Paka-so 29
29
Agbamịẹapụ Ḅelema Fịafịa Kọrịnama Pịrị Ḅẹ Ḅara
(Lẹv 8.1-36)
1“Mịọkụ miemẹ anie ị́ kẹ ịn mịẹ ḅarịye ịn mịẹ fịafịama sikima wẹrị ḅụ, mịẹtẹ ini agbamịẹapụ ḅara kẹ fịrị mẹnjị ị̀ pịrị ḅarị ḅara. Ḅụụ ḅụ ḅẹkụ ofori gbọrụ asambịrịma owi-nambulo na, maa ejimina na, 2ịn kẹ witi sịn mbịaka ḅụ iḅitẹịn ye kẹ mịẹ fịlawa kẹ sunmaye sọ-a ḅara kẹ mịẹ fịturu na, anị ḅẹ sunmaye so-a kịkị tẹ pulo kẹ pikiri aị na, sunmaye sọ-a ḍọkọḍọkọ ịkịka tẹ ịn pulo kẹ asana aị ọkịị. Ịn kẹ witi sịn mbịaka ḅụ iḅitẹịn ye mẹ kẹ mịẹ fịlawa mie ị́ kẹ arị mịẹ ḅarịye. 3Ị́ arị kẹ gbọrụ kana ḅio sụa ḅa, tẹ kana mẹ ḅio arị na, owi-nambulo ḅe na, maa ejimina ma na ọkị-ḅo ḅa.”
4“Ị́ nwẹnị Erọnị na, ori owiapụ-awọmẹ ma na kẹ Kobiri Akpụrụ-warị mẹ ḅọkọ ḅo ḅa, tẹ minji kẹ ịn sịkịrị ḅa. 5Ị́ opu akapa ma ọkị tẹ suku-ḅio ḅẹ kapa mẹ kẹ Erọnị sụa, tẹ ẹfọdị nwẹn-sịn kapa mẹ ḅẹ vọrọrọ-kapa mẹ kẹ ọ̀ sụa, tẹ nwẹnị ẹfọdị nwẹn-sịn kapa mẹ kẹ ọ̀ sụa, tẹ ekpe-gbaịn-kapa mẹ kẹ pịkị ọ̀ sụa, tẹ ḅara-ḍịn apụ ḍori wararị ḅiri-ponoye mẹ kẹ ò ḅiri pono ḅa, 6tẹ í tọpịtẹ-ḅịtẹ-sun mẹ kẹ ọ̀ sịḅị sure, tẹ fịafịa ama-da sun kẹ tọpịtẹ-ḅịtẹ-sun mẹ ọgọnọ gbana ḅa. 7Tẹ nwẹnị fịafịa-pulo mẹ ọkịị, tẹ anị kẹ ọ̀ sịḅị sara, tẹ ọ̀ mịẹ fịafịamaa.”
8“Anịtẹso ị́ ori owiapụ-awọmẹ ma ọkị-ḅo tẹ kapa kẹ ịn sụa, 9tẹ ḅiri-ponoaị kẹ ịna aḅiri pono, tẹ sun ma kẹ ịn sure ḅa; tẹ agbamịẹ fịrị mẹ ịna nye sọ mu ḅẹ sakị, ḅẹ sakị la ḅa kẹẹ-korotẹ oloko ḅara ḅụ. Mị ḅara mie ị́ kẹ ḅara kẹ Erọnị na, ori owiapụ-awọmẹ na ọgọnọ gbana tẹ ịn mịẹ fịafịama ḅarị ḅara.”
10“Anịtẹso í owi-nambulo ḅe kẹ Kobiri Akpụrụ-warị mẹ tọrọkọ ḅo ḅa. Erọnị na ori owiapụ-awọmẹ na ịna aḅara kẹ owi-nambulo ḅe sịḅị ọgọnọ gbana ḅa, 11tẹ í Kobiri Akpụrụ-warị mẹ ḅọkọ ḅụ KỊNỊNYANAḄỌ ḅe tọrọkọ ḅụ owi-nambulo ḅe ḅaa ḅa; 12tẹ owi-nambulo ḅe ọmbie mẹ ḅụ ye ọkị tẹ ḅara-tụngbalị kẹ anị gbọn-gbọn tẹ kẹ agbamịẹ-anga mẹ ḅẹ ịfalị ma lama ḅa, tẹ ị́ nwẹnị kirikọn ọmbie mẹ kẹ agbamịẹ-anga mẹ suku ḅụ sara ḅa. 13Anịsakị ị́ ḅẹlẹkị ma tẹ furo ḅio ịla ma gbaịn aị mamgba na, pụmbụra mẹ ḅụ sime aị ma na maa san-akpa ma na arị ọgọnọ ḅẹ ḅẹlẹkị ma na kẹ sụa ọkị tẹ arị dọkịma ḅa agbamịẹ-anga mẹ ọgọnọ ḅụ. 14Kụma owi-nambulo ḅe oju-meni na ori oju apara na, ọ̀ pọkụ-muaị na, ó tomi ma ḅụ ḅele tẹ fịnị kẹ arị dọkịma ḅa. Anie mẹ anie si agba mẹ.”
