Paka-so 5
5
Mozizi Na Erọnị Na Ijiputi Ḅẹ Amadaḅọ Dama-mum
1Mị sakị mẹ ḅọrọ tẹso, Mozizi na, Erọnị na nwẹnị Fero dama-mu tẹ ḅẹẹ, “Mị-ḅara mie KỊNỊNYANAḄỌ ḅe, Izirẹlịapụ tẹkẹarị Tamụnọ ḅe ḍuko yee, ‘Ị̀ atomi wẹrịso in so, mịẹtẹ ini ịkpa mẹ ḅio kopini afịaị sọ tẹ alalị fị ị̀ pịrị ḅẹ ḅara.’ ”
2Kụma Fero nwẹnị ḅẹẹ, “Anị KỊNỊNYANAḄỌ ḅe anie tụḅọ, tẹ arị pọkọ poki tẹ Izirẹlị wẹrịso tẹ ịn so ḅẹ? KỊNỊNYANAḄỌ ḅe arị ò nimi-a, anịsakị anie sikima, à ḍụkụ tẹ Izirẹlị so ḅịa.”
3Anịtẹso ịn nwẹnị pakịrị, “Hiburu ḅẹ apụ ma Tamụnọ ḅe amịna ḅụụ pakama wa ḍie tẹẹ. Wa ị́ tẹkẹm, minini wa pịrị tẹ wa tẹra aḍin kẹ ịkpa mẹ ḅio mẹnjị mu tẹ agba mịẹ KỊNỊNYANAḄỌ wamịna Tamụnọ ḅe pịrị, anieofori ò ḅofa ama gbaịn obi, anịanịa okologie kẹ wa ḅaa fama.”
4Kụma Ijiputi ḅẹ amadaḅọ ḅe nwẹnị Mozizi na Erọnị na gbela, “ó tiegotẹ tomi ma ọkị so ịna kọrịnama ḅụ? Ó mu ọmịna kụrọtẹ akọrịnama ma kọrịị.” 5Tẹ Fero nwẹnị paa ẹkwẹn tẹ ḅẹẹ, “Tomi ma mịọkụ ama mẹ ḅio ḅin la tẹ ḅara ḍikii, tẹ ọmịnị ịn wẹrịso-so tẹ ini ịna kụrọtẹ akọrịnama ḅụ ịnyọsara ma-ḅọrọarị!”
6Anị gbọrụ ene mẹ, Fero nwẹnị tọn kụrọ kọrịnama tọn tomi ma pịrịarị sịḅịdapụ ma na, ịn ḍikiḍikiarị apụ ma na pịrị, 7“Ọ́ ḅarị jen-maaịn kẹ ọ́ tarị asịra pịrị-pịrị ḅara ḅụ mịna atomi ma pịrị tẹ ịn kẹ biriki fọị ma; yee ini ḅarana mu asịra ḍọkị ịna aḅụụ pịrị. 8Kụma biriki kịẹn-ḅịḅị tẹ tarị ịn tẹmẹ-tẹmẹ ḅara mẹ ọ́ nwẹn kẹ ịna ọgọnọ gbana ḅa, ó gotẹ anị ḅụ ye sin ḅẹ ye ofori, kẹ gotẹ ọkọ ḅẹẹarị, ịn kọrị ḅẹ kọrịnama ofori, anie mie ịn gotẹ owuarị àrị in wẹrịso tẹ in mu agba mịẹ ịna Tamụnọ pịrị. 9Yee iku tarị ḅẹ kọrịnama nẹngị kọrịnama ini ọgọnọ gbana, mịẹtẹ ini anị ḅụ sime tẹ kụrọma kọrịnama kọrị tẹ ḅarị iruo ẹkwẹn-aḅịḅị kẹ ye-sịn ma.”
