Genesis 8
8
Hay natdukan nan danum
1Ugge kinal-iwan Apu Dios da Noah ya nadan aggayam an wadan nah bapor ot ipaali nay dibdib ot matmatdukan nan danum. 2Ya natikod mo nadan danum an malpud dalom ya ad kabunyan 3ot mun-ul-ulen natduk hi liman bulan. 4Handih mikapulut pituy algon di mikapitun bulan ya nipattuk nan bapor nah Bilid an Ararat. 5Mungkatduk nan danum ot handih namangulun algo kediyen mikapulun bulan ya matibo moy tuktuk di bibilid.
6Nala-uy nap-at an algo ot ahi ibughul Noah di ohan tawang nan bapor. 7Ot ipatayap nay ohan gawwang, mu ugge nibangngad te timmanayyapan ta inggana matduk nan danum. 8Ot ipatayap na bo nan ohan paloma ta panginil-ana hin natduk nan danum. 9Mu maid di ena opaan te ugge ni-an natduk di danum ot mibangngad nah bapor ot alan Noah ot ipaghop na. 10Hin-od nay pitun algo ot ahina bo ipatayap nan paloma. 11Mungkahilong kediye ya nibangngad nan paloma an waday himbat nah tubun di kaiw an oliba. Ot hidiyey nanginilaan Noah an natduk mo nan danum. 12Ot pala-uwona boy pitun algo ot ahina ipatayap hidiyen paloma, mu ug-ugge nibangngad.
13Handih onom di gatut ta ohay toon Noah kediyen namangulun algoh namangulun bulan ya maid moy danum ot ibughul na nan bapor ot mun-ang-ang-ang ya mungkamag-anan moy luta. 14Ya handih nala-uy duwampulut pitun algoh mikadwan bulan ya nakammag-anan mo nan luta.
15Kanan Apu Dios ke Noah di 16“Damana mon lumah-un kayun nah inayam, nadan imbabalem ya nadan inayan da. 17Ya palah-unom nadan aggayam takon nadan hamuti ta mumbunat dat mihinap da tuh luta.” 18Ot lumah-un hi Noah ya nan pamilyana nah bapor. 19Takon nadan aggayam, nadan hamuti ya nadan mungkaddapan ya limmah-un da an waday oha on nun-uunnud da nadah kaingngo da.
Hay nun-appitan Noah ke Apu Dios
20Nangapyah Noah hi pun-appitan ke APU DIOS ot alanay hin-oh-a nadah aggayam ya hamuti an miappit ot gobhonan in-appit nan hiya. 21Ya inabulut APU DIOS hidiyen niappit ke hiya. Ot kananah nomnom nay “Adik mo ipidwan dug-ahan di luta takon di gaga-ihoy pangi-en di tagu. Te inilak an nunna-ud tuwali handih kaunga dan adi maphod di wadah nomnom da. Adik mo ipidwan lobngon tun lutat adi madadag am-in di matagu. 22Ya adi mapa-i tun luta ta nanongnan waday tiempon puntanoman ya waday ahiani, wadat nangamung di tialgo ya ahiudanan ya waday pat-al ya hilong.”
Attualmente Selezionati:
Genesis 8: ifkWB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2004, Wycliffe Bible Translators, Inc. All rights reserved.
