Génesis 33
33
Kub' tnajsa'n Esaú til Jacob
1Tejtzun tke'yinte Jacob kyja'toq ttzaj Esaú tuk'ix kyaje syent xinaq tuk'il, e b'aj tpa'n qe k'wa'l t-xol Lea ex Raquel ex kyxol qe kab'e majen xu'j; 2e kub' tnejsa'n Jacob qe kab'e majen xu'j kyuk'il qe kyal, lepchix Lea kyuk'il qe tal, ex mankb'il xi' Raquel tuk'il José. 3Kub'tzun nej Jacob kywitz, ex wuq maj kub' ẍmeje' ex pon takl tib'aj twitz twitz tx'otx', tejxi tul kanun twitz ttzik. 4Xitzun qelan Esaú tuk'il, tzaj tchle'n, xi paqe' tib'aj tqul, ex el ttz'ub'an twitz. E jawtzun oq' kykab'il. 5Xitzun tke'yin Esaú qe xu'j kyuk'ix qe kyal, ex xi tqanin kyja':
—Yajtzun qe jlu, ¿alkye qe? Chi Esaú.
—Atzun qe nk'wa'le o che tzaj tq'o'n Dios, aqine ajb'el teya, chi Jacob xi ttzaq'we'n.
6E ultzun laq'e' qe majen xu'j kyuk'ix kyal ex e kub' mok'e' twitz tx'otx'. 7Ax ikx ul laq'e' Lea kyuk'ix qe tal ex e kub' mok'e'. Te mankb'il ul José tuk'ix Raquel; ax ikx e kub' mok'e'. 8Ax ikx xi tqanin Esaú:
—¿Alkye t-ximb'etza kyi'j junjun b'yuj alumaj ma che ok nk'ulb'a'ne? Chi Esaú.
—Waje tu'n tk'monteya tu'n nkamb'anteye xtalb'il teya, chi Jacob xi ttzaq'we'n.
9—Mi'n, witz'in. Ax at nim weye. E tten te teya aju teya, chi Esaú.
10Xi tma'ntl Jacob kyja':
—Mi'n, najsama. Qa ax tok ma nkamb'aye t-xtalb'ila, k'momxa aju oyaj lu tu'nju ma wile twitza; a jlu mer ik tza'n aku Dios ma wile, ex b'a'n ma chin k'mete tu'na. 11In chin kub'sane twitza k'momxa aju oyaj ma tzaj wi'ne teya, porke o chin tzaj xtaline tu'n Dios ex minti' jun atx taj weye.
Tu'nju kukx t-xi tma'n Jacob ikju, kub' tuj twitz Esaú tu'n t-xi tk'mo'n aju oyaj, 12ex xi tma'n Esaú kyja':
—Qo ik' tzalu. Jaku chin kub' neje twitza.
13Xi tma'n Jacob kyja':
—Tat, b'a'n tu'na, ne'x qe tal k'wa'l, ax ikx uk'in qe ẍne'l wu'ne ex qe wakẍ k'itzqe kub' kyal. Qatzun ma che sikt, tujlo junx q'ij jaku che kyim kykyaqil ẍne'l. 14Mas b'a'n tu'n t-xi neja nwitze, aqine tmajena; atzun weye, cheb'a chin xe'le, ik tza'nx che b'et qe alumaj aqeju nejni nwitze, ex ik tza'nx che b'et qe tal nk'wa'le, okxi npon kanune tuk'ila tuj Seir, chi Jacob.
15Xi tma'n Esaú kyja':
—B'a'n. Jaku che kyaj nq'o'ne junjun xinaq tuk'ila, aqeju uk'in wu'ne, chi Esaú.
Xi tma'n Jacob:
—¿Ti kyajb'en qe jlu? O'kx wajb'ile tu'n nkamb'anteye t-xtalb'ila, chi Jacob.
16Tujxtzun q'ij lu aj meltz'aj Esaú tu'n tpon tuj Seir. 17Atzunte Jacob kyja' ttzaj tu'n tul tuj Sucot. Atzun jaw tb'incha'n tja ex qe kyja talun. Tu'ntzun jlu Sucot#33.17 Sucot. Tuj yol ebrey atzun in tma'n: Ja t-xaq tze'yin twi'. tb'i lugar lu ok tq'o'n.
18B'a'n ul Jacob tuj tnam Siquem tuj tx'otx' Canaán, tej tajtz meltz'aj tuj Padan-aram, ex atzun kub' ten twitz tnam. 19Tu'n jun syent saq pwaq o tloq' jun piẍ tx'otx' kye tk'wa'l Hamor aju tman Siquem. Atzun kub' tq'o'n Jacob tja, xb'alun ja. 20Ax ikx jaw tb'incha'n jun altar, ex El-elohe-israel tb'i ok tq'o'n.
Attualmente Selezionati:
Génesis 33: MAMNO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
