Yôhan 4

Yêsu Hăng Đah Kơmơi Samari

1Tơ Yêsu thâo ƀing Pharisi hmư̆ hing kơ Ñu hmâo pơjing laih anŭn ngă ƀatem kơ ƀing ding kơna lu hloh kơ Yôhan, 2(biă mă ƀu djơ̆ Yêsu pô ôh ngă ƀatem kơ arăng, kơnơ̆ng ƀing ding kơna Ñu đôč ngă.) 3Yêsu tơbiă mơ̆ng kwar Yuđa wơ̆t glaĭ pơ kwar Galilê. 4Samơ̆ Yêsu khŏm găn nao kwar Samari, 5Tui anŭn Ñu truh pơ sa boh plei amăng kwar Samari, anăn Sikar jĕ pơ hmua Yakôp brơi kơ ană ñu Yôsep.#Čơd 33:19; Yôs 24:32. 6Pơ anŭn hmâo ia dơmun Yakôp. Yêsu gleh rơbưi yua kơ rơbat, tui anŭn Ñu dŏ ber ƀơi ia dơmun. Hlăk anŭn năng ai pluh dua mông yang hrơi dơ̆ng.#4:6 Mông tal năm.

7Hmâo sa čô đah kơmơi Samari rai sŏ ia. Yêsu laĭ hăng gơ̆: “Pha kâo mơñum ia ih đa.” 8(Hlăk anŭn ƀing ding kơna Ñu nao laih pơ plei kiăng blơi mơnơ̆ng ƀơ̆ng huă.)

9Đah kơmơi Samari laĭ kơ Ñu: “Hyư̆m, Ih jing mơnuih Yuđa pŭng kơ rơkâo mơñum ia mơ̆ng kâo jing đah kơmơi Samari lĕ?” (Yua kơ mơnuih Yuđa ƀu pơgop pơlir hăng mơnuih Samari ôh.)#Êsr 4:1-5; Nêh 4:1-2.

10Yêsu laĭ glaĭ: “Tơdah ih thâo mơnơ̆ng Ơi Adai pha brơi, laih anŭn tơdah ih thâo krăn hlơi pô dŏ pơhiăp hơbĭt hăng ih: ‘Pha kâo mơñum ia ih đa,’ tui anŭn ih pô či rơkâo kơ Ñu, laih anŭn Ñu či brơi ia hơdip kơ ih.”

11Đah kơmơi laĭ kơ Ñu: “Ơ Khua, ih ƀu hmâo kơthŭng sŏ ia ôh, hloh kơ anŭn ia dơmun anai dlam dơ̆ng; tui anŭn mơ̆ng pơpă ih hmâo ia hơdip anŭn lĕ? 12Djơ̆ mơ̆ ih prŏng hloh kơ Yakôp ơi adon gơmơi đưm, pô hmâo brơi kơ gơmơi ia dơmun anai, laih anŭn ñu pô wơ̆t hăng ƀing ană đah rơkơi ñu, hlô mơnơ̆ng ñu rong, leng kơ mơñum ia anai soh sel?” 13Yêsu laĭ glaĭ: “Hlơi pô mơñum ia anai ăt či mơhao dơ̆ng, 14samơ̆ hlơi pô mơñum ia Kâo či pha brơi, ƀu či mơhao dơ̆ng tah; ia Kâo pha brơi či jing hĭ amăng ñu sa bĭt akŏ ia ƀlĕ bluh hlŏng truh pơ tơlơi hơdip hlŏng lar.” 15Đah kơmơi anŭn laĭ hăng Ñu: “Ơ Khua, rơkâo kơ ih brơi ia anŭn kơ kâo bĕ, kiăng kơ kâo ƀu mơhao dơ̆ng ôh, kŏn rai sŏ ia anai dơ̆ng lơi.”

