Bambata Pai 14
14
Pa Batasa Abarama Roto
1Ni gu rago Amurafera adu ni bakindo Sinara, Arioka ki du ni bakindo Erasara, Kedoruraomera ki ngia bakindo Erama, Tidara ki ngia bakindo aGoi, 2agi abakindo re i ki so vura kuti Bera nangia bakindo Sodomo, gbiakuti Birasa nangia bakindo Amora, na Sinaba nangia bakindo Adema, na Semebere nangia bakindo Zeboima, na bakindo Bera (si nga Soara). 3Agi yo dunduko re adungura tiyo ku rogo Ngboongboorago Sidimi (si nga Baime Tikpo). 4I ara fu Kedoruraomera garã ki du 12, ti 13 garã i ki sa mungu kuti ko. 5Ti gu garã nangia 14 ha, Kedoruraomera ki ye na agu abakindo nadu na ko, ki di be aRefo Aseterota-karu-naima yo, na be Azuza Ama yo, na be aEme Save-kiriyatayima yo, 6na be aOri rogo gayo Bagangara nga Seira ki da ku Ereparana yo, du bangbanda ngbakungba yo; 7i ki yega ku Ene-misapata yo (si nga Kadesa) ki di be gu ringara dunduko nga ga aAmareko, na be aAmoro nanaraka Asasona-tamara yo. 8Bakindo Sodomo ki guari, na bakindo Amora, na bakindo Adema, na bakindo Zeboima, na bakindo Bera (si nga Soara) i ki tangara tiyo sa vura kuti agu yo ku rogo Ngboongboorago Sidimi, 9nga Kedoruraomera bakindo Erama, na Tidara bakindo aGoi, na Amurafera bakindo Sinara, na Arioka bakindo Erasara, nga abakindo biama kuti abakindo bisue. 10Were dungu adue dada adu rogo Ngboongboorago Sidimi. Abakindo Sodomo na Amora ki oro, ki tiwi ku rogo ho, akura yo ki oro ku bagangara yo. 11Avurayo ki gbu ahe dunduko nangia ga aSodomo na ga aAmoro, na gayo ariahe dunduko, ki ga na ni; 12i ki zi Roto, nangia wiri tame Abarama, nanaraka Sodomo yo, na gako ahe, ki ga.
13Gu ni sa nabati ki ye ka gumba ha fu Abarama, nangia Ebere, wa ko araka pati agu agero nangia ga Mamare nangia boro Amora, wirina Esokore na Anera; agi yo re amangi mokido dagba yo na Abarama. 14Ho Abarama agi he ni ya i zi wirinako, ko ki ngbe ku mbata yo fu gako aborovura, nga agu yo i avungu yo kpuko yo, i adu wa aboro 318, i ki do fuo yo ki da ku Dana yo. 15Ko ki kparaka gako aboro yuru kuti yo, ko na avuruko, i ki mangi yo ki dandi yo ki da Oba yo, nga gu du pavuru Damaseke ku nodiyo. 16Ko ki yega na ahe dunduko, ki yega na wirinako nangia Roto a, na gako ahe, na ade na aboro a.
Pa fu Marekesedeke maku fu Abarama
17Fuo yega ko pati imo Kedoruraomera na agu abakindo naadu na ko, bakindo Sodomo ki kuru ka gbia ko, rogo Ngboongboorago Save, (si nga ga Bakindo Ngboongboorago). 18Marekesedeke nangia bakindo Sarema ki ye na riahe na imekakue; ko adu ni boromotumo fu Mbori nga Bahe ki susi. 19Ko ki ta fu maku fu Abarama niya,
“Maku dú fu Abarama be Mbori nga Bahe ki susi,
nga baira ngbangbaturũ na kpotosende;
20tambuahe dú fu Mbori nga Bahe ki susi,
nga gu ko nafu avuraro dunduko ku be ro!”
Abarama ki fu sa dagba bawe fu ko rogo ahe dunduko. 21Bakindo Sodomo ki ya fu Abarama “Mo fú aboro fere, mo ki rogo ahe ni gamo.” 22Abarama ki ya fu bakindo Sodomo, “Mi azunga he nitumba bere koyo du Yekova ni nga Mbori nga Bahe ki susi, nga baira ngbangbaturũ na kpotosende, 23ya mi adía nga watadu toni wiri gire na giri rakata te, mi adía nga gu he nga gamo wa sa te, mo ka ya, ‘Mi nakumukosi Abarama’, 24kina gu aparanga ari he, na gu bete gbugbuahe nga ga agu aboro ani andu na yo; nga Anera na Esekore na Mamare, i rógo gu bete gbugbuahe ni gayo.”
Attualmente Selezionati:
Bambata Pai 14: ZB1978
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
La Sainte Bible en Zande © Alliance Biblique Universelle, 1978.
