Suku-saakị 43
43
Josẹfụ Owiapụ-Amịnapụ Benijamịnị Na Pịkịma-so Ijiputi Mum
1Mị sakị mẹ ịnụ mẹ ama mẹ ḅio kụrọ-gbaị wararị. 2Fịye mẹ tẹ Ijiputi ḅụ ini ọkị-ḅo ye mẹ ịn nwẹn fị fama tẹso, ịna ḍaḅọ Jekọbụ nwẹnị ịn ḅẹẹ, “Ọ́ pịkị mu fịye kalịye fẹẹ ḅo wa pịrịị.”
3Kụma Juda nwẹnị ọ̀ ḅẹẹ, “Tomḅọ ḅe tẹmẹ-la ḅara kẹ wamịna ḅeri nụnụm, tẹ ḅẹẹm, ‘Ọmịna iyimbere ḅe ọmịnị na emi sikima, ọmịnị ị̀ tọrụkuḅu ẹrị ḅịa.’” 4Ị́ nwẹnị wamịna iyimbere ḅe kẹ wamịnị na sụa fịrịma ḅarị ḅẹḅẹ wa mu fịye fẹẹ ḅo ị́ pịrị ḅa; 5kụma ị́ ọ̀ kẹ fịrịma ḅịa ḅẹḅẹ, wa mu ḅịa, kẹ gotẹ ọkọ ḅẹẹarị, tomḅọ ḅe wa ḅẹẹm, “Ọmịna iyimbere ḅe ọmịnị na emi sikima ọmịnị ị̀ tọrụkuḅu ẹrị ḅịa.”
6Izirẹlị nwẹnị gbela, “Ó tiegotẹ nwẹn sime si ḅara kẹ ị̀ na mịẹ, tẹ ḍuko tomḅọ ḅe pịrị mịnẹ ó jen iyimbere nyana wararị?”
7Ịn nwẹnị pakịrị, “Tomḅọ ḅe ẹbị ḅara kẹ wamịna aḅụụ na, wamịna paka-furo na gbolomaye gbelam tẹ ḅẹẹm, ‘ọmịna ḍaḅọ ọ̀ paa ḍumo wararị? Ó jen iyimbere nyana?’ Wa ḍuko ọ̀ pịrị aị ma anie mịna gbela aị ma apakịrị-ḅịḅị. Tọ ḅọkọ ḅụ wa inetẹ nimi ḅẹ mịnẹ ọ̀ ḅẹẹ ḅa, ‘Ọmịnị ọmịna iyimbere ọkị-ḅo?’ ”
8Tẹ Juda nwẹnị ọ̀ ḍa Izirẹlị ḅẹẹ, “Tụḅọ ḅe kẹ ị̀ ḅụụ sụa fịrịmaa, anịsakị wa saakị tẹ mu ḅa, mịẹtẹ wamịnị na, ị́ na, wamịna ḍọkọḍọkọ-awọmẹ ma sọ na sọ fịị ḅịa tẹ inetẹ ḍumo ḅẹ ḅara. 9Àrị ori onyo-sẹịn ḅa; ị̀ ḅara ḅụ mie ị́ ò ḅii ḅarị ye; arị ọ̀ kẹ pịkịma ḅo tẹ ọ̀ kẹ ị́ tọrọkọ sịẹma-a ḅẹḅẹ yee anịrẹ onyo mẹ ị̀ ọgọnọ gbana gbamaso. 10Wa mị sakị mẹ fama-a namịna mimgbe ḅo mịọkụ la maa asakị sọ wa mu tẹ pịkịma ḅo tẹ.”
