Génesis 32
32
In b'ant tten Jacob tu'n tk'ulb'ante tib' tuk'il Esaú
1Ik'tzuntl Jacob ex e tzaj txqan t-anjel Dios kanul te. 2Tejtzun tlonte Jacob qe anjel tma: Aqe jlu txqan t-soldad Dios qe. Tu'ntzun jlu, Mahanaim tb'i lugar lu ok tq'o'n.
3E tzaj t-sama'n Jacob sanjel tuk'il Esaú aju ttzik, tu'n kyul tuj tx'otx' Seir, ex Edom juntl tb'i tok, 4ex tzaj tma'n kye kyja': Atzun jlu kxel kyma'ne te tat Esaú aju ntzike: Atzun jlu in tma'n Jacob aju ajb'el teya: Tej wetze tuj njaye, atzun o chin tene tja Labán, 5ex ate' nwakẍe, nburre, nẍne'le, nmajene xinaq ex nmajene xu'j. Atzun tqanil in xi nsama'ne teya, tat. In chin ayone tu'n nkamb'anteye t-xtalb'ila, che chikuye, chi Jacob kye sanjel.
6E ajtztzun meltz'aj qe sanjel ex xi kyma'n te Jacob kyja': Ma qo'x aje tuk'il Esaú aju ttzika. Twitzelku tzul kanul ti'ja, ex uk'in kyaje syent xjal tu'n, che chi.
7Tzajtzun nimxix t-xob'il Jacob ex nim t-ximb'etz. E kub' tpa'n qe xjal ate'toq tuk'il, kyuk'ix qe t-ẍne'l, qe twakẍ, ex qe tchej camey; te kab'e k'loj e je'l tu'n. 8Tu'nju kub' t-ximan kyja': Qa ma tzaj Esaú q'ojlel ti'j jun k'loj, atzunte juntl k'loj jaku tzoqpaj. 9Oktzun ten na'l Dios ex tma: Nman, aju Tdios nchmane Abraham ex Tdios nmane Isaac, aya o tzaj q'mante weye kyja': Taj meltz'aja tuj ttx'otx'a ex kyuk'il qe xjal at t-xilena kyuk'il, ex b'a'n k'elel tb'eya wu'ne, chiya. 10Minti' woklene ti'j t-xtalb'ila ex tq'aq'b'il tk'u'ja tzaj tq'o'na weye. Tej wik'e tuj nima Jordán minti'toq q'i'n wu'ne, noq o'kx nky'aqo'che. Atzun ja'lo ma b'ant kab'e k'loj nb'ete. 11B'inchama xtalb'il, chin tkloma tuj tq'ab' ntzike Esaú, porke in chin xob'e twitz. Mya yajku tzul q'ojlel wi'je, ex jaku che kub' tb'yo'n qe xu'j ex qe k'wa'l. 12O tzaj tma'na weye kyja': Chin onile ti'ja tu'n tanq'ina b'a'n, ik che okel tiyjila ik tza'n ttxa tz'a'n ttzi mar, ex mlay b'ant kyajlanjtz tu'nju nim kyajlal, chiya, chi Jacob.
13Axtzun o tan Jacob tuj aq'b'il lu, ex kyxol tkyaqilju attoq te, e jaw tjyo'n oyaj tu'n kyxi tq'o'n te Esaú aju ttzik. 14Jaw tjyo'n kab' syent ttxu chip ex winqin tman chip, kab' syent ttxu ẍne'l ex winqin tman ẍne'l, 15ax ikx 30 ttxu chej camey kyuk'ix qe kyal k'itzqetoq che kub', 40 vac, laj tal tor, winqin ttxu bur ex laj tman bur. 16Ex e je'x tq'o'n tuj kykwent qe tmajen teyle te junjun k'loj alumaj, ex xi tma'n kye kyja': Che nejkuye nwitze, ex kyq'onkje pab'l tib' kyxol teyle te junjun k'loj.
