Bambata Pai 15
15
Pa ga Mbori mozunga fu Abarama
1Fuo agi apai re, sangba Yekova ki ye koyo du Abarama ni rogo yuguyugupai yo, ki ya, “Abarama, ka mo gúnde nga ya, Mi nga ga vurakube; ga mosoro nikadu ni bakere he.” 2Abarama ki ya, “Ako Gbia MBORI, gini he mo ka fu fere, wa du mi ni irazangada, na gu ni nikadia kumbore ni nga Eriezere nga kina boro Damaseke?” 3Abarama ki ya, “Mo ngére, mo afu nga vungu fere te; were, kina gu ni i avungu ni ni kanga kpure yo, nikangia dikumbore.” 4Oni ngére, sangba Yekova ki ye koyo du ko ni, ki ya, “Gi kumba re adía nga kumboro te; ono kina gu ni mo ka vunga ni ni tiro, nikangia dikumboro.” 5Ko ki kuru na ko ku zegi yo ki ya fu ko, “Mo ngére ku ngbangbaturũ yo, ki gedi akerekuru, ka mo rengbe na geda ra.” Ko ki ya fu ko, “Kina wo ngbatungaro ka du.” 6Ko ki idi pa Yekova, Yekova ki gedi he fu ko ni rurupai.
7Yekova ki ya fu ko, “Mi nga Yekova naye na mo Ura yo nga ga aKasado ringara, ka fu gi ringara foro re ni gamo ringara.” 8Ko ki ya, “Ako Gbia MBORI, mi arúga tire na ni waĩ ya si adú ni gi ringara?” 9Ko ki ya, “Mo yé na paranga nabagara nga gu ru du garãru biata, na nameme du garãru biata, na bakandoro du garãru biata a, na mbipo, na paranga gbungu.” 10Ko aye na agi ahe re dunduko, ki kparaka rogo ra ni ba ue, ki moi katiri gu ru ku bani, na gu kura ha ku bani a, ono ka ko akparaka nga azire ni ba ue ya. 11Aranga ki ti ku auru akangbara, ono Abarama adandi ra ku sa yo.
12Ho uru ati ni, bakere rame ki tuka Abarama; were, gunde tikatika bitimo ki zi ko. 13Yekova ki ya fu Abarama, “Mo ini he ni rengo ya ngbatungaro adú ni kungba aboro rogo gu ringara adu nga ni gayo ya, i ki du ni akanga fu aboro gu ringara re, i ki rungosi yo agarã ki du 400; 14gu rikaaboro, i ka ra fu yo, mi asápa ngbanga yo asapa, fuo gure i ki guari yo na bakere ũkumuko. 15Mo tigamo, mo andú koyo du abamo ni zezeredi; ti digida gbanga ragoro i ki kpisidi ro. 16Ti rago biama rika ngbatungayo i ki karaga tiyo ku erẽ; bambiko ga aAmoro ingapai ata rengba nga dunduko te.”
17Si ki ta du wa gere ho uru ati ni bitimo ki ti, mo ngére, gbigiwi na bakere ngimihe na kĩkĩ nzinga si nisusi dagba agu akatiri ra re. 18Ni kina gu rago re Yekova ki ta fu mozunga fu Abarama, niya, “Mi afú gi ringara re fu ngbatungaro, tona ti gu di du Ezipeta yo ki da ti gu bakere di nga Ferata, 19nga ringara aKeno, na ga aKenezo, ga aKadamono, 20ga aEto, ga aPerezo, ga aRefo, 21ga aAmoro, ga aKanano, ga aGirigaso, na ga aYebuso a.”
Attualmente Selezionati:
Bambata Pai 15: ZB1978
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
La Sainte Bible en Zande © Alliance Biblique Universelle, 1978.
