Yohana 6

UYeesu ikivaliisa avaanu magana mashumi gasaanu (5,000)

(Mataayo 14:13-21; Maluko 6:30-44; Luuka 9:10-17)

1Gaganile kishila ago, uYeesu wáaluta kunyiikho ya nyi, wálowokha ililamba ilikhome lya Galilaya, ilitaawa ilinji litambulwa Tibeliya. 2Ililugu ilikhome lya vaanu vamufwata uYeesu, kiiva vakhandi vikigaaga amabikha aga kivaponia avatamu. 3Baheene uYeesu na vamanyisiwa vaakwe vataana ku shidunda shimonga, vaakhala lumo. 4Uluhaavi ulo, ishiwungo sha Vayahuudi isha Pasaakha shikhandi nkholeela.

5UYeesu wáloleela, wáshaaga ishipuga shikhome sha vaanu shina shikhandi shiiluta kunyaakwe. Baheene wámuposa uFilipo wáaja, “Wuli, tikwiliile kigula kwi ishakiilya isha kivaliisa avaanu woona ava?” 6UYeesu wámuposaaga uFilipo ndeeno kwa kimujela, kwa kiiva akhandi ameenye shina hambi iigaha. 7UFilipo wámugomosesa wáaja, “Hata nda tive tisakula kipata ishakiilya, ihela isa mahombo ga nsiku magana gavili (200)#6:7 Ihela isa mahombo ga nsiku magana gavili (200): Kwa Shiyunaani yiyandiikhwe, dinaali magana gavili (200). sisikwila, hata nda shila muunu apate shidoodo.” 8Baheene uAndeleya, yuna akhandi mumanyisiwa yunji, khanji lukholo lwakwe uSimoni Petulo, wámugomosesa uYeesu wáaja, 9“Wee Mutwa, kuna mudiimi yumonga apa, ana makhaate gasaanu aga shayili ni nswi sivili. Leelo ishakiilya ishi, shisikwilane wuli ililugu lya vaanu woona ava?”

10Baheene uYeesu wávalajisa avamanyisiwa vaakwe wáaja, “Vajoveli avaanu vakhale pansi.” Uluvala lula lukhandi luna masoli minshi, ndeeno avaanu woona vaakhala pansi. Mu shipuga shila, mukhandi muna vagoosi magana mashumi gasaanu (5,000). 11UYeesu wátoola amakhaate gala, wámufuunya uNguluvi, wágamenyulania, wávagavila avaanu woona vina vakhandi pala. Wáagaha shiisho nasi nswi sila, shila muunu wáapata shina akhandi isakula.

12Avaanu woona vaganaga kiilya na kiyikuta, uYeesu wávajovela avamanyisiwa vaakwe wáaja, “Mukungaanie amakhaate amamenyulanie gina masigase, kiija gasilaave gananjishe.” 13Ndeeno, vakunganiaga amakhaate aga shayili gina gasigeele, vaamemya matunduti ishumi na gavili. 14Avaanu vala pina vashaajile ishimanyilo shila shina wágahaga uYeesu, valogwele vaajova, “Shiyooli umuunu uyu, mukuvamalago wa Nguluvi, yuna tikhandi tihuviilila kiija, akhayinsa mu nyi muno.”#6:14 Yimba mu litaafili lya Luuju lwa Ndaji 18:15-19. 15UYeesu wáamanya kiija avaanu vala visakula kimukhata na kimutemya kwa ngufu ave mutwa waanave. Leelo umwene wáwuukha, wáaluta mwene duguli ku shidunda.

UYeesu ijenda pashaanya pa malenga

(Mataayo 14:22-33; Maluko 6:45-52)

16Uluhaavi lwa shinyiijuva, avamanyisiwa va Yeesu vasulunukha kiluta ku lilamba lya Galilaya. 17Vayinjila mu shipugo vayansa kilowokha kiluta ku lijumbi lya Kapelinawumu. Uluhaavi ulo kukhandi kuna nshiisi, leelo uYeesu akhandi asinavafishe na kiiva lumo nawo.

