Mataayo 18

Ʉmbaha mu Lʉdeeva lwa Kʉkyanya

(Maliko 9:33-37; Luuka 9:46-48)

1Ʉnsɨkɨ ʉgwa avakongi va Yɨɨsʉ vakamwitsila, vakambʉʉtsa vakata, “Ndeeti, veeni imbaha ʉkʉlʉtɨɨlɨla avange vooni mu Lʉdeeva lwa Kʉkyanya?” 2ɄYɨɨsʉ akamwɨlanga ʉmwana ʉnʼdebe, akambɨɨka pagati pa veene. 3Akavavʉʉla akata, “Tsa jɨlweli ndikʉvavʉʉla ʉkʉta, ɨngave namukwandʉka nʉ kʉva nda vaana avadebe,#18:3 Namukwandʉka nʉ kʉva nda vaana avadebe Ʉvʉganulu ʉvʉnge kwʉ kʉta ʉmuunu ʉvaveetsaga ʉvɨ nikwɨdɨka ʉkʉlongotsiwa nʉ Ngʉlʉve ndʉ mwana ʉmwʉ ikwɨdɨkɨla ʉkʉlongotsiwa na vahotsi va mwene, nakaweese ʉkwingila nakɨ kɨgono kɨpamato mu Lʉdeeva lwa Ngʉlʉve. namuliingile mu Lʉdeeva lwa Kʉkyanya. 4Ʉkʉkongana nɨɨlyo, ʉmuunu ʉvaveetsaga ʉvɨ ikɨjisa ndʉ mwana ʉnʼdebe ʉjʉ, vɨ alaava mbaha mu Lʉdeeva lwa Kʉkyanya. 5Ikange, ʉmuunu ʉvaveetsaga ʉvikʉmwʉpɨlɨla ʉmwana ʉnʼdebe ndʉʉjʉ, mu litaawa lyango, iiva annyʉpɨlye ʉne.

Ɨlivʉngʉ pa kulongwi tsa ngelo

(Maliko 9:42-48; Luuka 17:1-2)

6“Lɨno, ʉmuunu ʉvaveetsaga angave ikʉnʼjatsa mpamato va vadebe ava avikʉnnyɨdɨka ʉne, avombe imbiivi, ɨkaale jiiva hʉba kʉ muunu ʉjwa ʉkʉkʉngɨlwa ʉlwala lwa kʉhevetela mu singo, nʉ kʉtwivilitswa kʉgati kʉ nyanza. 7Muswe vʉvʉle ʉnyie nyɨ vaanu va kɨlʉnga ɨkɨ nyɨ mukʉvapelela avange vavombe imbiivi! Ingelo, ndajɨve ndeeti, tsikwitsa, paninie nɨɨlyo asue vʉvʉle ʉmuunu ʉvipela ingelo itso! 8Kɨngave ɨkɨvoko kyako evo ɨkɨlʉnde kyako kikʉkʉpelela ʉtule inongwa, ʉkɨdumule nʉ kʉkɨtaaga kʉvʉtale. Hʉba siitso ʉkʉtsikwingila kʉ wʉʉmi wa sikutsooni wʉ ʉlɨ nɨ kɨvoko kɨpamato evo ɨkɨlʉnde kɨpamato, ʉkʉlɨngʼaania nʉ kʉsigala ni sivoko syʉ sivɨlɨ evo isilʉnde syʉ sivɨlɨ, kʉmbele wiitse ʉtaagwe kʉ mwoto gwa sikutsooni. 9Vʉvʉle vʉle, lɨngave ɨliiho lyako likʉkʉpelela ʉtule inongwa, lyomokole nʉ kʉlɨtaaga kʉvʉtale!#18:8-9 Ikulongwi itsa kʉdumula isivoko ni silʉnde evo ʉkwomokola amiiho ndʉwʉ tsitsovilwe apa, kwʉ kʉta avaanu vɨsigage lwoni kʉ siinu sya vʉnogwe wa mmana isikʉvapelela vatule inongwa. ɄYɨɨsʉ naatsovage ʉkʉhetsa isipagɨka sya mihana gya vaanu. Hʉba siitso ʉkʉtsikwingila kʉ wʉʉmi wa sikutsooni wʉ ʉlɨ nɨ liiho lipamato, ʉkʉlɨngʼaania nʉ kʉsigala na miiho gwʉ gavɨlɨ, kʉmbele wiitse ʉtaagwe kʉ mwoto gwa sikutsooni.

Ɨkɨhwananitso kya ngʼolo ɨjyajagile

(Luuka 15:3-7)

10“Mwɨlolelage, muleke ʉkʉmʼbeda mpamato mu vadebe ava, manya ndikʉvavʉʉla ʉkʉta, kʉkyanya avasuungʼwa va veene, valɨ pavʉlongolo pa Daada, vilolana nave ʉnsɨkɨ gwoni. 11Lola, ʉMwana va Muunu iitsile mu kɨlʉnga pakʉta avapoke avajagile.#18:11 Inyandʉlʉ itsinge tsa katale tsa Vʉvɨge ʉVʉvalatse natsilɨ nalwo ʉlʉkɨndɨ ʉlʉ.

