Paka-so 30
30
Kụnụaị Dọkịma Agbamịẹ-anga Mẹ
(Pks 37.25-28)
1“Ị́ ọgọnọ ḅụ kụnụaị dọkịma ḅẹ agbamịẹ-anga nama ḅa; ịn kẹ akasiya sịn-arị sịn mie ị́ kẹ anị nama ḅarịye. 2Anị ḅẹ nangwọ gbọrụ ḅụọ-kuḅu na maa ẹnzụ na (45 cm); anị ḅẹ finjima pịkị gbọrụ ḅụọ-kuḅu na maa ẹnzụ na (45 cm); anị ḅẹ nangwọ na finji na gbasị ḅa; tẹra ḅụọ-kuḅu (90 cm) anị ḅẹ gele sọ ḅa, tẹ anị ḅẹ sụa-paka ịfalị ma anị na gbọrụ ḅụ sime ḅa. 3Ị́ gwa-a karakara golu sọ anị na, anị ḅẹ ọgọnọ mẹ na, anị ḅẹ akaka ma ikelema-koro na, anị ḅẹ ịfalị ma na sara ḅa, tẹ pịkị kẹ anị pono ikelema-koro ḅa. 4Arịḅẹ ponoye mẹ suku ị́ maa nụnụma sụa anị pịrị ḅa, dama-dama wararị maa akaka ḅụ mie ị́ arị sụa ḅarị ye, tẹ arị ịn kẹ anị dogi ḅẹ nangwọtẹ asịn sọ tẹ sime ḅẹ anga sọ ḅa. 5Ịn kẹ akasiya sịn sin mie ị́ kẹ arị ye tẹ golu sọ sara arị gbaịn ḅarịye. 6Kiki-pẹlẹ-ḅịtẹ mẹ tẹ Ḅụụ Ḍie-pakama Igbe mẹ ọgọnọ ḅẹ Ḅịḅị-gbaịnye mẹ tẹ arị ọmịnị na ẹrịya ḅarị anga mẹ ḅịtẹ mẹ tọrọkọ mie ị́ anị kẹ koroma wẹrị ḅarịye. 7Erọnị nwẹnị anị ọgọnọ kụnụ lamarị kụnụaị dọkịma ḅa; dede goyegoye ọ̀ tọnjọ ma tẹlẹma ḅarị sakị ori anị dọkịma ḅa. 8Anịsakị ḅoḅiri ḅụ Erọnị tọnjọ ma tọnjị fama sakị, ori anị dọkịma ḅa, KỊNỊNYANAḄỌ ḅe tọrọkọ ḅụ dọkịma mu ḅẹẹ-sakị ḅẹẹ-sakị la ḅarị kụnụaị ọmịna ḅụọ ḅụ ọkị mu ḅụọ fa, ḅụọ paka la. 9Anị ọgọnọ ị́ fịafịa-a kụnụaị agba mịẹ ḅịa, anịanịa dọkịma-agba, anịanịa mgbọlị afịaị agba; anịsakị ị́ pịkị iru agba sọ mịẹ ḅịa. 10Kụra gbọrụ sakị, gbọrụ sakị Erọnị nwẹn kẹ si-wẹrịso pịrị agba mịẹ ḅa anị ḅẹ ịfalị ma ọgọnọ; kẹ si-wẹrịso si agba mẹ mịẹ ọmbie mẹ ọ̀ nwẹn kẹ si bẹkẹlẹma siin anị pịrị ḅa, ọmịna ḅụọ ḅụ ọkị mu ḅụọ-fa-ḅụọ-paka la kụra gbọrụ sakị, gbọrụ sakị ọ̀ nwẹn kẹ si bẹkẹlẹma siin anị pịrị ḅa; anị anie fịafịa-tẹịn yọ sọ KỊNỊNYANAḄỌ ḅe pịrị ye.”