18Baaho ilipepo ilinya ngufu mandu lyakutukha, ililamba ilikhome lyashafukha. 19Avamanyisiwa va Yeesu pina vikholojela ishipugo, vajendile ngaja kilomiita sisaanu awu mutanda ndeeni, vamwaga umuunu ijenda pashaanya pa malenga, ivejeela pa shipugo shaanave, baheene vatiila mandu. 20Leelo uYeesu wávajovela wáaja, “Yuune, musikhatiilaji!” 21Ino, aveene vakhandi visakula kiija ayinjile mu shipugo shaanave. Baaho ishipugo shaafikha ku mwambwa kuna vakhandi viiluta.

UYeesu mukhaate guna gukivapeela avaanu uwuumi

22Pamulaawu njine, ishipuga sha vaanu vina vakhandi vasigeele ku mwambwa yila iya lilamba ilikhome, vaamanya kiija kukhandi kuna shipugo shimo hela pala. Khanji vaamanya kiija uYeesu asikhalutile shipugo shimo na vamanyisiwa vaakwe, leelo avamanyisiwa vaakwe valutaga veene duguli. 23Avaanu avanji vayinsa ni fipugo ifinji kihuma ku Tibeliya, vaafikha uluvala luna ishipuga sha vaanu pina valiisaga amakhaate, pina uYeesu wáganaga kimufuunya uNguluvi. 24Baheene ishipuga sha vaanu vala, vaganaga kimanya kiija uYeesu na vamanyisiwa vaakwe vakwasiina, vayinjila mu shipugo shila, vaaluta ku Kapelinawumu kimusakula uYeesu.

25Avaanu vala pina vafikhaga ku mwambwa ya lilamba ilikhome, vamwaga vamuposa vaajova, “Wee Mumanyisaaji, wayinsa yooli kuno?” 26UYeesu wávagomosesa wáaja, “Shiyooli nikivajovela, nimeenye kiija musikinisakula kwa kiiva ya kishimanya ishimanyilo shina nagahaga, leelo mukinisakula kwa kiiva navapeelaga amakhaate, gina mwaliisaga na kiyikuta. 27Musikhasengaji insengo kwa kiiva ya kipata ifyakiilya fina finanjikha, leelo musengaje kwa kiiva ya fyakiilya fina fisinanjikha shiluta. One Lusawo lwa Muunu nikivapeela avaanu ifyakiilya ifyo, kwa kiiva uDaada uNguluvi anibagwile kwa kiiva ya kisenga ago.”

28Baheene aveene vamuposa vaajova, “Wuli, tigahe shishi baheene tisenje insengo sina uNguluvi isakula?” 29UYeesu wávagomosesa wáaja, “Insengo yina uNguluvi isakula muyisenje yiyeene iyi, kinihuviilila one yuna nifiliikhwe nu mwene.” 30Vamuposa vaajova, “Wuli, usiigahe shimanyilo shishi kiija tishaaje na kihuviilila? Usisenje nsengo nshi? 31Avambuyeesu valiisaga imana#6:31 Imana: Ishi shikhandi shakiilya shina uNguluvi wávapeelaga aVaisilaheli pina vakhandi mu luvanda. Yimba mu litaafili lya Kihuma 16:31-34. pina vaali mu lunyikha, ngaja shina yiyandiikhwe mu Mayandikhwa aManofu kiija, ‘Akhavapeelile ishakiilya isha kihuma kushaanya.’#6:31 Yimba mu litaafili lya Sabuli 78:24.” 32UYeesu wávajovela wáaja, “Shiyooli nikivajovela, asili yu Musa yuna wávapeelaga avambuyeenyu ifyakiilya fila, leelo yu Daada uNguluvi. Lino ikivapeela omwe ifyakiilya ifya shiyooli kihuma kushaanya. 33Ifyakiilya fya Nguluvi, yumwene yula yuna iyiikha kihuma kushaanya, baheene avapeele avaanu woona ava mu nyi soona uwuumi wa shiluta.” 34Baheene vamugomosesa vaajova, “Wee mutwa, tilomba uve ukitupeela wiila, ifyakiilya ifi.” 35UYeesu wávagomosesa wáaja, “One yuune shakiilya shina shikivapeela avaanu uwuumi. Umuunu yoyoona yuna iyinsa kunyangu na kinihuviilila, asikhava ni njala wala kikhawukha, hata gwalimo.

