OKHUCHIAKA 21

Okhwibulwa khwa Isaka

1OMWAMI yalaamila Sara ikhabi, singa obwa yali niyalaka, 2ma nabelekha ne niyebul'la Aburahamu omwana omusiani olwa yali nali omusakhulu. Omusiani uyo yebulwa munyinga ya Nyasaye yaboola yakhebul'lwemwo.#Heb. 11:11 3Aburahamu namukulikha Isaka. 4Olwa Isaka yali namatukhu munane, Aburahamu yamuseba singa obwa Nyasaye yali niyamulaka:#Okhuch. 17:12; Ebikh. 7:8 5Aburahamu yali nende emihika emia ndala olwa Isaka yebulwa. 6Sara naboola, “Nyasaye umbeye obusangali nende okhutsekha. Buli mundu ohul'lakhwo, alatsekhe n'nase.” 7Ma nameeta okhuboola mbu, “Niwina owakhabooleye Aburahamu mbu Sara yakhanuniekhwo abaana? Ne kata mbwo mwibuliye omwana omusiani mumatukhu kobusakhulu bubwe.”

8Omwana nakhula ne khwitukhu liayalesibwa amabeele Aburahamu yalomba lisabo likali okhusila.

Hagari nende Ishimaeli bakhungwa

9Litukhu lindi Ishimaeli, omwana wa Hagari Omumisiri yebul'la Aburahamu yali nasinanga nende Isaka omwana wa Sara. 10Sara nabalola ne nabool'la Aburahamu, “Okhuunge omusumba mukhasi uyu nende omwanawe, barule hano. Omwana womusumba womukhasi uno arakhanyoolakhwo omukabwa kwobuhinda bubwo obwomwana wanje Isaka yakhalamilwe tawe.”#Gal. 4:29-30 11Kano kanyasia Aburahamu okhusila, sichila Ishimaeli khandi yali omwanawe. 12Nebutswa Nyasaye yabool'la Aburahamu, “Orahenda omwoyo khulwomusianiwo nende omusumbawo omukhasi, Hagari tawe. Okhole kosi aka Sara akhubool'la okhukhola sichila tsinzibulo tsitsio tsiandakhulaka tsiakharul'le mu Isaka.#Rom. 9:7; Heb. 11:18 13Khandi ndakhahelesie omwana womusumbawo omukhasi abaana abenji ma balabe olwibulo olwinji sichila ye khandi no mwanawo.”

14M'mabwebwe omukamba kwalondakhwo, Aburahamu yahelesia Hagari ebiakhulia nende esimuka esilimwo amaatsi. Namureela ebindu yibio khumukongo ma namusebula halala nomusianiwe. Hagari natsia natiimatiima musitsiimi sia Berisheba. 15Olwa amaatsi kosi kali nikahweye musimuka yebala omwana musitsakha 16natsia niyekhala etsimiita emia ndala okhurula khuye, naboola, “Sinyenya ndole obwomwana wanje afwa tawe.” Ne olwa yali niyekhayeho omwana#21:16 Omwana Mumahandiko kandi kakhale ni Hagari. nachaaka okhulakaya butinyu.

17Nyasaye yahul'la omwana nalakayanga, ne om'malaika wa Nyasaye nal'loma khu Hagari okhurula mwikulu naboola mbu, “Nisina esikhunyasianga Hagari? Oraria tawe. Nyasaye uhuliye omusianiwo nalakayanga. 18Sinjila, tsia obukule omwana, omuhombelesie. Ndakhakhole olwibulo lulwe okhuba oluyia olukhongo.” 19Ma Nyasaye niyekula tsimoni tsia Hagari ne nalola esitaho esiamaatsi. Yatsia niyetsusia amaatsi musimukasie, ma nahil'lakhwo omwana. 20Nyasaye yali nende omwana uyo, ma nakhula namenya musitsiimi sia Parani ne naba omusitsa wokhuyiitsa nobuyingo. 21Nyina namunyool'la omukhasi okhurula musibala sie Misiri.

Indakano hakari wa Aburahamu nende Abimeleki

22Olwene yilwo Abimeleki batsia nende Fikoli, omukhongo wabasikari belihelie, nibabool'la Aburahamu, “Nyasaye ali n'nawe mukosi akokholanga.#Okhuch. 26:26 23Kho wesuhile hano imbeli wa Nyasaye mbu siwakhangaatekhwo nohomba abaana banje, nohomba abolwibulo lwanje tawe. Ise ndi omusubilwa khuibe kho nawe undesuhile mbu nobe omusubilwa khu ise nende esibala siomenyelemwo sino.”

24Aburahamu naboola, “Khusubisinjia.”

25Aburahamu namwekan'na Abimeleki khumang'ana kesitaho esiabatiyi babe bali nibamunuul'le. 26Abimeleki naboola, “Simanyile niwina okhol'le akene yaka tawe. Siwaimbooleyekhwo tawe, ne luno nilwo olwokhuranga okhukahul'lakhwo.” 27Ma Aburahamu nabukula amakondi nende tsing'ombe nahelesia Abimeleki, ma bombi nibalomba indakano. 28Aburahamu niyahula ebimeme bine nabitaru okhurula musiayo sisie, 29ne Abimeleki namureeba, “Okhol'lembwo khulwasina?”

30Aburahamu nakalusia, “Huchil'la obukule ebimeme bine nabitaru bino bibe esimanyilo mbu nise owayaba esitaho yisi.” 31Khulwa akene yako habundu yaho hakulikhwa eliira mbu Berisheba, sichila niho aha bombi babili bali okhwesuhila.

32Olwabali nibamal'le okhulombela indakano ha Berisheba, Abimeleki nende Fikoli nibarula nibatsia musibala sia Filisiti. 33Ma Aburahamu naraaka omusaala kwesikomooli mu Berisheba ma niyekayakaya OMWAMI, Nyasaye weinziayo. 34Aburahamu yamenya musibala sia Filisiti oluhono olurambi.

Attualmente Selezionati:

OKHUCHIAKA 21: EBAIBO

Evidenziazioni

Copia