Suku-saakị 42
42
Josẹfụ Owiapụ-Amịnapụ Ijiputi Ḅụ Fịye Fẹẹ Ḅẹ Mum
1Jekọbụ naam mịnẹ Ijiputi ḅụ fịye emi, anịtẹso ọ̀ nwẹnị ori owiapụ-awọmẹ ḅẹẹ, “Ó tiegotẹ mịanga sakị fama tẹ jụmọ-jụmọ ḍikiarị?” 2#Fịr 7.12Ọ̀ nwẹnị ḅẹẹ, “Ḍikii, à naa tẹ mịnẹ Ijiputi ḅụ fịye emi, ó mu anịanga fịye fẹẹ ḅọ wa pịrịị, mịẹtẹ wa ḍumo tẹ ḅarị fịị ḅịa ḅara.” 3Mie ḅụ Josẹfụ oyia amịnapụ ma ideri Ijiputi ḅụ fịye fẹẹ ḅẹ mum. 4Kụma Jekọbụ Josẹfụ iyimbere Benijamịnị kẹ osi amịnapụ ma na sụa fịrịma-a, gbala ọ̀ ḅalafaam mịnẹ siye ọ̀ la ḅa ẹrẹsị. 5Mị-ḅara ḅụ Izirẹlị owiapụ-awọmẹ ma, jen-apụ tẹ ḅo ye fẹẹ ḅẹ apụ ogbo ḅio sọ tẹ ḅom, gbala ịnụ Kenanị ama ḅụ emi ẹrẹsị.
6Mị sakị mẹ Josẹfụ anie ama mẹ ḅẹ ḅẹrẹtọnḅọ; ori anie fịye mẹ kẹ ama-ama ḅẹ apụ mamgba dẹrịarị ḅọ. Josẹfụ owiapụ-amịnapụ nwẹnị ḅo tẹ ọ̀ tọrọkọ sịḅị-tuu mu ịna tọrụkuḅu kẹ kiri lama. 7Josẹfụ ori owiapụ-amịnapụ ma ẹrị tẹ ịn lekirim, kụma ori igoniapụ mịẹ ḅara kẹ ịn mịẹm tẹ bala-a ḅara kẹ ẹkwẹn ịn pịrịm. Ori ịn gbelam, “Ọ́ tọ-anga sime tẹ ḅo?”
Ịn nwẹnị pakịrị, “Wa Kenanị ama ḅụ sime tẹ fịye fẹẹ ḅẹ ḅom.”
8Mị-ḅara ḅụ Josẹfụ ori owiapụ-amịnapụ ma lekirim, kụma ini ò lekiri-a. 9#Suk 37.5-10Josẹfụ nwẹnị ḍawọ ma tẹ ịna aḅụụ ọ̀ kọn aị ma kẹ ḅiokoroma; tẹ ọ̀ nwẹnị ịn ḅẹẹ, “Ọmịnị anie ama ẹnyẹ-apụ, ó ḅo ama mẹ ịnyọ nyana-a mẹ ḍọkị-nimi ḅẹ ḅom.”
10Ịn nwẹnị ọ̀ pakịrị, “Ẹn-ẹn, ị̀ nyanaḅọ, ọkụma fịye fẹẹ mie ị́ afịrịmẹnjịapụ gotẹ ḅo ye. 11Wamịnị-mgba anie gbọrụ owiḅọ iyi owiapụ-awọmẹ wamịnị anie karakara atomi; ị́ afịrịmẹnjịapụ ma ama ẹnyẹ-apụ-a.”
12Ọ̀ nwẹnị ịn ḅẹẹ, “Ẹn-ẹn, ọmịnị anie ama ẹnyẹ-apụ, ama mẹ ḅẹ ịnyọ nyana-a mie ó ḍiki ḅẹ ḅo ye.” 13Ịn nwẹnị ḅẹẹ, “Wamịnị ị́ afịrịmẹnjịapụ ma anie oyi maa owiapụ-amịnapụ finji, gbọrụ owiḅọ iyi owiapụ-awọmẹ Kenanị ama ḅụ. Ịrụ-tẹịn ḅọ ḅe wamịna ḍaḅọ na emi, anịsakị gbọrụḅọ ḅarị ofori.”