16Yêsu laĭ kơ gơ̆: “Nao iâu rơkơi ih bĕ, hăng wơ̆t glaĭ pơ anai.” 17Đah kơmơi laĭ glaĭ: “Kâo ƀu hmâo rơkơi ôh.” Yêsu laĭ kơ gơ̆: “Djơ̆ yơh ih laĭ: ‘kâo ƀu hmâo rơkơi ôh’, 18yua kơ ih hmâo rơma čô rơkơi laih, laih anŭn mơnuih ih dŏ ră anai ñu ƀu djơ̆ rơkơi ih mơ̆n. Djơ̆ yơh ih laĭ tui anŭn.” 19Đah kơmơi anŭn laĭ kơ Ñu: “Ơ Khua, kâo thâo Ih jing sa čô pô laĭ lui hlâo. 20Ƀing ơi adon gơmơi kơkuh pơpŭ ƀơi hăng ngŏ čư̆ anai; samơ̆ ƀing ih laĭ amăng plei Yêrusalem yơh jing anih lăp arăng kơkuh pơpŭ.” 21Yêsu laĭ kơ gơ̆: “Ơ đah kơmơi, đaŏ bĕ kơ Kâo, mông giăm truh, ƀing gih ƀu kơkuh pơpŭ kơ Ama ƀơi hăng ngŏ čư̆ anai, kŏn djơ̆ pơ plei Yêrusalem lơi. 22Ƀing gih kơkuh pơpŭ kơ pô ƀing gih ƀu thâo krăn ôh; samơ̆ gơmơi jing ƀing Yuđa kơkuh pơpŭ kơ pô gơmơi thâo krăn, yua kơ tơlơi pơklaih tơbiă rai mơ̆ng ƀing mơnuih Yuđa. 23Samơ̆ mông giăm truh, laih anŭn ñu truh laih, tơ ƀing mơnuih kơkuh pơpŭ hăng tơlơi sĭt, či kơkuh pơpŭ kơ Ama hăng bơngăt jua laih anŭn hăng tơlơi sĭt; ƀing kơkuh pơpŭ kar hăng anŭn yơh Ama kiăng. 24Ơi Adai jing bơngăt mơyang, hnŭn yơh ƀing kơkuh pơpŭ kơ Ñu, khŏm kơkuh pơpŭ hăng bơngăt jua laih anŭn hăng tơlơi sĭt.” 25Đah kơmơi anŭn laĭ kơ Yêsu: “Kâo thâo Yang Mêsi či rai ‘Pô anŭn arăng iâu Yang Krist’; Tơ Ñu rai, Ñu či bơrơđah brơi kơ ƀing ta abih bang tơlơi.” 26Yêsu laĭ kơ ñu: “Kâo, pô dŏ pơhiăp hăng ih, jing Pô anŭn yơh.”

27Hlăk anŭn ƀing ding kơna Ñu truh. Gơñu kơtuă hling ƀuh Ñu dŏ pơhiăp hăng sa čô đah kơmơi, samơ̆ ƀu hmâo ôh sa čô tơña kơ Ñu: “Hơgĕt Ih kiăng?” Ƀôdah “Hyư̆m Ih dŏ pơhiăp hăng ñu?”

28Tui anŭn đah kơmơi anŭn lui hĭ čeh ia ñu, hăng nao pơ plei laĭ kơ ƀing ană plei pla. 29“Rai bĕ, lăng sa čô đah rơkơi hmâo laĭ djơ̆ abih bang tơlơi kâo hmâo ngă laih. Pô anŭn ƀu djơ̆ Yang Krist ôh hă?” 30Gơñu tơbiă mơ̆ng plei hăng nao pơ Yêsu.

31Tơdang anŭn, ƀing ding kơna pơđur kơ Yêsu: “Ơ Nai, ƀơ̆ng huă bĕ.”

32Samơ̆ Ñu laĭ glaĭ: “Kâo hmâo gơnam ƀơ̆ng huă samơ̆ ƀing gih ƀu thâo ôh.”

33Tui anŭn ƀing ding kơna bơlaĭ tơdruă gơñu pô: “Hmâo hlơi ba mơnơ̆ng ƀơ̆ng huă kơ Ñu hă?”

34Yêsu laĭ kơ ƀing gơ̆: “Mơnơ̆ng ƀơ̆ng huă Kâo jing ngă tui hăng tơlơi kiăng Pô hmâo pơkiaŏ rai Kâo, hăng ngă pơgiơ̆ng hĭ bruă Ñu. 35Ƀu djơ̆ ôh hă ƀing gih laĭ: ‘Dŏ pă blan dơ̆ng truh bơyan hơpuă’? Samơ̆ Kâo laĭ kơ ƀing gih, angak mơta lăng bĕ, hăng lăng khul hmua hmâo pơdai tơsă, laih anŭn bơyan hơpuă truh laih yơh. 36Pô hơpuă hmâo mă tŭ laih prăk apah hăng hrui pơƀŭt boh than pioh kơ tơlơi hơdip hlŏng lar; tui anŭn kiăng kơ pô sai hăng pô hơpuă dưi hơ̆k mơak hrŏm hơbĭt. 37Yua kơ tui anai tơlơi arăng juăt laĭ: ‘Pô anai sai, pô pơkŏn hơpuă’ jing djơ̆ biă mă yơh. 38Kâo hmâo pơkiaŏ ƀing gih nao hơpuă pơ anih ƀing gih ƀu mă bruă ôh. Ƀing pơkŏn mă bruă laih, laih anŭn ƀing gih kơnơ̆ng hơpuă mă boh than mơ̆ng bruă gơñu đôč.”