15“Anịtẹso ị́ ejimina ma ḅụ ḅẹ gbọrụ ye ọkị ḅa, tẹ Erọnị na ori owiapụ-awọmẹ na ịna aḅara kẹ ejimina ḅe sịḅị ọgọnọ ḅụ gbana ḅa. 16Ị́ ejimina ḅe ḅaa ḅa, tẹ ori ọmbie mẹ ọkị tẹ anị kẹ agbamịẹ-anga mẹ oju wakị ikelema-koro ḅa. 17Anịtẹso ị́ ejimina ḅe kẹ pakịrị, pakịrị keni ḅa, anị ḅẹ ịla ma na, ḅụọ ḅẹ eleke ma na sịkịrị tẹ arị kẹ osi keni wararị aị ma na, sịḅị mẹ na gbọrụ anga koromaa, 18#Ẹfi 5.2; Flp 4.18tẹ agbamịẹ-anga mẹ ọgọnọ ḅụ bebe ejimina ḅe dọkịmaa; aniemẹ anie mịẹ KỊNỊNYANAḄỌ ḅe pịrị dọkịma-agba; aniemẹ anie kụnụarị agba, fịnị ḅụ mịẹ KỊNỊNYANAḄỌ ḅe pịrị agba.”
19“Í osi ejimina ḅe ọkị ḅa; Erọnị na, ori owiapụ-awọmẹ na ịna aḅara kẹ ejimina ḅe sịḅị ọgọnọ ḅụ gbana ḅa, 20tẹ ị́ ejimina ḅe ḅaa ḅa, tẹ ori ọmbie ḅụ ye ọkị tẹ anị kẹ Erọnị ama-ḅara anga ḅẹ ḅeri mẹ ọgọnọ-jụ tan ḅa, pịkị kẹ ori owiapụ-awọmẹ ma ama-ḅara anga ḅẹ aḅeri ma ọgọnọ-jụ tan ḅa, pịkị kẹ ịna ama-ḅara ḅẹ opu ḅara-atụngbalị ma na, ịna ama-ḅara anga ḅẹ opu aḅụọ-tụngbalị ma na taan. Kirikọn ọmbie mẹ kẹ agbamịẹ-anga mẹ akaka ma sara ikelema-koroo. 21Anịtẹso ị́ ọmbie mẹ tẹ agbamịẹ-anga mẹ ọgọnọ ḅụ simearị ye mẹ ḅụ kẹlẹ ọkị ḅa, pịkị fịafịa-pulo mẹ na ḅụ kẹlẹ ọkị tẹ anị kẹ Erọnị na, ori opu akapa ọgọnọ na ḅụ asana ḅa, pịkị kẹ ori owiapụ-awọmẹ na, ịna opu akapa ọgọnọ na ḅụ asana ḅa; anịsakị ori na, ori opu akapa ma na; ori owiapụ-awọmẹ na, ịna opu akapa na ori na wẹrị fịafịa ḅa.”
