Paka-so 6
6
1Kụma KỊNỊNYANAḄỌ ḅe nwẹnị Mozizi ḅẹẹ, “Mịọkụ à kẹ Fero mịẹ ḅarịye ị́ ẹrị ḅa; kẹ gotẹ ọkọ ḅẹẹarị, kụrọ ḅara ḅụ ori ịn fịrịma pakama ḅa; kụrọ ḅara mie ọ̀ kẹ ori ama mẹ ḅụ ịn dee pakama ḅarịye.”
Tamụnọ Mozizi Sịnm
2 #
Suk 17.1; 28.3; 35.11; Pks 3.13-15 Tamụnọ nwẹnị Mozizi ḅẹẹ, “Yẹrị anie KỊNỊNYANAḄỌ ḅee. 3À ḅụụ-pakama Ebira-amụ ḍiem, Ayịzịkị ḍiem, pịkị Jekọbụ ḍiem Kụrọmamgba Nyana Tamụnọ ḅara ḅụ, kụma arị ị̀ ẹrẹ, KỊNỊNYANAḄỌ ḅe, ḅara kẹ ị̀ ḅụụ mie pakama tẹ ini ì nimi-a. 4À pịkị ama mẹ tẹ ini igoniapụ ḅara kẹ anga Kenanị ama mẹ kẹ ịn pịrị ḅẹ ọḅọkụ sọ kẹ ini na fịm. 5Anie sikima, arị Izirẹlịapụ ma, inima tẹ Ijiputi-ḅẹ-apụ ma omoni ḅara-ḅio ọlọ-sịẹma wararị apụ ma iningi mẹ naa tẹ, anịsakị arị ị̀ ọḅọkụ mẹ kẹ ḅiokoroma tẹ. 6Anịẹrẹsị Izirẹlịapụ ma ḅẹẹ, ‘Yẹrị anie KỊNỊNYANAḄỌ ḅee, anịsakị arị Ijiputi ḅẹ apụ ma dogi-aị ma suku-ḅio ḅụ ọ́ pakama-ḅo ḅa tẹ arị ọ́ ḍụa-ḅọrọma ḅa ịna omoni ḅara mẹ ḅio, sụụn-pakatẹ ḅara-kọngọ na, gburo-gburotẹ opu ḅẹrẹkọn amịẹaị mịẹ ḅara na à nwẹn kẹ ọ́ pakịrị ọkị ḅa; 7anịsakị arị ọmịnị ọkị tẹ kẹ ị̀ atomi mịẹ ḅa, tẹ arị ọmịna Tamụnọ sọ ḅa, tẹ ó nimi ḅa mịnẹ yẹrị anie KỊNỊNYANAḄỌ ọmịna Tamụnọ ḅee, oriḅe tẹ Ijiputi-ḅẹ-apụ ma dogi-aị ma suku-ḅio ḅụ ọ́ pakama-ḅo ḅọ ḅe. 8Tẹ arị ọmịnị ọkị-ḅo ama mẹ tẹ à ye karị ḅara kẹ mininim à kẹ Ebira-amụ na, Ayịzịkị na, Jekọbụ na pịrị ḅarị ama mẹ ḅio suu ḅa; arị anị kẹ ọ́ pịrị tẹ anị ọmịna nye sọ ḅa. Yẹrị anie KỊNỊNYANAḄỌ ḅee,’ ” 9Mozizi mị-ḅara mẹ ḍuko Izirẹlịapụ ma pịrịm, kụma ịn Mozizi poki ḍụkụ-a ịna kaantẹ tẹmẹ na, ịna tọrụsiẹrị omoni-sọ ḅara na gotẹ.
10KỊNỊNYANAḄỌ ḅe nwẹnị Mozizi ḅẹẹ, 11Sọ-mu ḍuko Fero, Ijiputi ḅẹ amadaḅọ pịrịị, ori Izirẹlịapụ ma wẹrịsoo, ini ori ama ḅio paka-so.
12Kụma Mozizi nwẹnị KỊNỊNYANAḄỌ ḅe ḅẹẹ, “Ḍikii Izirẹlịapụ ma sọ amụ ì poki-a, tọ-ḅara ḅụ Fero rẹ ì poki ḅẹ, jen-a jen-a yẹrị ḅẹlẹ-pẹle-a ḅọ?”
13Ọkụma KỊNỊNYANAḄỌ ḅe ẹkwẹn Mozizi na, Erọnị na pịrịm ịn tọn Izirẹlịapụ ma na, Fero, Ijiputi ḅẹ amadaḅọ na pịrịị ini Ijiputi amụ ḅụ Izirẹlịapụ ma pakama-ḅo ḅẹ ḅara.
Mozizi Na Erọnị Na Paka Furo Ḅẹ Ḍiri
14Mịna apụ ma anie ịna aḍapụ ma awarị ma ḅẹ sịḅịdapụ ma; Rubẹnị, Izirẹlị tarị tụḅọ (mgbe) ḅe owiapụ-awọmẹ anie: Hanọkụ na, Palụ na, Hẹzịrọnị na, pịkị Karimu na; mịna apụ ma anie Rubẹnị ḅụụ ḅụ paka-ḅo afuro.