11Ịna ḍaḅọ Izirẹlị nwẹnị ịn ḅẹẹ, “Anị ḅara mẹ mie anị mịẹ ḅarị ḅara ḅẹḅẹ, anị ọkụma ó miemẹ mịẹ. Ọmịnị ama mẹ ḅio paka-ḅo iḅitẹịn asịnmgbọlụ ma ḅẹ jaị kẹ ọmịna akpa ḅio sụa tẹ dogi mu ḍie tomḅọ ḅe pịrịị: bamụ nwẹn-sịn fụka-ye deinma olo kalịye na, ḅẹm kalịye na, ye-oḅoloye na, kụnụaị na, pisitakiyo nwẹn-sịn mbi na alịmọnịdị nwẹn-sịn ye na. 12Ọmịna aḅara simearị igbigi mẹ ḅẹ maa akiri ọkịị; igbigi mẹ tẹ ọmịna akpa ḅịḅị ḅụ ọ́ pịkịma-ḅo igbigi mẹ kẹ sụa dogi muu; ẹbịsịya anị ịna atọrụ gbarịm. 13Ọmịnị ọmịna iyimbere ḅe sọ ọkịị, tẹ saakịị, tẹ pịkị siin tomḅọ ḅe dama-muu. 14Yee Kụrọmamgba Nyana Tamụnọ ḅe mịẹtẹ tomḅọ ḅe tọrọkọ ọmịnị ọkụrụkụrụ nyana, mịẹtẹ ori ọmịna iyimbere osi ḅọ ḅe na Benijamịnị na kẹ pịkị fịrịma ḅẹ ḅara. Yẹrị kịngẹ kụma, ị̀ awọmẹ ma nwẹnị fịị fama-fama, ịn fịị tẹ.” 15Mie ḅụ owiapụ ma ḍiepịrị-aị ma na, ịna aḅara simearị igbigi mẹ ḅẹ maa akiri na, Benijamịnị na ọkịm, tẹ ịn saakị tẹ so Ijiputi mum, tẹ Josẹfụ tọrọkọ sịẹsimem. 16Josẹfụ Benijamịnị na ini na ẹrị tẹso, ọ̀ nwẹnị ọ̀ warị ḅẹ fịrịmẹnjịḅọ ḅẹẹ. “Tomi ma ọkị-ḅo ị̀ warị ḅio suu, tẹ nama gbọrụmgbọ ḅaa, gbala eneḅaka ogbo ḅụ arị ini na fịye fị gboloma ḅa ẹrẹsị.” 17Tomḅọ ḅe Josẹfụ tọn ọ̀ pịrị ḅara mịẹm, tẹ tomi ma kẹ Josẹfụ warị ḅom. 18Tomi ma ḅalafaam ini ịn kẹ Josẹfụ warị ḅo ye mẹ ẹrẹsị, tẹ ịn nwẹnị ḅẹẹ, “Igbigi mẹ tẹ tarị sakị mẹ ḅụ ịn kẹ pịkị wamịna akpa ḅio sụa ye mẹ mie in gotẹ wa ọkị-ḅo ọ̀ warị ḅio suu ye, mịẹtẹ ọ̀ ḅọkọ ḍọkị tẹ owu kẹ wa paka tẹ wa kẹ omoni atomi mịẹ, tẹ wamịna yedogi-anama kọrị-ọkị ḅarị ḅara.” 19Mie ḅụ ịn Josẹfụ warị mẹ ḅẹ fịrịmẹnjịḅọ ḅe dama-mu tẹ ori na ẹkwẹnm warị mẹ ḅẹ ḅọkọ mẹ akaka ḅụ, 20tẹ ḅẹẹm “yei ị̀ nyanaḅọ, wa tarị gbọrụ sakị kẹ fịye fẹẹ ḅẹ ḅom; 21tẹ wa so mu ịnyọsara anga la tẹ wamịna akpa finji sakị, ọrụḅọ-ọrụḅọ igbigi — ye so-a ḅara ḅụ — mḅọ akpa ḅịḅị ḅụ emi; mie ḅụ wa pịkị sin anị kẹ sụa ḅo tẹ, 22anịsakị wa pịkị wamịna jen igbigi ọkị-ḅo tẹ kẹ fịye fẹẹ ḅẹ ḅara. Wamịna igbigi mẹ kẹ wamịna akpa ma ḅio sụa ḅọ wa nimi-a.”
23Fịrịmẹnjịḅọ ḅe nwẹnị pakịrị, “Ọmịnị ịnyọ ḅaa, tẹ ḅalafa ma, sosi ọmịna Tamụnọ, pịkị ọmịna ḍaḅọ Tamụnọ ḅe ngọ kẹ ọmịna akpa ma ḅio sụa ọ́ pịrị tẹ. Ọmịna igbigi à daa-ọkịm.” Anịtẹso ọ̀ nwẹnị Simiyọnị pakama-ḅo ịn pịrị.
