Paka-so 4
4
Tamụnọ Ḅụụ-buama-aị Mịẹ Kụrọ Kẹ Mozizi Pịrịm
1Anịtẹso Mozizi nwẹnị pakịrị, “Kụma ḍikii, ini ì minini ḅịa, anịanịa ị̀ pọkọ poki, kẹ gotẹ ọkọ ḅẹẹarị, ịn ḅẹẹ ḅa, ‘KỊNỊNYANAḄỌ ḅe amịna ḅụụ kẹ í ḍie-a.’ ”
2KỊNỊNYANAḄỌ ḅe nwẹnị ò gbela, “Anie mẹ tẹ ị́ ḅara-ḅio simearị ye tiye?”
Ọ̀ nwẹnị pakịrị, “Mkpara.”
3KỊNỊNYANAḄỌ ḅe nwẹnị ḅẹẹ, “Anị kẹ wakị kiri-ḅio koromaa” Mie ḅụ ori anị kẹ wakị kiri-ḅio koromam, tẹ anị nwẹnị oronwi ḍi, tẹ Mozizi anị ḅụ ḍumo-mangị kọn som. 4Kụma KỊNỊNYANAḄỌ ḅe nwẹnị Mozizi ḅẹẹ, “Ị́ ḅara sụn-pakama tẹ anị etemi ḅụ anị ọkịị” — mie ḅụ ori amịna ḅara sụn-pakama tẹ anị ọlọm, tẹ anị ḅo ọ̀ ḅara-ḅio mkpara sọm — 5“mịẹtẹ ịn minini ḅẹ ḅara mịnẹ KỊNỊNYANAḄỌ ịna atẹngịapụ ma sịḅị-tuu pịrị Tamụnọ ḅe, anie Ebira-amụ na Ayịzịkị na pịkị Jekọbụ na sịḅị-tuu pịrị Tamụnọ ḅe ḅụụ pakama ị́ ḍie tẹẹ.”
6KỊNỊNYANAḄỌ ḅe nwẹnị siin ọ̀ ḅẹẹ, “Ị́ ḅara kẹ í toni-ḅio suu.” Tẹ ori ọ̀ ḅara kẹ ò toni-ḅio suum; tẹ ori anị pakama-ḅo sakị, ḍikii, sofịnị-obi ọ̀ ḅara ḅụ paka tẹ eene mgbọlị pịna-pịna ḅara kẹ pịna-pịna tẹẹ. 7Anịtẹso KỊNỊNYANAḄỌ ḅe nwẹnị ḅẹẹ, “Ị́ ḅara mẹ kẹ siin í toni-ḅio suu.” Mie ḅụ ò siin ọ̀ ḅara kẹ ò toni-ḅio suum, tẹ ori anị pakama-ḅo sakị, anị ḅo ori oju meni kirikọn anga mẹ sime-ḅara sime tẹẹ. 8KỊNỊNYANAḄỌ ḅe nwẹnị ḅẹẹ, “Ịn tarị elekima mẹ minini-a anịanịa anị kẹ ye-sịn-a ḅẹḅẹ, ini ọḅụkọn elekima mẹ minini ḅa. 9Ịn mịna maa elekima ma sọ minini-a, anịanịa, ị́ pọkọ poki tẹ anị kẹ ye-sịn-a ḅẹḅẹ Nayịlị nwẹn-sịn tọrụ mẹ ḅụ ị́ minji ḍuu ọkị ḅa, anịsakị anị kẹ kpongbo-kiri mẹ ḅụ sara-a, tẹ minji mẹ tẹ ị́ Nayịlị nwẹn-sịn tọrụ mẹ ḅụ ḍuu ọkị minji mẹ ḅo ọmbie sọ ḅa kpongbo-kiri mẹ ḅụ.”
10Kụma Mozizi nwẹnị KỊNỊNYANAḄỌ ḅe ḅẹẹ, “yei ị̀ Nyanaḅọ, àrị ẹkwẹn ọrụ nimi-a, à paka kụra-ḅio, anịanịa ị́ saakị ẹkwẹn yẹrị ị́ fịrịmẹnjịḅọ pịrịarị kụra-ḅio sọ; ọkụma ẹkwẹn ḅụ ị̀ ḅẹlẹ sarasara-a, tẹ à paḅụrụarị.”
