Mataayo 15

Ʉkʉkonga inyiiho tsa vanyienya

(Maliko 7:1-23)

1Pwʉ vaninie mu Vafalisayo na vamanyisi va ndagɨlo ʉkʉhʉma kʉ Yelusalemu, vakiitsa kwa Yɨɨsʉ, vakambʉʉtsa vakata, 2“Kɨki avakongi vaako navikonga inyiiho itsʉ avanyienya viitu vaatʉlekye? Lola, viilya ɨkyakʉlya kɨtsila kʉpuguha isivoko#15:2 Viilya ɨkyakʉlya kɨtsila kʉpuguha isivoko Wʉ gʉsiike ʉnsɨkɨ gwa kʉlya, aVayahudi vaale nʉ lwiho lwa kʉtala ʉkwɨvalatsa kʉ nzɨla jya kʉpuguha isivoko pwʉ vatengʉle ʉkʉlya ɨkyakʉlya. Ʉmuunu ʉvaalitsaga ɨkyakʉlya kɨtsila kʉpuguha isivoko aavalɨlwagwa innangi va nyiiho tsa veene. sya veene!” 3ɄYɨɨsʉ akavaanda akata, “Kɨki najyʉnyie namukonga indagɨlo tsa Ngʉlʉve apeene mukonga inyiiho tsiinyo? 4Lola, ʉNgʉlʉve aatye, ‘Ʉmwɨmɨkage ʉdadaajo nʉ jyʉva vaako.’#Kʉhʉma 20:12; Simiilitso tsa Ndagɨlo 5:16 Ikange aatye, ‘Ʉmuunu ʉvaveetsaga ʉvɨ ikootola kwa dadaaje evo kwa vanyina, abudwagwe.’#Kʉhʉma 21:17; Valawi 20:9 5Lɨno ʉnyie mumanyiisa mwita, ‘Ʉmuunu alɨ nawo ʉvʉtavʉlɨlwa wa kʉmbʉʉla ʉdadaaje evo ʉvanyina ʉkʉta, “Ʉlʉtangɨlo ʉlwʉ ndɨkaale ndikʉkʉpa ʉve, lɨno lwiva lwa kʉmpa ʉNgʉlʉve.” ’ 6Kwʉ kʉta mwita ʉmuunu nitsigilwa ʉkʉmwɨmɨka ʉdadaaje evo ʉvanyina. Kʉ nzɨla ɨjyo, ʉnyie mwibeda ɨlimenyu lya Ngʉlʉve pa vʉsumbe wa kʉkonga inyiiho tsiinyo. 7Nyɨ vanuasi ʉnyie! Ʉnyamalago ʉYesaya aatsovile amalago ga lweli gaanyie ʉpwʉ aatye,

8‘ɄNgʉlʉve iita, “Avaanu ava vikʉnnyɨmɨka kʉ mamenyu geene,

inumbula tsa veene, baako tsilɨ kʉtale nʉʉne.

9Ʉkwɨsaja kwa veene,

vikɨgatatsa vʉvʉle,

pakʉva itsʉ vimanyiisa,

ndagɨlo tsa vʉnogwe wa vaanu.” ’#Yesaya 29:13”

10ɄYɨɨsʉ akakyɨlanga ɨkɨpʉga kya vaanu kʉ mwene, akata, “Pʉlɨhɨtsi vʉnonu nʉ kʉtsimanya itsi! 11Nakwʉ kʉta isiinu isyʉ sikwingila mu ndomo, syʉ sikʉmpelela ʉmuunu ave inkolelanie. Apeene, amamenyu ʉgwʉ gihʉma mu ndomo, gwʉ geene ʉgwʉ gikʉmpelela ʉmuunu ave inkolelanie.”

