Yohana 5

UYeesu iiponia umuunu umulema

1Gaganile kishila ago, uYeesu wáaluta ku lijumbi lya Yelusalemu, ku shiwungo sha Vayahuudi. 2Ilijumbi ilyo, likhandi lina shikwilo ishikhome shina shikhandi shitambulwa “Shikwilo sha Nkholo.”#5:2 Shikwilo sha Nkholo: Kukhandi kuna shikwilo nu munaada guna vakhandi vigusisa inkholo ni nkhanu isinji isa kihumya ishadanda. Yimba mu litaafili lya Nehemiya 3:1; 12:39. Nkholeela ni shikwilo isho, kukhandi kuna lilamba lina likhandi litambulwa kwa Shihebulaniya Betisayida. Kukhandi kuna fitala fisaanu, fina fikhandi ni nsimbili. Ifitala ifyo fikhandi filipiliime ililamba ilyo. 3Mu mamepo ga fitala fyona fila, vakhandi viigona avatamu vinshi, avapofu, avalema na vina vatengelemwishe. [Vakhandi vihepelesa amalenga gatiijwe, 4kwa kiiva umalayikha wa Mutwa uNguluvi akhandi iyinsa kigatiigula amalenga mu lilamba lila, umutamu uwa wutasi kiyinjila akhandi iipona uwutamu waakwe wuna akhandi nawo.]#5:4 Amaswi aga, gakusiina mu mayandikhwa agamonga amakuulu. 5Pa lilamba lila, akhandi akwali umugoosi yumonga yuna akhandi mutamu maakha mashumi gatatu na munaana. 6Baheene uYeesu wámwaga agonile pala. Hata nda uYeesu akhandi ameenye kiija umuunu yula wáali mutamu kwa nsiku nyinshi, wámuposiise wáaja, “Wuli, owe wisakula kiponisiwa?” 7Umutamu yula wámugomosesa uYeesu wáaja, “Eena mutwa, kusiina umuunu uwa kiniyinjisa mu lilamba ilikhome pina amalenga gitiigwa. One pina nisakula kiyinjila, umuunu uyunji ilongola kiyinjila.” 8Baheene uYeesu wámujovela umutamu yula wáaja, “Yiima, yitwikha umushekha gwakho, ulutaje.” 9Baaho, umuunu yula wáapona uwutamu waakwe, wásumula umushekha gwakwe wáyansa kijenda jenda bahala.

UYeesu wámuponiaga umuunu uyo, mu lijuva lya Sabaato.#5:9 Sabaato: Yimba iliswi ili mu Maswi aMahensa. 10Lino avakhome va Vayahuudi vamujovela umuunu yula yuna uYeesu wámuponiaga vaajova, “Iminsiyaano lijuva lya Sabaato, indaji sisikikutawula kisumula umushekha gwakho.” 11Leelo umuunu yula wávagomosesa wáaja, “Umuunu yuna wániponia wánijovela kiija niyitwishe umushekha gwangu nilutaje.” 12Baheene avakhome vala vamuposa vaajova, “Wuli, yu naani yuna wákujova ugahaje ndeeno?” 13Leelo umuunu yula asikhandi amumeenye yuna wámuponiaga, kwa kiiva uYeesu akhandi shi awuushile pa shipuga shila isha vaanu, vina vakhandi pala.

14Gaganile kishila ago, mu lisiku lilila, uYeesu wámwaga umuunu yula mu lukeeke ulwa nanda imbaagule iya kifuunyila, wámupavila wáaja, “Puliisa, iminsiyaano waapona. Usikhawuyiilaga kigaha uwunansi khanji, kwa kiiva nda ukiyitenekha kigaha uwunansi, usiilave mandu kishila uluhaavi luna ukhandi wiilava ulwamwandi.” 15Baaho umuunu yula wámulekha uYeesu, wáatina kivajovela avakhome va Vayahuudi kiija, yu Yeesu yuna wámuponia. 16Baheene avakhome va Vayahuudi vayansa kimulafya uYeesu, kwa kiiva akhandi ikivaponia avaanu mu lijuva lya Sabaato.

Avaanu viipata uwuumi kishilila uLusawo lwa Nguluvi

17Leelo uYeesu wávajovela wáaja, “UDaada wangu isenga insengo wiila, asituuya. Ino, na yuune nisenga insengo nisituuya.” 18Kwa kiiva ya ilyo, avakhome va Vayahuudi vayansa kisakula insila ya kimubuda uYeesu. Vagahaga ndeeno, kwa kiiva lusikhandi lujowo luulo hela ulwa kilekha kiyinatila iSabaato, leelo kwa kiiva akhandi iijova kiija, uNguluvi yu Daada waakwe. Kwa nsila iyo akhandi ikiyiwona kiija ali ngaja shina ashwali uNguluvi.

19UYeesu wávajovela avakhome vala wáaja, “Shiyooli nikivajovela, one Lusawo lwakwe, nisikwiliile kigaha lyolyona kwa wutawulilwa wangu. One niigaha gina nikimwaga uDaada wangu iigaha. Khanji goona gina uDaada iigaha, gageene gina na yuune Lusawo lwakwe, nikigagaha. 20UDaada anigeene one, lulwene ikiniwonensa goona gina ikigasenga umwene, khanji asiniwonense shina niigaha amabikha amakhome kishila aga, baheene musiswije mandu. 21Ngaja shina uDaada ikivafyusa avaanu na kivapeela uwuumi wa shiluta, shiisho ndeeno na yuune nikwiliile kivapeela uwuumi, avaanu vina nigeene kivapeela. 22Khanji uDaada asikimuhiga umuunu yoyoona, leelo anipeelile one uwutawulilwa uwa kivahiga avaanu woona. 23Kwa nsila iyo, avaanu woona vasinitiile ngaja shina vikimutiila uDaada. Umuunu yoyoona yuna asikinitiila one Lusawo lwakwe, iiva asikimutiila uDaada yuna anifiliishe.

