यूहन्ना 10

गवाल़ा कने भेड्डां रा उदाहरण

1यीशुये गलाया, “हऊँ तुहांजो सच्च बोलां भई सै जे कोई भेडशाला रे दरवाजे चियें अन्दरौ नीं जान्दा, पर किसी दुज्जे पासे ते चली जां, सै चोर कने डाकू आ। 2पर सै जे दरबाजे ते अन्दरौ जां सैई आ भेड्डां रा गवाल़ा। 3द्वारपाल तिसरे खातर दरवाजा खोल्ली देआं, कने भेड्डां तिसरी अवाज़ पछयाणां इयां, कने सै अपणियां भेड्डां जो नौं लेईने सद्दां कने बाहरौ लेईजां। 4ताहली जे सै अपणियां सारियां भेड्डां जो बाहर कड्डी लेआं, तां फेरी सै तिन्हांरे अग्गे-अग्गे चलां, कने भेड्डां तिसरे पिच्छे-पिच्छे चलां इयां, काँह्भई सै तिसरी अवाज़ पछयाणां इयां। 5भेड्डां कदीं किसी अंजाण माहणुये रे पिच्छे नीं जान्दी, पर तिसते दूर नट्ठा इयां, काँह्भई सै तिस अंजाण माहणुये री अवाज़ नीं पछयाणदी।” 6यीशुये तिन्हांजो ये उदाहरण दस्या, पर सै नीं समझी पाये भई तिसरा क्या मतलब आ।

यीशु बधिया गवाल़ा

7इस पर यीशुये तिन्हांने भीं गलाया, “हऊँ तुहांजो सच्च दस्सां, भेड्डां रा दरवाजा हऊँ आ। 8सै जितने जे मेरते पैहले आईरे थे, सब चोर कने डाकू ये, पर मेरियें भेड्डें तिन्हारी नीं सुणी। 9दरवाजा हऊँ आ; जे कोई मेरे जरिये अन्दर जां, तां परमेशरा तिस्सो छुटकारा देणा, कने अन्दर बाहर औन्दे जान्दे रैहणा कने खाणे जो रोटी पांगा। 10चोर सिर्फ भेड्डां री चोरी करने, कने तिन्हाजो मारने कने तबाह करने खातर औआं; हऊँ इस खातर आया भई सै पूरे तरिके ने जिऊंदा रौ। 11अच्छा गवाल़ा हऊँ आ; अच्छा गवाल़ा भेड्डां खातर अपणी जान देई देआं। 12मजदूरिया पर रखीरा नौकर ताहली जे भेड़िये जो औंदे देखगा तां तिस नट्ठी जाणा। तिस भेड्डां छडी देणियां काँह्भई सै तिन्हांरा गवाल़ा नींआ कने भेड्डां तिसरियां नींआ, इस खातर भेड़िया तिन्हां पर हमला करां कने सारियां भेड्डां जो बखेरी देआं। 13मजदूर इस खातर नट्ठी जां भई सिर्फ तिस्सो मजदूरिया ने मतलब हुआं, कने सै भेड्डां री कोई परवाह नीं करदा। 14अच्छा गवाल़ा हऊँ आ; हऊँ अपणियां भेड्डां जो जाणाँ, कने मेरियां भेड्डां मिन्जो जाणाँ इयां। 15तियां जे पिता मिन्जो जाणाँ कने हऊँ पिता जो जाणाँ। कने हऊँ भेड्डां खातर अपणी जान देआं। 16मेरियां होर बी भेड्डां इयां, सै जे इसा भेडशाला री नीं। मिन्जो सै बी लौणे जरूरी आ। सै मेरी अवाज़ पैहचाण गियां, फेरी सब्बीं रा इक इ झुण्ड कने इक इ गवाल़ा हूणा। 17पिता इस खातर माहने प्यार कराँ भई हऊँ अपणी जान देआं भई तिस्सो भीं बापस लेई सक्कूं। 18इस्सो माह्ते कोई लेन्दा निआं, पर हऊँ इस्सो अपणिया इच्छा ने देआं। मिन्जो अपणी जान देणे रा बी अधिकार आ, कने तिस्सो फेरी भीं लेणे रा बी अधिकार आ; ये हुक्म मिन्जो मेरे पिता परमेशरा ते मिलीरा।”

19इन्हां गल्लां रिया बजह ने यहूदियां च अप्पूँ चियें बिगड़ीगी। 20तिन्हां चते जादातर लोक बोलणे लगे, “तिस पर बुरीआत्मा स्वार इ, कने सै पागल आ; तुहें तिसरी कजो सुणी कराँ ये?” 21कने किछ लोक बोलणे लगे, “ये गल्लां येढ़े माहणुये रियां नीं हुई सकदियां तिस पर जे बुरीआत्मा स्वार हो। क्या बुरीआत्मा अन्हेयां री आक्खीं च जोत पाई सक्कां इ?”