12Pwʉ avakongi va Yɨɨsʉ vakalʉta kʉ mwene, vakambʉʉtsa vakata, “Ʉlʉmanyile ʉkʉta aVafalisayo wʉ vapʉliike amamenyu galya ʉgwʉ ʉkatsovile, vakaviipile siitso?” 13ɄYɨɨsʉ akaanda akata, “Ndʉwʉ ʉmuunu inyapa ɨkɨɨnu ɨkɨmelile ɨkyʉ navyalili ʉmwene, wʉ alagaha ʉDaada ʉvɨ alɨ kʉkyanya, alajatsa avamanyisi vooni avimanyiisa ʉgwʉ nalagiili ʉmwene. 14Valeki avo, ʉlwakʉva vavyʉta vaanu vabosu avigela ʉkʉvalongotsa avabosu avange! Ɨngave ʉmʼbosu ikʉndongotsa ʉmʼbosunnine, vooni wʉ vavɨlɨ jʉvigwɨla mu liguli!” 15Pwʉ ʉPetulo akaanda akata, “Tʉlʉvʉlɨle ɨkɨhwananitso kya siinu isikwingila mu ndomo isyʉ nasikʉmpelela ʉmuunu ave inkolelanie.” 16ɄYɨɨsʉ akavʉʉtsa akata, “Ndeeti najyʉnyie mupitsiige namulʉmanyili? 17Namulʉmanyili ʉkʉta ɨkɨɨnu ɨkɨveetsaga ɨkyʉ kikwingila mu ndomo, kikwingila mu litumbu lya muunu pwʉ kʉmbele kihʉma kitaagwa kʉ tsoo? 18Lɨno, ɨkihʉma mu ndomo gwa muunu, kihʉma mu numbula jya mwene. Ɨkyo kyʉ kyene kikʉmpelela ʉmuunu ave inkolelanie. 19Lola, mu numbula jya muunu, mwʉ gihʉma amasaago amaviivi aga: ʉvʉbudi, ʉvʉligu, ʉvʉmalaja, ʉvʉhɨɨtsi, ʉwooleletsi wa vʉnuasi na madʉsi. 20Gooni ago, gwʉ geene gikʉmpelela ʉmuunu ave inkolelanie. Lɨno ʉmuunu niiva inkolelanie ʉlwakʉva iilya kɨtsila kʉpuguha isivoko.”

Ʉlwɨdɨko lwa nʼdala ʉNkanaani

(Maliko 7:24-30)

21ɄYɨɨsʉ akahega palya, akabɨha kʉ kɨlʉnga kya kʉ Tilo nɨ kya Sidoni. 22Pwʉ ʉnʼdala mpamato ʉNkanaani, ʉvɨ aataamaga ʉkwa, akambona ʉYɨɨsʉ kʉvʉtale, akiitsa ikwɨlanga kʉ maka iita, “Gwe Ntwa, Mwana va nkʉlʉdeeva ʉDavʉdi, ʉngʼolele ɨkɨsa! Ʉmwalɨvango ibiitwe siitso nɨ mepo ɨmbiivi.” 23Ʉmwene ʉYɨɨsʉ naamwande ʉnʼdala ʉjwa ɨlimenyu ɨlɨveetsaga. Pwʉ avakongi vakahegelela kwa Yɨɨsʉ, vakanʼdoova vakata, “Imbʉʉle alʉtage, manya ʉnʼdala ʉjʉ ikwoveela kʉnsana kwawe.” 24ɄYɨɨsʉ akavaanda akata, “ɄNgʉlʉve ansuungʼile ʉne kukʉvapoka aVaisilahɨli, manya avo vajagile ʉta ngʼolo.” 25Baaho, ʉnʼdala ʉjwa akiitsa, akasugama pavʉlongolo pa Yɨɨsʉ, akanʼdoova akata, “Gwe Ntwa, ndikʉkʉdoova ʉnnange!” 26Akamwanda akata, “Nalʉnonu ʉkʉtoola ɨkyakʉlya kya vaana nʉ kʉtsilahɨla imbwa.”#15:26 Imbwa AVayahudi vɨɨvonaga aveene wʉ vanogye siitso pamiiho ga Ngʉlʉve. Avaanu avange avatava Vayahudi vaavavonaga navanogiili kɨɨnu. Valɨkʉta mbwa. ɄYɨɨsʉ ihwanania ipange aVayahudi evo avakongi va mwene, na vaana. Avatava Vayahudi ihwanania ni mbwa. Ʉvʉsumbe wa Yɨɨsʉ nawaale wa kʉnʼdʉka ʉnʼdala ʉlya, ʉmwene aanogilwe ʉkʉnʼgela ʉlwɨdɨko lwa mwene. 27Ʉnʼdala ʉjwa akaanda akata, “Eena wʉ jɨlɨwo Ntwa, lɨno imbwa natsyene tsiilya amasigalɨlo agiigwa paasi ʉkʉhʉma pa meesa tsa venembwa itso.” 28ɄYɨɨsʉ akamwanda akata, “Vɨ nʼdala ʉve, ʉlɨ nʉ lwɨdɨko ʉlʉvaha siitso! ɄNgʉlʉve akʉvombele ndʉwʉ ʉdoovile.” Akavalɨlo kaako ʉmwalɨve ʉjwa akapona.

