Suku-saakị 47
47
1Mie ḅụ Josẹfụ sọ-mu tẹ ḍuko Fero pịrịm, “Ị̀ ḍa na, ị̀ owiapụ-amịnapụ na, ịna anana na oḅori na ogbo-ogbo na opu anama ogbo-ogbo na, ye tẹ ịn nyana aị mamgba Kenanị ama mẹ ḅụ ịn kobiri tẹ kẹ ḅọ tẹ, mịọkụ ịn Gosẹnị ama mẹ ḅụ emi.” 2Anịsakị ori owiapụ-amịnapụ ma ogbo-ḅio ḅụ ọ̀ sọnọa owiapụ ọkị tẹ ịn kẹ mu Fero ḍiem. 3Fero nwẹnị ori owiapụ-amịnapụ ma gbela, “Ọ́ tọ kọrịnama kọrị-kọrị tẹ kẹ angarị?”
Ịn nwẹnị Fero pakịrị, “Ị́ afịrịmẹnjịapụ ma anie anana ḍikiḍikiapụ, wamịna aḍapụ ma wẹrịtẹ ḍikiḍiki sime-ḅara mẹ.” 4Ịn nwẹnị Fero ḅẹẹ, “Wa igoni kẹ ama mẹ ḅio anga ḅẹ ḅom, gbala ị́ afịrịmẹnjịapụ iḅi osuka nyana tẹ kẹ anana ogbo-ogbo ma pịrị fị ḅẹ anga ofori ẹrẹsị; kẹ gotẹ ọkọ ḅẹẹarị, ịnụ mẹ Kenanị ama mẹ ḅio kụrọ-gbaị wararị ẹrẹsị, anịsakị mịọkụ wa ị́ tẹkẹm, yee ị́ afịrịmẹnjịapụ Gosẹnị ama mẹ ḅụ anga.” 5Anịtẹso Fero nwẹnị Josẹfụ ḅẹẹ, “Ị́ ḍa na, ị́ owiapụ-amịnapụ na ị́ ḍọkụma-ḅo tẹ. 6Ijiputi ama mẹ ị́ tọrọkọ emi. Ị́ ḍa na, í owiapụ-amịnapụ ma na kẹ ama mẹ ḅẹ iḅitẹịn anga ḅụ koromaa; yee ịn Gosẹnị ama mẹ ḅụ anga. Anịsakị ịna ogbo-ḅio ḅụ ị́ nama kọrị ịnyọ nyana owiapụ nimi-nimi, ịn kẹ ì opu anama ḍikiḍiki apụ mịẹ.”
7Anịtẹso Josẹfụ nwẹnị ọ̀ ḍa Jekọbụ kẹ ḅo tẹ ọ̀ kẹ Fero tọrọkọ sịẹma. Jekọbụ nwẹnị Fero boma. 8Tẹ Fero nwẹnị Jekọbụ gbela, “Ị́ sịḅị nda akụra ḅọrọ tẹ?”
9Jekọbụ nwẹnị Fero pakịrị, “À kẹ igoni-mẹnjị kọn ikelekele tẹ ene ma ḅẹ akụra, anie kụra sonioa si oyi finji (130); ì ḍumo ḅụ ị̀ sịḅị ḅọrọ tẹ akụra boowa tẹ pịkị ḅụụ-fụkamam, anịsakị ị̀ atẹngịapụ ma ḍumo ḅụ ịn kẹ ịna igoni-amẹnjị kọn ikelekele aḍin ma ḅẹ akụra ma sọ na gbasị-a.” 10Tẹ Jekọbụ Fero bomam, tẹ Fero tọrọkọ ḅụ mẹnjị pakam. 11Anịtẹso Josẹfụ ọ̀ ḍa na, ori owiapụ-amịnapụ ma na sime ḅẹ anga kẹ ịn pịrịm, tẹ Ijiputi ama mẹ ḅụ ịn nyana ḅẹ anga, Fero tọn ḅara ḅụ Ramịsịsị ama mẹ ḅẹ iḅitẹịn anga mẹ kẹ ịn pịrịm. 12Tẹ Josẹfụ fịye kẹ ọ̀ ḍa na, ori owiapụ-amịnapụ ma na, ọ̀ ḍa warị-kpo mẹ na pịrịm, kịẹn-ḅịḅị ḅụ ịn kokoarị apụ ma la ḅara ḅụ.
