Иа́но 13

Ису́со Морэла Ѓэра́ Пэ́скирэ Сыкляибнытконэ́нгэ

1Анги́л свэ́нко Патради́ Ису́со, сыр джиндя́, со явдя́ пашылэды́р мардо́ (шту́нда) ваш Лэ́скэ тэ мэкэл дава́ свэ́то и тэ рисёл кэ Дад, Лэ́скэ ячнэ́ древа́н дро́га одолэ́, савэ́ дживдэ́ Лэ́са пэ дава́ свэ́то, и какана́ Ёв сыкадя́ сари́ зор Пэ́скирэ ласкаса кэ ёнэ. 2Бэльвэле́, ке́ли ёнэ ханас, на́лачхо чхудя́ мысля дро ило́ Юда́скэ, Симоноскирэ чхавэ́скэ Искариотоскирэскэ тэ здэл Исусо́с. 3Ису́со джиндя́, со Дад саро́ отдыя́ дрэ Лэ́скирэ васта́, и со Ёв явдя́ Дэвлэ́стыр и рисёла кэ Дэвэ́л. 4Ису́со уштыя́ скаминдэстыр, злыя́ Пэ́стыр упратуно урибэ́н, лыя́ рушника (кхосно) и подпхандяпэ ла́са. 5Пало́ (после) Ёв чхудя́ пани́ дро морибнаскиро чаро́ и лыя́ тэ морэл ґэра́ сыкляибнытконэ́нгэ и тэ кхосэл рушникаса, савья́са Ёв сыс подпхандло. 6Ке́ли Ёв подги́я кэ Си́моно Пэ́три, одова́ ракирэ́ла Лэ́скэ: “Раё Дэ́вла! Ту явэ́са тэ морэс ґэра́ ма́нгэ? 7Ису́со отпхэндя́ лэ́скэ: “Со Мэ кэра́ва, какана́ ту на ґалёса, нэ саро́ ту ґалёса коригэды́р.” 8Пэ́три ракирэ́ла Лэ́скэ: “Ту ние́кхвар на выморэса ґэра́ мирэ́.” Ису́со отпхэндя́ лэ́скэ: “Ко́ли Мэ на выморава ту́кэ ґэра́, тэды ту на сан Ма́нца кхэтанэ́ дрэ паш.” 9Тэды Пэ́три ракирэ́ла Лэ́скэ: “Раё Дэ́вла! Мор, на екх ґэра́ и васта́ мирэ́, нэ и шэро́.” 10Ису́со ракирэ́ла Лэ́скэ: “Жужэ́ (чыстонэ) манушэ́скэ трэй екх ґэра́ тэ выморэл, пал-дова́ со ёв исын жужо́; и тумэ́ сан жужэ́, нэ на сарэ́. 11Пал-дова́ со Ёв джиндя́ Пэ́скирэс здыибнарис, палдава́ адя́кэ и пхэндя́, со на сарэ́ ёнэ сыс жужэ́. 12Нэ ке́ли Ису́со вымордя лэ́нгэ ґэра́ и уридя Пэ́скиро урибэ́н, Ёв бэсця́ пэ Пэ́скиро штэ́то и пхэндя́ лэ́нгэ: “Ци тумэ́ на джинэ́на, со Мэ кэрдём ваш тумэ́нгэ? 13Тумэ́ Ман кхарэ́на “Сыклякирибна́скиро” и “Дэвэ́л”, и мишто́ кэрэ́на, пал-дова́ со Мэ адасаво́ и Сом. 14И ко́ли Мэ, Дэвэ́л и Сыклякирибна́скиро вымордём тумэ́нгэ ґэра́, адя́кэ-паць и тумэ́нгэ трэй тэ морэн ґэра́ екх екхэ́скэ. 15Мэ дыём тумэ́нгэ приме́ро (сыкаибэ́н), соб (кай) и тумэ́ тэ кэрэ́н адя́кэ-паць, со Мэ кэрдём тумэ́нгэ. 16Чачэс, чачэс Мэ ракира́ва тумэ́нгэ: дына́ри исын на барэды́р пэ́скирэ Ра́стыр, и одова́, кон бичхадо́, нанэ барэды́р одолэ́стыр, Кон бичхадя́ лэс. 17Ко́ли тумэ́ джинэ́на дава́, тумэ́ явэ́на бахталэ́, ко́ли и явэ́на тэ кэрэ́н адя́кэ-паць. 18Мэ на пал сарэ́ндэ тумэ́нгэ ракира́ва. Мэ джино́м (джина́в) одолэ́н, савэ́н Мэ выкэдыём; нэ мэк тэ сполнинэ́лпэ Свэ́нто Чхиныбэ́н: Одова́, кон ха́ла маро́ кхэтанэ́ Ма́нца, ґаздыя́ ґэро́й пэ Ма́ндэ. 19Какана́ Мэ ракира́ва тумэ́нгэ: анги́л, сыр дава́ сполнинэлапэ, соб (кай) тумэ́ тэ патя́н, со дава́ сом Мэ. 20Чачэс, чачэс Мэ ракира́ва тумэ́нгэ: кон прилэ́ла одолэ́с, конэ́с Мэ бичхава́ва, прилэ́ла Ман; нэ кон прилэ́ла Ман, прилэ́ла Одолэ́с, Кон бичхадя́ Ман.”