UYeesu isenga gina adobweshe uDaada uNguluvi

36“Leelo one nikivajova kiija hata nda mwanyaaga, mushaanali musipikinihuviilila. 37Avaanu woona vina uDaada ikinipeela, viyinsa kunyangu na kinihuviilila. Khanji one nisikimukhaana hata yumo yuna iyinsa kunyangu. 38Kiiva ya ilyo, one nayinsaga kihuma kwa Nguluvi, kiija nisengaje gina ageene uDaada yuna wánifilikhaga. Nisiyinsile kigaha gina nigeene yuune. 39UNguluvi yuna anifiliishe, ageene kiija, nisilaave nimuyase hata yumo mu vala vina anipeelile, leelo nivafyuse woona mu lisiku ilya kihigwa inyi. 40Kiiva uNguluvi yuna anifiliishe, ageene kiija, shila muunu yuna iimanya kiija one nili Lusawo lwakwe na kinihuviilila, asiwupate uwuumi wa shiluta. One nikhayinsa kimufyusa mu lisiku ilya kihigwa inyi.”

41Baheene aVayahuudi vayansa kingʼuula kwa kiiva uYeesu wáyijovaga mwene kiija, “One yuune shakiilya shina uNguluvi wáshiyisaaga kihuma kwa Nguluvi.” 42Vaposania vaajova, “Wuli, umuunu uyu asili yu Yeesu, umuswamuve wa Yusufu, yuna tivameenye avasafi vaakwe woona? Lino akwiliile wuli kilogola kiija, wáyiikha kihuma kwa Nguluvi?” 43UYeesu wávagomosesa wáaja, “Musikhangʼulilanaji yuumwe kwa yuumwe. 44Kusiina umuunu yuna akwiliile kiyinsa kunyangu, nda uDaada yuna anifiliishe, asimulongwese. Na yuune nikhayinsa kimufyusa mu lisiku ilya kihigwa inyi. 45Umukuwamalago yumonga wáyandikhaga mu Mayandikhwa aManofu kiija, ‘UNguluvi akhavamanyisa avaanu woona.’#6:45 Yimba mu litaafili lya Isaaya 54:13. Lino umuunu yoyoona yuna ipuliisa na kiyimanyisa kihuma kwa Daada, uyo iyinsa kunyangu. 46Nisiijova kiija, akwali umuunu yuna amwajile uDaada uNguluvi. Leelo yuune duguli yuna nimwajile, kwa kiiva nihumile kunyaakwe.

Ishakiilya shina shileeta uwuumi wa shiluta

47“Shiyooli nikivajovela, umuunu yoyoona yuna ikinihuviilila one, ana wuumi wa shiluta. 48One yuune shakiilya, shina shikivapeela avaanu uwuumi wa shiluta. 49Hata nda yive avambuyeenyu valiisaga imana ku lunyikha, leelo vafwisaga. 50Lino apa, shikwali ishakiilya shina shihumile kwa Nguluvi. Umuunu nda alye ishakiilya isho, asiifwa kaa. 51One yuune shakiilya shina shihumile kwa Nguluvi, shina shikivapeela avaanu uwuumi. Umuunu yoyoona yuna iilya ishakiilya ishi, iipata uwuumi wa shiluta. Ishakiilya ishi, muvili gwangu, guna nisiguhumye kwa vaanu woona, kiija vapate uwuumi wa shiluta.”