Ịnụ Ijiputi Sẹ Ḅụ Pakam
13Mị sakị mẹ ama mẹmgba ḅụ fịye ofori, gbala ịnụ mẹ kụrọ-gbaị wararị ẹrẹsị, anie mịẹtẹ ḅuru-ḅa gotẹ Ijiputi ama mẹ na, Kenanị ama mẹ na ḅarị ịnyọ nyana-a. 14Josẹfụ nwẹnị igbigi mẹmgba tẹ Ijiputi ama mẹ na, Kenanị ama mẹ na ḅụ ịn kẹ fịaị fẹẹ tẹ ịn ḍọkị-ẹrị ye mẹ kobiri tẹ Josẹfụ igbigi mẹ kẹ Fero warị ḅom. 15Ijiputi ama mẹ na, Kenanị ama mẹ na ḅụ kịnị aḅara sime igbigi mamgba ịn kẹ ye fẹẹ fama tẹso, Ijiputi-ḅẹ-apụ mamgba nwẹnị kobiri Josẹfụ ḍọkụma-ḅo tẹ ḅẹẹ, “Fịye kẹ wa pịrịị! Wa tiegotẹ ị́ tọrụ-ogbo ḅụ fịị ḅẹ? Kẹ gotẹ ọkọ ḅẹẹarị, wamịna igbigi fa fama tẹ.”
16Josẹfụ nwẹnị pakịrị, “Ọmịna igbigi fa tẹ ḅẹḅẹ, ọmịnị ọmịna opu anama kẹ ḅo ị̀ pịrịị, anịsakị à fịye kẹ opu anama ma na ḍima ọ́ pịrị ḅa.” 17Mie ḅụ ini ịna opu anama na, asụ amẹẹ ma na, anana na oḅori na ogbo-ogbo ma na, opu anama ogbo-ogbo ma na, yedogi-anama ma na ọkị-ḅo ọkị-ḅo Josẹfụ pịrịm anị kụra mẹ ḅụ, tẹ Josẹfụ fịaị kẹ arị na ḍima ịn pịrịm.
18Anị kụra mẹ kunoma tẹ anị ḍukama kụra mẹ ḅụ ịn nwẹnị ọ̀ ḍọkụma-ḅo tẹ ọ̀ ḅẹẹ, “Wa ye kẹ wa nyanaḅọ ḅọịma ḅịa mịnẹ wamịna igbigi mamgba fa fama tẹ; anịsakị opu anama ogbo-ogbo ma sime wa nyanaḅọ ḅe pịrị tẹ, wa nyanaḅọ ḅe ḍiki-tọrụ ḅụ wamịna oju ma na wamịna akiri na sikima kirikọntẹ wa nyana kpọkpọ gberie-sọ ḅarị ofori. 19Wa tiegotẹ ị́ tọrụ ogbo ḅụ fịị, tẹ wamịnị na wamịna kiri ma na gulugulu ḅẹ? Fịye kẹ wamịnị na, wamịna akiri ma na fẹẹ ọkịị, anịsakị wamịnị na, wamịna akiri ma na omoniapụ sọ Fero pịrị ḅa; tẹ sịnmgbọlị kẹ wa pịrị, mịẹtẹ wa ḍumo, tẹ ḅarị fịị ḅịa ḅara, anịsakị ama mẹ ḅarị ḅo fatẹ ye-yọ sọ ḅịa.”