17Xi tma'n teju xi t-sama'n nej: Qa ma tz'ok tk'ulb'an tib'a tuk'il Esaú aju ntzike, ex qa ma tzaj tqanin teya kyja': ¿Alkye tpatrona? ¿Jatum ma txi'ya? ¿Al-e qe alumaj q'i'n tu'na? qa chi, 18q'manxtzuna te kyja': Tat Esaú, a jlu jun oyaj ma tzaj sama'n teya tu'n Jacob aju tmajena, ex lu te lepchix ttzaj qi'je, chikuya.
19Ax ikx te tkab'in, te toxin ex kye kykyaqil qeju lepchtoq qe kyi'j qe alumaj, xi tma'n kye kyja': Ikxtzun tten kxel kyma'ne te Esaú ok tok kyk'ulb'an kyib'e tuk'il. 20Ax ikx kxel kyma'ne te kyja': Ax ikx te Jacob aju tmajena, lu te lepchix ttzaj qi'je, che chikuye, chi Jacob.
Tu'nju tma Jacob kyja': Kchewixtel tq'oj Esaú wi'je tu'nju oyaj in xi nsama'ne, ex lepchix nxi'ye tu'n twile twitz. Qapelo jaku chin k'mete tu'n ikju, chi Jacob. 21Xitzun t-sama'n oyaj nej. Atzun te ax kyaj tan tuj campament tuj aq'b'il lu.
Ok ten Jacob ma'lil tuk'il jun anjel
22Tujx aq'b'il lu jaw we' Jacob, e tzaj ti'n qe kab'e t-xu'jil, qe kab'e tmajen xu'j ex qe junlaj tky'ajal, ex e jik'x ti'n tuj jun xajb'il a' tuj nima Jaboc, 23junx tuk'il tkyaqilju attoq te. 24Kyja'tzun kyaj ten Jacob tjunal te, ex o ma'lin jun xinaq tuk'il tejxi qsqix. 25Tejtzun tna'nte xinaq, lu minti'x tu'n t-xkye' ti'j Jacob, oktzun tb'aju'n twi t-xix, ex b'i'x etz q'ulpaj t-xix Jacob tu'n, akux kukxtoq tma'lin tuk'il. 26Xitzun tma'n xinaq te Jacob kyja':
—Chin ttzoqpintza, tu'nju ch'ix qsqix, chi xinaq.
—Qa mi'n ma chin kub' tky'iwla'na, mlay txi ntzoqpi'ne, chi Jacob te.
27—¿Titzun tb'iya? Chi xinaq.
—Jacob nb'iye, chi xi tma'n.
28Xitzun tma'n xinaq te kyja':
—Mi'n tz'ok q'ma'ntl tb'iya Jacob, Israel#32.28 Israel. Tuj yol ebrey atzun in tma'n: Tu'nju ma q'ojina tuk'il Dios. Atzun tb'i Jacob ok, tkub'len ti'j q'oj tu'n tuk'il t-anjel Dios. tb'iya k'okel, tu'nju ma ma'lina tuk'il Dios ex kyuk'il xjal ex ma kub' kyi'j tu'na, chi xinaq.
29—Ax ikx teya, q'mantza weye ti tb'iya, chi Jacob.
Xitzun ttzaq'we'n xinaq:
—¿Tiqu'n in tzaj tqanina nb'iye? Chi xinaq.
Axtzun kub' ky'iwla'n Jacob tu'n. 30Oktzun tq'o'n Jacob tb'i lugar lu Peniel,#32.30 Peniel. Tuj yol ebrey atzun in tma'n: Aju twitz Dios. tu'nju tma: Ma wile aku Dios ex itz'x qine.
31Matoqtzun in b'et tetz Jacob tuj Peniel tej tqoptz'aj q'ij, otoq tz'etz q'ulpaj t-xix ex in koxintoq tel. 32Tu'ntzun jlu, atxixtzun minti' in xi kychyo'n qe tiyjil Israel aju tb'otx'il twi xixb'aj, tu'n tlaj twi' t-xix Jacob o ky'ixb'isanjtz.
Attualmente Selezionati:
Génesis 32: MAMNO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
