JON 2

Kanaho Nyem Naanam

1Aal loum deenso Galili gvdag Kanaho nyem ak naanum. 2Jisug annvkam hoqho doonum. Jisu nvla mwwg buu tulungam kam hoq nyem naakho goqnum. 3Hwdlo roo alangam twwnya yukam, Jisug annv mwam benum, “Bulug roo alangv dookma.” 4Jisu mwnwn birwqnum, “Nyem, hoq doomanam mam ngoqg lvgab hognvkv nyisv doodwn, “Ngoqg moodv sija godab hvvc maata.” 5Jisug annv ho nyera tulungam benum, “Mwv hoggv nyitwk hvl betayin ham tato.” 6Hoq ataho Juhudi hvdwg dormo nyicib hursnan iss wlw uppum pumx go doonum; uppum pumxiv harcaq cammum yooma gogaqb issiv haanum. 7Jisu nyera tulungam benum, “Soq uppum torab so iss loq toolwqto.” Bulv uppum torab pam issiv gamb hv yirt kvl dvb bwlwqnum. 8Kokw so mwv bulam benum, “Sija iss meegin suqlin gvdwl soq durum namsam kaaya bo nyi akam jita.” Bulv mwam bva jinum, 9ho mwv issam roo alab mvnam mam twwkanum. Mwv hogloqkv soq roo ala si haanum ham cengmanum. Hvbmabde issam toolin bo nyera tulungv cengnum 10hoo mwv nyem naanbo nyegangam goqnv mwam benum, “Nyi mwlwngv roo ala alboam lak otuqcob hordwn, hoq kokwb pooxangam lak hordwn. Hvbnyimab no sija godab roo ala alboam ap xiqpan!” 11Galili gvdag Kanaho soq si, otuqcob Jisug swrdorxeqb nyinamv; hoqho mwv mwwg yuugnam mam kaakinum, hoo mwwg buu tulungv mwam mwwjwnum. 12Soq kokwb Jisu mwwg ann, bor tulu ngvla buu tulungv Kaparnahumb wknv apo go hoqho doonum.

Jisug Xumk Namlongam Mvxaqnam

(Mt 21:12-13; Mk 11:15-17; Lk 19:45-46)

13Juhudi hvdwg Dvtv Durum moodv haasv twqb nyiywk ho Jisu Jerusalemb wnum. 14Mwv Xumk nam uraho sibin, svv, sviya hoo pukum puqnbo, hoo twngk kwlibo nyi tulungam bulug tebol ho doodwb kaapanum. 15Hoo mwv tanam pvvkwql agaqtvl nyi tulungam jwwnv sviya hoo svv mwlwngam xumk nam hoqgv ruqlin kunum. Mwv twngk kwlibog tebolam ngurkub ngurxeq dvb mvnv twngk kabaram yvqciq-yvqywl mvnum. 16Hoo pukum puqn boam benum. “Hoq dupum-dvrab tulu ham soqkv naapaqto! Ngoqg Abwg nam mam kwm-kor mvk haty namgob mvmab!” 17Mwwg buu tulungv dvrwqbo potalo hog hvl xeqnamv doodwn ham mwwpanum, “Noqg namgab ngoqg mwwjwnamv wm jaqhvb ngam gux tado.”

18Ho Juhudi hvdv mwam birwqnv toxnum, “No hognvk swrdorxeqngv nyil ngulam kaakin tayin, no soqsam nyidwb ator doodwn.” 19Jisu bulam birwqnum, “Nulv soq xumk nam sam saxia to hoo ngo samnvn aal loum mam lokta nit dvb mvdar tayin.” 20Bulv mwam toxnum, “No soq namsam aal loum mam lokta mvdar tayin, “Soq xumk nam sam vnyw campy leq nywx go mvnum. 21Hvbmabde xumk nammam benamv hv Jisu mwwg gv vpam besnum. 22Mwv sipekul gorab yikho mwwg buu tulungv mwwg soq benam sam mwwpa kunum, hoo bulv dvrwq potalo benam mam la Jisu benum mam mwwjwnum.

Jisu Nyia Kog Nyij-mujam Cengnam

23Jerusalemho Jisug swrdorxeq, bon nyinam mam kaatwl, nyiv vigo Jisun mwwjwnum. 24Hvbjaqkam Jisu mwv atv bulam mwam mwwjw mwwnw maanum, hoqgab mwv nyi mwlwngam cingyumnum. 25Nyiv mwam bekin maajaqkam, bulug hang mwwnam mam mwv cengxol doonum.

Attualmente Selezionati:

JON 2: NISS

Evidenziazioni

Copia