Suku-saakị 46
46
Jekọbụ Na Ò Furo Na So Ijiputi Mum
1Mie ḅụ Izirẹlị ye tẹ ọ̀ nyana aị mamgba kobiri tẹ Biyasẹba ḅom, tẹ tọnwa agba mịẹ ọ̀ ḍa Ayịzịkị Tamụnọ ḅe pịrịm. 2Tamụnọ nwẹnị ḍin ḅụ ịkịan ẹrị ḅara ḅụ ẹkwẹn Izirẹlị pịrị tẹ ọ̀ sịn, “Jekọbụ, Jekọbụ!” Tẹ ọ̀ nwẹnị pakịrị, “Mie yẹrịị, mịanga.”
3Anịtẹso ọ̀ nwẹnị ḅẹẹ, “Yẹrị anie Tamụnọ, ị́ ḍa Tamụnọ ḅe; Ijiputi mu mẹ go ḅalafa ma; kẹ gotẹ ọkọ ḅẹẹarị, arị ị́ ḅụụ ḅụ gburo-gburotẹ opu sịẹ pakama ḅa anị yọ ḅụ. 4Àrị ị́ na so Ijiputi mu ḅa, tẹ pịkị sin í ọkị-ḅo ḅa; anịsakị í Josẹfụ ḅara ḅụ emi ogbo ị́ atọrụngbọ gbaịn ḅa.”
5Anịtẹrẹmẹ Jekọbụ Biyasẹba ḅụ saakị pakam; tẹ Izirẹlị owiapụ-awọmẹ ịna ḍaḅọ Jekọbụ na, ịna ḍọkọḍọkọ-awọmẹ na, ịna sime-ereme na dogi som kirimẹnjị-arụ mẹ tẹ Fero kẹ ọ̀ sẹịn ḅẹ fịrịma arụ mẹ ḅio. 6#Fịr 7.15Opu anama na, ngọ na tẹ Kenanị ama ḅụ ịn sọye ḅara ḅụ nyana aị na sọ ịn kẹ Jekọbụ na ò furo-ḅẹ-apụ na ḅụụ sụa ọkị so Ijiputi mum. 7Ori ori owiapụ-awọmẹ na, taa-owiapụ-awọmẹ na, eremịna-awọmẹ na, taa-eremịna-awọmẹ na kẹ ọ̀ ḅụụ sụa Ijiputi ḅom.
8Mịọkụ mịna ẹrẹ ma anie Izirẹlị furo-ḅẹ-apụ tẹ Ijiputi sọ-ḅo apụ ma ẹrẹ: Jekọbụ na ori iyia owiapụ-awọmẹ na, Rubẹnị, Jekọbụ tarị tụḅọ (mgbe), 9na Rubẹnị owiapụ-awọmẹ ma na: Hanọkụ na, Palụ na, Hẹzịrọnị na, pịkị Kami na. 10Simiyọnị owiapụ-awọmẹ ma anie: Jemuhẹlị na, Jamịnị na, Ohadi na, Jakini na, Zoha na, pịkị, Kenanị ḅẹ ẹrẹḅọ ma owiḅọtụḅọ Sahulu na 11Livayị owiapụ-awọmẹ ma anie: Gasọnị na, Kohatị na, pịkị Mẹrarị na; 12Juda owiapụ-awọmẹ ma anie Ẹrị̀ na, Ọnanị na, Sẹla na Pẹrẹzi na pịkị Zera na (kụma Ẹrị̀ na, Ọnanị na Kenanị ama ḅụ fịịm); anịsakị Pẹrẹzi owiapụ-awọmẹ anie: Hẹzịrọnị na, Emulu na. 13Ịsaka owiapụ-awọmẹ ma anie: Tola na, Puva na Jasubu na, pịkị Simirọnị na. 14Zẹbulọnị owiapụ-awọmẹ ma anie: Sẹrẹdi na, Ẹlọnị na, pịkị Jalili na. 15Mịna owiapụ-awọmẹ ma anie Liya awọmẹ ma tẹ Padani-aramụ ḅụ arị iyi Jekọbụ pịrị apụ ma, ori ẹrẹḅọtụḅọ Dayịna kẹ ịna aḅụụ sụa; inimgba ori owiapụ-awọmẹ na, ori eremịna-awọmẹ na kịẹn-ḅịḅị ḅụ ini kịnị suei, tẹra apụ finji.
16Gadi owiapụ-awọmẹ ma anie Zifọnị na, Hagayi na, Suni na, Ẹzịbọnị na, Iri na, Arọdị na, pịkị Arili na. 17Asa owiapụ-awọmẹ ma anie: Imina na, Isiva na, Isivi na, Beriya na, pịkị ịna ịyịmbara Sera kẹ sụa. Anịsakị Beriya owiapụ-awọmẹ ma anie: Ẹba na, Malikịyẹlị na. 18Mịna ini apụ fa si ma anie Zilipa ma tẹ Lebanị kẹ ori ẹrẹḅọtụḅọ Liya pịrị ḅọ ma iyi Jekọbụ pịrị owiapụ-awọmẹ ma.
