Mwa 37

Ngewa ya Yosevu na Ana-a-ĩthe

1Yakovo atũaa nthĩ ya Kanaani vala ĩthe wake Isaka watwĩe ta mũeni. 2Ũũ nĩ ũelesyo ĩũlũ wa andũ ma mũsyĩ wa Yakovo.

Yosevu, e mwanake wa myaka ĩkũmi na mũonza, nĩwaĩthasya mbũi na malondu e na ana-a-ĩthe, ana ma Mbila na Nziliva iveti sya ĩthe wake. Yosevu nĩwakothaa kũthi kũtavya ĩthe maũndũ mathũku ala ana-a-ĩthe meekaa.

3Ĩsilaeli nĩwamwendete Yosevu mbee wa ana ala angĩ onthe make, nũndũ Yosevu asyaiwe ĩthe wake e mũkũũ. Ĩsilaeli nĩwamũseũvĩsye ngũa ndaasa yĩ malangi ma mĩthemba mingĩ. 4Ĩndĩ yĩla ana-a-ĩthe mamanyie kana ĩthe woo nĩwamwendete mbee woo, nĩmamenie Yosevu na weethĩa maimũneenasya nesa.

5Ũtukũ ũmwe Yosevu nĩwaotie ndoto. Yĩla watavisye ana-a-ĩthe ndoto ĩsu, nĩmamũmenie mũno mbee wa ũndũ mamũmenete mbeenĩ. 6Nĩwameie atĩĩ, “Ĩthukĩĩsyei nĩmũtavye ũndũ nĩotie: 7Ithyonthe twĩĩ mũũndanĩ tũyova iia sya nganũ. Kyove kya ngetha kĩla nĩĩovete nĩkĩũngamie kĩlũngele nasyo ila mwĩĩovete syakĩlingĩla na syakumana mbee wakyo.”

8Ana-a-ĩthe ma Yosevu nĩmamũkũlilye atĩĩ, “We wĩsũanĩa nũũtw'ĩka mũsumbĩ na kũtũsumbĩka?” Kwoou nĩmamũmenie mbeange wa ũndũ mamũmenete nũndũ wa ndoto isu waotaa na nũndũ wa maũndũ ala wamatavisye.

9Yosevu nĩwaotie ndoto ĩngĩ na eea ana-a-ĩthe atĩĩ, “Nĩnĩotie ndoto ĩngĩ na ndotonĩ ĩsu nonie syũa, mwei, na ndata ĩkũmi na ĩmwe ikumanĩte mbee wakwa.”

10Ĩndĩ yĩla watavisye ĩthe, na ana-a-ĩthe make, ĩthe nĩwamũkanisye na amũkũlya, “Ĩsu nĩ ndoto ya mũthemba mwaũ ũotie? Nyie nĩ na inyia waku na ana-a-ĩthe maku nĩtũkũka na tũikumana mbee waku tũtine nthĩ na ũthyũ?” 11#Meko 7.9 Ana-a-ĩthe ma Yosevu nĩmamwĩw'ĩaa kĩwĩu, ĩndĩ ĩthe wake nĩwekalaa aisũanĩa ĩũlũ wa ndoto ila Yosevu waotie.

Yosevu Akĩthoow'a Misili nĩ Ana-a-ĩthe

12Ĩvinda yĩmwe ana-a-ĩthe ma Yosevu nĩmaendie kũĩthya mbũi na malondu ma ĩthe woo vakuvĩ na ndũa ya Sekemu. 13Ĩsilaeli nĩweeie Yosevu atĩĩ, “Nĩenda ũkũtuma Sekemu, kũla ana-a-ĩthe maku me kũĩthya mbũi na malondu.”

Yosevu nĩwamũsũngĩie amwĩa, “Nĩnĩyũmbanĩtye kũthi.”

14Ĩthe wake amwĩa atĩĩ, “Enda ũkamanye kana ana-a-ĩthe maku nĩ aseo, na kana mbũi na malondu nĩendee nesa; na ĩndĩ ũisyoka wũke kũndavya.” Kwoou ĩthe wa Yosevu nĩwamũtũmie kuma mwandanĩ wa Eviloni athi Sekemu. 15Nĩwambĩĩie kwanganga isesinĩ na mũndũ ũmwe amwona na amũkũlya atĩĩ, “Wĩmantha kyaũ?”

16Yosevu amũsũngĩa, “Nĩmantha ana-a-ĩthe makwa. Nũtonya kũndavya vala mekũĩthya mbũi na malondu?”

17Mũndũ ũsu amwĩa atĩĩ, “Nĩmaumie vaa mathi, nũndũ nĩwie mayasya, ‘Tume vaa tũthi Ndothani.’ ” Kwoou Yosevu nĩwaendie aatĩĩa ana-a-ĩthe na amethĩĩla Ndothani.