11Anịtẹso KỊNỊNYANAḄỌ ḅe nwẹnị ọ̀ ḅẹẹ, “Tụḅọ tomḅọ ḅịḅị mẹ tẹmẹ? Tụḅọ ọ̀ mịẹtẹ ọ̀ ḅịḅị ikpopu, anịanịa ò ḅeri iningi, anịanịa ò ye ẹrịarị, anịanịa ọ̀ tọrụngbọ pụụn? Yẹrị KỊNỊNYANAḄỌ ḅe, anị mịẹ-a? 12Anịẹrẹsị mịọkụ muu, anịsakị arị ị́ ḅịḅị mẹ na sime ḅa, tẹ ị́ kọn ḅẹ ẹkwẹn kẹ í toluma ḅa.”
13Kụma Mozizi nwẹnị ḅẹẹ, “yei ị̀ Nyanaḅọ, arị ị́ tẹkẹm, ị́ fịrịma ḅẹ jụmọ fịrịmaa.”
14Anịtẹso KỊNỊNYANAḄỌ ḅe ịganị Mozizi pịrịm, tẹ ọ̀ nwẹnị ḅẹẹ, “Í iyimbere Erọnị Livayị furo-ḅẹ-ḅọ ḅe ori ofori? À nimi wararị mịnẹ ori inetẹ iḅiọkụ ẹkwẹn ḅa; anịsakị ḍikii, ọ̀ paka ị́ na donia ḅẹ ḅoarị, tẹ ọ̀ tọrụngbọ kẹ ị́ ẹrị sakị ori amịna ḅioḅẹngbọ ḅụ ḅio ḅẹlẹ ḅa. 15Anịsakị ị́ ẹkwẹn ọ̀ pịrị tẹ ẹkwẹn-aḅịḅị ma kẹ ọ̀ ḅịḅị ḅio suu ḅa, arị ọmịnị maa apụ ma kọn ḅarị ẹkwẹn da karakarama ḅa, tẹ ọ́ mịẹ ḅẹ ye kẹ ó toluma ḅa. 16Ori ị́ kọn ḅẹ ẹkwẹn kọn tomi ma pịrị ị́ pịrị ḅa, tẹ ị́ ḅịḅị ẹkwẹn daḅọrọmaḅọ sọ ị́ pịrị ḅa, anịsakị ị́yẹrị nwẹnị gbala ọ̀ Tamụnọ ḅara sime ḅa. 17Anịsakị ị́ ḅara-ḅio ị́ mị mkpara mẹ tẹ ị́ kẹ elekima ma mịẹ ḅarịye mẹ ọkị ọlọ-sịẹma ḅa.”
Mozizi Pịkịma-so Ijiputi Mum
18Mozizi nwẹnị pịkịma-so ò fụanḅọ Jetiro ḍọkụma-mu tẹ ọ̀ ḅẹẹ, “Àrị ị́ tẹkẹm, yee à pịkị-so mu Ijiputi ḅụ ị̀ amịnapụ ḍiki ịn paa ḍumo wararị ḅoto.” Tẹ Jetiro nwẹnị Mozizi ḅẹẹ, “Dein na muu.”
19KỊNỊNYANAḄỌ ḅe nwẹnị Midiyanị ḅụ Mozizi ḅẹẹ, “Pịkịma-so Ijiputi muu, kẹ gotẹ ọkọ ḅẹẹarị, tomi ma tẹ ị́ ḅaa ḅẹ ḍọkị apụ mamgba ịn fịị fama tẹ.” 20Mie ḅụ Mozizi ọ̀ ta na, ori owiapụ-awọmẹ na kẹ yedogi-nama ọgọnọ kpọlịma tẹ pịkịma-so Ijiputi ama mẹ mum; anịsakị ọ̀ ḅara-ḅio Mozizi Tamụnọ mkpara mẹ ọkị ọlọ-sịẹmam.