19Jekọbụ ta Resẹlị iyi owiapụ-awọmẹ ma anie: Josẹfụ na, Benijamịnị na. 20#Suk 41.50-52Anịsakị ini Ijiputi ama ḅụ Manasẹ na, Iferemu na iyi Josẹfụ pịrịm, inima tẹ Pọtifẹra, Ọnị anịanịa Ẹliopolisi ḅẹ agbamịẹḅọ ḅe ẹrẹḅọtụḅọ Asẹnatị iyi ọ̀ pịrị apụ ma. 21Anịsakị Benijamịnị owiapụ-awọmẹ ma anie Bila na, Bika na, Asịbẹlị na, Gira na, Nahamanị na, Iyi na, Rosi na, Mupimu na, Upimu na, pịkị Adi na. 22Mịna apụ ma anie Resẹlị owiapụ-awọmẹ ma tẹ ini iyi Jekọbụ pịrị apụ ma, inimgba ngei apụ fa jei.
23Danị owiḅọtụḅọ anie Usimu. 24Nafutali owiapụ-awọmẹ ma anie: Jazịyẹlị na, Guni na, Jiza na, pịkị Silemu na. 25Mịna apụ ma anie Biliya, árịma tẹ Lebanị kẹ ori ẹrẹḅọtụḅọ Resẹlị pịrị ḅọ ma owiapụ-awọmẹ ma, anịsakị arị iyi Jekọbụ pịrị apụ inimgba sọnọma apụ. 26Jekọbụ owiapụ-awọmẹ ma sime-ereme ma sikima, tomi tẹ ò soku ḅụ da-da paka-ḅo tẹ Ijiputi sọ-mu apụ inimgba ini apụ ofori kịnị atesi oyi finji (66), 27#Fịr 7.14anịsakị Josẹfụ owiapụ-awọmẹ ma tẹ Ijiputi ḅụ ini iyi ọ̀ pịrị apụ maa apụ; Jekọbụ warị mẹ ḅẹ atomi mamgba tẹ Ijiputi ḅụ sọ-ḅo apụ kịnị atesi oyi finji (70).
Jekọbụ Na Ò Furo Na Ijiputi Ḅụ
28Jekọbụ nwẹnị tarị ọ̀ tọrọkọ Juda kẹ Josẹfụ fịrịma ò mu Gosẹnị ḅụ ori na ẹrịyaa; tẹ ịn ḅo Gosẹnị ama mẹ la. 29Anịtẹso Josẹfụ ò kirimẹnjị-arụ tẹlẹma tẹ ḅụkụlọ Gosẹnị ḅụ ọ̀ ḍa Izirẹlị na bịama ḅẹ mum; ịn ḅo bịama gbọrụ sakị Josẹfụ amịna ḅụụ pakam ọ̀ pịrị, tẹ ọ̀ kọngọ fịnama tẹ ọ̀ kọngọ ḅụ sime tẹ tẹmẹ-la ḅara kẹ owu alamam. 30Izirẹlị nwẹnị Josẹfụ ḅẹẹ, “Àrị ị́ tọrụkuḅu ẹrị tẹ, tẹ nimi tẹ mịnẹ ị́ paa ḍumo-sime wararị nwẹn ḅẹẹ sakị, yee mịọkụ à nwẹnị fịị.” 31Anịtẹso Josẹfụ nwẹnị ori owiapụ-amịnapụ ma na, ọ̀ ḍa warị-kpo mẹ na ḅẹẹ, “à mu ḍuko Fero pịrị tẹ ọ̀ ḅẹẹ ḅa, ‘ị̀ owiapụ-amịnapụ na, ị̀ ḍa warị-kpo na tẹ Kenanị ama ḅụ sime-sime apụ ma ị̀ ḍọkụma-ḅo tẹẹ, 32anịsakị mịna atomi ma anie nama ḍikiḍikiapụ, kẹ gotẹ ọkọ ḅẹẹarị, ini anie ḅẹẹ kụra-ḅio opu anama ḍikiḍikiapụ; anịsakị ini ịna anana na, oḅori ogbo-ogbo ma na, ịna opu anama ogbo-ogbo ma na, ye tẹ ịn nyana aị mamgba na ọkị-ḅo tẹ.’ 33Fero ọ́ sịn, tẹ ọ́ kọrị-kọrị tẹ kẹ angarị kọrịnama tiye kẹ ó gbela-gbela, 34ọmịnị ọ̀ pakịrị ḅa, ‘ị́ afịrịmẹnjịapụ anie ḅẹẹ kụra-ḅio, wamịna asambịrịma sakị kụra-ḅio ọkị-ḅo mịọkụ la ḅụ wamịnị na wamịna ḍaḅọ anie opu anama ḍikiḍikiapụ,’ mịẹtẹ ó Gosẹnị ama ḅio anga ḅarị ḅara; kẹ gotẹ ọkọ ḅẹẹarị, Ijiputi-ḅẹ-apụ nama ḍikiḍikiḅọ goḅọ-goḅọ tọn-arị.”
Attualmente Selezionati:
Suku-saakị 46: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