18Ana-a-ĩthe ma Yosevu nĩmamwonie e vaasa, na atanamba kũvika, mavanga kũmũaa. 19Nĩmaneenanisye ene kwa ene masya atĩĩ, “Sisyai ũla mũndũ ũotaa ndoto nũya wũkĩte. 20Ũkai tũmũae na tũimwĩkya ĩimanĩ yĩmwe katĩ wa aa me vaa na tũyasya nyamũ mbai nĩmũĩe na nĩtũkwona kana ndoto syake ikeanĩa.”

21Ĩndĩ yĩla Lũveni weewie maineena ndeto isu nĩwamanthie ũndũ ũtonya kũtangĩĩa Yosevu. Nĩwameie atĩĩ, “Tũikamũae. 22Mwĩkyei ĩimanĩ yĩĩ yĩ vaa weũnĩ, ĩndĩ mũikamwĩke naĩ.” Lũveni ameie ũu atangĩĩe Yosevu ndakoawe nĩ ana-a-ĩthe, nĩ kana ĩtina amũtũnge kwa ĩthe wake. 23Kwoou yĩla Yosevu wavikie vala ana-a-ĩthe maĩ, nĩmamumisye ĩla ngũa yake ndaasa yaĩ na malangi ma mĩthemba mingĩ. 24Nĩmamwosie mamwĩkya ĩimanĩ. Vayaĩ kĩw'ũ ĩimanĩ yĩu, yaĩ ĩthei.

25Yĩla mekalile nthĩ maye nĩmookĩlilye metho na moona atandĩthya ma nzyawa sya Ĩsumaeli mokĩte kuma Ngileati. Atandĩthya asu maĩ na ngamĩle syakuĩte syĩndũ sya kũsamya lĩu nesa, na ingĩ inyungaa nesa maitwaĩte nthĩ ya Misili.

26Yuta nĩweeie ana-a-ĩthe, “Ve ũtethyo mwaũ kwitũ kũaa mwana-a-ĩthe waitũ na tũilea kũweta kana nĩtwamũaa? 27Ũkai tũmũthoosye kwa Aĩsumaeli aya, ĩndĩ tũikamwĩke naĩ, nũndũ nĩ mwana-a-ĩthe waitũ na nĩtũsyaanĩw'e.” Ana-a-ĩthe nĩmeetĩkĩlile ũndũ Yuta wameie. 28#Meko 7.9 Ala atandĩthya kuma Mitiani nĩmookie mavĩtĩte, na ana-a-ĩthe ma Yosevu mamumya yĩla ĩimanĩ na mamũthoosya kũla kwĩ atandĩthya asu kwa thooa wa ithimo mĩongo ĩlĩ sya silĩva namo mamũkua mamũtwaa Misili.

29Yĩla Lũveni wasyokie vala ve ĩima yĩla Yosevu walikĩtw'e na alea kũmwĩthĩa vo, nĩwatembũangie ngũa syake nĩ kyeva. 30Nĩwasyokie kũla kwĩ ana-a-ĩthe na asya, “Kĩla kĩmwana kĩi yĩla ĩimanĩ! Nĩĩka ata nyie?”

31Nĩmooaie mbũi na moosa ĩla ngũa ndaasa ya Yosevu mamĩinda nthakamenĩ ya mbũi ĩsu. 32Nĩmoosie ngũa ĩsu ya Yosevu ndaasa yĩ malangi maingĩ matwaĩa ĩthe woo na mamwĩa atĩĩ, “Twĩthĩie ngũa ĩno vandũ; kwa mĩsisye ũmanye kana nĩ ĩla ngũa ndaasa ya mwana waku Yosevu.”

33Nĩwamanyie kana nĩyo na asya, “Aa! Ĩĩ nĩ ĩla ngũa ya mwana wakwa Yosevu. Nyamũ mbai nĩmũaie. Kwa w'o Yosevu nũtembũangiwe atw'ĩka ilungu!” 34Yakovo nĩwatembũangie ngũa syake nĩ woo, oosa ngũa ngaamu sya makunia eekĩa na aĩa nũndũ wa mwana wake vandũ va mĩthenya mingĩ. 35Ana make na eĩtu make onthe nĩmookie kũmũkiakisya, ĩndĩ nĩwaleile aikiakiw'a na asya, “Ekanai nakwa, ngathi kũla maveva ma ala akw'ũ mekalaa o nĩendee na kũĩa nũndũ wa mwana wakwa.” Kwoou Yakovo nĩwaendeeie na kũĩa nũndũ wa mwana wake Yosevu.

36Maũndũ asu maendee, ala atandĩthya kuma Mitiani maĩ mathooisye Yosevu nthĩ ya Misili kwa Votivalĩ, ũmwe wa anini ma mũsumbĩ, ũla waĩ mũnene wa asikalĩ ala masungaa nyũmba ya mũsumbĩ.

Attualmente Selezionati:

Mwa 37: KAMBA

Evidenziazioni

Copia