यूहन्ना 14

परमेशरा तक पुजणे रा रस्ता

1“तुहांरे दिल दुखी नीं हो, परमेशरा पर विश्वास रखा कने मेरे पर बी विश्वास रखा। 2मेरे परमेशर रे घरा होर मती सारी रैहणे रियां जगहां इयां; अगर जे येढ़ा नीं हुंदा तां माह तुहांजो नीं बोलणा था भई हऊँ तुहांरे खातर रैहणे जो जगह बनाणे जो जाया राँ। 3जे हऊँ तित्थी जाया राँ, कने तुहां खातर रैहणे री जगह बणाऊं, तां माह फेरी येत्थी आईने तुहांजो अपणे सौगी रैहणे खातर ऊत्थी लेई जांगा, ताकि तुहें बी तित्थी रौआ तित्थी जे हऊँ रौआं।” 4तित्थी जे हऊँ जाया राँ, तित्थी रा रस्ता तुहें जाणाँ ये। 5थोमे तिस्सो गलाया, हे प्रभु, अहें नीं जाणदे, भई तू किति जाया राँ। फेरी तित्थी रा रस्ता अहें कियां जाणी सक्का यें? 6यीशुये तिसजो गलाया, “हऊँ इ हाया सै जे लोकां जो अपणे पिता ले लेई जां, हऊँ तिन्हांजो तिसरे बारे च सच्चाई दस्सां, कने हऊँ इ तिन्हांजो अनन्त जीवन देआं, कोई बी मेरे बगैर पिता लौ नीं जाई सकदा। 7जे तुहें सच्चीजो जाणया हुन्दा भई हऊँ कुण आ तां तुहें मेरे पिता जो बी जाणीगरे हुन्दे, हुण तुहें तिस्सो जाणाँ ये, कने तुहें तिस्सो देखीरा बी आ।”

8फिलिप्पुसे तिस्सो गलाया, “हे प्रभु, अहांजो पिता परमेशरा रे दर्शण कराई दे तां अहांजो सन्तोख हुई जाणाँ।”

9यीशुये तिस्सो गलाया, “फिलिप्पुस, क्या हऊँ तुहांजो सौगी लम्बे वगता तक नीं रया, कने तुहें मेरे बारे च हुण मनी जाणदे? तिने जे मिन्जो देखील्या तिने पिता जो देखील्या। तुहें काँह बोलां ये, भई ‘अहांजो पिता जो दस?’ 10क्या तुहांजो ये विश्वास निआं भई हऊँ पिता ने सौगी आ कने पिता मेरे सौगी आ? सै जे बचन हऊँ तुहांजो बोलां सै हऊँ अपणे खा ते नीं बोलदा; पर पिता सै जे मेरे सौगी आ हर बगत अपणा काम्म करदा रैयां। 11विश्वास करा, हऊँ पिता सौगी आ कने पिता मेरे सौगी आ; निआं तां जो चमत्कार मैं कित्तिरे तिसरी बजह ते विश्वास करा। 12हऊँ तुहांजो सच-सच बोलां, जो कोई माह पर विश्वास करगा तिस सै काम्म करने, तिन्हांजे हऊँ कराँ, इन्हां कम्मां ते बी बधीने तिस बड्डे-बड्डे काम्म करने काँह्भई हऊँ पिता लौ जाय राँ। 13जो किछ तुहां मेरे नौआं ते मेरते मंगणा सै माह करी देणा, ताकि पुत्रा रे जरिये पिता री महिमा हो। 14जो किछ तुहां मेरे नौआं ते मेरते मंगणा सै माह करी देणा।