22“Í pịkị ejimina ḅe ḅẹlẹkị mẹ na, ḅẹlẹkị etemi mẹ na, ịla ma gbaịn ḅẹlẹkị ma na, pụmbụra mẹ ḅụ sime aị ma na, maa san-akpa na arị ọgọnọ ḅụ sime ḅẹlẹkị mẹ na, ama-ḅara anga ḅẹ ḅụọ-ẹtẹnẹ mẹ na ọkị ḅa. 23Pịkị ịn kẹ agba mịẹ KỊNỊNYANAḄỌ ḅe pịrị fịturu simearị kana mẹ ḅio gberie-gberie ọkịị: in pulo kẹ asana wararị gbọrụ kpo na, in pulo kẹ asan-a gbọrụ kpo na pịkị gbọrụ ḍọkọḍọkọ ịkịka. 24Anịsakị ị́ arị kẹ Erọnị na ori owiapụ-awọmẹ na aḅara ḅio sụa tẹ ini arị kẹ agba mịẹ KỊNỊNYANAḄỌ ḅe pịrị aị ḅara kẹ arị wẹrị fịafịama ḅa. 25Anịtẹso ị́ ịna aḅara ḅụ arị ọkị ḅa, tẹ agbamịẹ-anga mẹ ọgọnọ ḅụ arị kẹ dọkịma-agba mịẹ aị ma na sụa dọkịma ḅa, KỊNỊNYANAḄỌ ḅe tọrọkọ kụnụarị agba ḅara ḅụ; aniemẹ anie fịnị ḅụ mịẹ KỊNỊNYANAḄỌ ḅe pịrịarị agba.”
26“Ị́ ḅara kẹ Erọnị sịḅị gbana sakị ḅẹ ejimina ḅe ekpe mẹ ọkị tẹ anị wẹrị sikima kẹ sime KỊNỊNYANAḄỌ ḅe tọrọkọ ḅụ wẹrị sikima agba mẹ pịrị ye mịẹ ḅa; tẹ anị í ḍiekiri sọ ḅa. 27Ị́ wẹrị sikima agba mịẹ ye mẹ ḅẹ ekpe mẹ na, agbamịẹapụ ma ḍiekiri ḅẹ ḅụọ-ẹtẹnẹ tẹ wẹrị sikima ye mẹ na mịẹ fịafịama ḅa, aniemẹ tẹ ḅara kẹ sịḅị ḅụ gbana sakị ḅẹ ejimina ḅẹ ḅụụ ḅụ ọkị agba mịẹ ye mẹ, anị sime Erọnị na, ori owiapụ-awọmẹ na pịrịm nwẹn ḅẹẹ sakị. 28Anị sime Erọnị na, ori owiapụ-awọmẹ na pịrị ḅa Izirẹlịapụ ma gbẹẹ gbamaso ḅarị saa ḅara ḅụ, gbala aniemẹ anie agbamịẹapụ ma ḍiekiri ẹrẹsị Izirẹlịapụ ma ịna dein-pịrị-agba ḅụ mịẹ ḅarị agba ḅụ, aniemẹ anie ịn mịẹ KỊNỊNYANAḄỌ ḅe pịrị ḅarị agba.”
29“Erọnị fịafịa opu akapa ma, ori ḅọrọ so sakị arị sime ori owiapụ-awọmẹ pịrị ḅa, ini arị sụa tẹ ịn pulo kẹ ịna sịḅị sara, tẹ pịkị ḅara kẹ ịna sịḅị gbana ḅa. 30Owiḅọtụḅọ ḅe tẹ ò kiri ọkị ḅarị agbamịẹḅọ ḅe Kobiri Akpụrụ-warị mẹ ḅẹ Fịafịa Yọ Mẹ ḅio sọ-ḅo sakị ọ̀ sọnọma aḍin kẹ arị sụa ḅa.”
31“Ị́ ḅara kẹ sịḅị ọgọnọ gbana sakị ḅẹ ejimina ḅe meni ọkị mu fịafịa gbọrụ anga ḅụ sọọ ḅa, 32tẹ Erọnị na ori owiapụ-awọmẹ na ejimina ḅe meni mẹ pẹị ḅa, tẹ fịturu mẹ tẹ kana ḅio simearị ye mẹ kẹ Kobiri Akpụrụ-warị mẹ ḅẹ ḅọkọ mẹ ḅụ anị ḅalị ḅa. 33Arị aị ma tẹ ḅara kẹ ini ọgọnọ gbana tẹ ịn mịẹ fịafịam ḅẹ ẹrẹsị kẹ si-wẹrịso mịẹye mịẹ aị ma ini arị fị ḅa, kụma sikima ḅọ arị fị ḅịa, gbala arị fịafịa wararị ẹrẹsị. 34Ḅara kẹ sịḅị ọgọnọ gbana sakị ḅẹ nama mẹ, anịanịa fịye mẹ ḅẹ ye kirikọn nwenii dede-ḅio la-la, anịrẹ ị́ fịnị kẹ kirikọn-ye mẹ dọkịma ḅa, gbala anị fịafịa wararị ẹrẹsị.”