24“Shiyooli nikivajovela, avaanu woona vina vikigapulikha amaswi gangu na kimuhuviilila uNguluvi yuna anifiliishe, awo vanawo uwuumi wa shiluta. Vasikhahigwa kwa wunansi waanave, leelo vakulusiiwe kihuma mu mfwa na kiyinjisiwa mu wuumi wa shiluta. 25Shiyooli nikivajovela, uluhaavi luyinsa khanji shi lwafikha, luna avaanu vina vafwile vakhapulikha amaswi gina one Lusawo lwa Nguluvi nilogola. Baheene vina vakhava vipulikha, vakhapata uwuumi wa shiluta. 26Ngaja uDaada shina ana ngufu iya kimupeela umuunu uwuumi wa shiluta, shiisho ndeeno na yuune Lusawo lwakwe, anipeelile ingufu iya kivapeela avaanu uwuumi wa shiluta. 27Khanji anipeelile uwutawulilwa uwa kivahiga avaanu, kwa kiiva one yuune Lusawo lwa Muunu. 28Musikhaswigaji! Lukhayinsa uluhaavi luna avaanu woona vina vafwile vakhanipulikha pina nikivashemeela, 29woope vakhafyukha. Avaanu vina vakhandi viigaha amanofu, vakhapeelwa uwuumi wa shiluta, leelo vina vakhandi viigaha amavi, vakhahigwa.”

Avalunjikhaaji va Yeesu

30UYeesu wáyitenekha kilogola wáaja, “Kusiina ishiinu shoshoona shina nikwiliile kigaha kwa wutawulilwa wangu. Nikivahiga avaanu ngaja uDaada shina ikinijovela. Kwa kiiva ya ilyo, uwuhigo wangu wa shiyooli, kiiva nisiigaha gina nigeene one, leelo niigaha gina ageene uNguluvi yuna anifiliishe. 31Nda nikiyibedela yuune, uwubedelo wangu wusikwiliile kiyiitikhwa kiija wa shiyooli. 32Leelo, woope uDaada ikisibedela imola sangu kunyeenyu, na yuune nimeenye kiija goona gina ikigalogola aga kunyangu, ga shiyooli. 33Omwe mwavafilikhaga avanandeje#5:33 Avanandeje: Yimba iliswi Mwanandeje mu Maswi aMahensa. kwa Yohana uMutwiniaji, woope wánibedelaga aga shiyooli kunyeenyu. 34One nisihuviilila gina avaanu vikinibedela, leelo nikivajovela ago goona, kiija mukulusiwe. 35UYohana uMutwiniaji wáwonensa ishiyooli kunyeenyu, ngaja lumuli luna luveekha na kimulikha mu nshiisi. Omwe mwashendevelaga uwuvalafu uwo, kwa luhaavi lufupi.

36“Leelo nina goope gina gikinibedela mandu, gashilile gina uYohana akhandi ikinibedela. Kwa kiiva insengo sina uDaada uNguluvi wánipeelaga kiija nive nisenga, siseene sina sikinibedela, kiija uDaada uNguluvi yumwene yuna wánifilikhaga. 37Woope uDaada yuna wánifilikha one, wánibedela kunyeenyu. Omwe musinapulikhaje hata gwalimo ishawuti yaakwe, khanji musinamwagaje hata gwalimo, shina ashwali. 38Mwikhaana kigaviikha amaswi ga Nguluvi mu numbula seenyu kwa kiiva musikinihuviilila one yuna uNguluvi anifiliishe kunyeenyu. 39Mwijimba mandu kiyimba aMayandikhwa aManofu, kwa kiiva muhiiva kiija umo mukwiliile kiwupata uwuumi wa shiluta. Shiyooli ago gikinibedela one, 40leelo omwe mwikhaana kiyinsa kunyangu, kiija muwupate uwuumi wa shiluta.

41“Ulugulumilo lwangu lusili kiija avaanu vanitupishe. 42Ndaali, kwa kiiva nivameenye omwe shina mushwali, kiija musimugeene uNguluvi mu numbula seenyu. 43One nayinsa kwa wutawulilwa wa Daada, leelo mwikhaana kiniposheela. Nda umuunu uyunji iyinsa kwa wutawulilwa waakwe mwene duguli, musimuhuviilile na kimuposheela. 44Mwidobokha kitupikhwa na vayeenyu, leelo musisakula ilishima kihuma kwa mwene uNguluvi. Lino, mukwiliile wuli kinihuviilila one?

45“Musikhahiivaji kiija one nisivasitaashe kwa Daada, ndaali! UMusa yuna mumuhuviliile, yumwene yuna akhavasitaakha. 46Shiyooli nda mukhandi mukigahuviilila amaswi gina wáyandikhaga uMusa, mwali mukwiliile kinihuviilila na yuune, kwa kiiva uMusa wáyandikhaga imola sangu. 47Leelo, musikigahuviilila amaswi gina wágayandikhaga uMusa, lino mukwiliile wuli kigahuviilila amaswi gangu?”

Attualmente Selezionati:

Yohana 5: Shisangu

Evidenziazioni

Copia