24Tẹ fịrịmẹnjịḅọ ḅe tomi ma ọkị-ḅo Josẹfụ warị ḅio suu, tẹ minji kẹ ịn pịrị, tẹ ịn kẹ ịna aḅụọ-suku sịkịrị, tẹ ọ̀ nama fịye kẹ ịna yedogi-anama ma pịrị fị fama tẹso, 25ịn nwẹnị ḍiepịrịye mẹ tẹlẹma ene ogbo ḅụ Josẹfụ ḅo mẹ wẹrịma, gbala ịn naam mịnẹ ini anịjụ fịye fị ḅa. 26Josẹfụ ḅo warị la tẹso, ịn nwẹnị ḍiepịrịye mẹ tẹ ini ọkị-ḅo ọ̀ pịrị ye mẹ ọkị-ḅo warị ḅio suu, tẹ sịḅị-tuu mu kiri lama ọ̀ pịrị. 27Tẹ ori ịna aḅụụ sime-ḅara kẹ ịn gbelam, “Ọmịna omongitẹ ḍaḅọ ḅe tẹ ó ḍuko ị̀ pịrị ḅọ ḅe ori oju iḅi wararị? Ọ̀ paa ḍumo wararị?”
28Ịn nwẹnị pakịrị, “Ị́ fịrịmẹnjịḅọ, wamịna ḍaḅọ ḅe ori oju iḅi wararị, ọ̀ paa ḍumo wararị.” Tẹ ịn nwẹnị kụn pịrị ḅara kẹ kparakị tẹ sịḅị-tuu ọ̀ pịrị.
29Tẹ Josẹfụ nwẹnị ọ̀ tọrụ saakị tẹ ori iyimbere Benijamịnị ori na gbọrụ iyingiḅọ iyi ḅọ ḅe ẹrị tẹ ḅẹẹ, “Ḅie ọmịna iyimbere ịrụ-tẹịn ḅọ ḅe tẹ ó ḍuko ị̀ pịrị sime ḅọ ḅe? Tamụnọ ḍiki-ḅụụjịrị nyana ị́ pịrịị, ị̀ tụḅọọ!” 30Anịtẹso Josẹfụ nwẹnị ò ḅioḅẹngbọ ḅụ ori iyimbere ḅe kẹ ọ̀ sịḅị kanakanama la ḅara gotẹ fọnya saakị mu ò sime tẹ owu ḅarị anga ḍọkị, tẹ mẹnjị ọ̀ kala-ḅio sọ-mu tẹ anịanga tẹmẹ-la ḅara kẹ owum. 31Anịtẹso ọ̀ nwẹnị minji kẹ ọ̀ tọrụ sịkịrị tẹ paka-ḅo; tẹ ọ̀ ḅụụ ọlọ tẹ ḅẹẹ, “Yee fịye dẹbịlẹ ọgọnọ gbana.” 32Ini ò nye sikima gbana ọ̀ pịrịm, tẹ ịna nye sịkịm gbana ịn pịrịm, anịsakị Ijiputi-ḅẹ-apụ ma tẹ ori na fịye fịarị apụ ma ịn pịkị ịna nye sikima ịn pịrịm, gbala Ijiputi-ḅẹ-apụ ma Hiburu apụ ma na gbọrụ anga ḅụ fịye fị ḍụkụ ḅịa, aniemẹ tọn-tọnye sọ Ijiputi-ḅẹ-apụ ma pịrị wararị ẹrẹsị. 33Josẹfụ tọrọkọ ḅụ mie ịn lẹgị ye, ini iyi ḅara mie ịn ḍiki ịn lẹgịma ḅara, omongi-tẹịn ḅọ ḅe ḅụ ọkị mu ịrụ-tẹịn ḅọ ḅe la. Tomi ma nwẹnị ḅụụ-bua ḅụ tọrụ pịkị jụmọ-jụmọ ḍiki. 34Josẹfụ dẹbịlẹ ọgọnọ mie ịn fịye ọkị-ọkị mu ịn pịrị ye, kụma Benijamịnị ḍiekiri sọnọa sakị kẹ ḍụḅa osi-apụ nye nẹngịm. Mie ḅụ ịn fị na, ḅuu na tẹ ori na tọrụ-ḅẹlẹm.
Attualmente Selezionati:
Suku-saakị 43: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
