Génesis 11

Babel törrita rurapäkushqan

1Tsay witsanqa lapan runakuna juk idiömalatami parlapäkuq. 2Inti jeqamunan kaqpita aywakurmi Sinar#11.2 Sinarqa Babiloniami karqan. nishqancho tarirqan jatunkaray pampata. Tsaychömi paykuna lapan tarqan.

3Paykunami wilanakurqan kayno nir: <<Tsaytsika ladrilluta rurarkur hornucho kuwapäkushun>>.

Wilanakushqannölami ladrilluta rurapäkurqan rumipa trukan tsaywan perqananpaq. Tsay ladrillukunatami breawan perqarqan. 4Tsaypitanami yapay kayno nir wilanakurqan: <<Tsay ladrillukunawan jatun markata rurashun. Tsaynöpis törrita sharkatsishun jana patsaman töpananyaq. Tsaynöpami pïmaypis respitamäshun. Maytsaypa mashtakänantsipa trukanqa kaylachöna lapantsi täshunpaq>>.

5Tsaymi Tayta Dios jana patsapita urämurqan markata y törrita runakuna sharkaykätsishqanta rikananpaq. 6Tsayta rikaykurmi Tayta Dios yarpachakur kayno nirqan: <<Paykunaqa tsay idiömalata parlarmi shumaq wilanakur tsayno rurarkaykan. Markata y törrita sharkatsiyta usharkurqa imatapis mastachari rurapäkunqa. 7Tsayno kaptinqa paykunaman aywar pantakätsishun tsay idiömalata manana parlapäkunanpaq. Tsaynöpami juk idiöma juk idiömatana parlar manana tantiyanakunqanatsu imata parlaykashqantapis>>.

8Tsayno nirmi Tayta Dios lapan runakunata intëru patsaman mashtakätsirqan. Tsaynöpami sharkaykätsishqan markata mana ushapäkurqannatsu. 9Tsay markachömi Tayta Dios pïmay runakunata pantakätsir idiömanta jukman jukman tikratsirqan. Tsayno pantakätsishqanpitami tsay markapa jutin karqan Babel.#11.9 Babel ninanqa pantakätsin ninanmi. Mana tantiyanakurnami runakunaqa maytsaypapis mashtakar aywakärirqan.

Sempa tsurinkunapita miraqkuna

1 Crónicas 1.24-27

10Kaychömi qelqaraykan Sempa tsurinkunapita y paykunapita miraqkunapitapis.

Diluviu kashqanpita ishkay watatami Sempa tsurin Arfaxad yurirqan. Tsay witsan Sem kaykarqan pachak (100) watayuqmi. 11Tsurin Arfaxad yurishqanpita Sem kawarqan pitsqa pachak (500) wata masraqmi. Paypa tsurinkuna warmipis olqupis karqanmi.

12Arfaxad kimsa chunka pitsqa (35) watayuq kaykaptinmi tsurin Sala yurirqan. 13Tsurin Sala yurishqanpita Arfaxad kawarqan chusku pachak kimsa (403) wata masraqmi. Arfaxadpa tsurinkuna warmipis olqupis karqanmi.

14Sala kimsa chunka (30) watayuq kaykaptinmi tsurin Heber yurirqan. 15Tsurin Heber yurishqanpita Sala kawarqan chusku pachak kimsa (403) wata masraqmi. Salapa tsurinkuna warmipis olqupis karqanmi.

16Heber kimsa chunka chusku (34) watayuq kaykaptinmi tsurin Peleg yurirqan. 17Tsurin Peleg yurishqanpita Heber kawarqan chusku pachak kimsa chunka (430) wata masraqmi. Heberpa tsurinkuna warmipis olqupis karqanmi.

18Peleg kimsa chunka (30) watayuq kaykaptinmi tsurin Reu yurirqan. 19Tsurin Reu yurishqanpita Peleg kawarqan ishkay pachak isqun (209) wata masraqmi. Pelegpapis tsurinkuna warmipis olqupis karqanmi.

20Reu kimsa chunka ishkay (32) watayuq kaykaptinmi tsurin Serug yurirqan. 21Tsurin Serug yurishqanpita Reu kawarqan ishkay pachak qanchis (207) wata masraqmi. Reupapis tsurinkuna warmipis olqupis karqanmi.

22Serug kimsa chunka (30) watayuq kaykaptinmi tsurin Nacor yurirqan. 23Tsurin Nacor yurishqanpita Serug kawarqan ishkay pachak (200) wata masraqmi. Serugpapis tsurinkuna warmipis olqupis karqanmi.

24Nacor ishkay chunka isqun (29) watayuq kaykaptinmi tsurin Taré#11.24 Wakin traduccionkunachöqa Térah ninmi. yurirqan. 25Tsurin Taré yurishqanpita Nacor kawarqan pachak chunka isqun (119) wata masraqmi. Nacorpapis tsurinkuna warmipis olqupis karqanmi.

26Taré qanchis chunka (70) watayuq kaykar kimsa tsuriyuqnami karqan. Paykunapa jutinmi karqan Abram, Nacor y Harán.

Tarépita miraqkuna

27Kaychömi qelqaraykan Tarépa tsurinkunapita y paykunapita miraqkunapitapis.

Tarépa tsurinkunami karqan Abram, Nacor y Harán. Haránpa tsurinmi karqan Lot. 28Ur markancho taykaptilanraqmi papäninpitapis mas puntata Haránqa wanukurqan. Tsay markachöqa caldeo runakunami tarqan.

29Abrampa warmin karqan Saraimi. Nacorpa warminnami karqan Haránpa tsurin Milca. Milcapa nananmi karqan Isca. 30Saraimi itsanqa qoluq karqan.

31Ur markacho taykashqanpitami Canaánman Taré aywakurqan. Ur markaqa caldeo runakuna tashqan markami karqan. Canaánman aywakurmi pusharqan tsurin Abramta, wilkan Lotta y lumtsuynin Saraitapis. Aywarkaykashqancho Harán markaman chayaykushpan tsaylachöna täpäkurqan. 32Harán markachömi Taré wanurqan ishkay pachak pitsqa (205) watayuq kaykar.

Attualmente Selezionati:

Génesis 11: qvmB

Evidenziazioni

Copia