Paka-so 18
18
Jetiro Mu Toluma Mozizi Ḍikim
1Jetiro, Midiyanị ḅẹ agbamịẹḅọ, Mozizi fụanḅọ ḅe Tamụnọ kọrị Mozizi na, ori atomi Izirẹlịapụ ma na pịrị aị mamgba na, KỊNỊNYANAḄỌ ḅe wẹrịtẹ Ijiputi ḅụ Izirẹlị pakama-ḅo ḅara na naam. 2#Pks 2.21,22Mịọkụ Mozizi ọ̀ ta Zipora ḅẹẹ tẹ á so tẹso, Jetiro Mozizi fụanḅọ ḅe nwẹnị árị na 3#Fịr 7.29árị maa owiapụ-awọmẹ na ọkị mum. Owiapụ-awọmẹ ma gbọrụḅọ ẹrẹ Gasọmụ: gbala ori mẹẹ, Igoni Ama Ḅụ À Bịanḅọ Sọ Tẹẹ. 4Anịsakị osi-ḅọ ḅe ẹrẹ Ẹlịyeza: gbala ori mẹẹ, Ị̀ Ḍa Ḅe Tamụnọ Ḅe Ḅarasụa Ị̀ Pịrịm, Tẹ Fero Ị̀ Ḅaa Ḅụ Ị̀ Ḍụa-ḅọrọmam 5Tẹ Jetiro, Mozizi fụanḅọ ḅe Mozizi maa owiapụ awọmẹ ma na, ọ̀ ta na kẹ ọ̀ ḅụụ sụa tẹ ịkpa mẹ ḅio Tamụnọ fịafịa tụndụ mẹ ḅụ ini akpụrụ-warị pike tẹ simearị anga mẹ ḅom. 6Gbọrụḅọ nwẹnị mu ḍuko Mozizi pịrị, “Ḍikii, í fụanḅọ Jetiro ị́ ta na, arị maa owiapụ awọmẹ na kẹ á ḅụụ sụa tẹ kẹ ọ̀ ḅụụ sụa ḅoarị,” tẹso. 7Mozizi nwẹnị ò fụanḅọ ḅe na bịama ḅẹ tẹ ọ̀ dama-mu, tẹ kpọma sịḅị-tuu ọ̀ pịrị tẹ ọ̀ ḅịḅị nọnjị, ịn nwẹnị jụmọ-jụmọ ḅụụ sime ḅara kẹ jụmọ-jụmọ gbela tẹ nwẹnị mẹnjị akpụrụ-warị mẹ ḅio sọ-mu, 8Anịtẹso Mozizi KỊNỊNYANAḄỌ ḅe Izirẹlị sịḅị gotẹ kẹ Fero na, Ijiputi-ḅẹ-apụ ma na mịẹ tẹ aị mamgba na, ḅụụ-fụka tẹ etela mẹ ḅụ ḅo ịn la tẹ ini ẹrị tọrụsiẹrị mamgba na, KỊNỊNYANAḄỌ ḅe wẹrịtẹ ịn ḍụa-ḅọrọma tẹ ḅara na ḍuko ọ̀ fụanḅọ ḅe pịrịm. 9Tẹ Jetiro iḅi mẹmgba tẹ KỊNỊNYANAḄỌ ḅe kẹ Izirẹlị mịẹ tẹ iḅi, anie Ijiputi-ḅẹ-apụ ma ḅara ḅio ori ịn ḍụa-ḅọrọma tẹ ye mẹ gotẹ ḍerekum. 10Jetiro nwẹnị ḅẹẹ, “Boma sime KỊNỊNYANAḄỌ ḅe tẹ Ijiputi-ḅẹ-apụ ma ḅara ḅụ na, Fero ḅara na ḅụ ọ́ ḍụa-ḅọrọma ḅọ ḅe pịrịị. 11Mẹkịnẹ à nimi tẹ mịnẹ KỊNỊNYANAḄỌ ḅe ḍụḅa oru-atamụnọ mamgba nẹngịm, gbala ini opu amịẹaị mịẹ ḅara kẹ tomi ma na mịẹ sakị ori Ijiputi ḅẹ apụ ma ḅara suku-ḅio ḅụ ịn ḍụa-ḅọrọmam ẹrẹsị.” 12Tẹ Jetiro, Mozizi fụanḅọ ḅe dọkịma-agba mịẹ, tẹ agba mịẹ jaị na ọkị-ḅo Tamụnọ pịrịm tẹ Erọnị Izirẹlị ḅẹ omongiapụ mamgba ọkị ọ̀ ḅụụ sụa tẹ Mozizi fụanḅọ ḅe na Tamụnọ tọrọkọ fịye fị ḅẹ mum.