21KỊNỊNYANAḄỌ ḅe nwẹnị Mozizi ḅẹẹ, “ị́ pịkịma-mu Ijiputi la sakị, ẹrị mịnẹ í Fero tọrọkọ ḅụụ-buama-aị mamgba tẹ à kụrọ kẹ ị́ pịrịm mịẹ nwẹn ḅẹẹ aị ma mịẹ; kụma àrị ò ḅioḅẹngbọ kụrọma ḅa, anie mịẹtẹ ọ̀ ḍụkụ tẹ tomi ma so ḅịa. 22Anịsakị í Fero ḅẹẹ ḅa, mie KỊNỊNYANAḄỌ ḅe ḍuko yee, ‘Izirẹlị anie ị̀ tarị owiḅọtụḅọ. 23#Pks 12.29Anịsakị à ḍuko ị́ pịrịarị ị̀ owiḅọtụḅọ wẹrịsoo, mịẹtẹ ọ̀ fịrịmẹnjị ị̀ pịrị ḅarị ḅara. Ị́ ḍụkụ tẹ ò so-a ḅẹḅẹ, àrị ị́ tarị owiḅọtụḅọ ḅaa ḅa.’ ”
24Ijiputi mu etela mẹ ḅụ ini ịnyọsararị anga ḅụ KỊNỊNYANAḄỌ ḅe ori na donia tẹ ọ̀ ḅaa ḅẹ ḍọkịm. 25Anịtẹso Zipora nwẹnị oḅuarị ḍụḅarị gbọrụ pakịrị ọkị tẹ kẹ arị owiḅọtụḅọ tarị-ḅụụ sịn, tẹ anị kẹ Mozizi aḅụọ-suku lama tẹ ḅẹẹ, “Tụkụma ḅara ḅụ ị́ ọmbie ḅụ ḅo diḅọ sọ ị̀ pịrị tẹ!” 26Mie ḅụ ori ọ̀ wẹrịsom. Anị sakị mẹ ḅụ, tarị-ḅụụ sin mẹ mie á gotẹ ḅẹẹ ye, “Ị́yẹrị anie ọmbie diḅọ.”
27KỊNỊNYANAḄỌ ḅe nwẹnị Erọnị ḅẹẹ, “Mẹnjị ịkpa mẹ ḅio sọ-mu Mozizi na donia.” Mie ḅụ ọ̀ mẹnjị mum, tẹ Tamụnọ tụndụ mẹ akaka ori na doniam, tẹ ọ̀ ḅịḅị nọnjịm. 28Anịtẹso Mozizi ẹkwẹn-aḅịḅị mamgba tẹ KỊNỊNYANAḄỌ ḅe kẹ ọ̀ fịrịma ḅara mẹ ḍuko Erọnị pịrị, pịkị elekima mamgba tẹ ọ̀ tọn ọ̀ pịrịm ọ̀ mịẹ nwẹn ḅẹẹ aị ma na ḍuko ọ̀ pịrị famam. 29Anịtẹso Mozizi na, Erọnị na nwẹnị mu tẹ Izirẹlịapụ ma ḅẹ omongiapụ mamgba kobiri gboloma. 30Tẹ Erọnị nwẹnị ẹkwẹn-aḅịḅị mamgba tẹ KỊNỊNYANAḄỌ ḅe kọn Mozizi pịrị aị ma ḍuko, pịkị tomi ma tọrụ ogbo ḅụ elekima ma mịẹm. 31Tomi ma nwẹnị minini; tẹ ịn naam mịnẹ KỊNỊNYANAḄỌ ḅe ḅo toluma Izirẹlịapụ ma ḍiki tẹ anịsakị ori ịna tọrụsiẹrị ẹrị tẹ nwẹn ḅẹẹ ye ḅụ ịn nwẹnị ịna sịḅị-tuu tẹ sunsin Tamụnọ pịrị.
Attualmente Selezionati:
Paka-so 4: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