Akpụrụ-warị Mẹ Ḅẹ Oso Igbigi
11KỊNỊNYANAḄỌ ḅe nwẹnị Mozizi ḅẹẹ, 12“Ị́ Izirẹlịapụ ma ḅụ sịḅị-sịḅị ma kịẹn fama sakị, anịtẹrẹmẹ gbọrụḅọ, gbọrụḅọ mḅọ ḅụụ-fụka ḅụ ḅọrọma ye kẹ KỊNỊNYANAḄỌ ḅe gbẹẹ amịna ḅụụ pịrị ḅa ị́ mḅọ kịẹn sakị mẹ ḅụ, mịẹtẹ fomu-ḅara ini ogbo-ḅio paka ḅịa ḅara ị́ ịn kịẹn sakị mẹ ḅụ. 13#Pks 38.25,26; Mat 17.24Gbọrụḅọ gbọrụḅọ tẹ sịḅị-sịḅị kịẹn mẹ ḅụ kịẹn ḅọ, kịẹn ḅọ miemẹ gbẹẹ ḅa: karakara igbigi tọn ye ḅụ tọọn paka-ḅo ịn kẹ sẹkẹlị sịn-arị igbigi mẹ kẹ maa anga ḍiya ḅẹ gbọrụ anga ịn nwẹn kẹ KỊNỊNYANAḄỌ ḅe pịrị ḅa agba mịẹ ḅara ḅụ. (Gbọrụ sẹkẹlị anie ịn kẹ Gera sịn-arị igbigi mẹ ḅẹ si.) 14Ọrụḅọ-ọrụḅọ tẹ sịḅị-sịḅị kịẹn mẹ ḅụ kịẹn ḅọ, kịẹn ḅọ si kụra sịḅị ḅụ ḅọrọtẹ ḅọ ḅụ ọkị iwo sime KỊNỊNYANAḄỌ ḅe pịrị agba mẹ mịẹ ḅa 15Ngọ-kọnḅọ ḅe ye pịrị gbanama ḅịa, anịsakị igoinḅọ ḅe pịkị oyi agẹra ma ḅụ ye sin tẹ pịrị ḅịa ọ́ sime KỊNỊNYANAḄỌ ḅe pịrị si-wẹrịso pịrị agba mẹ mịẹ ọmịna aḅụụ pịrị ḅẹ sakị.
16“Ị́ Izirẹlịapụ ma ḅara ḅụ si-wẹrịso pịrị igbigi mẹ ḍa ḅa, tẹ anị kẹ Kobiri Akpụrụ-warị mẹ ḅẹ kọrịnama ḅụ suu ḅa mịẹtẹ anị KỊNỊNYANAḄỌ ḅe tọrọkọ ḅụ Izirẹlịapụ kẹ ḅiokoroma ọkị-ḅo ḅẹ ḅara; mịẹtẹ ó si wẹrịso pịrị mịẹ ọmịna aḅụụ pịrị ḅarị ḅara.”
Opu Ojo Ẹfẹrẹ Mẹ Tẹmẹ Ḅẹ Ḅara
17KỊNỊNYANAḄỌ ḅe nwẹnị Mozizi ḅẹẹ, 18#Pks 38.8“Í ojo opu ẹfẹrẹ sọ tẹmẹ ḅa, anị ḅẹ suku sọ ojo, anị sime ye sịkịrị pịrịm. Ị́ anị kẹ Kobiri Akpụrụ-warị mẹ na, agbamịẹ-anga mẹ na ogboku koroma ḅa, tẹ í minji kẹ anị ḅio sụa ḅa, 19Erọnị na, ori owiapụ-awọmẹ na kẹ ịna aḅara na, ịna aḅụọ-suku na sịkịrị ḅarịye. 20Ịn mẹnjị Kobiri Akpụrụ-warị mẹ ḅio sọ-mu ḅarị sakị, anịanịa ịn fịrịmẹnjị ḅẹ sọma ḅo agbamịẹ-anga mẹ kpeki tẹ fịnị kẹ agba dọkịma KỊNỊNYANAḄỌ ḅe pịrị ḅẹ sakị, ịn minji kẹ ịna oju sịkịrị ḅa anieofori ịn ḅofa fịị. 21Ịn minji kẹ ịna aḅara na, ịna aḅụọ-suku na sikiri ḅa anieofori ịn ḅofa fịị; anị ḍiri ḅio kẹẹ-koro oloko sọ ịn pịrị gbamaso ḅa; anị sime oriḅe sọ pịrịm na ọ̀ ḅụụ ḅụ paka-ḅo apụ na, ịna ḅụọ ḅụ ọkị mu ḅụọ-fa-ḅụọ-paka la ḅa.”