20Mie ḅụ Josẹfụ Ijiputi ḅụ sime akiri mamgba fẹẹ Fero pịrịm, ịnụ mẹ ịna aḅụụ ḅụ kụrọ ḅakam ẹrẹsị, Ijiputi-ḅẹ-apụ mamgba ịna aḍụọ ḍẹrịm. Kiri mẹ ḅo Fero kiri sọm, 21anịsakị tomi ma kụma, Ijiputi mẹ ḅẹ gbọrụ kunoma ḅụ ọkị mu osi kunoma la ori ịn kẹ ori omoniapụ mịẹm. 22Agbamịẹapụ ma kiri ngẹrị mie ọ̀ fẹẹ-a ye; gbala Fero ịn ḍuko sịẹma wararị ḅara-ḅarịma igbigi kẹ ịn pịrịarị ẹrẹsị; tẹ ḅara-ḅarịma igbigi mẹ tẹ Fero kẹ ịn pịrịarị ye mẹ kẹ ini angam ẹrẹsị ini ịna kiri dẹrị-a. 23Anịtẹso Josẹfụ nwẹnị tomi ma ḅẹẹ, “Ḍikii, mịmgba ḅẹ ene mẹ ḅụ arị ọmịnị na, ọmịna akiri na fẹẹ Fero pịrị tẹ. Mie mịọkụ mịanga sime ọ́ pịrị sịnmgbọlị, ọmịnị ọkị-ọkị mu kiri mẹ ḅụ ḍiḅi ḅa. 24Anịsakị fịaị soku asakị ma ḅụ, ọ́ fịaị ma kẹ sọnọa akiri ḍiya ḅẹ gbọrụ kiri kẹ Fero pịrị ḅa, tẹ sọnọa akiri ḍiya ḅẹ inia akiri ma ọ́ kẹ ḍụọ ḅio ḍiḅi ḅarị sịnmgbọlị na, ọmịnị na ọmịna warị-kpo na fị ḅarị fịye na, kẹ ọmịna ḍọkọḍọkọ-awọmẹ koko ḅarị fịye ḅara ḅụ ọmịna nye sọ ḅa.”
25Ịn nwẹnị pakịrị, “Ị́ wamịna aḍumo ḅọrọma tẹ, anị nwẹnị wa nyanaḅọ ḅe ḅụụ-ḅẹlẹ kụma, wa omoni-sọ Fero pịrị ḅa.” 26Mie ḅụ Josẹfụ Ijiputi ama mẹ ḅẹ kiri mẹ gbolomaye kẹ oloko ḅara kẹẹ koromam, tẹ anị sịẹsime ḅo mịmgba lam, mịnẹ Fero fịaị ma kẹ sọnọa kiri ḍie ḅẹ gbọrụ kiri nyanam; agbamịẹapụ ma kiri ngẹrị mie ḅo Fero nye sọ-a ye.
Jekọbụ Ḅii Kunoma Ye
27Mị-ḅara ḅụ Izirẹlị Ijiputi ama mẹ ḅụ angam, Gosẹnị ama mẹ ḅụ; anị ḅio ye nyana lama, awọ iyi tẹ tọnwa ḅara kẹ lolo-kama. 28Tẹ Jekọbụ tẹra kụra fa si kẹ Ijiputi ama mẹ ḅụ ḍumo-simem; mie ḅụ Jekọbụ ḍumo-ene ma ḅụ ọ̀ sịḅị ḅọrọ akụra, tẹra akụra ofori kụra sọnọma si oyi finji (147). 29#Suk 49.29-32; 50.6Izirẹlị gbarị-a ḅara ḅụ fịị ḅarị sakị mẹ ḅo kpeki tẹso, ọ̀ nwẹnị ori owiḅọtụḅọ Josẹfụ sịn tẹ ọ̀ ḅẹẹ, “À nwẹnị í ḍiki-tọrụ ḅụ ḅẹlẹma ḍọkị-ẹrị-ẹrị, ị́ ḅara kẹ ị̀ ḅụọ-ẹtẹnẹ suku-ḅio suu tẹ mininii, ị́ ị̀ kẹ ye-sịn ḅara na karakara ḅara na kẹ ị̀ na mịẹ ḅa. Ị̀ kẹ Ijiputi ḅụ ḍiḅi; 30kụma yee arị ị̀ aḍapụ ma na ḅọlọlọ gboloma; Ijiputi ḅụ ì dogi pakaa, tẹ ini ị̀ aḍapụ ma ḍiḅiarị anga ḅụ ì ḍiḅii.”
Josẹfụ nwẹnị pakịrị, “Àrị í ḍuko ḅara mịẹ ḅa.” 31Jekọbụ nwẹnị ḅẹẹ, “Ye karị ḅara kẹ mininii, mịnẹ ị́ mịẹ ḅa.” Josẹfụ nwẹnị ye karị ḅara kẹ minini. Anịtẹso Izirẹlị ò monoye sịḅịkọ ḅụ ọ̀ sịḅị-tuum.
Attualmente Selezionati:
Suku-saakị 47: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