12“Mwivona ndeeti, ɨngave ʉmuunu alɨ ni ngʼolo ʉndeevʉlʉ mpamato (100), mamato mu ngʼolo itso jijaga, jiivomba kɨki? Jiikʉtsileka itsinge tsilya isitsigo budikakʉpamato na budikakʉpamato (99) mu lʉnyika nʉ kʉbɨha kukʉjɨlonda jɨlya mamato ɨjɨjagile. 13Tsa jɨlweli ndikʉvavʉʉla ʉkʉta, angave jiikʉjɨvona, jiikʉjɨhovokela siitso ɨngʼolo ɨjyo mamato, ʉkʉlʉtɨɨlɨla ʉkʉtsihovokela ingʼolo tsilya isitsigo budikakʉpamato na budikakʉpamato itsʉ natsijagili. 14Vʉvʉle vʉle, ʉDadajiinyo ʉvɨ alɨ kʉkyanya, ninogwa ʉkʉta mpamato mu vadebe ava ajage.

Ɨnzɨla jya kʉmbʉnga ʉvakʉnangye

15“Ɨngave ʉmwɨdɨkinnino akʉvombye ʉvʉnangi, ʉbɨhe ʉkatsove nave pa kulongwi ɨjyʉ akʉnangye, wʉ mulɨ nyɨ veene. Ɨngave jiikʉkʉpʉlɨka, pwʉ jʉwiiva ʉnkavile ikange ʉmwɨdɨkinnino ʉjwa. 16Lɨno ɨngave nakakʉpʉlɨke, pwʉ ʉkantoole ʉmuunu ʉjyʉnge mpamato evo vavɨlɨ pakʉta vavepwo avooleletsi vavɨlɨ evo vadatu pakʉta jʉvoolelage itsʉ mupya mwitsova.#Simiilitso tsa Ndagɨlo 19:15 17Ɨngave ninogwa ʉkʉvapʉlɨka naveene avo, pwʉ ʉbɨhe ʉkagʉvʉʉle ʉmpelela. Ɨngave nakagʉpʉlɨke nagʉ mpelela, pwʉ ʉmbalɨlage ndʉ muunu ʉnyapanzi evo ʉnsangʉtsi va songo.

Ʉvʉtavʉlɨlwa wa vakongi wa kʉdɨnda nʉ kʉdɨndʉla

18“Tsa jɨlweli ndikʉvavʉʉla ʉkʉta, gooni ʉgwʉ mukʉgadɨnda mu kɨlʉnga ɨkɨ, ʉNgʉlʉve namwene idɨnda kʉkyanya. Ikange, gooni ʉgwʉ mudɨndʉla mu kɨlʉnga ɨkɨ, ʉNgʉlʉve namwene idɨndʉla kʉkyanya. 19Tsa jɨlweli ndikʉvavʉʉla ikange ʉkʉta pa kɨlʉnga apa, ɨngave avaanu vavɨlɨ pagati paanyie, vikwɨdɨngʼana ʉkʉnʼdoova ʉNgʉlʉve ɨkɨɨnu ɨkɨveetsaga, ʉmwene ʉDaada ʉvɨ alɨ kʉkyanya jiikʉvavombela ɨkyo. 20Lola, palya ʉpwʉ avaanu vavɨlɨ evo vadatu vilʉndamana mu litaawa lyango, najyʉne ndiiva baaho paninie navo.”

Ɨkɨhwananitso kya muunu ʉvɨ nikʉnsyɨkɨla ʉnnine

21Pwʉ ʉPetulo akabɨha kwa Yɨɨsʉ, akambʉʉtsa akata, “Gwe Ntwa, ɨngave ʉmwɨdɨkinʼjyango ambombye ʉvʉviivi, ndɨnogye ʉkʉnsyɨkɨla kalɨngi? Ndeeti, ndɨkilivukilage ʉkʉnsyɨkɨla ndɨkasikile pa lekelakʉpamato (7)?” 22ɄYɨɨsʉ akamwanda akata, “Nandikʉkʉvʉʉla ʉkʉta ʉnsyɨkɨlage lekelakʉpamato vʉvʉle, apeene ʉnsyɨkɨlage ʉnnino ʉnsɨkɨ gwoni kɨtsila kʉvalɨla.#18:22 Ʉnsyɨkɨlage ʉnnino ʉnsɨkɨ gwoni kɨtsila kʉvalɨla Mu nzovele jya Kɨyunaani pavɨgilwe ʉsyɨkɨlage lekelakʉpamato (7) ʉkavujiila isitsigo lekelakʉpamato (70).