10Mie ḅụ kụrọ kọrịnama tọn tomi ma pịrịarị sịḅịdapụ ma na, ịn ḍikiḍikiarị apụ ma na nwẹnị paka mu tẹ tomi ma ḅẹẹ, mie Fero ḍuko yee, “À ḅarị asịra kẹ ọ́ pịrị ḅịa. 11Ọmịnị ḅarana inetẹ anị ḍọkị-ẹrị ḅẹ anga goyegoye ḅụ mu anị nyana-a; kụma ọmịna kọrịnama ḅụ gbala-gbala ye so ḅịa.” 12Mie ḅụ tomi ma gala-gala Ijiputi ama mẹmgba ikelema-korom, asịra nakara ịkpakụ kọn ḅẹ ḅara. 13Kụrọ kọrịnama tọn sịḅịdapụ ma nwẹnị ịn gbiri-gbirima tẹ ḅẹẹ, “Ọmịnị ene-ene ḅụ ọ́ kọrịarị ḅara mẹ kọrị karamaa, asịra emi sakị ọ́ kọrị-kọrị ḅara mẹ.” 14Anịsakị ịn nwẹnị Izirẹlịapụ ma ḅụ inima tẹ Fero kụrọ kọrịnama kọrị sịḅịdapụ ma tọnm ịn ḍikiḍikii nwẹn ḅẹẹ apụ ma fomu, tẹ ịn gbela, “Tiegotẹ mịmgba ḅụ ọmịnị ọ́ tarị kọrị-kọrị ḅara mẹmgba kọrị-a biriki tẹmẹ mẹ ḅụ.”
15Anịtẹso Izirẹlị ḅe apụ ma ḍikiḍikiarị apụ ma nwẹnị ḅo owu Fero pịrị, “Tiegotẹ ị́ mị ḅara kẹ ị́ afịrịmẹnjịapụ na mịẹ? 16Ini asịra sọ kẹ ị́ afịrịmẹnjịapụ pịrị-a, anịsọ ịn wa ḅẹẹm, ‘ó biriki tẹmẹẹ!’ Tẹ ịn kẹ ị́ afịrịmẹnjịapụ fomu tẹ ḅara ḍikii; kụma mịẹkọn mẹ ị́ atomi ma ḅụ emi.”
17Kụma ọ̀ nwẹnị pakịrị, “Ọ́ kọrịnama kọrị-a, ọ́ kọrịnama kọrị-a, mie ó gotẹ ḅẹẹ ye, ‘Wa wẹrịso tẹ wa mu agba mịẹ KỊNỊNYANAḄỌ ḅe pịrị.’ 18Ó so tẹ mu kọrịnama kọrịị mịọkụ; kẹ gotẹ ọkọ ḅẹẹarị, ini asịra kẹ ọ́ pịrị ḅịa, anịsọ ọ́ tẹmẹ-tẹmẹ biriki kịẹn-ḅịḅị mẹ mie ọ́ tẹmẹ ḅarị ye.” 19Izirẹlịapụ ma ḍikiḍikiarị apụ ma ẹrịm mịnẹ ịn si mẹnjị kọnm, ịn ḅẹẹm, “Mịẹtẹ ene-ene ḅụ ọ́ tẹmẹ-tẹmẹ biriki kịẹn-ḅịḅị ḅụ ye so ḅẹ ye ofori” nwẹn ḅẹẹ sakị 20Ịn nwẹnị mu Mozizi na, Erọnị na tẹ sime ịn koruarị apụ ma na bịama ịn Fero tọrọkọ pịkịma-ḅoarị ogbo, 21tẹ ịn nwẹnị Mozizi na Erọnị na ḅẹẹ, “KỊNỊNYANAḄỌ ḅe ó ḍiki tẹ kọọn, gbala ọ́ mịẹtẹ wa Fero tọrụ ịnọ apụ na, ori afịrịmẹnjịapụ ịganịma apụ na sọ tẹ, tẹ okologie kẹ ịna ḅara sụa tẹ ịn kẹ wa ḅaa.”
Mozizi Ḅẹrẹ Ḍuko KỊNỊNYANAḄỌ Ḅe Sụam
22Anịtẹso Mozizi nwẹnị sin pịkị KỊNỊNYANAḄỌ ḅe da, tẹ ḅẹẹ, “Yei KỊNỊNYANAḄỌ, í tiegotẹ ị̀ kẹ fịrịma? 23Kẹ gotẹ ọkọ ḅẹẹarị, àrị ị́ ẹrẹ ḅụ ḅo ẹkwẹn Fero pịrị kụra-ḅio, siye mie ọ̀ kẹ mịna atomi ma mịẹarị ye, tẹ ị́ gbala-gbala ị́ atomi ma ḍụa-ḅọrọma-a.”
Attualmente Selezionati:
Paka-so 5: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