Ису́со Ангилпхэнэ́ла пал Пэ́скиро Здыибэ́н

21Ке́ли Ису́со пхэндя́ дава́, Ёв древа́н пиридживэлас дро ило́ и досыкадя и выпхэндя: “Чачэс, чачэс Мэ ракира́ва тумэ́нгэ, со екх тумэ́ндыр здэла Ман.” 22Тэды сыкляибны́тка, дыкхи́ екх пэ екхэ́стэ, на джиндлэ́, пал конэ́стэ Ёв ракирдя́. 23Екх Лэ́скирэ сыкляибнытконэндыр, саво́ сыс дро́го Исусо́скэ, сыс пашто́ пашы́л Исусо́скиро колы́н. 24Си́моно Пэ́три подпхэндя шпэра́са (знакоса) лэ́скэ, соб (кай) одова́ тэ пхучэл Лэ́стыр, пал конэ́стэ Ёв ракирэ́ла. 25И сыкляибны́тко, сыр приклониндяпэ кэ Исусо́скиро колы́н, пхэндя́ Лэ́скэ: “Раё Дэ́вла! Кон адава́ исын?” 26Ису́со отпхэндя́: “Одова́, конэ́скэ Мэ болавава котэ́р маро́ и подава”, и Ёв подыя котэ́р маро́ Юда́скэ, Симоноскирэ-Искариотоскирэ чхавэ́скэ. 27И тэды пало́ дава́ котэ́р, на́лачхо загия́ дрэ лэ́стэ. Тэды Ису́со пхэндя́ лэ́скэ: “Со кэрэ́са, кэр сыгэды́р.” 28Нэ нико́н, кон сыс бэшто́ одо́й, на ґалыя́, кэ со Ёв пхэндя́ дава́ лэ́скэ. 29Вари-савэ́ лэ́ндыр думиндлэ, со, сыр Юдастэ сыс ловитко тыкнори, палдава́ Ису́со ракирдя́ лэ́скэ: “Кин, со амэ́нгэ трэй кэ свэ́нко, ци соб (кай) тэ дас вари-со богэнгэ.” 30Юда лыя́ котэ́р маро́, и ада́й жэ гия́ яври́; и дава́ сыс рат. 31Ке́ли ёв гия́, Ису́со пхэндя́: “Какана́ Чхаво́ Манушэ́скиро славиндяпэ и Дэвэ́л славиндяпэ дрэ Лэ́стэ. 32Ко́ли Дэвэ́л славиндяпэ дрэ Лэ́стэ, тэды и Дэвэ́л прославинэла Лэс дрэ Пэ́стэ, и сыг прославинэла Лэс. 33Чхавалэ Мирэ́! На́бут Ма́нгэ яця́пэ тэ явав тумэ́нца. Тумэ́ явэ́на тэ родэ́н Ман, и сыр Мэ пхэндём Юдэ́нгэ: Карик Мэ джа́ва, тумэ́ на могинэ́на тэ явэ́н, адя́кэ Мэ и тумэ́нгэ ракира́ва. 34Мэ да́ва тумэ́нгэ нэво́ припхэныбэ́н: явэ́н дро́га екх ваш екхэ́скэ; сыр Ма́нгэ, адя́кэ-паць и тумэ́ явэ́н дро́га екх ваш екхэ́скэ. 35Пир дава́ уджинэна сарэ́, со тумэ́ сан Мирэ́ сыкляибны́тка, ко́ли явэ́ла ла́ска машки́р тумэ́ндэ.”

Ису́со Ангилпхэнэ́ла пал Лэ́скиро Отпхэныбэ́н

36Си́моно Пэ́три пхэндя́ Лэ́скэ: “Раё Дэ́вла! Карик Ту джа́са?” Ису́со ракирэ́ла лэ́скэ: “Карик Мэ джа́ва, ту́кэ нашты́ (на могинэ́са) тэ джас какана́ пал Ма́ндэ, нэ коригэды́р джа́са пал Ма́ндэ.” 37Пэ́три пхэндя́ Лэ́скэ: “Раё Дэ́вла! Со́скэ Ма́нгэ нашты́ тэ джав пал Ту́тэ какана́? Мэ чхува́ва пэ́скиро ило́ пал Ту́тэ.” 38Ису́со отпхэндя́ лэ́скэ: “Чхувэ́са ило́ пэ́скиро пал Ма́ндэ? Чачэс, чачэс Мэ ракира́ва ту́кэ: на пробагала башно, сыр ту трин мо́лы отпхэнэсапэ Ма́ндыр.”

Attualmente Selezionati:

Иа́но 13: ROMBALT

Evidenziazioni

Copia