14Kụma Josẹfụ nwẹnị ịn ḅẹẹ, “À kẹ ọ́ ḅẹẹ ḅara anie anị sime-ḅara, ọmịnị anie ama ẹnyẹ-apụ. 15Miemẹ ḅụ mie ini ọ́ daaḍiki ḅarị ye; Fero ḍumo-sime wararị ogbo, ọ́ mị yọ mẹ ḅụ so ḅịa ọmịna iyimbere ịrụ-tẹịn ḅọ ḅe ḅọ mị yọ la sikima. 16Yee ọmịna aḅụụ ḅẹ gbọrụḅọ mu ọmịna iyimbere ḅe ọkị-ḅo, kirikọn-apụ ma ikoli ḅio simearị ogbo; mịẹtẹ ọmịna ẹkwẹn-aḅịḅị ma ḅụ ini ọmịna aḅụụ ḅụ karakara emi ḅoto ḍọkị-nimi ḅẹ ḅara. Anieofori, Fero ḍumo-sime wararị ogbo, tụkụma ḅara ḅụ ọmịnị anie ama ẹnyẹ-apụ.” 17Tẹ ori inimgba kẹ ikoli ḅio suu gboloma mu tẹra aḍin lam.
18Tẹra aḍin karama ene ḅụ Josẹfụ nwẹnị ịn ḅẹẹ, “Ó miemẹ mịẹ anịsakị ó ḍumo ḅa, gbala à Tamụnọ ḍiki-ḅalafarị ẹrẹsị. 19Ọmịnị karakara atomi ḅẹḅẹ, yee ọmịna ḅụụ ḅẹ gbọrụḅọ ikoli mẹ ḅio sime. Yee kirikọn-apụ ma fịye dogi mu ọmịna ḅuru-ḅaarị warị-kpo-kpo ma pịrị, 20tẹ ọmịna ịrụ-tẹịn iyimbere ḅe ọkị-ḅo ị̀ pịrịị; mie ḅụ ọmịna ẹkwẹn-aḅịḅị ma ḅẹ karakara mẹ ḍie-paka ḅa tẹ ọ́ ḅarị fịị ḅịa.” Tẹ ini ọkọ mịẹm. 21Anịtẹso ịn nwẹnị jụmọ-jụmọ ḅẹẹ, “Karakaraye ḍuko ḅụ, wamịna iyimbere ḅe gbolomaye ḅụ wa ḅẹrẹ-ḅarasii nyana wararị. Wa ọ̀ nyana ḅụụ-ḅalaḅala mẹ ẹrịm, ọ̀ wa tẹkẹ tẹ wa poki ḍụkụ-a sakị mẹ ḅụ. Anịẹrẹsị mie mị ḅụụ-ḅalaḅala mẹ gotẹ ḅo wamịna ọgọnọ gbana ye.”
22 #
Suk 37.21,22 Rubẹnị nwẹnị pakịrị, “À ḍuko ọ́ pịrị-a ó si kẹ ḅị kalatụḅọ ḅe mịẹ ma? Kụma ó poki ḍụkụ-a. Anie ḅụ mịọkụ ori ọmbie ọsụma fomu-ḅara mẹ ḅo wa la tẹẹ.” 23Ịn nimi-a mịnẹ Josẹfụ ịn fiearị ye naarị, gbala ẹkwẹn daḅọrọmaḅọ ịna ogboku emi ẹrẹsị. 24Anịtẹso Josẹfụ nwẹnị ịna aḅụụ pịkị tẹ mẹnjị sikima tẹ tẹmẹ-la ḅara kẹ owu. Ọ̀ nwẹnị pịkịma ịn ḍọkụma-ḅo tẹ ẹkwẹn ịn pịrị. Ọ̀ nwẹnị ịna ḅụụ Simiyọnị ọkị tẹ ịna tọrọkọ ọ̀ fịna.
Josẹfụ Owiapụ-Amịnapụ Pịkịma-so Kenanị Mum
25Josẹfụ nwẹnị tọn ịn fịye kẹ ịna akpa ma ḅio sụa, sụa ḅinma, tẹ ọrụḅọ-ọrụḅọ igbigi kẹ mḅọ akpa ḅio sụa, tẹ etela ḅụ ịn fị ma-so ḅarị fịye kẹ ịn pịrịị. Miemẹ ịn mịẹ ịn pịrịm. 26Anịtẹso ini ịna fịye kẹ ịna yedogi-anama ọgọnọ gbana tẹ som. 27Ini ḅẹ gbọrụḅọ ịn ḍin mẹ kẹ simearị anga ḅụ nama fịye kẹ ò yedogi-nama pịrị fị ḅẹ amịna akpa finji tẹ nwẹnị ori igbigi ẹrị ori akpa ḅịḅị ḅụ. 28Ọ̀ nwẹnị ori owiapụ-amịnapụ ma ḅẹẹ, “Ị̀ igbigi ini anị kẹ pịkị ị̀ pịrị tẹ; mie anị ị̀ akpa ḅịḅị ḅụ!” Miemẹ ḅụ ịna ḅioḅẹngbọ nwẹnị pikiri, tẹ oju sẹkị ḅụ ịn nwẹnị tọrụ pịkị jụmọ-jụmọ da, tẹ ḅẹẹm, “Mie ḅọrọ tiye tẹ Tamụnọ kẹ wa mịẹ?”