Ịn Ḅẹrẹkọn-apụ Tọnm
(Dit 1.9-18)
13Anị ḅẹ ene-ḅaa ḅụ Mozizi tomi ma kọn ḅẹ ẹrẹsị lẹgị-simem, tẹ tomi ma dede-ḅio ḅụ sịẹsime ori ikelema nwenii ḅoḅiri-so lam. 14Mozizi fụanḅọ mịna aị ma tẹ ọ̀ mịẹ tomi ma pịrịarị aị ma ẹrị tẹso, ọ̀ nwẹnị gbela, “Mie mẹ tẹ ị́ mịẹ tomi ma pịrịarị ye ḅọrọ tiye? Í tiegotẹ ngẹrị lẹgị-sime tẹ tomi mamgba dede-ḅio sịẹ sime ị́ ikelema nwenii ḅo ḅoḅiri-so la?”
15Mozizi nwẹnị ò fụanḅọ ḅe pakịrị, “Tomi ma gbala ị̀ ḍọkụma-ḅo tẹ Tamụnọ ḅịḅị ḅiiarị; 16ini ịgbanịya nyana sakị ịn pịkị ị̀ ḍọkụma-ḅo tẹ à ḅẹrẹ kọn tomḅọ ḅe na, mḅọ na kpeki tẹ angarị ḅọ mẹ na pịrịarị, anịsakị à pịkị mịẹtẹ ịn kẹẹ wararị Tamụnọ oloko ma na, ọ̀ tọn-pẹlẹ aị na nimiarị.”
17Mozizi fụanḅọ ḅe nwẹnị ọ̀ ḅẹẹ, “Í mịẹarị ye iḅi-a. 18Ị́yẹrị na, ị́ na simearị apụ ma na ọmịna aḅụụ kọrị-kọrị ḅa; kẹ gotẹ ọkọ ḅẹẹarị, ye mẹ iku ị́ nẹngị ḅakam; ị́yẹrị ngẹrị inetẹ ịnyọ nyana tẹ anị kọrị ḅịa. 19Mịọkụ ị̀ pọkọ pokii; àrị anị mịẹ na-iḅi nimi ẹkwẹn kọn ị́ pịrị ḅa, anịsakị Tamụnọ ị́ na sime ḅa! Ị́ sịẹ tomi ma pịrị ḅa Tamụnọ tọrọkọ, tẹ ịna aḅẹrẹ kẹ Tamụnọ ḍọkụma-ḅo ḅa; 20tẹ kẹẹ wararị oloko ma na, tọn-pẹlẹ aị ma na kẹ ịn toluma, tẹ mịẹtẹ ini etela mẹ tẹ ịn mẹnjị nyana etela mẹ na ịn mịẹ nyana ye na nimi ḅa. 21Anie sikima, owiapụ mamgba ḅụ, ịnyọ nyana tẹ Tamụnọ ḍiki-ḅalafarị owiapụ ḅara, owiapụ tẹ kịnị ḅioḅẹngbọ-kẹ-sịrẹrẹ-niḅi apụ, tẹ ọḅụ-fị ḍiki-ḅioḅuarị apụ sẹlẹẹ; tẹ ọkọ sime apụ kẹ ḅẹrẹtọn-apụ sọma kịnị maa ẹndẹ oyia asi finji-finji na; kịnị sọnọa si, sọnọa si na; kịnị amesi oyi finji-finji na; oyi apụ, oyi apụ na pịrịị. 22Anịsakị yee ini sakị mamgba tomi ma ḅẹrẹ kọn, gburo-gburotẹ ḅẹrẹ goyegoye ini ọkị-ḅo ị́ pịrị ḅa, kụma ḅẹ kala ḅẹrẹ kala ḅẹrẹ, ini ḅarana anị kọn-pẹlẹ ḅa; mị-ḅara ḅụ anị ị́ na sarasara ḅa, tẹ ini ị́ na sọ ikuye mẹ dogi ḅa. 23Í miemẹ mịẹ-mịẹ, tẹ Tamụnọ mị ḅara mẹ tọn ị́ pịrị-pịrị, anịrẹ ị́ inetẹ ịnyọ nyana tẹ kẹ inema ḅa, anịsakị mịna atomi mamgba so dein ḅụ so mu ịna ye-yọ la ḅa.”
24Mie ḅụ Mozizi ò fụanḅọ ḅe pọkọ poki tẹ ò ḍuko ḅara mẹmgba mịẹm. 25Mozizi Izirẹlị mẹmgba ḅụ ịnyọ nyana owiapụ sẹlẹm, tẹ ịn kẹ tomi ma sịḅịdapụ mịẹm, ḅẹrẹtọn kịnị maa ẹndẹ oyia asi finji na kịnị sọnọa si, sọnọa si na; kịnị amesi oyi finji-finji na; oyi apụ oyi apụ na pịrị ḅẹ apụ sọmam. 26Tẹ ịn sakị mamgba tomi ma ḅẹrẹ kọnm kụrọtẹ aḅẹrẹ ini ọkị-ḅo ọkị-ḅo Mozizi pịrịm, kụma ḅẹẹ kala ḅẹrẹ kala ḅẹrẹ, ini ḅara na anị kọn-pẹlẹm.
27Anịtẹso Mozizi ò fụanḅọ ḅe wẹrịso tẹ ò so ò soku-ḅẹ opu sịẹ mum.
Attualmente Selezionati:
Paka-so 18: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
