Markus 12
12
DEŠADUITO KAPITLO.
1Ta job rakerdes ani parnisia apo lende: I dženo čides i drakeskerbrego, kerdes i kašteskerbeda (oder bareskerbeda) trujum, kerdes i drabesker kher, ta kerdes i tikno džanglesker kher (Turm), čideslo semeti i molenger gadžende ta cerdes pralo them. 2Ta job bičerdes apo molengergadžende, kai vejes i ciri, i valeto, ta vejeslo kola molengergadžende čomoni i gibester o drakesker bregeske. 3Kala taperden ta kurdenles ta mekjen ta cerdelo čičo tele. 4Ta job bičerdes komoli i vaver valeto apo lende. Kales činden len ano lesker šero ta čingerden pen les. 5Ta job bičerdes papale i vaveres, ta kava marden len, ta buteder vaveren, kai kurden len jekende lender, vaveren ta marden len. 6Kome jek haslo, i kamlo čavo. Kava bičerdeslo palduno apo lenge ta phendes: Jon ta vena dar glan miro čaveste! 7O molenger gadženge ta phenden api vaverkend: Kava hi o loveskero, avena me, ta marahas les, pala vela o love mender. 8Ta jon taperden les, marden les ta vicerden les o drakeskerbrego vri. 9Ho kerelo o rai ka a drakeskerbregeste? Job ta vela ta marelo o molengergadžende ta delo o drakesterbrego vaverende. 10Draverden tu me kava činepen gar? „Kava bar kai prasaden kola dženenge, vejes kana i baro bareske. 11I bolepeneste vejes kava ta les hi bares ani mare jakenge.“ 12Ta jon roderden ta taperden les, ta jon daren pen o čeles; jon ta hajerden mišto, ta rakerdes job kava parnisa apo lende. Ta jon mekjen les ta gejen pen nikli.
13Ta jon bičerden an peske jekender Farizeare ta Herodianare ta taperden les druchi labeske. 14Kala vejen ta phenden apo leske: Sikerpaskerrai, me džanahas, ta hal tu čačo, ta phučehas kenkes pale, tu ta dikhe gar apo dženenge baro kova, tu ta sikerehe o Devlesker drom ani čačopen. Hi proserdo, o baro krales ta del peske plaiserpen, ta mo den men les gar? 15Job ta prindžerdes lenger chochapen, ta phendes apo lenge: Hoske midžena tume man? Anen mange i nikili kai, ta dikau les. 16Pala anden len jek, ta phendes apo lenge: Hoveske hi kava bildo ta i praločinepen? Jon phenden apo leste: O baro kraleste. 17Pala rakerdes Jezus ta phendes apo lenge: Dena tume o baro krales, ho hi o baro kraleske, ta o Devles ho Devleske hi. Ta jon kerden bare jaka prala leste.
18Ta vejen les Zaduceare paša leste, kai phenena, dela kenk preštardopen. Kala phučjen les ta phenden: 19Sikerpaskerrai, Mozes čindes menge: „Ta merela jekester phral, ta mekelo i romni ta kenk čavenge palel, keake mo ta lelo lesker phraleskerromni ta džangelo gib lesker phraleste.“ 20Efte phralenge has len. O ersto lejes i romni, her ta mujeslo, mekjeslo kenk gib palel. 21Pala lejes joi o duito, ta mujeslo ta nina kava mekjeslo kenk gib palel. 22Ta nina keake o trinto. Ta kala eftenge mekjen kenk gib palel. Palduno hakonender mujes nina i romni. 23Paši preštardopen, kai štenenle pre, kones lender hi kai a romni? Ta kala eftenge has len joi i romiake. 24Pala rakerdes Jezus ta phendes apolenge: Durina tume gar kai drin vel ta hajven tume gar o činepen, ta o Devlesker zorelopen? 25Kai ta štejen len o mulender pre, keren pen kenk biab, jon ta hi her i engle ani bolapen. 26Ho džala pala o mulenge an, ta štejen len pre, draverden tume gar ani Mozesester livro paši kareskerbor kai rakerdes o Devel keake apo leste: Me hom o Devel Abraham, Isaak, ta o Devel Jakobeste. 27Job hi gar i Devel o mulender, job hi o Devel kolender kai hi džide. Tume durina keake.
28Pala vejes jek o kala livrosikermangerende kate, kai hundes ta dikhes lenger čingerpen, ta rakerdeslo lenge lačo, kava phučes pes: Kones ta hi o ersto hako phenapenender? 29Jezus rakerdes: O ersto hi: Hunehe Izrael, o rai tiro Devel hi jek Devel! 30Tu mo ta kame o rai tiro Devles drani tiro celo dziester, drani tiro celo mulester, drani tiro celo trupester, ta drani hake tire zorelopenester. 31Kava hi o ersto phenapen. O duito hi kava: Tu mo ta kames o vaverenge her tuke. I vaver bareder phenapen her kava dela gar. 32— Šuker, sikerpaskerrai, pala o čačopen rakerdeles tu, dela foni jek Devel, her job dela kenk vaver. 33Ta kava mo ta kames drani celo dziester, drani celo trupester, ta drani hake zorelopenester, ta o vaveres mo ta kameles her tuke: kava hi buteder her hake chačeanapen ta vaver anapen. 34Her ta dikhes Jezus, ta rakerdeslo godzvero, phendeslo apo leste: Tu hal gar dur o Devlesker themeste! Ta kenkes kames kome ta phučen pen les.
35Jezus ta rakerdes papele ta phendes, kai sikerdeslo ani kangeri: Her phenena o livrosikermangerenge, Christus ta hi o Davidesker čavo? 36David phenela ani boldo mulester: „O Rai phendes apo miro raies: Beše tuke api miri čači, džin ta čidaues tiri midžike dženenge tela tire pirenge.“ 37David, ta kharelo les lesker rai. Her ta pala lesker čavo? Ta o čel hundes apo leste.
38Ta job phendes apo lenge ani lesker sikerpen: Hilderen tume glano livrosikermangerender, kai našena trujum ani baro ripenester ta venela 39parkemen api kunčenge ani kangerende ta bešenle pral pre, ta rodena glanduni kunčenge paši bare chabenende. 40Kola kai lena kala romniender kher, kai hi len kenk rom, ta priserenle fonci keake raha: prala kalende džala i bareder krisni.
41Ta Jezus bešes palavergl o lovenger mochtin, ta dikhes, her ta viceren o čel love ani mochtin, ta but bravele vicerden but drin. 42Pala vejes nina i čoreli romni kai his kenk rom, ta vicerdes dui tikni koter, kava hi i džuvalo, drin. 43Ta job khardes leskr sikermangerende ketene, ta phendes apo lenge: čačo phenau me tumen, kaja čoreli romni vicerdes buteder kai drin, her hake kai vicerden ani mochtin. 44Ta hake vicerden lenger bravelopenester drin, kaia ta vicerdes laker čorelopenester hako drin, kai has li, laker celo love.
Attualmente Selezionati:
Markus 12: SINT1912
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
First published by the British and Foreign Bible Society in 1912.
