Mataayo 17

ɄYɨɨsʉ ikwandʉka kʉmiiho mu wɨɨmɨkiwa

(Maliko 9:2-13; Luuka 9:28-36)

1Wʉ silʉtɨngʼiinie isigono ntanato (6), ʉYɨɨsʉ akavatoola ʉPetulo, ʉYakobo nʉ Yohana, ʉnnuuna va Yakobo. Akatoga navo kʉ kɨdugala ɨkɨtale, apoonu pa kwɨjyekela. 2Wʉ valɨ palya, ʉYɨɨsʉ akaandʉka ɨmivonekele gya mwene. Kʉmiiho kʉ mwene kʉlɨkʉngʼalangʼadɨka ʉngata litsʉva, nagyene ɨmisabwa gya mwene, gɨkava mivalasu siitso ʉngata lʉmuli. 3Ʉnsɨkɨ gʉʉgwa vakavoneka ʉMoose#17:3 ɄMoose Ʉjʉ aale indongotsi va Vaisilahɨli, vɨ mwene aavɨgile mu Bibilia isitabu isitala sihaano isya ndagɨlo. Ʉmwene aasue ɨmyaka myongosu wʉ akaanale ʉYɨɨsʉ ʉkʉholwa. nʉ Eliya.#17:3 Eliya Ʉjʉ aataamile mu kɨlʉnga ʉmʉ kʉ myaka ɨgya mileevʉlʉ innaana ni sitsigo sihaano (850) Wanaholilwi ʉYɨɨsʉ Kɨlɨsiti. Aale nyamalago ʉvɨ aVayahudi vaambalɨlaga ʉkʉta inninie mu vanyamalago avavaha. ɄNgʉlʉve aantoolile nɨ mutuka jya mwoto ʉkʉtoga kʉkyanya (2 Vakʉlʉdeeva 2:11). AVayahudi vaahʉʉvɨlaga ʉkʉta ʉEliya aale itala ʉkʉkilivuka mu kɨlʉnga pwʉ akonge ʉMesiya ʉYɨɨsʉ (Malaki 3:1; 4:5-6). Avaanu avo vakatengʉla ʉkʉtsova nave ʉYɨɨsʉ. 4Pwʉ ʉPetulo akatsova nʉ Yɨɨsʉ akata, “Gwe Ntwa, lʉnonu ʉwe tʉtaamage baaha apa. Ɨngave vunogwa, nditsenga apa isyeve sidatu. Kɨpamato kɨve kyave, ɨkɨnge kɨve kya Moose, ɨkɨnge kɨve kya Eliya.”

5Wʉ ʉPetulo apitsiige itsova, lola, ɨlivɨngo ɨlyangʼaalaga lɨkiitsa lɨkavagubikila. Ɨlimenyu lɨkapʉlɨkɨka ʉkʉhʉma mu livɨngo ɨlyo lɨkata, “Ʉjʉ vɨ Mwana vango. Ndɨnʼganile, namwene ikʉnnyovosa, mumpʉlɨhɨtsaage ʉmwene!” 6Avakongi va mwene avo wʉ vapʉliike ago, vakadwada siitso, vakagudama paasi nʉ kwɨbunga kʉmiiho. 7ɄYɨɨsʉ akahegelela pawiipi na veene, akavaabaasa, akavavʉʉla akata, “Inamuki, muleke ʉkʉdwada!” 8Wʉ viinamwike nʉ kʉloleesa, navaambone ʉmuunu ʉjyʉnge, ʉYɨɨsʉ akavoneka alɨ mwene. 9Wʉ vikwika mu kɨdugala kɨlya, ʉYɨɨsʉ akavalagɨla, akata, “Muleke ʉkʉmbʉʉla ʉmuunu ʉvaveetsaga tsyoni itsʉ mutsiweene, ʉkʉtsisikila ʉpwʉ ʉMwana va Muunu jiitsʉʉka ʉkʉhʉma kʉ vaswe.”