23“Pa kulongwi ɨjyo ʉLʉdeeva lwa Kʉkyanya luhwananitswa nʉ nkʉlʉdeeva mpamato ʉvɨ aanogilwe ʉkʉvomba ɨmbalɨlo jya mitsigilo ɨgyʉ aavatsigilaga avavombi va mwene. 24Wʉ atengwe ʉkʉvomba ɨmbalɨlo ɨjyo, avasikali va mwene vakiitsa nʉ muunu mpamato ʉvɨ aatsigilwagwa italanta avaelufu kɨtsigo (10,000).#18:24 Italanta avaelufu kɨtsigo (10,000) Ɨtalanta mamato jyalɨngʼiine nʉ lʉhombo lwa mbombo kʉ muunu mpamato kʉ myaka kɨtsigo na gɨhaano (15) nʉ kʉlʉtɨɨlɨla. Apo ʉmbombi ʉjwa aatsigilwagwa indalama tsa kʉkwɨla ʉlʉhombo lwa mbombo kʉ vaanu avaelufu kɨtsigo (10,000) kʉ myaka kɨtsigo na gɨhaano nʉ kʉlʉtɨɨlɨla. 25Ʉmbombi ʉjwa aalemilwe ʉkʉhomba ʉntsigilo gwa ndalama itsʉ aatsigilwagwa. Pwʉ ʉnkʉlʉdeeva akavalagɨla avasikali va mwene ʉkʉta vanʼgʉtse ʉmwene, ʉnʼdala, avaana ni siinu syoni sya mwene pakʉta gʉtavʉlwe ʉntsigilo gwa mwene.

26“Pwʉ ʉmbombi ʉjwa akasugama pavʉlongolo pa nkʉlʉdeeva, akanʼdoova akata, ‘Ndidoova ʉnsipilile padebe, jʉndikʉkʉhomba isiinu syako syoni.’ 27Ʉnkʉlʉdeeva akankolela ɨkɨsa ʉmbombi ʉjwa, akansyɨkɨla, akantavʉla ʉkʉta alʉtage, pwʉ akahega.

28“Wʉ ahʉmile kʉnzi, akaaganila nʉ mbombinnine ʉvɨ aankopye idinali ʉndeevʉlʉ mpamato (100).#18:28 Dinali ʉndeevʉlʉ mpamato tsyalɨngʼiine nʉ lʉhombo lwa mbombo lwa myetsi gɨnni kʉ muunu mpamato. Baaho akantikamila, akatengʉla ʉkʉnʼdoda kʉ singo, akata, ‘Homba isyʉ ndyakʉkopye.’ 29Ʉmbombinnine ʉjwa akasugama paasi, akansiima akata, ‘Ndidoova ʉnsipilile padebe, jʉndikʉkʉhomba ʉntsigilo gwako.’ 30Lɨno ʉmwene akabeela, akalʉta kukʉnʼdɨndɨla ʉnnine ʉjwa mu nyumba jya vakʉngwa ʉkʉsikila ʉnsɨkɨ ʉgwʉ alammomba ʉntsigilo ʉgwa.

31“Lɨno, avavombivanine avange wʉ vagaweene ago, vakalemala siitso mu numbula tsa veene. Pwʉ vakalʉta kʉ nkʉlʉdeeva va veene nʉ kʉmbʉʉla gooni ʉgwʉ gavombiike. 32Pwʉ ʉnkʉlʉdeeva akamwɨlanga ʉmbombi ʉjwa, akambʉʉla akata, ‘Gwe vɨ mbombi vɨ mbiivi ʉve! Lola, ʉpwʉ ʉkansiimile ʉkʉta ndɨkʉsyɨkɨle isyʉ ndɨkakʉtsigilaga, ndɨkakʉsyɨkye ʉntsigilo gwoni! 33Ndeeti, najyʉve napakakʉnogele ʉkʉnkolela ɨkɨsa ʉmbombinnino ndʉwʉ ʉne ndɨkakʉkolye ɨkɨsa ʉve?’

34“Pwʉ ʉnkʉlʉdeeva ʉjwa akaviipa siitso, akavalagɨla avasikali va mwene ʉkʉta vamwibate nʉ kʉntaaga mu nyumba jya vakʉngwa ʉkʉsikila ʉpwʉ alammomba ʉntsigilo gwoni.”

35Kʉ vʉmalɨlo, ʉYɨɨsʉ akatsova akata, “ɄDaada vango ʉvɨ alɨ kʉkyanya, alambombela ewo ʉmuunu ʉvaveetsaga mwanyie ʉvɨ nikʉnsyɨkɨla ʉmwɨdɨkinnine kʉ numbula jya mwene jyoni.”

Attualmente Selezionati:

Mataayo 18: zga

Evidenziazioni

Copia