पवित्र आत्मा री प्रतिज्ञा

15“जे तुहें मेरने प्यार कराँ ये, तां तुहां मेरयां हुक्मां जो मनणा। 16कने मांह तुहांरे खातर पिता ने प्राथना करनी, कने तिस तुहांजो इक सहायक देणा तिस जे तुहांजो सदा रैहणा, 17यनिके पवित्र आत्मा तिसजो जे संसारा रे लोक ग्रहण नीं करी सकदे, काँह्भई सै नांत इस्सो जाणाँ ये कने नांई देखी सक्कां ये; पर तुहां तिसरा पता, काँह्भई तिस सदा तुहांजो रैहणा कने तुहां च वास करना। 18मांह तुहांजो दोस्ता ते बिणा नीं छडणा; मांह येत्थी जो फेरी भीं औणा। 19थोड़े बगता ते बाद, संसारा मिन्जो नीं देखणा, पर तुहां मिन्जो देखणा, तुहां जिऊंदेयां रैहणा काँह्भई हऊँ बी जिऊंदा। 20तिस बगत ये साफ हुई जाण भई हऊँ अपणे पिता सौगी आ कने तुहें मेरे सौगी ये कने हऊँ तुहां सौगी आ; कने तिस जे मिन्जो प्यार करना पिता बी तिस्सो प्यार करना। 21तिस जे मेरा हुक्म मनणा, कने तिन्हांरा पालन करना, तिस सचमुच मेरने प्यार करना; सै जे मेरने प्यार कराँ तिसने मेरे पिता प्यार करना मांह बी तिसने प्यार करना कने अप्पूँजो तिसरे सामणे परगट करना।”

22यहूदा सै जे इस्करियोति नीं था तिसने बोलणे लगया, “ये कियां हुई सक्कां भई तू अहांजो साफ-साफ दिसणा कने संसारा रे लोका जो नीं दिसणा?”

23यीशुये तिस्सो जबाब दित्या, “तिसजे मेरने प्यार करना, तिस मेरी शिक्षां जो मनणा; कने तिसने जे मेरा पिता प्यार करगा, कने अहां तिसले औणा कने तिसने सौगी रैया करना। 24सै जे मेरने प्यार नीं करदा सै मेरिया शिक्षा जो नीं मनदा; तिस बचना जो जे तुहें सुणा यें सै मेरा बचन निआं पर पिता रा, तिने जे मिन्जो भेजीरा।

25“तदुआं तका जे हऊँ तुहांजो सौगी आ तदुआं तका इ मांह तुहांजो ये गल्लां करनियां। 26पर सहायक, यनि पवित्र आत्मा, तिस्सो जे पिता मेरे नौआं ते भेजणा, तिस सब गल्लां तुहांजो सखाणियां कने जो किछ मैं तुहांजो गलाया सै सब गल्लां याद कराणियां। 27हऊँ तुहांजो शान्ति देआं, तेढ़ी नीं, तिस तरिके री जे संसार देआं; पर हऊँ तुहांजो अपणी शान्ति देआं तिसते जे तुहांरा मन नांत घबराओ कने न डरो।

28“तुहें मिन्जो बोलदे, सुणयां रायें भई, ‘हऊँ जाया राँ, कने तुहां ला फेरी बी औणा,’ जे तुहें मेरने प्यार कित्या हुंदा तां तुहें खुश हुंदे काँह्भई हऊँ पिता लौ जाया राँ, काँह्भई पिता मेरते महान आ। 29ये सब गल्लां हुणे ते पैहले इ मैं तुहां दस्सीत्या काँह्भई ताहली जे ये गल्लां पूरियां हुणे लगो तां तुहां मांह पर विश्वास करना। 30कने जादा हऊँ तुहांजो ये गल्लां नीं करी सकदा काँह्भई इस संसारा पर राज करने औणे औल़ा शैतान; माह पर तिसरा कोई अधिकार नींआ। 31ये गल्लां इस खातर पूरियां हुणियां भई संसारा जो पता लगी जाओ भई हऊँ पिता ने प्यार कराँ। पिता तेढ़ा जे हुक्म मिन्जो दितिरा, हऊँ तेढ़ा ही कराँ। हुण उट्ठा कने येत्थीते चला।”

Attualmente Selezionati:

यूहन्ना 14: KFSNT

Evidenziazioni

Copia