यूहन्ना 13

यीशुये रा चेलयां रे पैर धोणा

1फसह रे त्योहारा ते पैहले, यीशुये जाणील्या भई, सै बगत नेड़े आ ताहली जे तिस इस संसारा जो छड्डिने पिता परमेशरा लौ चली जाणा। तिने संसारा च सै जे तिसरे अपणे लोक थे कने सै जे तिसने प्यार कराँ थे, तिन्हांने बौहत सारा प्यार जताया। 2तंजे यीशु कने तिसरे चेले राति जो रोटी खाया राँ थे। शैताने पैहले तेई यीशुये जो धोखा देणे रे खातर शमौना रे पुत्र यहूदा इस्करियोति रे मना च पाईतरा था। 3यीशु ये जाणा था भई पिता परमेशरे सारा अधिकार तिस्सो दई तरा कने सै परमेशरा लाते आईरा, कने पिता परमेशरा लौ इ वापस जाईराँ। 4तां सै रोटी खांदा उठीग्या, कने अपणा चोल़ा त्वारीत्या कने इक परना अपणे लक्का पर बन्हील्या। 5तां तिने इक्की बरतना च पाणी लैया, कने अपणयां चेलयां रे पैर धोणे लगया कने सै जे परना तिने इक्की दास्सा साई लपेटिरा था तिसने तिन्हांरे पैर साफ करने लगया। 6ताहली जे यीशु शमौन पतरसा लौ आया, पतरसे बोल्या, प्रभु, क्या तुज मेरे पैर धोणे? 7यीशु ये तिस्सो जबाब दित्या, “जो किछ हऊँ करया राँ सै अजें तिज्जो पता नीं लगणा, पर सै वक्त औणे पर सारियां गल्लां रा पता लगी जाणा।” 8पतरसे तिसने बोल्या, मांह कदीं बी अपणे पैर तेरते नीं धुआणे। यीशुये तिस्सो जवाब दित्या, जे हऊँ तेरे पाँव नीं धोऊं तां तेरी मेरे सौगी कोई संगती नीं। 9इस पर शमौन पतरसे बोल्या, प्रभु, तां तू मेरे पैर इ नीं सिर कने हत्थ बी धोई दे। 10यीशुये तिस्सो बोल्या, इक माहणु सै जे नहाई चुक्कीरा तिस्सो सिर्फ अपणे पैरां जो धोणे री जरूरत इ; तुहें सारे शुद्ध ये पर सारे इ नीं। 11यीशु जाणा था भई तिस्सो पकड़वाणे औल़ा कुण आ, इसा वजह ने तिने बोल्या, भई तुहें सारे शुद्ध नींये।

12इस खातर ताहली जे यीशुये तिन्हांरे पैर धोये कने अपणा चोल़ा पैहनीने दोबारा ते अपणिया जगह आईने बैठिग्या, तां तिन्हांने बोल्या, “क्या तुहें समझे भई मैं तुहांरे खातर क्या कित्या?” 13तुहें मिन्जो गुरू कने प्रभु, बोलां यें, तुहें ठीक बोलां यें, काँह्भई हऊँ इ तुहांरा गुरू कने प्रभु आ। 14फेरी तंजे मैं प्रभु कने गुरू हुईने बी तुहांरे पैर धोए, तुहां बी अप्पूँ चियें इक्की दुज्जे रे पैर धोईने माह साई करदे रैयों। 15मैं तुहां खातर इक उदाहरण रखया; इस खातर भई तुहें बी तेढ़ा इ करा तेढ़ा जे मैं तुहांजो कित्या? 16हऊँ तुहांजो सच-सच बोलां, इक दास अपणे गुरुये ते बडा नींआ, कने नांई इक सनेहा देणे औल़ा तिसते बड्डा सै जे तिसजो भेज्जां। 17हुण तां जे तुहें इन्हां सब गल्लां जो जाणाँ ये, तां तिन्हांरा पालन करा, ताकि तुहांजो आशीष मिलो। 18हऊँ तुहां सब्बीं रे बारे च येढ़ा नीं बोल्या करदा; मिन्जो मेरयां चेलयां रा पता, काँह्भई मैं तुहांजो चुणीलरा, पर ये इस खातर हुईरां भई पवित्रशास्त्रा च सै जे लिखिरा सै पूरा हुई जाओ, तिने जे मित्र हुईने मेरे सौगी रोटी खाद्दि सै मेरा दुश्मण बणीग्या। 19येढ़ा सब हुणे ते पैहले इ हऊँ तुहांजो इस खातर दस्यारां भई ताहली जे ये गल्लां हुई जाओ तां तुहें विश्वास करो भई सै “हऊँ आ।” 20हऊँ तुहांजो सच बोलां, भई सै जे मेरे भेज्जीरे जो ग्रहण कराँ, सै मिन्जो ग्रहण कराँ, कने सै जे मिन्जो ग्रहण कराँ, सै मेरे भेजणे औल़े जो ग्रहण कराँ।

