Mataayo 16

AVafalisayo na Vasadukayo vilonda ɨkɨmanyilo ʉkʉhʉma kʉkyanya

(Maliko 8:11-13; Luuka 12:54-56)

1Pwʉ aVafalisayo na Vasadukayo vaninie vakiitsa kwa Yɨɨsʉ, vakatengʉla ʉkʉnʼgela kʉ nzɨla jya kʉnʼdoova avavonie ɨkɨmanyilo ɨkivonia ʉkʉta asuungʼilwe nʉ Ngʉlʉve. 2ɄYɨɨsʉ akavaanda akata, “Ɨngave vʉhue, mwitsova mwita, ‘Kɨlaavo jʉkwikya vʉnonu ʉlwakʉva kʉkyanya kʉvalye.’ 3Ikange ʉnsɨkɨ gwa pavʉsiku mwitsova mwita, ‘Ɨleelo ɨsula jʉjitima ʉlwakʉva kʉkyanya kʉguvile ikange kʉlɨ na mavɨngo.’ Apo ʉnyie mulʉmanyile ʉkʉtsaagʉlɨla vʉnonu isimanyilo sya kʉkyanya, lɨno mulemwa ʉkʉtsimanyingʼania itsʉ ndivomba nʉ kʉta ʉne neene veeni. 4Ɨkɨvʉmbʉkʉ kya vaanu avatulanongwa na valigu kilonda ɨkɨmanyilo! Nandɨkavavonie ɨkɨmanyilo ɨkɨveetsaga, apeene, jʉvikʉkɨvona ɨkɨmanyilo kɨpamato kyene ɨkyʉ ʉNgʉlʉve aavombile kʉ nyamalago ʉYoona.”#Yoona 1:17 Pwʉ ʉYɨɨsʉ akavaleka, akahega.

Imanyiiso imbiivi tsa Vafalisayo na Vasadukayo

(Maliko 8:14-21)

5Avakongi va Yɨɨsʉ wʉ vilovoka ɨnyanza, vakava vasaamilwe ʉkwɨvopela ɨmikate. 6ɄYɨɨsʉ akavavʉʉla akata, “Mwɨlolelage nɨ kɨlʉve kya Vafalisayo na Vasadukayo.” 7Avakongi va mwene vakatengʉla ʉkwɨtsosanza valɨkʉta, “Itsova ewo ʉlwakʉva natwɨvopiili ɨmikate.” 8ɄYɨɨsʉ akagamanya ago ʉgwʉ vɨɨtsosanzaaga, akavavʉʉtsa akata, “Nyɨ vaanu va lwɨdɨko lʉdebe ʉnyie! Kɨki mukɨtsosanza ikulongwi tsa kʉsaamwa ʉkwɨvopela ɨmikate? 9Mupitsiige namulʉmanyili? Namukʉmbʉka ʉmwʉ avaanu valya avaelufu vahaano (5,000) ndyavigwise kʉ mikate gɨhaano? Ndeeti, mwaholengʼiinie amasigalɨlo isitʉndʉ silɨngi?”#Mataayo 14:21 10ɄYɨɨsʉ akoongeletsa ʉkʉvavʉʉtsa akata, “Ikange ʉpwʉ ndyamenyulinie ɨmikate lekelakʉpamato (7) nʉ kʉvagavɨla avaanu avaelufu vanni (4,000), mwalʉndamiinie amasigalɨlo isitʉndʉ silɨngi?#Mataayo 15:38 11Kɨki namukʉlʉmanya ʉkʉta nandɨtsoviigi ikulongwi tsa mikate? Pwʉ lɨno ndikʉvavʉʉla ikange ʉkʉta mwɨlolelage nɨ kɨlʉve kya Vafalisayo na Vasadukayo.” 12Pwʉ kʉ vʉmalɨlo avakongi va mwene vakalʉmanya ʉkʉta nakatsovage ikulongwi tsa kɨlʉve kya kʉtotsa ɨmikate, apeene akatsovaga ikulongwi tsa manyiiso tsa vʉnuasi tsa Vafalisayo na Vasadukayo.

