Genesis 9
9
Hay impainilan Apu Dios ke Noah
1Hi Apu Dios ya binendisyonanah Noah ya nadan iimbabalena an kananay “Mangaddu kayu ta dumakol kayu ta boblayan yun am-in tun luta. 2Am-in di aggayam, nadan hahamuti ya nadan matagun wadah baybay ya tumakut dan dakayu ya dakayuy nangamung hi pangiatan yun dida. 3Am-in datuwe ya idat kun dakayu ta pananud yuh adol yu umat nadah nitanom an indat kun dakayu. 4Mu iadik an kanon yu nadan dotag an nanongnan waday dalana te nan dalay kawad-an di biyag. 5Kinali nan tagun patayonay ibbanan tagu ya kastiguwok ya kate damdamay pangastiguk nah aggayam an pumateh tagu. 6Te lintuk di tagu an umat ke ha-on, ta hidiye nan waday pumateh ibbanan tagu ya patayon yu damdama. 7Maphod di mangaddu kayu ta dumakol di imbabale yu ta mihinap da tuh luta.”
8Kanan bon Apu Dios ke Noah ya nadah imbabalenay 9“Dakayu ya takon nadan holag yu ya ipaannung kuy planuk hi kiphodan yu 10takon nadan aggayam ya hahamutin impalah-un yu nah bapor. 11Ya punna-udok mon kalyon ke dakayu an adi mo malbongan tun luta ta adi mo madadag am-in di matagu. 12,13Hay pangitib-an yun umannung tun kinalik ke dakayu takon nadan aggayam ya punnanongok ta nangamung di nakitobbalak ke dakayu an wadaok di at-atibungalon nah kulabut hi kabunyan ta ahi damdama pangitib-an di holag yu. 14Ta deket nah waday at-atibungalon hi kabunyan 15,16ya hidiyey panginomnomak nah kinalik ke dakayu ya am-in di matagun wada tuh luta an adi mo mapidwan malbongan tun luta. 17Hidiyey pangimatunan yu nah kinalik an kiphodan am-in di matagu tuh luta.”
Hi Noah ya nadan imbabalena
18,19Hanadan tulun imbabalen Noah an limmah-un nah bapor ya hi Sem, hi Ham ya hi Japet. Diday nalpuwan am-in di tatagun nihinap tuh luta. Hi Ham ya hiyay aman Kanaan.
20Hay ngunun amadan hi Noah ya muntanom. Hiyay namangulun nuntanom nah grapes. 21Waday naminghan an kinapya na nan grapes hi mainum ot inumona. Handih nabutong ya numbollad ot pamaganah bakilang nah abung nan nakapyah tulda. 22Hi Ham an hi aman Kanaan ya tinibonah amana an hi Noah an numbollad ya ena kinali nah duwan tulang na an da Sem ke Japet. 23Ot diday e nangulon amada an inwang-al da nan uloh indoggan da ot ihunohhunod dan mangeh kad-an amada ta adida iang-ang ke hiya ot handih nih-up da ya ingga da nan ulo ot maulohan hi amada. 24Handih napaey binutong Noah ot inilaonay inat Ham an udidiyan an imbabalena 25ya kananay
“Hay dug-an di iKanaan an holag Ham ya diday ahi kababbabaan an muttatyun nadan holag da tulang nan hi Sem ya hi Japet. 26Madayaw hi AP-APU an Dios Sem ya mabendisyonan anhan hiya. Mu nadan iKanaan ya mumbalin dan muttatyuna. 27Ya hana ot ta hi Apu Dios ya padakkolonay holag Japet ya mid-um da nah holag Sem. Mu mumbalin nadan iKanaan an himbut nadan holag Japet.”
28Hi Noah ya timmaguh tuluy gatut ta naliman toon nipalpu handih nagibbuwan di nalbongan di luta. 29Ta hay ngam-ut am-in di toona ot ahi nate ya hiyam di gatut ta nalima.
Attualmente Selezionati:
Genesis 9: ifkWB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2004, Wycliffe Bible Translators, Inc. All rights reserved.