10Avakongi avo vakambʉʉtsa ʉYɨɨsʉ vakata, “Kɨki avamanyisi va ndagɨlo vitsova viita ʉEliya vɨ va kwitsa taasi#17:10 ɄEliya vɨ va kwitsa taasi Apa ʉNgʉlʉve iita ndɨlansuungʼa ʉnyamalago ʉEliya wʉ kɨkaanale ʉkwitsa ɨkɨgono kɨlya ɨkya Nkʉlʉdeeva. Lola kwa Malaki 4:5-6. pwʉ pambele iitse ʉKɨlɨsiti?” 11ɄYɨɨsʉ akaanda akata, “Tsa jɨlweli, wʉ jyatsovilwe ʉkʉta ʉEliya ikwitsa taasi kunotsa tsyoni. 12Lɨno ndikʉvavʉʉla ʉkʉta ʉEliya akamalile ʉkwitsa,#17:12 ɄEliya akamalile ʉkwitsa ɄYɨɨsʉ ʉpwʉ aatsovaga ikulongwi itsa Eliya aantsovaga ʉYohana ʉMwotsi. Lola Maliko 1:2-8. avaanu navakammanyingʼanie, vakambombye imbiivi itsʉ vakanogilwe. Vʉvʉle vʉle, najyʉ Mwana va Muunu jʉvikʉmpelela ʉvʉkʉvɨlwa.” 13Apo avakongi avo vakalʉmanya ʉkʉta ʉYɨɨsʉ itsova ikulongwi tsa Yohana ʉMwotsi.

ɄYɨɨsʉ iswɨma ɨmepo ɨmbiivi jya ligotsi mu mwana

(Maliko 9:14-29; Luuka 9:37-43a)

14ɄYɨɨsʉ na vakongi valya vadatu wʉ vasiike ʉpwʉ lyale ɨlipʉga lya vaanu, ʉmuunu mpamato akabɨha kwa Yɨɨsʉ, akasugama pavʉlongolo pa mwene. 15Akambʉʉla ʉYɨɨsʉ akata, “Gwe Ntwa, ndidoova ʉnkolele ɨkɨsa ʉnswambango ʉlwakʉva alɨ nʉ vʉtamu wa ligotsi. Ʉvʉtamu ʉvʉ, vukʉnʼgatatsa siitso. Kakongosu iigwa mu mwoto na mu magasi. 16Ndɨkiitsile nave kʉ vakongi vaako pakʉta vamponie, lɨno valemilwe.”

17ɄYɨɨsʉ akaanda akata, “Ʉnyie nyɨ vaanu va kɨvʉmbʉkʉ ɨkɨtsila lwɨdɨko, ɨkya vagalo, ndɨtaame nʉʉnyie ʉnsɨkɨ ntale ʉgʉlɨ ndeeti? Ndɨvasipilile ʉkʉsika ndali? Indeeti apa ʉmwana ʉjwa!” 18Wʉ vandeetile, pwʉ ʉYɨɨsʉ akajɨtanila ɨmepo ɨmbiivi ɨjyale mu nʼgati mu mwana, jɨkahʉma. Baaho, ʉmwana ʉjwa akapona. 19Pwʉ avakongi va Yɨɨsʉ wʉ vɨjyekye nʉ Yɨɨsʉ, vakambʉʉtsa vakata, “Kɨki ʉwe tʉkalemilwe ʉkʉhʉmya ɨmepo ɨmbiivi jɨlya?” 20Pwʉ ʉmwene akavaanda akata, “Mukalemilwe ʉlwakʉva mukaale vatsila lwɨdɨko ʉkʉta ʉNgʉlʉve ivomba. Tsa jɨlweli, mukaale muve nʉ lwɨdɨko lʉdebe, ndavɨ lʉve ndɨ mbeju ɨndebe ʉkʉlʉtɨɨlɨla tsyoni, mukaale mukʉkɨvʉʉla ɨkɨdugala ɨkɨ mwita, ‘Hega apa, ʉbɨhage palya,’ pwʉ ɨkyene kɨkaale kihega. Pwʉ nakɨkaale kɨvepwo ɨkɨɨnu ɨkya kʉvalema ʉnyie. 21Paninie naago, ɨmepo ɨmbiivi ɨjɨlɨ ndɨɨjɨ, namukaweese ʉkʉswɨma vʉle vʉle, apeene kwene kʉ nzɨla jya kʉnʼdoova ʉNgʉlʉve nʉ kwɨdɨnda ʉkʉlya ɨkyakʉlya.”#17:21 Inyandʉlʉ itsinge tsa katale tsa Vʉvɨge ʉVʉvalatse natsilɨ nalwo ʉlʉkɨndɨ ʉlʉ.