ɄPetulo itsova ʉkʉta ʉYɨɨsʉ vɨ Kɨlɨsiti

(Maliko 8:27-30; Luuka 9:18-21)

13ɄYɨɨsʉ wʉ asiike mu kɨlʉnga kya pawiipi nʉ vʉtsenge wa kʉ Kaisaliya-Filipi, akavavʉʉtsa avakongi va mwene akata, “Avaanu viita ʉMwana va Muunu veeni?” 14Vakamwanda vakata, “Avange viita veeve Yohana ʉMwotsi, avange viita veeve nyamalago ʉEliya na vange viita veeve nyamalago ʉYelemiya evo inninie va vanyamalago avange.” 15ɄYɨɨsʉ akavuja akavavʉʉtsa akata, “Ingɨno ʉnyie mwita ʉne neene veeni?” 16ɄSimoni Petulo akamwanda akata, “Ʉve veeve Kɨlɨsiti, ʉMwana va Ngʉlʉve ʉvɨ mwʉmi.”

17ɄYɨɨsʉ akambʉʉla akata, “Ʉve Simoni vɨ nswambe va Yoona, ʉlɨ nʼgatalʉsu ʉlwakʉva nakʉli ʉmuunu ʉvɨ akʉdɨndʉlye ago, apeene vɨ Daada ʉvɨ alɨ kʉkyanya. 18Lɨno ndikʉkʉvʉʉla ʉve ndiita, veeve Lʉnalaawe,#16:18 Lʉnalaawe Ɨlitaawa ɨlɨ Lʉnalaawe kwʉ kʉta Petulo mu nzovele jya Kɨyunaani. ikange pakyanya pa lʉnalaawe ʉlʉ, pwʉ ndɨlatsenga ʉmpelela gwango, ikange amaka ga kʉ vʉswe nagalagʉleme ʉmpelela lʉsiku. 19Nʉʉne ndikʉkʉpa ʉvʉtavʉlɨlwa mu Lʉdeeva lwa Kʉkyanya pakʉta gooni ʉgwʉ vudɨnda mu litaawa lyango mu kɨlʉnga ɨkɨ, najyʉ Ngʉlʉve idɨnda kʉkyanya. Ikange, gooni ʉgwʉ vudɨndʉla mu litaawa lyango mu kɨlʉnga ɨkɨ, najyʉ Ngʉlʉve idɨndʉla kʉkyanya.”#16:19 Nʉʉne ndikʉkʉpa ʉvʉtavʉlɨlwa mu Lʉdeeva lwa Kʉkyanya Ʉvʉlʉvʉlʉ wa mamenyu aga kwʉ kʉta galya ʉgwʉ gilamulwa na vavombi va Ngʉlʉve mu kɨlʉnga ɨkɨ, ʉvʉlamutsi ʉwa vukwɨdɨkiwa nʉ Ngʉlʉve. Lola itsyavombiike kʉ Mbombo tsa Vapositili 5:1-11; 15:28; na kʉ 1 Vakolinto 5:3-5. 20Pwʉ ʉYɨɨsʉ akavabeetsa siitso avakongi va mwene avo valeke ʉkʉmbʉʉla ʉmuunu ʉvaveetsaga ʉkʉta ʉmwene vɨ Kɨlɨsiti.

