Paka-so 19
19
Izirẹlị Ḅẹ Apụ Ma Sayịnayị Tụndụ Suku Daasịẹm
1Izirẹlịapụ ma Ijiputi ama ḅụ so tẹ tẹra akalụ karama akalụ mẹ ḅẹ ịwọ akalụ ene mẹ ḅụ anie in ḅo Sayịnayị ḅẹ Ịkpa mẹ ḅio sọ ye. 2Ịn Rẹfidimụ ḅụ saakị paka tẹ ḅo Sayịnayị ḅẹ Ịkpa mẹ ḅio sọ tẹso, ịkpa mẹ ḅio mie ini akpụrụ-warị pike tẹ sime ye; anị yọ ḅụ tụndụ mẹ tọrọkọ mie Izirẹlị akpụrụ-warị pike tẹ sime anga.
3Mozizi nwẹnị tụndụ mẹ kpọlị Tamụnọ dama-mu tẹ KỊNỊNYANAḄỌ ḅe nwẹnị tụndụ mẹ ọgọnọ ḅụ ọ̀ sịn, ḅẹẹarị, “Mị-ḅara mie í ḍuko Jekọbụ warị mẹ pịrị ḅarị ḅara, tẹ ḍuko Izirẹlịapụ ma pịrị: 4Ọmịnị à kẹ Ijiputi-ḅẹ-apụ ma mịẹ ye na, arị igo apamba ọgọnọ ó dogi tẹ ọmịnị ọkị-ḅo ị̀ ḅụụ pịrị ḅara na ẹrị tẹ. 5#1 Pit 2.9#Dit 4.20; 7.6; 14.2; 26.18; Tay 2.14Anịẹrẹsị mịọkụ ọmịnị ị̀ pọkọ poki tẹ ị̀ ọḅọkụ koko, koko, tomi-kụlọkụlọ mamgba ogboku ḅụ ọmịnị ì soku ḅụ à nyana apụ sọ ḅa; kẹ gotẹ ọkọ ḅẹẹarị, bebe tomikiri mẹmgba ì nye, 6#Mịẹ 1.6; 5.10anịsakị ọmịnị agbamịẹapụ ama-da kụrọ na, fịafịa opu sịẹ na sọ ị̀ pịrị ḅa. Mịna ẹkwẹn-aḅịḅị ma anie ẹkwẹn-aḅịḅị tẹ ị́ kọn Izirẹlị ḅẹ awọmẹ ma pịrị ḅarị ẹkwẹn.” 7Mie ḅụ, Mozizi ideri-ḅo tẹ tomi ma ḅẹ omongiapụ ma sịnm, tẹ mịna ẹkwẹn-aḅịḅị mamgba tẹ KỊNỊNYANAḄỌ ḅe tọn ọ̀ pịrị aị ma kẹ ịna tọrọkọ koromam. 8Tẹ tomi mamgba nwẹnị pakịrị gboloma tẹ ḅẹẹ, “Mịẹ nwẹn ḅẹẹ tẹ KỊNỊNYANAḄỌ ḅe ḍuko aị mamgba wa mịẹ ḅa.” Tẹ Mozizi mu tomi ma kọn ẹkwẹn-aḅịḅị ḍuko KỊNỊNYANAḄỌ ḅe pịrịm.
9KỊNỊNYANAḄỌ ḅe nwẹnị Mozizi ḅẹẹ, “Ḍikii, à kpititẹ oḅuto kpo ḅio ị́ ḍọkụma-ḅoarị, mịẹtẹ arị ị́ na ẹkwẹn-arị sakị tomi ma naa, tẹ pịkị í minini gbamaso ḅarị ḅara.”
Anịtẹso Mozizi tomi ma kọn ẹkwẹn-aḅịḅị ma ḍuko KỊNỊNYANAḄỌ ḅe pịrịm. 10Tẹ KỊNỊNYANAḄỌ ḅe nwẹnị Mozizi ḅẹẹ, “So tomi ma ḍọkụma-muu, tẹ mịmgba na ḅaa na kẹ ịn mịẹ fịafịama, tẹ yee ini ịna opu akapa ma sịkịrị, 11tẹ ḅụụ tẹlẹma-a tẹrẹị karama ene mẹ ḅụ, kẹ gotẹ ọkọ ḅẹẹarị, anị ene mẹ ḅụ KỊNỊNYANAḄỌ ḅe ideri Sayịnayị Tụndụ mẹ ọgọnọ ḅo ḅa tomi mamgba tọrụ-ogbo ḅụ. 12#Hib 12.18-20Anịsakị í tomi ma mu la ḅịa anga ḅẹ oke kẹ ịn ḍie tụndụ mẹ ikelema-koro ḅa tẹ ḅẹẹ, ‘Ọmịnị ọmịna aḅụụ ẹbịị mịnẹ ọmịnị tụndụ mẹ kpọlị-a, ọ́ pịkị kpeki mu ḅara kẹ anị ḅẹ agara sọ lama-a; ḅara kẹ tụndụ mẹ lama ḅọ lama ḅọ, ini mḅọ ḅaa ḅa. 13Gbọrụḅọ-sọ ḅara kẹ mḅọ lama ma, kụma ịn ḍụḅarị kẹ mḅọ gbin ḅaa-a ḅẹḅẹ, ịn ḍịẹịn kẹ mḅọ tẹịn ḅaa ḅa. Anị ḅọrọ nama-o, tomḅọ-o mḅọ ḍumo ḅịa.’ Ọdụ mẹ fie tẹ kpekele fie pẹlẹ-a sakị, mie ini tụndụ mẹ sime anga ḅo ḅarịye.”
