Bambata Pai 13
13
Pa kpara Abarama ti Roto
1Abarama ki guari Ezipeta yo, i na diako, na agu ahe dunduko nadu be ko, na Roto fuo ko a. I ki ndu ku Negebe yo.
2Abarama akumuko gbe na zogozogo anya, na feda, na dahabu. 3Ko ki guari Negebe yo ki nindu gako anduge kindi ki da ku Betere yo, yo gako bamburoko adu ni mbata, dagba Betere na Ai, 4ki da ti gu ba ho bamotumo adu ni, nga gu ko adua ha yo mbata. Abarama ki kpari yo ti rimo Yekova. 5Roto nangia gu ko naandu a na Abarama, ko ki du na rimbasa akandoro na rimbasa abagara, na abamburoko be ko a. 6Ka rago arengba nga na yo wa ka i mongo sungu kina ku ho sa ya; bambiko gayo ũkumuko akii gbe, ka si adu nga wa ka i mongo sungu kina sa ya. 7Kpata ki du dagba ga aAbarama ababanda anya na ga Roto yo. Ni gu rago re aKanano naaraka rogo gu ringara re na aPerezo.
8Abarama ki ya fu Roto, “Mi nazungadi ro, ka kpata dú nga dagba rani na mo, na dagba gimi ababanda anya na gamo yo a ya; wa du kina awirina nga ani. 9A nga rago dunduko du bara bangiro te re? Mi nazungadi ro, mo kpára ti re. Ka mo di gu du ku garebe yo, mi ki di gu du ku kumbabe yo; watadu ka mo di gu du ku kumbabe yo, mi ki di gu du ku garebe yo.” 10Roto ki tuka bangiriko, ki bi gu kpasakpasa rago du pangba di Yaradene dunduko. Aime adu yo wenengaĩ rogo arago dunduko. Si adu wa kina ga Yekova ati, wa kina ringara Ezipeta a, wa ka boro ndu ku Soara yo; si adu wo mbata fu gbarasa Yekova Sodomo na Amora. 11Si du Roto asia gu kpasakpasa rago nadu pangba Yaradene ti ni ni gako dunduko. Roto ki nindu ku uroyo. I ki kparaka, gu ni ku bani gu ni ku bani. 12Abarama ki sungu rogo ringara Kanana, Roto ki sungu rogo agu abaakporo naadu rogo kpasakpasa rago, ki gbisi gako bamburoko mbembedi ku Sodomo yo. 13Ono aboro Sodomo adu ni gbigbita yo, ni aboro ingapai kuti Yekova ki susi.
14Fuo kparaka yo na Roto, Yekova ki ya fu Abarama, “Mo túka nga bangiro rogo gu ba ru mo rogo ho, ki ngere nga ku nodiyo, na ku sudiyo, na ku uroyo, na ku dioyo a; 15bambiko gu ringara bi mo ho re dunduko, mi afú he foro na fu ngbatungaro kindi. 16Mi ki fu ngbatungaro wa kina nvutu sende; ka i rengbe na geda nvutu sende, i arengba na geda ngbatungaro a. 17Mo gúari, ki ndu rogo bagiza gi ringara re, na rogo bakiaha, bambiko mi afú he foro.” 18Abarama ki gbisi gako bamburoko, ki ye ki sungu pati agu agero nangia ga Mamare, du Eburone yo; ko ki dua bamotumo yo fu Yekova.
Attualmente Selezionati:
Bambata Pai 13: ZB1978
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
La Sainte Bible en Zande © Alliance Biblique Universelle, 1978.
