Yôhan 3

Yêsu Hăng Nikôđem

1Hmâo sa čô amăng ƀing Pharisi anăn ñu Nikôđem. Ñu jing sa čô amăng ƀing khua gĭt gai ană Yuđa. 2Hlăk mlam, ñu nao pơ Yêsu hăng laĭ: “Rabi, gơmơi thâo Ih jing sa čô nai tơbiă rai mơ̆ng Ơi Adai; ƀu hmâo ôh hlơi dưi ngă tơlơi mơsêh mơyang Ih hmâo ngă laih tơdah ƀu hmâo Ơi Adai dŏ hrŏm hơbĭt hăng ñu.”

3Yêsu laĭ glaĭ: “Kâo laĭ kơ ih sĭt biă mă, tơdah sa čô mơnuih ƀu tơkeng glaĭ dơ̆ng,#3:3, 7 tơkeng glaĭ dơ̆ng; dưi pơblang: tơkeng mơ̆ng ngŏ. ñu ƀu dưi ƀuh Dêh Čar Pơtao Ơi Adai ôh.”

4Nikôđem laĭ glaĭ: “Hyư̆m sa čô mơnuih tha laih dưi tơkeng glaĭ dơ̆ng lĕ? Dưi mơ̆ ñu mŭt glaĭ amăng kian amĭ ñu hăng tơkeng tal dua dơ̆ng?”

5Yêsu laĭ glaĭ: “Kâo laĭ kơ ih sĭt biă mă, tơdah sa čô mơnuih ƀu kơnang kơ ia laih anŭn hăng Yang Bơngăt Hiam kiăng kơ tơkeng glaĭ dơ̆ng, ñu anŭn ƀu dưi mŭt amăng Dêh Čar Pơtao Ơi Adai ôh. 6Tơlơi hơgĕt tơkeng rai mơ̆ng asar đeh ñu jing asar đeh, tơlơi hơgĕt tơkeng rai mơ̆ng Yang Bơngăt Hiam ñu jing bơngăt mơyang. 7Anăm kơtuă hling ôh kơ tơlơi kâo hmâo laĭ laih kơ ih: ‘Ƀing gih khŏm tơkeng glaĭ dơ̆ng.’ 8Pơpă angĭn kiăng thut ñu thut yơh, ih hmư̆ dơnai ñu, samơ̆ ih ƀu thâo ôh mơ̆ng pơpă ñu tơbiă rai, ăt kŏn thâo lơi pơpă ñu nao. Hlơi pô tơkeng rai mơ̆ng Yang Bơngăt Hiam ăt ñu jing kar hăng anŭn mơ̆n.”

9Nikôđem tơña: “Hyư̆m tơlơi anai dưi jing lĕ?” 10Yêsu laĭ glaĭ: “Ih jing nai pơtô kơ ƀing Israel, samơ̆ ih ƀu thâo hluh tơlơi anai ôh hă? 11Kâo laĭ kơ ih sĭt biă mă: Gơmơi pơhiăp hơgĕt tơlơi gơmơi thâo, pơhaih hơgĕt tơlơi gơmơi hmâo ƀuh laih, samơ̆ ƀing gih ƀu tŭ ôh tơlơi ƀing gơmơi pơhaih. 12Tơdah kâo pơhaih kơ ƀing gih khul tơlơi amăng lŏn tơnah, ƀing gih ăt kŏn đaŏ mơ̆n. Hloh kơ anŭn dơ̆ng hyư̆m ƀing gih dưi đaŏ tơdah Kâo pơhaih kơ ƀing gih khul tơlơi amăng adai? 13Aka hmâo djơ̆ ôh mơnuih đĭ nao pơ adai, kơnơ̆ng hmâo Pô trŭn rai mơ̆ng adai, jing Ană Mơnuih.”

14Kar hăng Môis yol đĭ laih ala ngă hăng kong amăng tơdrŏn tač, ăt kar hăng anŭn mơ̆n arăng či yol đĭ Ană Mơnuih.#Yap 21:9. 15Kiăng kơ hlơi pô đaŏ kơ Ñu dưi hmâo tơlơi hơdip hlŏng lar.

16Yua kơ Ơi Adai khăp biă mă kơ lŏn tơnah#3:16 Dưi pơblang: mơnuih mơnam amăng lŏn tơnah., tơl Ñu brơi Ană Ñu hmâo kơnơ̆ng sa čô, kiăng kơ hlơi pô đaŏ kơ Ană anŭn ñu ƀu răm rơngiă hĭ ôh samơ̆ ñu hmâo tơlơi hơdip hlŏng lar. 17Yua kơ Ơi Adai hmâo pơkiaŏ rai laih Ană Ñu amăng lŏn tơnah, ƀu djơ̆ kiăng phat kơđi kơ lŏn tơnah ôh, samơ̆ kiăng kơ lŏn tơnah yua mơ̆ng Ană anŭn dưi hmâo tơlơi pơklaih.