39Hmâo lu ƀing Samari amăng plei anŭn đaŏ kơ Yêsu, yua kơ tơlơi đah kơmơi anŭn hmâo ngă gơ̆ng jơlan: “Ñu hmâo laĭ djơ̆ abih bang tơlơi kâo hmâo ngă.” 40Tui anŭn tơ ƀing Samari nao pơ Yêsu, gơñu rơkâo kơ Yêsu dŏ glaĭ hrŏm hơbĭt hăng gơñu, laih anŭn Yêsu dŏ glaĭ pơ anŭn dua hrơi.

41Hmâo mơnuih đaŏ lu hloh dơ̆ng yua kơ tơlơi Yêsu pơtô. 42Gơñu laĭ kơ đah kơmơi anŭn: “Ră anai gơmơi đaŏ ƀu djơ̆ yua kơ tơlơi ih ngă gơ̆ng jơlan ôh, samơ̆ yua kơ gơmơi pô hmâo hmư̆ laih, hăng thâo sĭt Ñu yơh jing Pô Pơklaih lŏn tơnah.”

Yêsu Pơsuaih Ană Đah Rơkơi Sa Čô Khua

43Dua hrơi mơ̆ng anŭn, Yêsu lui anih anŭn nao pơ kwar Galilê; 44yua kơ Yêsu pô hmâo laĭ pơsĭt, arăng ƀu pơpŭ pơyom ôh sa čô pô laĭ lui hlâo amăng plei ñu pô.#Mat 13:57; Mar 6:4; Luk 4:24. 45Tơ Ñu truh pơ kwar Galilê, ƀing mơnuih Galilê mơak čơkă jum Ñu, yua kơ gơñu hmâo ƀuh abih bang tơlơi Ñu hmâo ngă amăng plei Yêrusalem ƀơi hrơi phĕt Tơlơi Găn, yua kơ wơ̆t gơñu mơ̆n hmâo nao kơ tơlơi phĕt anŭn.#Yô 2:23.

46Tui anŭn Yêsu wơ̆t glaĭ dơ̆ng pơ plei Kana amăng kwar Galilê, anih Ñu hmâo hrih ia ƀlăng jing tơpai. Pơ plei Kapernum hmâo sa čô ană đah rơkơi khua prŏng dŏ ruă.#Yô 2:1-11. 47Tơ khua anŭn hmư̆ Yêsu tơbiă rai mơ̆ng kwar Yuđa nao pơ kwar Galilê, ñu nao pơ Yêsu hăng rơkâo kơ Gơ̆ nao pơ plei Kapernum pơsuaih ană đah rơkơi ñu, yua kơ gơ̆ ruă giăm či djai. 48Tui anŭn Yêsu laĭ kơ ñu: “Tơdah ƀing gih ƀu ƀuh ôh gru kơnăl mơyang hăng tơlơi mơsêh mơyang, ƀing gih ƀu či đaŏ ôh.”

49Khua anŭn laĭ glaĭ: “Ơ Khua, rơkâo kơ Ih rai bĕ hlâo kơ ană kâo djai.”

50Yêsu laĭ kơ ñu: “Nao bĕ, ană đah rơkơi ih či hơdip.” Pô anŭn đaŏ kơ tơlơi Yêsu hmâo laĭ kơ ñu, gơ̆ glaĭ yơh. 51Tơdang ñu dŏ rơbat ƀơi jơlan, ƀing ding kơna ñu nao čơkă ñu hăng laĭ: “Ană đah rơkơi ih ăt dŏ hơdip.”

52Tui anŭn pô khua tơña kơ gơñu hlăk hơdôm mông ană ñu suaih. Gơñu laĭ: “Tơ̆m brơi hlăk sa mông klam#4:52 mông tal tơjuh. tơlơi duăm rơŏt ñu abih.” 53Pô ama anŭn thâo djơ̆ ƀơi mông anŭn yơh Yêsu hmâo laĭ kơ ñu: “Ană đah rơkơi ih či hơdip” Tui anŭn ñu hăng abih bang sang anŏ ñu đaŏ yơh.

54Anai jing tơlơi mơsêh mơyang tal dua Yêsu hmâo ngă tơdơi kơ Ñu tơbiă mơ̆ng kwar Yuđa glaĭ pơ kwar Galilê.

Attualmente Selezionati:

Yôhan 4: JRA2016

Evidenziazioni

Copia