ɄYɨɨsʉ itsova ikulongwi tsa kʉswa nʉ kʉtsʉʉka kwa mwene

(Maliko 8:31–9:1; Luuka 9:22-27)

21Ʉkʉhʉma ʉnsɨkɨ ʉgwa, ʉYɨɨsʉ akatengʉla ʉkʉvavʉʉla avakongi va mwene ʉkʉta wɨgane wa Ngʉlʉve ʉmwene alʉte kʉ Yelusalemu. Ʉkwa vʉtsikʉmbona ʉvʉkʉvɨlwa ʉvʉlʉti ʉkʉhʉma kʉ vanzagɨla, avavaha va vateeketsi na vamanyisi va ndagɨlo.#16:21 Vanzagɨla, avavaha va vateeketsi na vamanyisi va ndagɨlo Isipʉga sidatu isi syale lwʉ lʉlʉndamano lwa kɨpʉga kya valongotsi avavaha, ʉwʉ vaamalaga amamenyu gooni ga Vayahudi. Ɨkɨpʉga ɨkɨ kyatambʉlwagwa Sanihedilini. Ɨmba Sanihedilini kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. Kʉmbele itsibudwa, ikange pa kɨgono ɨkya daatu jiitsʉʉka. 22ɄYɨɨsʉ wʉ agatsovile amamenyu ago pavʉvalasu, ʉPetulo akanʼdoova, akalʉta nave pa lʉkanzi. Akamʼbeetsa aleke ʉkʉtsova ikulongwi itso akata, “Gwe Ntwa, ʉNgʉlʉve asige ago! Galeke ʉkʉkʉvona ʉve!” 23Ʉmwene ʉYɨɨsʉ akagalamuka, akankelemukila ʉPetulo akata, “Hega, lʉta kʉnsana kwane, Setano! Wigela ʉkʉnsiga ʉne ndɨleke ʉkʉvomba ʉvʉnogwe wa Ngʉlʉve! Amasaago gaako ga vʉmuunu, navusaaga itsa Ngʉlʉve.”

24Pwʉ ʉYɨɨsʉ akavavʉʉla avakongi va mwene akata, “Angave ʉmuunu ʉvaveetsaga inogwa ʉkʉngʼonga, atsileke itsa vʉnogwe wa mmana gwa mwene. Ɨtwɨkage ɨkɨdamingʼanie kya mwene, angʼongage.#16:24 Ʉkwɨtwɨka ɨkɨdamingʼanie ʉkʉtsowa apa kwʉ kʉta ʉkwɨdɨka ʉkʉkʉvɨlwa nʉ kʉswa pa kulongwi jya Yɨɨsʉ Kɨlɨsiti. 25Lola, ʉmuunu ʉvɨ inogwa ʉkʉponia ʉwʉʉmi wa mwene, vɨ alawaambʉtsa. Lɨno ʉmwene ʉvɨ ikwambʉtsa ʉwʉʉmi wa mwene kʉ nongwa jyane, ʉjwa vɨ alavʉpoka ʉwʉʉmi wa mwene. 26Ʉmuunu jiivʉmbʉlɨla kɨki angave akavile syoni isya mu kɨlʉnga wʉ kʉnʉ ambwitse ʉwʉʉmi wa sikutsooni? Evo ʉmuunu ahʉmye kɨɨnu kɨki ɨkya kʉpyanitsa pa wʉʉmi wa mwene wa sikutsooni? 27Lola, ʉne ndɨ Mwana va Muunu, ndɨliitsa paninie na vasuungʼwa vango mu wɨɨmɨkiwa wa Daada. Pwʉ ndɨlammomba ʉmuunu mpamato mpamato ʉkʉkongana ni mbombo tsa mwene. 28Jɨlweli ndikʉvavʉʉla ʉkʉta, avange mu nʼgati mwanyie nyɨ mulɨ apa, navakaaswe ʉkʉsika ʉpwʉ vikʉmbona ʉMwana va Muunu ikwitsa kulongotsa ʉLʉdeeva lwa mwene.”#16:28 Navakaaswe ʉkʉsika ʉpwʉ vikʉmbona ʉMwana va Muunu ikwitsa kulongotsa ʉLʉdeeva lwa mwene. Mu mamenyu aga, ʉYɨɨsʉ aatsovaga ikulongwi tsa mwene tsa kʉtsʉʉka nʉ kʉtoga kʉkyanya ni tsa kwitsa kwa Mepo ʉMbalatse.

Attualmente Selezionati:

Mataayo 16: zga

Evidenziazioni

Copia