18Hlơi pô đaŏ kơ Ană anŭn Ơi Adai ƀu klă kơđi ôh; samơ̆ hlơi pô ƀu đaŏ ôh Ơi Adai klă kơđi kơ ñu laih yơh, yua kơ ñu ƀu đaŏ ôh kơ anăn Ană Ơi Adai hmâo kơnơ̆ng sa čô. 19Tơlơi klă kơđi anŭn jing tui anai: Tơlơi bơngač hmâo truh laih amăng lŏn tơnah, samơ̆ ană mơnuih khăp kơ tơlơi kơnăm mơmŏt lu hloh kơ tơlơi bơngač, yua kơ bruă gơñu ngă jing soh sat. 20Yua kơ hlơi pô ngă tơlơi sat ñu bơrơmŭt kơ tơlơi bơngač, laih anŭn ƀu nao ôh pơ tơlơi bơngač, hwĭ kơ rơđah hĭ bruă ñu ngă. 21Samơ̆ hlơi pô ngă tui tơlơi sĭt, ñu nao pơ tơlơi bơngač yơh, kiăng kơ khul bruă ñu ngă dưi rơđah klă, yua kơ ñu ngă tui hăng tơlơi Ơi Adai kiăng.

Yêsu Hăng Yôhan Ƀatem

22Giơ̆ng anŭn, Yêsu hăng ƀing ding kơna Ñu nao pơ tring Yuđa. Ñu dŏ hăng gơñu pơ anŭn laih anŭn ngă ƀatem. 23Yôhan ăt ngă ƀatem mơ̆n ƀơi plei Ênon, giăm plei Salim, yua kơ pơ anŭn hmâo lu ia, laih anŭn ƀing ană plei rai kiăng tŭ ƀatem. 24Hlăk anŭn arăng aka krư̆ Yôhan amăng sang mơnă ôh.#Mat 14:3; Mar 6:17; Luk 3:19-20.

25Hlăk anŭn, hmâo tơlơi pơrơjah tơ̆ng krah ƀing ding kơna Yôhan hăng sa čô mơnuih Yuđa#3:25 Đơđa Hră Ơi Adai Pơhiăp so đưm čih: ƀing mơnuih Yuđa. kơ phĕt tơlơi rao pơrơgoh. 26Gơñu nao pơ Yôhan hăng laĭ: “Ơ Nai, pô hmâo dŏ laih hăng ih ƀơi gah adih hang ia krong Yurdan, kơ pô anŭn yơh ih hmâo ngă gơ̆ng jơlan laih, ră anai Ñu dŏ ngă ƀatem, abih bang mơnuih leng kơ nao pơ Ñu soh sel.”

27Yôhan laĭ glaĭ: “Tơdah Ơi Adai ƀu pha brơi, ƀu hmâo hlơi dưi mă tŭ hơgĕt gĕt ôh. 28Ƀing gih yơh jing pô ngă gơ̆ng jơlan kơ tơlơi kâo hmâo laĭ laih, kâo pô ƀu djơ̆ jing Yang Krist ôh, samơ̆ Ơi Adai pơkiaŏ kâo rai hlâo kơ Ñu.#Yô 1:20. 29Hlơi pô dŏ kơ dra pơkô̆, ñu anŭn jing tơdăm pơkô̆; samơ̆ ƀing gơyut kơ pô tơdăm pơkô̆ dŏ giăm hmư̆ hiăp tơdăm pơkô̆ anŭn gơñu bă hăng tơlơi hơ̆k mơak biă mă. Anŭn jing tơlơi hơ̆k mơak klă tum kơ kâo yơh. 30Ñu khŏm đĭ tui, kâo khŏm trŭn tui.”

Pô Rai Mơ̆ng Adai

31Pô rai mơ̆ng glong Ñu jing prŏng hloh kơ abih bang. Pô tơbiă mơ̆ng lŏn tơnah jing pô lơ̆m kơ lŏn tơnah, ñu pơhiăp khul tơlơi lơ̆m kơ lŏn tơnah; samơ̆ pô rai mơ̆ng adai jing pô glong hloh kơ abih bang. 32Ñu ngă gơ̆ng jơlan hơgĕt tơlơi Ñu hmâo ƀuh hăng hmư̆ laih, samơ̆ ƀu hmâo hlơi tŭ mă tơlơi Ñu ngă gơ̆ng jơlan ôh. 33Hlơi pô tŭ mă tơlơi Ñu ngă gơ̆ng jơlan, pô anŭn pơhaih Ơi Adai jing sĭt. 34Pô Ơi Adai hmâo pơkiaŏ rai, Ñu pơhaih boh pơhiăp Ơi Adai, yua kơ Ơi Adai pha brơi Yang Bơngăt Hiam kơ Ñu tơl ƀu hmâo hơnơ̆ng pơkă ôh. 35Ama khăp kơ Ană laih anŭn hmâo jao laih abih bang tơlơi dưi amăng tơngan Ană.#Mat 11:27; Luk 10:22. 36Hlơi pô đaŏ kơ Ană, ñu hmâo tơlơi hơdip hlŏng lar; hlơi pô ƀu đaŏ ôh kơ Ană, ñu ƀu dưi ƀuh ôh tơlơi hơdip, samơ̆ tơlơi Ơi Adai hil ăt dŏ ƀơi ñu nanao.

Attualmente Selezionati:

Yôhan 3: JRA2016

Evidenziazioni

Copia