ɄYɨɨsʉ ikʉvaponia avatamu vongosu

29Wʉ ahegile apo, ʉYɨɨsʉ akalʉta kʉ lʉkanzimbale lwa nyanza jya Galilaya, akatoga kʉ kɨdugala, akatsitaama paasi. 30Ɨkɨpʉga ɨkɨvaha kya vaanu kɨkiitsa ʉpwʉ aale. Vaavagegile kʉ mwene avaanu avalema, avabosu, avasugujwike isilʉnde, avilemwa ʉkʉtsova na vatamu avange vongosu. Vakavavɨɨka avatamu avo pa silʉnde sya Yɨɨsʉ, ʉmwene akavaponia. 31Avaanu avo vakadega siitso wʉ vikʉvavona avaanu avakalemwagwa ʉkʉtsova vitsova, avakasugujwike isilʉnde vigenda, avakaale valema vaponile, na vakaale vabosu vilola. Vakatengʉla ʉkʉnʼginia ʉNgʉlʉve va Vaisilahɨli.

ɄYɨɨsʉ iliisa avaanu avaelufu vanni

(Maliko 8:1-10)

32Pwʉ ʉYɨɨsʉ akavɨɨlanga avakongi va mwene, akavavʉʉla akata, “Ndikʉvakolela ɨkɨsa avaanu ava, manya vatsila kyakʉlya, ʉlwakʉva vavye paninie nʉʉne isigono sidatu. Nandinogwa ʉkʉta ndɨvatavʉle vavujage kʉ matsumbe ga veene wʉ valɨ nɨ nzala, jʉvigela vijyeta mu nzɨla.”

33Avakongi va mwene vakambʉʉtsa vakata, “Gwe Mbaha, pa lʉkɨnga apa, tukʉgɨvona ndaku ɨmikate gya kʉviigusa avaanu vooni ava?” 34ɄYɨɨsʉ akavavʉʉtsa akata, “Mulɨ nagyo ɨmikate gɨlɨngi?” Aveene vakamwanda vakata, “Tʉlɨ nagyo ɨmikate lekelakʉpamato (7) ni sisomba sidebe.” 35Lola, ʉYɨɨsʉ akavalagɨla avaanu vataame paasi. 36Akatoola ɨmikate ɨgyo lekelakʉpamato ni sisomba isyo, akasaana kwa Ngʉlʉve, pwʉ akamenyulania, alɨkʉvapa avakongi va mwene, pwʉ naveene avakongi valɨkʉvagavɨla avaanu avo. 37Avaanu vooni avo vakalya, vakiiguta. Kʉmbele avakongi vakalʉndamania amasigalɨlo, vakadɨtsa isitʉndʉ lekelakʉpamato. 38Avaanu avaalie ɨkyakʉlya ɨkyo vaalepwo avagoosi avaelufu vanni (4,000), kɨtsila kʉvalɨla avadala na vaana. 39Wʉ avatawe avaanu avo valʉtage, ʉYɨɨsʉ akiingila mu waato, akalʉta kʉ mbasu tsa vʉtsenge wa Magadani.

Attualmente Selezionati:

Mataayo 15: zga

Evidenziazioni

Copia