Fịafịa-Pulo Mẹ Pikiri Gwa Ḅẹ Ḅara
22 #
Pks 37.29
Anie sikima, KỊNỊNYANAḄỌ ḅe pịkị Mozizi ḅẹẹm, 23“Iḅitẹịn ẹnyị ma ọkịị: Gilogilotẹ maha nwẹn-sịn kụnụarị ye mẹ ḅẹ sẹkẹlị ẹndẹ sọnọa si finji na, sịnamọnị nwẹn-sịn kụnụ lamarị ye mẹ ḅẹ sẹkẹlị oyia asi mesi oyi finji, anie maha mẹ kẹ maa anga ḍiya ḅẹ gbọrụ anga la ḅara na, ịn kẹ aromatiki nwẹn-sịn ye ḅẹ sẹkẹlị oyia asi mesi oyi finji na, 24Kasiya nwẹn-sịn ye ḅẹ sẹkẹlị ẹndẹ sọnọa si finji na olivu pulo ḅẹ ninea akarama pembe ye na (karakara ye-tọnye kẹ tọn ḅara ḅụ). 25Sẹntị mịẹ dẹrịḅọ gwa ye sime-ḅara mie ị́ kẹ mịna aị ma pikiri gwa tẹ anị fịafịa-pulo sọ ḅarịye; fịafịa-pulo anị nwẹn sọ ḅa. 26Ị́ anị kẹ Kobiri Akpụrụ-warị mẹ na, Ọḅọkụ-Igbe mẹ na ọgọnọ sara ḅa. 27Ị́ pịkị anị kẹ dẹbịlẹ mẹ na, anị ḅẹ ye mịẹ-aị mamgba na, tọnjọ-sịẹmaye mẹ na, anị ḅẹ ye mịẹ-aị mamgba na, kụnụaị dọkịma agbamịẹ-anga mẹ na, 28Dọkịma agbamịẹ-anga mẹ na, anị ḅẹ ye mịẹ-aị na, opu ẹfẹrẹ mẹ na anị ḅẹ suku mẹ na, ḅụ sara ḅa. 29Ị́ arị mịẹ fịafịama ḅa, tẹ arị fịafịa-tẹịn aị sọ ḅa; ḅụụ kẹ arị lama ye, lama ye ḅo fịafịatẹ ye sọ ḅa. 30Í fịafịa-pulo kẹ Erọnị na, ori owiapụ-awọmẹ na sịḅị sara tẹ ịn mịẹ fịafịama ḅa, mịẹtẹ ini agbamịẹapụ ḅara kẹ fịrịmẹnjị ị̀ pịrị ḅarị ḅara. 31Ị́ Izirẹlịapụ ma ḅẹẹ ḅa, ‘Mie mẹ ị̀ fịafịa-pulo sọ ḅa ọmịna ḅụọ ḅụ mu ḅụọ-fa-ḅụọ-paka la. 32Anị ja tomi oju ḅụ sara ḅịa, anịsakị ị́ anị gwaa ḅara mẹ kẹ anị kịkama jen gberie-sọ gwa ḅịa. Anị fịafịa wararị, anịsakị anị fịafịa ọ́ pịrị ḅa. 33Ḅẹḅọ-ḅẹḅọ tẹ anị kịkama gwa ḅọ gwa ḅọ, anịanịa anị ḅẹ ye kẹ etela-ogbo ḅẹ ḅọ lama ḅọ lama ḅọ, mḅọ atomi ḅụ ini mḅọ pẹlẹ-siin ḅa.’ ”
Kụnụaị Ma Pikiri Gwa Ḅẹ Ḅara
34KỊNỊNYANAḄỌ ḅe nwẹnị Mozizi ḅẹẹ, “Kụnụarị ẹnyị, ịn kẹ sịtakịtẹ na, ọnika na, galibanumu na sịn ẹnyị na gwa-a fịranịkịnịsẹnịsị na ḅụ gbasịma gberie-gberie ḅụ ye ọkịị, 35tẹ sẹntị mịẹ dẹrịḅọ ḅe pikiri gwaarị ḅara kẹ anị pikiri tẹ fụn kẹ sụa anị kpaịn tẹ fịafịa kụnụaị sọ. 36Ị́ anị ḅụ ye ọkị temi tẹ mgbọlị ma ḍọkọḍọkọ lama ḅa, tẹ anị ḅẹ ye kẹ Kobiri Akpụrụ-warị mẹ ḅio Ọḅọkụ-Igbe mẹ tọrọkọ asana sara ḅa, àrị ọmịnị na ẹrịya ḅarị anga mẹ ḅụ; anị fịafịa-tẹịn yọ sọ ọ́ pịrị ḅa. 37Anịsakị kụnụaị ma tẹ ị́ anị ḅẹ kụlọ-kụlọ ma wẹrịtẹ sime-ḅara mẹ kẹ mịẹ ḅarịye mẹ, ị́ anị mịẹ ọmịna aḅụụ pịrị ḅịa, anị ọmịna aḅụụ sime ḅarị ḅara, wẹrị KỊNỊNYANAḄỌ ḅe pịrị fịafịa ye. 38Ḅẹḅọ-ḅẹḅọ tẹ anị kịkaye mịẹ tẹ kẹ sẹntị ọmbị ḅara ọmbị ḅọ ọmbị ḅọ, mḅọ atomi ḅụ ini mḅọ pẹlẹ-siin ḅa.”
Attualmente Selezionati:
Paka-so 30: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
