OKHUCHIAKA 20
20
Aburahamu nende Abimeleki
1Aburahamu yarula Mamure natsia musibala sia Negebu ma namenya hakari wa Kadeshi nende Shuri. Olunyuma, olwayali namenyele Gerari, 2yaboola mbu omukhasiwe Sara nimbotsowe. Khe Omuruchi Abimeleki wa Gerari nalaka mbu Sara ahilwe khuye.#Okhuch. 12:13; 26:7 3Mubutukhu Nyasaye yetsela Abimeleki mwilooro naboola, “Ibe nofwe, sichila ubukuuye omukhasi uyu, ouli omukhasi wabene.”
4Nebutswa Abimeleki yali nasili okhuba nende Sara naboola, “Omwami, mbula esikha siosi tawe! Olanzira ise nende abandu banje noho? 5Aburahamu mwene abooye mbu Sara nomukhaana wabwe, khandi Sara mwene naboola mbwo. Ndakhol'le kano munjila yesilongoole, ma sindikhwo nende esikha siosi tawe.”
6Nyasaye namubool'la mwilooro mbu, “Yee, manyile okholeye yaka munjila yesilongoole, niko akachil'le nikhwikal'la okhukhol'la tsimbi, ma simbuchiliye otiilekhwo khumukhasi uyo tawe. 7Ne luno kalusia omukhasi uyo khumusaatsawe. Okhuba nomuroobi, ne yetsa okhukhusaayila, khe obule okhufwa. Nebutswa nobula okhukalusia, khulakanga mbu nofwe, ibe nende abandu baabo bosi.”
8M'mabwebwe omukamba okwalondakhwo Abimeleki yalanga abemelibe bosi ma nababool'la akali nikekholekhele, ne bosi baria okhusila. 9Ma Abimeleki nalanga Aburahamu namureeba, “Nisina esiokhukholeye yisi? Ndakhukholeye abubi sina obuchil'le niwenya okhuleera olubi khuise nende obwami bwanje? Omundu wosi siyenyekhanga akholekhwo akokhol'le kano tawe. 10Busina nokhola mbwo?”
11Aburahamu nakalusia, “Ndapaal'lenje mbu omundu salikhwo hano omuhetsanga Nyasaye oluyali tawe ma nimbaara mbu mwakhanzira kho mubukule omukhasi wanje. 12Ne tooto nomukhaana wefwe, sichila no mwana wa Papa wanje, owa Mama wanje undi, ne ndamuteesia nomukhasi wanje. 13Khe olwa Nyasaye yaimbinisie munyumba ya Papa niyandeera musibala siebucheni, ne nimbool'la omukhasi wanje mbu, ‘Nobool'lenje buli mundu mbu ndi mbootsowo khulwokhukhumanyia mbu waimbul'la.’ ”
14Abimeleki yamala nakalusia Sara khu Aburahamu, ma khandi namuhelesia amakondi nende tsing'ombe nende abakholi. 15Nabool'la Aburahamu, “Esibala sianje siosi siesino, omenyekhwo aha wenyele.” 16Ne nabool'la Sara, “Mbetsanga omusiani wenywe ebitonye biefetsa ebihela elefu ndala singa esimanyisio khubosi abamuli n'nabo mbu soli nes'sikha tawe. Buli mundu namanye mbu sokhol'lekhwo abubi bwosi tawe.”
17Ma Aburahamu nasaaya Nyasaye, ne Nyasaye nahonia Abimeleki nende omukhasiwe, nende abakholibe abakhasi kho babe abanyala okhwibula abaana. 18Sichila OMWAMI yali niyabekala tsimbelekhelo abomwitaala lia Abimeleki bosi khulwa akali nikekhol'le khu Sara omukhasi wa Aburahamu.
Attualmente Selezionati:
OKHUCHIAKA 20: EBAIBO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©Bible Society of Kenya, 2019
