JON 3

Jisu la Nikodimas

1Nikodimas ngvk hvl Juhudi tulungam nyig wgbo nyi ak Parisi dvpar hoqgv doonum. 2Mwv aigol Jisug dookub haanv mwam benum, “Tomswrbo, ngulv cengdwn no Pwnbo kanamnam tomswrbo akv. Hiyamkam Pwnbov mwwg lvgab doomin gvma lo noqg nyinam hvb swrdorxeqb nyinyi ram.” 3Jisu mwam birwqnum, “Ngo jvqtw jaqb nam bedwn hiyvkam lokta ko bwwdar maalo Pwnbog lvpwngam kaapa nyoram.” 4Nikodimas toxnum, “Hoggub nyil nyekam bov lokta ko bwwdar kotayin. Mwv lokta annwg kepob hookurl lwnyi dvb ko bwwdar kolaram.” 5Jisu birwqnum, “Ngo nam jvqtw jaqb bedwn, iss hoqgv la Yal galoqkv ko bwwdar koma baloqkam hiyvkam Pwnbog lvpwngam kaapa nyoram. 6Nyia kov ko bwwnamv nyiib nyidwn, hoo Yalv hoqgv bwwnamv mwv Yalwb nyidwn. 7No lokta ko bwwdar ta hvl ngoqg begam gab lomabv. 8Dooiyv dooi mwwkwb ywl wdwn, nulv ham dunam mam tapa dvn, hvbmabde nulv dooiyv hogloqkv haas dvn yv, hoo hogloqb ws dvn yv ham cengma dvn. Soq sib kalam hiyv Yal hoqkv ko bwwpan hvbkalam nyidwn.” 9Nikodimas toxnum, “Soq si hoggub jaq nyitayin?” 10Jisu birwqnum, “No Israel hvdwg nyijwq-nyegam tomswrbo abwb nyitwl no soq tulu sam cengma dvn i? 11Ngo jvqtw jaqb bedwn, ngulv ngulug cengnam mam bedwn, hoo ngulv hognvkam kaatkun ham bekin dvn, hvbjaqkam nulv ak jijaqkam ngulug puiyam loorwqma. 12Ngo nulam soq gvda gvtwg bvrwqngam beikam nulv mwwjw ma, hvbnyiloqkam, ngo nulam ao gvdag bvrwqngam bebaloqkam, nulv ngam hoggub nyil tvjw tayin? 13Ao toloqgv ipoqbo Nyia Ko aoho hiyvkam sija godab ao gvdab caamada.”

14Mojes tvbam deexa-raraho daapo aoho torcal apnam hvbkalam Nyia Ko Tuupam torcal apdvb nyiky tayin. 15Hoggab mwam mwwjw boa hvnamv nwrba cwtam swwgam naatayin. 16Hoggab Pwnbov gvda gvtam hwdgo aby kunv mwwg Ko Tuup akin ciqnyingam jipaq kunum, mwam mwwjwbo nyi tulungv siram, hvbmabde nwrba cwtam swwgam naal swwtayin. 17Hoggab Pwnbov mwwg Ko Tuupam gvda gvtwb nyel pw-hwwdy tak hvl kanam maanum, hvbmabde mwam ywwt ywwtak hvl kanamnum.

18Ko Tuupam mwwjwbo tulungv nyel pw-hwwk ho haadwb dookma; hvbmabde mwwjw maan tulu gab nyel pw-hwwsam hwwxo pakun, hoggab mwv Pwnbog Ko Tuup akinam mwwjw maanum. 19Soq siblak nyel pw-hwwnam mam hwwgdvn hutongv gvda gvtwb haapa ku, hvbmabde nyi tulungv hutongam aby maab kan yaangam aby bobindvn, hoggab bulv nyic nyia nyidwn. 20Nyic nyia nyinbov hutongam oyum dvn hoggab mwwg nyic nyiangam kaakin nwwma dvn. 21Hvbmabde jvqtwb nyinbo nyiv huto kob haadwn, hoggab mwwg hog mwlw nyinam wnamv Pwnboam mwwgwl nyidwn.

Jisu la Jon

22Soq kokw so Jisu mwwg buu tulungam boolayil Judiya gvdab wnum. Mwv apo go hoo bulug dookub doobnv baptijum jinum. 23Jon kam Salim ogum Anon ho issiv vijaqg doogam gab baptijum jidul doonum. Nyi tulungv mwwg dookub hoodul doogam gab mwv baptijum jidul doonum. 24Ho Jonnvn pvtwqho lwqma daanum. 25Jonwg buu tuugin Juhudi nyi akwg lvgab dormo bvrwqho bel hursnam mam benv bviyaq minsnum. 26Kokw so bulv Jonwg dookub wnv mwam bekinnum, “Tomswr bov, Jordon pobu kvtin alo noqg lvgab nyi yvba bo noqg benam nyi akam no mwwpa i? Mwv sija baptijum jidul yvdo, nyi mwlwngv mwwg dook kvdaq wdo!” 27Jon birwqnum, “Pwnbov mwam jima baloqkam hiyvkam hog gokam doog nyoram. 28Nulv atv ngoqg benam mam tanbov doos dvlak, ngo ywwnbo ak hvvma, hvbmabde ngo mwwg otuqyab kanam coonam akv; 29Nyem naaknamv nyega gab doodkun; nyega hoq ajin lvgab daqanv tadwn hoo nyegaho agam mam mwv tapa yukam hemp al mwwpa dvn. Sija ngoqg hemp ponamv niqtuq polin pakun. 30Mwv ngam xibin yaadwb nyitayin hvbmabde ngo anyo taikun.”

Ao Gvda Toloqgv Ipoqbo Akv

31Ao gvda toloqgv ipoqbo nyi akv mwlwngam koi yaadwn, gvda gvtso nyiv gvda gvt gab doodwn hoo gvda gvtwg bvrwqngam bedwn. Ao gvda toloqgv ipoqbo akv mwlwjaqkam koi yaadwn. 32Mwv hognvkam kaaknum hoo taknum ham mwv bekin dvn, hvbjaqkam mwwg puiyam nvvrwq maadwn. 33Hiyv akgon mwwg puiyam nvvrwq bvnyiloqkam hv Pwnbog jvqtwngv hvl lvdy dvn. 34Hiyvn Pwnbov kanam pan mwv Pwnbog agam mam bedwn, hoggab, mwam Pwnbov mwwg Yalam xikal at xima jaqb jidwn. 35Abv mwwg Ko Tuupam aby dvn hoo hog mwlwngam mwwg alaqho gvqlwq jipa kun. 36Hiyv lajaqkam Ko Tuupam mwwjw bov nwrba cwtam swwgam naapa kun; hiyv lajaqkam Ko Tuupam tama bov swwgam naapa ram, hvbmabde Pwnbog laqm-baqm deenamv mwwg aoho kuiyum godab dootayin.

Attualmente Selezionati:

JON 3: NISS

Evidenziazioni

Copia