ɄYɨɨsʉ itsova ikange ikulongwi tsa kʉswa nʉ kʉtsʉʉka kwa mwene

(Maliko 9:30-32; Luuka 9:43b-45)

22ɄYɨɨsʉ wʉ alɨ paninie na vakongi va mwene kʉ Galilaya, akavavʉʉla akata, “ɄMwana va Muunu jiihendamwa kʉ vaanu avaviivi, 23ʉwʉ jʉvikʉmʼbuda. Ɨkɨgono ɨkya daatu jiitsʉʉka.” Avakongi va mwene wʉ vapʉliike ago, vakasʉsʉvala siitso.

Ʉkʉsonga ɨsongo jya tembile

24ɄYɨɨsʉ na vakongi va mwene wʉ vasiike mu Kapelenaumu, avasangʉtsi va ndalama tsa kʉvombela mu tembile,#17:24 Ndalama tsa kʉvombela mu tembile Mu nyiiho tsa veene ʉNʼyahudi ʉnʼgoosi ʉvaveetsaga ʉnya myaka isitsigo sivɨlɨ (20) nʉ kʉlʉtɨɨlɨla, aatsigilwagwa ʉkʉhʉmya indalama tsa kʉvombela mu tembile ʉmwaka nʉ mwaka. Indalama itso tsyalɨngʼiine nʉ lʉhombo lwa mbombo jya sigono sivɨlɨ (Kʉhʉma 30:13-16; 2 Kulongwi tsa Misɨkɨ 24:9-14; Nehemiya 10:32). vakiitsa kwa Petulo. Vakambʉʉtsa vakata, “Ndeeti ʉmmanyisi viinyo namwene isonga ɨsongo jya tembile?” 25ɄPetulo akavaanda akata, “Wʉ jɨlɨwo, isonga.” Pwʉ ʉPetulo akiingila mu nyumba ʉmwale ʉYɨɨsʉ. Lola, ʉPetulo wʉ akaanale ʉkʉtengʉla ʉkʉtsova, ʉYɨɨsʉ akambʉʉtsa akata, “Gwe Simoni, ʉve wivona ndeeti? Avakʉlʉdeeva va mu kɨlʉnga ɨkɨ visonza ɨsongo kʉ vaanu va mu nyumba tsa veene, evo kʉ vaanu avange va mu silʉnga sya veene?” 26ɄPetulo akaanda akata, “Visonza kʉ vaanu avange va mu silʉnga sya veene.” ɄYɨɨsʉ akambʉʉla akata, “Ɨngave wʉ jɨlɨwo, kwʉ kʉta avaanu va mu nyumba tsa veene valɨ nʉ vʉtavʉlɨlwa wa kʉleka ʉkʉsonga ɨsongo. 27Lɨno pakʉta tʉleke ʉkʉvaviipitsa avaanu ava, ʉbɨhe ʉkalahe ɨndovano mu nyanza. Pwʉ ɨsomba ɨjʉpya witala ʉkʉlova, jʉbungule ʉndomo gwa jyene. Ʉmwa jʉvukʉtsivona indalama. Pwʉ ʉtoole indalama itso, ʉbɨhe ʉkasonge ɨsongo jyane nɨ jyave.”

Attualmente Selezionati:

Mataayo 17: zga

Evidenziazioni

Copia