35“Ye tẹ à wẹrịtẹ tọn ị́ pịrị tẹ aị mamgba, à tọn ḅara mie ị́ kẹ Erọnị na, ori owiapụ-awọmẹ na mịẹ ḅarị ḅara. Sọnọma aḍin ḅụ ị́ ḅara kẹ ini ọgọnọ gbana mịẹye mịẹ fama ḅa. 36Ene-ḅaaene-ḅaaene, ị́ gbọrụ owi-nambulo kẹ si wẹrịso gotẹ si agba mịẹ ḅa. Ị́ pịkị si agba mịẹ agbamịẹ-anga mẹ pịrị ḅa, ị́ si bẹkẹlẹma sịn anị pịrị sakị, tẹ pulo kẹ anị ḅụ sara ḅa kẹ anị mịẹ fịafịama ḅụ. 37Sọnọma aḍin ị́ nwẹn kẹ si bekelema agbamịẹ-anga mẹ pịrị tẹ anị mịẹ fịafịama ḅa, anịsakị agbamịẹ-anga mẹ fịafịa tẹịn ḅa, ḅụụ kẹ agbamịẹ-anga mẹ lama ḅọ lama ḅọ anịanịa lama ye lama ye ḅo fịafịa ḅa.”
Ene-ḅaaene-ḅaaene Mịẹ Ḅẹ Agba Ma
(Kịẹ 28.1-8)
38“Mịọkụ miemẹ anie ị́ kẹ agbamịẹ-anga mẹ ọgọnọ agba mịẹ ḅarịye: asambịrịma maa anana ene-ḅaaene-ḅaaene sịkọpẹlẹ-a ḅara. 39Dede-ḅio ị́ gbọrụ asambịrịma anana kẹ agba mẹ mịẹ ḅa, tẹ osi asambịrịma anana ḅe kẹ ḅoḅiri-so ḅụ mịẹ ḅa. 40Anịsakị kẹ tarị asambịrịma anana ḅe na agba mẹ mịẹ ḅarị aị anie pọnjị olivu pulo maa akarama pembe ye kẹ pikiri iḅitẹịn fịlawa gbọrụ kala akpa pembe ye na, tẹ iru maa ololo pembe ye kẹ iru agba mịẹ ḅa. 41Osi asambịrịma anana ḅe ḅoḅiri-so mie ị́ ọ̀ kẹ agba mẹ mịẹ ḅarịye, tẹ dede agba mẹ mịẹ ḅara kẹ mgbọlụ agba na, anị ḅẹ iru agba na mịẹ ḅarị ye, anị nwẹnị fịnị ḅụ mịẹ KỊNỊNYANAḄỌ ḅe pịrịarị ọ̀ ḅụụ-ḅẹlẹ kụnụ agba sọ. 42Anị ọ́ sịkọpẹlẹ-a ḅara kẹ ḅụọ fa ḅụọ paka ḅụ mịẹ ḅarị dọkịma-agba sọ ḅa Kobiri Akpụrụ-warị mẹ ḅẹ ḅọkọ mẹ ḅụ KỊNỊNYANAḄỌ ḅe tọrọkọ, arị ọmịnị na ẹrịya tẹ ẹkwẹn ọ́ pịrị ḅẹ yọ mẹ ḅụ. 43Anị yọ ḅụ mie arị Izirẹlịapụ ma na ẹrịya ḅarịye, anịsakị ị̀ ebube anị mịẹ fịafịama ḅa. 44À Kobiri Akpụrụ-warị mẹ na, agbamịẹ-anga mẹ na mịẹ fịafịama ḅa; Erọnị na, ori owiapụ-awọmẹ na sọ arị agbamịẹapụ ḅara ḅụ ịn mịẹ fịafịama ḅa. 45Anịsakị arị Izirẹlịapụ ma ogbo-ḅio ḅụ anga ḅa, tẹ ị̀ na Tamụnọ sọ ḅa. 46Tẹ ịn nimi ḅa mịnẹ yẹrị anie KỊNỊNYANAḄỌ ịna Tamụnọ ḅe tẹ Ijiputi ama mẹ ḅio ịn pakama-ḅo ḅọ ḅee mịẹtẹ arị ini ogbo-ḅio anga ḅarị ḅara. Yẹrị anie KỊNỊNYANAḄỌ ịna Tamụnọ ḅee.”
Attualmente Selezionati:
Paka-so 29: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