52Lino aVayahuudi vayansa kikhaanania na kiposania viijova, “Umuunu uyu akwiliile wuli kitupeela umuvili gwakwe, kiija tilye?” 53Leelo uYeesu wávajovela wáaja, “Shiyooli nikivajovela, nda musiilya umuvili gwangu, na kiingʼwa idanda yangu one Lusawo lwa Muunu, musiiva nu wuumi wa shiluta. 54Umuunu yoyoona yuna iilya umuvili gwangu na kiingʼwa idanda yangu, iiva nu wuumi wa shiluta, na yuune nikhayinsa kimufyusa mu lisiku ilya kihigwa inyi. 55Kiiva, umuvili gwangu shakiilya sha shiyooli, nayi danda yangu shingʼwelo sha shiyooli. 56Umuunu yoyoona yuna iilya umuvili gwangu na kiingʼwa idanda yangu, asiive apikiyitenekha kisigala munyangu na yuune nisigala munyaakwe. 57Ngaja shina uDaada yuna anifiliishe ali muumi, one niipata uwuumi kihuma kunyaakwe. Shiisho ndeeno, umuunu yoyoona yuna ikinilya one, iipata uwuumi kihuma kunyangu. 58Lino, one yuune shakiilya shina shihumile kwa Nguluvi. Ishakiilya shina shisihwaneene ni shakiilya shina avambuyeenyu vashiliisaga, vaafwa. Leelo umuunu yoyoona yuna iilya ishakiilya ishi, akhava nu wuumi wa shiluta.”

59UYeesu wálogwele amaswi aga, pina akhandi imanyisa mu nanda iya kifuunyila ku Kapelinawumu.#6:59 Nanda iya kifuunyila: Yimba iliswi ili mu Maswi aMahensa.

Avamanyisiwa vinshi viilekha kimuhuviilila uYeesu

60Vaganaga kipulikha ago, avamanyisiwa vinshi mu vina vamufwataga vajovelanaga vaajova, “Amamanyiso aga makhamu mandu! Wuli, yu naani yuna akwiliile kigahuviilila?” 61UYeesu wáganaga kimanya kiija, avamanyisiwa vingʼuula kwa gina wálogola, wávaposa wáaja, “Wuli, iliswi ili lyavakhalasa? 62Lino, yikhava wuli, pina mukhanyaaga one Lusawo lwa Muunu, nitaana kiluta kwa Nguluvi kuna nikhandi ulwamwandi? 63UNumbula wa Nguluvi yumwene ikivapeela avaanu uwuumi. Umuunu asikwiliile kigaha shoshoona kwa ngufu saakwe mwene duguli. Amaswi gina navajovela gikimuleeta kunyeenyu uNumbula wa Nguluvi, nu wuumi wa shiluta. 64Leelo vakwali avanji mu omwe vina vikhaana kinihuviilila.”

UYeesu akhalogwele ndeeno, kwa kiiva akhandi ameenye kihuma pashiyanso kiija, vava naani vina vakhakhaana kimuhuviilila, na kiija yu naani yuna akhamudoolela. 65Ndeeno wáyitenekha kilogola wáaja, “Lulwene one nikivajovela kiija, kusiina umuunu yuna akwiliile kiyinsa kunyangu, nda uDaada asimulongwese.”

66Kihuma uluhaavi lula, avamanyisiwa vinshi mu vala vina vakhandi vikimufwata vamulekha, vasikhalongoseenie nawo khanji. 67Baheene uYeesu wávaposa vala avamanyisiwa ishumi na vavili wáaja, “Wuli, na yuumwe mwisakula kinilekha?” 68USimoni Petulo wámugomosesa wáaja, “Wee Mutwa, yu naani uyunji yuna tikwiliile kiluta kunyaakwe? Owe una maswi gina gikitupeela uwuumi wa shiluta. 69Ose tihuviilila, khanji timeenye kiija owe uli Munofu kihuma kwa Nguluvi.” 70Baheene uYeesu wávajovela wáaja, “Nivabagwile omwe ishumi na vavili kiiva vamanyisiwa vangu, leelo yumo mu omwe ilongosewa nu Shetaani.”#6:70 Shetaani: Yimba iliswi ili mu Maswi aMahensa. 71Apa, uYeesu akhandi ikimulogola uYuuda umwana wa Simoni uIsikaliyoote. Uyo yumwene yuna wámudolelaga uYeesu, hata nda akhandi munyaayumo mu vamanyisiwa ishumi na vavili.

Attualmente Selezionati:

Yohana 6: Shisangu

Evidenziazioni

Copia