14Mie ḅụ Mozizi tụndụ mẹ ọgọnọ ḅụ ideri tomi ma ḍọkụma-ḅom, tẹ tomi ma mịẹ fịafịamam; tẹ ịn pịkị ịna opu akapa ma sịkịrịm. 15Tẹ ò tomi ma ḅẹẹm, “Ọ́ ḅụụ tẹlẹma-a, tẹrẹị karama ene mẹ ḅụ, ó mu ẹrẹḅọ kpekima.”
16 #
Mịẹ 4.5
#
Dit 4.11,12 Tẹra aḍin karama ene mẹ ḅẹ dede-ḅio ḅụ, so-alagba nwẹnị tọnwa asakị kẹ tẹịn, tẹ So mẹ nwẹnị pịkị ḅalapụ-ḅalapụ tẹ kpititẹ oḅuto kpo nwẹnị tụndụ mẹ ọgọnọ ḅụ sịẹ, tẹ kpọma fie paka ọdụ nwẹnị kpekele fie pẹlẹ-a ḅara kẹ fie. Miemẹ mịẹtẹ akpụrụ-awarị ma ḅio simearị apụ ma oju nwẹnị ḅalafa ḅụ sẹkị. 17Anịtẹso Mozizi nwẹnị akpụrụ-warị mẹ ḅio tomi ma pakama-ḅo in ḅo Tamụnọ na ẹrịya ḅẹ ḅara. 18Onwi nwẹnị bebe Sayịnayị Tụndụ mẹ gbaịn, gbala KỊNỊNYANAḄỌ ḅe fịnị ḅio ideri anị ọgọnọ ḅom ẹrẹsị; tẹ anị ḅụ soarị onwi mẹ nwẹnị gbala ikulele orumo ḅụ soarị onwi turee-tureema iwo ḅara iwo, tẹ bebe tụndụ mẹ nwẹnị ye sima ḅara kẹ jike. 19Ọdụ mẹ fie paka kụrọ tọrọkọ-tọrọkọ muarị ḅara ḅụ Mozizi nwẹnị ẹkwẹn, tẹ Tamụnọ so-alagba ḅio ḅụ ọ̀ pakịrịm. 20Tẹ KỊNỊNYANAḄỌ ḅe ideri Sayịnayị Tụndụ ọgọnọ ḅom, tụndụ mẹ sịḅị ọgọnọ ḅụ; tẹ KỊNỊNYANAḄỌ ḅe Mozizi sịnm tụndụ mẹ sịḅị ọgọnọ ḅoo, tẹ Mozizi iwo mum. 21KỊNỊNYANAḄỌ ḅe nwẹnị Mozizi ḅẹẹ, “Ideri-mu tẹ tomi ma ḅeri nụnụụ, anieofori ịn ḅofa KỊNỊNYANAḄỌ ḅe ḍiki gotẹ oke mẹ saḅa tẹ ini ḅẹ tọnwa-apụ fịị gulugulu. 22Anịsakị yee agbamịẹapụ ma tẹ sọma ḅo KỊNỊNYANAḄỌ ḅẹ kpekiarị apụ ma sọ ịna aḅụụ mịẹ fịafịamaa, anieofori KỊNỊNYANAḄỌ ḅe ḅofa kaan-paka-ḅo ịna ọgọnọ sara.”
23Mozizi nwẹnị KỊNỊNYANAḄỌ ḅe ḅẹẹ, “Tomi ma inetẹ ḅo Sayịnayị Tụndụ mẹ la ḅịa, kẹ gotẹ ọkọ ḅẹẹarị, ị́yẹrị ḅarana tọn wa pịrịm, ḅẹẹarị, ‘Oke mie tụndụ mẹ ikelemaa, tẹ anị mịẹ fịafịama.’ ”
24KỊNỊNYANAḄỌ ḅe nwẹnị ọ̀ ḅẹẹ, “Ideri-muu, tẹ Erọnị kẹ ị́ ḅụụ sụa ḅoo; kụma wẹrịso tẹ agbamịẹapụ ma na, tomi ma na kan tolu KỊNỊNYANAḄỌ ḅe ḍọkụma-ḅo ma, anieofori ò ḅofa kan paka mu ịn da-paka.” 25Mie ḅụ Mozizi ideri tomi ma ḍọkụma-mu tẹ ḍuko ịn pịrịm.
Attualmente Selezionati:
Paka-so 19: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