29Ịn ḅo Kenanị ḅụ ịna ḍaḅọ Jekọbụ la tẹso, ịn nwẹnị ye tẹ ịn la aị mamgba ḍuko ọ̀ pịrị, tẹ ḅẹẹm, 30“Tomḅọ ḅe, ama mẹ nyanaḅọ ḅe bala-a ḅara kẹ ẹkwẹn wa pịrịm, tẹ ama mẹ ẹnyẹ ḅẹ ḅo apụ ḅẹrẹ kẹ wamịna sịḅị sẹịnm. 31Kụma wa ọ̀ ḅẹẹm, ‘Wamịnị anie karakara atomi, wamịnị ama ẹnyẹ-apụ-a. 32Wamịnị wamịna ḍaḅọ iyi owiapụ-awọmẹ, wamịnị oyi maa apụ finji, gbọrụḅọ ḅarị ofori, anịsakị ịrụ-tẹịn ḅọ ḅe mịmgba wamịna ḍaḅọ na Kenanị ama mẹ ḅio emi’ 33Anịtẹso tomḅọ ḅe, ama mẹ nyanaḅọ ḅe nwẹnị wa ḅẹẹ, ‘Miemẹ ḅụ mie à ḅọrọ tẹ nimi ḅarịye mịnẹ ọmịnị karakara atomi: ọmịnị aḅụụ ḅẹ gbọrụḅọ ị̀nịna sime ḅa, tẹ ọmịnị kirikọn apụ ma ịnụ mẹ gotẹ fịye ọkị mu ọmịna awarị-kpo ma pịrịị, tẹ so ó muarị anga muu. 34Ọmịnị ọmịna iyimbere ịrụ-tẹịn ḅọ ḅe ọkị-ḅo ị̀ pịrịị; anịtẹrẹmẹ à nimi ḅa mịnẹ ọmịnị ama ẹnyẹ-apụ-a kụma karakara atomi, anịsakị arị ọmịna iyimbere ḅe ḅọrọma ọ́ pịrị ḅa, tẹ ọmịnị ama mẹ ḅio tuḅokọn ḅa.’ ”
35Ini ịna akpa ma ḅio sime aị sara pakama-ḅo sakị, in ẹrịm ọrụḅọ-ọrụḅọ igbigi puku mḅọ akpa ḅio emi; tẹ ini na, ịna ḍaḅọ na ịna igbigi apuku ma ẹrị tẹso, ịna ekpe nwẹnị tukutuku. 36Ịna ḍaḅọ Jekọbụ nwẹnị ịn ḅẹẹ, “Ị̀ awọmẹ mamgba ọ́ ḅaa fama tẹ; Josẹfụ ḅarị ofori, anịsakị Simiyọnị ḅarị pịkị ofori, anịsakị mịọkụ ọ́ pịkị Benijamịnị ọkị ḅẹ tẹ; mie mẹmgba ḅo ì ponoma ḅẹ tẹ.”
37Anịtẹso Rubẹnị nwẹnị ọ̀ ḍa ḅẹẹ “Ị̀ maa owiapụ-awọmẹ ma ḅaa, arị ọ̀ pịkịma ḅo ị́ pịrị-a ḅẹḅẹ, ọ̀ kẹ ị̀ ḅara sụa, anịsakị arị ọ̀ pịkịma-ḅo ị́ pịrị ḅa.”
38Kụma Jekọbụ nwẹnị ḅẹẹ, “Ì owiḅọtụḅọ ḅe na ị́ na mu ḅịa, kẹ gotẹ ọkọ ḅẹẹarị, ori iyimbere fịị tẹ, tẹ ori ngẹrị kọnm, mu ye tẹ ó mu ḅarịye mẹ ḅụ ye ọ̀ la ọkụma, í kururu ọkị-ḅo ị̀ sịḅị ḅẹ iḅulu na sụa tẹ àrị anị ḅụ fịị ḅa.”
Attualmente Selezionati:
Suku-saakị 42: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