15Simiyọnị owiapụ-awọmẹ ma anie: Jemuhẹlị na, Jamịnị na, Ohadi na, Jakini na, Zoha na, pịkị Sahulu, anie Kenanị ḅẹ ẹrẹḅọ iyi owiḅọtụḅọ ḅe na; mịna apụ ma anie Simiyọnị ḅụụ ḅụ paka-ḅo afuro.
16 #
Kịẹ 3.17-20; 26.57,58; 1 Pkị 6.16-19 Mịna apụ ma anie Livayị owiapụ-awọmẹ ma ẹrẹ, ịna aḅụọ ḅụ ịn wẹrịtẹ paka ḅara: Gasọnị na, Kohatị na pịkị Mẹrarị na. Livayị ḍumo ḅụ ọ̀ sịḅị ḅọrọ akụra anie tẹra akụra fa kụra sọnọma asi (137). 17Gasọnị owiapụ-awọmẹ ma anie: Libini na, Simeyi na, gbọrụḅọ gbọrụḅọ amịna afuro nyanam. 18Kohatị owiapụ-awọmẹ ma anie; Amụramụ na, Izarị na, Hẹbụrọnị na pịkị Uziyẹlị na. Kohatị ḍumo ḅụ ọ̀ sịḅị ḅọrọ akụra anie: Kụra sonioa asi oyi finji na tẹra akụra na (133). 19Mẹrarị owiapụ-awọmẹ ma anie: Mali na Musi na. Mịna apụ ma anie Livayị ḅụụ ḅụ paka-ḅo afuro, ịna aḅụọ ma ḅụ ịn wẹrịtẹ paka ḅara.
20Amụramụ nwẹnị ọ̀ ḍa ịyịmbara Jokibẹdị ọkị sime, tẹ á nwẹnị Erọnị na, Mozizi na iyi ọ̀ pịrị. Amụramụ ḍumo ḅụ ọ̀ sịḅị ḅọrọ akụra anie tẹra akụra fa kụra sọnọma asi (137). 21Izarị owiapụ-awọmẹ ma anie Kora na, Nẹfẹgi na pịkị Zikiri na. 22Anịsakị Uziyẹlị owiapụ-awọmẹ anie Misẹlị na, Ẹlịzafanị na pịkị Sitiri na.
23Erọnị nwẹnị Amịnadabụ ẹrẹḅọtụḅọ Ẹlịsẹba, Nasọnị ịyịmbara ọkị sime, tẹ á nwẹnị Nadabụ na, Abihu na, Ẹlịyeza na pịkị Itama na iyi ọ̀ pịrị. 24Kora owiapụ-awọmẹ ma anie: Asi na, Ẹlịkena na, pịkị Abịyasafụ na; mịna apụ ma anie Kora furo-ḅẹ-apụ ḅụ paka-ḅo afuro. 25Erọnị owiḅọtụḅọ Ẹlịyeza nwẹnị Putiyẹlị eremịna-awọmẹ ma ḅẹ gbọrụḅọ ọkị sime, tẹ á nwẹnị Finihasi iyi ọ̀ pịrị. Mịna apụ ma anie Livayị furo-ḅẹ-apụ ma ḅụ ḍa awarị-warị ma ḅẹ sịḅịdapụ.
26Mịna apụ ma mie Erọnị na, Mozizi na tẹ KỊNỊNYANAḄỌ ḅe ḅẹẹm, “Ijiputi ama mẹ ḅio ịna kpo-kpo ma ḅụ Izirẹlị ḅe apụ ma pakama-ḅoo” kẹ ḅẹẹ apụ ma. 27Ḅị Mozizi ḅe na, ḅị Erọnị ḅe na, ini mie Ijiputi ḅụ Izirẹlịapụ ma pakama-ḅo gbolomaye ḍuko Fero, Ijiputi ḅẹ amadaḅọ ḅe pịrị apụ.
KỊNỊNYANAḄỌ Ḅe Mozizi Na Erọnị Na Fịrịmam
28Anị ene mẹ ḅụ, KỊNỊNYANAḄỌ ḅe Ijiputi ama mẹ ḅio ẹkwẹn Mozizi pịrị sakị, 29KỊNỊNYANAḄỌ ḅe Mozizi ḅẹẹm, “Yẹrị anie KỊNỊNYANAḄỌ ḅee, à ḍuko ị́ pịrị aị mamgba ḍuko Fero Ijiputi ḅẹ amadaḅọ pịrịị.”
30Kụma Mozizi KỊNỊNYANAḄỌ ḅe ḅẹẹm “Ḍikii yẹrị anie ḅẹlẹ pẹlẹ-a ḅọ, ndẹẹ anịtẹrẹmẹ Fero kẹ ì poki ḅẹ ḅara?”
Attualmente Selezionati:
Paka-so 6: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