यहूदियां रा अविश्वास

22यरूशलेम च मन्दरा री स्थापना रा त्योहार मनाया जाईराँ था; कने ठण्डा रे दिन थे। 23यीशु मन्दरा च सुलैमान रे बराण्डे च घुम्मणे फिरने लगीरा था। 24तिस बगत यहूदियें आईने सै घेरील्या कने बोलणे लगे, “तू अहांजो कदुआं तक सोचणे पर मजबूर करदे रैहणा? जे तू मसीह आ, तां अहांने साफ-साफ बोल्ली दे।” 25यीशुये तिन्हांजो जबाब दित्या, “मैं त तुहांजो दस्सीत्या पर तुहें विश्वास इ नीं करदे। सै काम्म जे हऊँ अपणे पिता रे नौआं ते कराँ सैई मेरा गवाह, 26पर तुहें इस खातर विश्वास नीं करदे काँह्भई तुहें मेरियां भेड्डां साई नीं यें। 27मेरी भेड्डां मेरी अवाज़ ध्याना ने सुणां इयां; हऊँ तिन्हौं जाणाँ, सै मेरे पिच्छे-पिच्छे चलां इयां; 28कने माह तिन्हाजो अनन्त जीवन देणा। कने सै कदीं बी नाश नीं हूणा, कने कोई बी तिन्हांजो मेरेते खोई नीं सकदा। 29तिन्हौं जे मेरे पिते, मिन्जो दित्तिरा, सै सबनीं ते खास ये कने कोई तिन्हाजो पिता रे हत्था ते गवाई नीं सकदा। 30हऊँ कने मेरा पिता इक ये।” 31फेरी यहूदियें तिसजो मारने खातर दोबारा पत्थर चक्के। 32इस पर यीशुये तिन्हांजो गलाया, “मैं तुहांजो अपणे पिता रिया तरफा ते कई भले काम्म दस्से; तिन्हां चा ते किस कम्मां खातर तुहें माह पर पत्थर मारीराँ ये?” 33यहूदियें तिस्सो जबाब दित्या, “भलाईया रे कम्मां खातर अहें तिज्जो पत्थर नीं मारया करदे पर परमेशरा री निंध्या करने रिया बजह ने; कने इस खातर भई तू माहणु हुईने अप्पूँजो परमेशर बणाईराँ।” 34यीशुये तिन्हाजो जबाब दित्या, “क्या तुहांरिया व्यवस्था च लिखिरा निआं, ‘मैं गलाया, “तू ईश्वर आ?” ’ 35जे परमेशरे तिस्सो ईश्वर बोल्या तिन्हाले जे परमेशरा रा बचन पुज्जया (कने पवित्रशास्त्रा री गल्ल झूट्ठ नीं हुई सकदी), 36तां तिस्सो जे पिता पवित्र करीने संसारा च भेज्या, तुहें तिस्सो बोलां ये, ‘तू निंध्या करीराँ,’ इस खातर मैं गलाया, हऊँ परमेशरा रा पुत्र आ? 37जे हऊँ अपणे पिता रा काम्म नीं करदा, तां तुहें मेरा विश्वास नीं करा। 38पर जे हऊँ कराँ, तां चाये माह पर विश्वास करा या नां करा, पर तिन्हां गल्लां पर त विश्वास करा ताकि तुहें जाणी सक्को कने समझी सक्को भई पिता माह चा कने हऊँ पिता चा।” 39तां फेरी भीं तिन्हे तिस्सो पकड़ने री कोशिश कित्ती पर सै तिन्हांते दूर चलिग्या।

40फेरी यीशु यरदन नदिया पार चलिग्या, तिसा जगह जे यूहन्ना पैहले बपतिस्मा देआं था, कने तित्थी रैया। 41मते सारे लोक तिसले आई ने तिसजो बोल्लां थे, “यूहन्ने त कोई बी चमत्कार नीं कित्ते पर यूहन्ने इस माहणुये रे बारे च जो किछ गलाया था, सै सब सच्च निकल़या।” 42फेरी तिसा जगह मते सारयां लोके यीशुये पर विश्वास कित्या।

Attualmente Selezionati:

यूहन्ना 10: KFSNT

Evidenziazioni

Copia