धोखे रा संकेत

(मत्ती 26:20-25; मरकुस 14:17-21; लूका 22:21-23)

21ताहली जे यीशु ये बोल्ली चुक्कया, फेरी तिसरा मन व्याकुल हुईग्या कने येढ़ा बोलदे हुए अपणे चेलयां जो दस्या, “हऊँ तुहांजो सच-सच बोलां भई तुहां चते इ इक्की मिन्जो धोखा देईने पकड़वाणा।”

22चेले मुड़ी-मुड़ीने इक्की दुज्जे खा जो देखणे लगे, भई किस रे बारे च तिस्सो शक आ कने किस रे बारे च सै बोल्या राँ। 23तित्थी इक चेला यीशुये रे नेड़े इ बैठिरा था, सै जे यीशुये रा प्यारा था, कने यीशुये रिया छातिया पर सिर रखीने स्वां था। 24तां शमौन पतरसे तिस्सो हिलाया भई सै यीशुये ते पुछो भई सै कुण आ, तिसरे बारे च जे यीशु बोल्या राँ था।

25तां तिने ताहलूं यीशुये रिया छातिया पर सिर रखीरा था, पुच्छया, “प्रभु सै कुण आ?”

26यीशुये तिस्सो जवाब दित्या, “तिस्सो जे माह रोटिया रा टुकड़ा डबोई कने देणा, सैई आ।” फेरी यीशुये रोटिया रा टुकड़ा कटोरे च डबोया कने तिस्सो चक्की ने यहूदा जो दित्या सै जे शमौन इस्करियोति रा पुत्र था। 27ताहलूं जे यहूदे सै रोटिया रा टुकड़ा लैया शैतान तिसच समाई गया।

तां यीशुये तिस्सो बोल्या, “सै जे तू करना छोड़े कर।” 28सै जे तित्थी बैठिरे थे तिन्हां चते किसी जो बी ये समझ नीं आया, भई यीशुये तिसने ये गल्लां काँह कित्ती यां। 29कईयें सोचया भई पैसयां री थैली सै जे यहूदा लेई इस खातर यीशुये तिस्सो बोल्या भई त्योहारा खातर समान खरीदी ले, या भई गरीबां जो किछ दई दे। 30इयां यहूदे रोटिया रा टुकड़ा लई लेया, सै ताहलु इ चली गया; ये राति रे बगता री गल्ल इ।

नौंईं आज्ञा

31तिसरे जाणे ते बाद यीशुये बोल्या, “हुण माहणुये रे पुत्रा री महिमा हुई कने परमेशरा री महिमा तिसच हूणी। 32अगर जे तिसते परमेशरा री महिमा हूणी तां परमेशरा अप्पूँ इ तिस्सो महिमा देणी

33“मेरे बच्चयो हऊँ थोड़िया देरा तका जो तुहांजो सौगी आ। इसते बाद तुहां मिन्जो टोल़णा, कने तियां जे मैं यहूदी अगुवेयां ने गलाया था, ‘तित्थी जे हऊँ जां, तित्थी तुहें नीं आई सकदे,’ सैई हऊँ हुण तुहांजो बोलां।

34“हऊँ तुहांजो इक नया हुक्म देआं भई तुहें इक्की दुज्जे ने प्यार करा; तियां जे मैं तुहांजो प्यार कित्या तियां इ तुहें इक्की दुज्जे ने बी प्यार करा। 35जे तुहें इक्की दुज्जे ने प्यार कराँ यें, इसते इ सब्बीं जो ये पता लगी जाणा भई तुहें मेरे चेले।”

पतरसा रे इन्कार करने रा संकेत

(मत्ती 26:31-35; मरकुस 14:27-31; लूका 22:31-34)

36शमौन पतरसे तिस्सो पुच्छया “प्रभु तू कितो जाया राँ?”

यीशुये तिस्सो जवाब दित्या, “तित्थी जे हऊँ जाया राँ तुहें तित्थी मेरने सौगी नीं आई सकदे, पर तुहां बाद च औणा।” 37पतरसे तिसते पुच्छया, “प्रभु जी, हुण हऊँ कांह् नीं आई सकदा? हऊँ तेरे खातर मरने जो त्यार आ।” 38यीशुये जवाब दित्या, “क्या मेरे खातर अपणा प्राण देंगा? हऊँ तेरने सच बोलां भई कुकड़ा झांग नीं देणी तदुआं तक जे तूं तिन्न बार मेरा इन्कार नीं करी लेंगा।”

Attualmente Selezionati:

यूहन्ना 13: KFSNT

Evidenziazioni

Copia