Gadiyeeda Giijasoodiga 8
8
1Ak ghamwas Sauli miyeadaannyi.
Sauli ghaghabwas ganiisa
Nea aba eaweettida ghwanyas ganiiseeda mida Yerusaleemu ghabasta haw; ak ghwadarda sean aba jeeda ng'eanyiida Yuudeeya sea Samariya, ea eaghus giijasoodiga. 2Iiduw gaweay fuga mwas Aseetta gabuy Stefaano, ak gaguuttu heareega muuchchi. 3Aba damandideani Saulo gagasa gwanyarja ganiisa, aba gideaba iissa gawa jeemba giliwas ghoah ak gooruutta jarooda headiga ea gadeemga ak ghwayiin ghealooniga.
Geerukkwiida Giijasta miy aba Samariya
4Iiduw fukkeanji dardaawaadiin gaweay gwarukwiida ng'asheanda. 5Gawa Filippo mujiineeda Samariya ak gwarukwiisa saawa ng'asheega Gristo. 6Ng'atta gooleeysiit emeetuw ginyaah Filippo, nea geadaa ng'asheega deamdeameadi sin. 7Aba gideaba gwarinna meangeenda munyas jeeda fuga saang'a ghayi ninyas, ak goojuur aba ghuutta haw; ak eara fuga saang'a abiittu damealgean ghana fuga badoojiga geahhaap. 8Hean gehoosan muuchchi aba mujiineedida.
9Ghayi abeetta gwanda siisi suguura Simon ghayi ammwadi was beeneekweanda aba mujiineetta ea ghwanung' ghahamng'eanyi fuga ng'eanyiida Samariya, nea gwayi aniini geawaschi siida haw. 10Inyeessa niny gooleeysiit muuchchi buuneeda, ghang'eada siida mwanang' ea ghoaw gea hees, nea geeyeenna, “Siisi uurda Aseetta suguura uurda haw.” 11Ng'atta gelleeysa iit muuchchi aba gideaba nigeawiit inyeessa ghwanung' ghahamng'eanyi buuneeda aba beneetkweandumeadaannyi. 12Hean nea ghamwas buuneeda giijasta miy bea Filippo bea badayda sugoochcheandumeeda Aseetta ea gheawunga Yeesu Gristo, geeppattiisan sean, headiga ea gadeemga. 13Simon eara niny iiduw ghamwas, ng'atta giibattiisandaannyi hean goodeayi Filippo. Ak ghwadaa ng'asheega deamdeameadi ea gwadeagwajeega hees sisin, ak ghahamng'eanyi.
14Iiduw nea ghwayiiy giijasoodigiga mida Yerusaleemuun gideaba fuga Samariya nimwas ng'asheega Aseetta, geechcheakta saawa Betro ea Yohaana, 15gaweay ama hitta ghwamwaash Aseetta appadahuukka nyaawa gideaba gagasa ghwanyas Gurorooda Ghaydit; 16aba gideaba aba damandida miigwashuubeesa sih aba jeannyaawa, gabeachchi gideaba geeppattiisan aba gheawunga Ng'uttamiida was Yeesu. 17Ng'atta ghwayiin geattinga nyaawa iheengeaba fukkeanji ak ghwanyas Gurorooda Ghaydit. 18Iiduw nea gwajeeng'u Simon gideaba Gurorooda geenyasa iiyiin giijasoodiga geattinga nyaawa buuneeda, hean gageanu ghoadaw lappiya, 19nea gwayeeshsha, “Agooneani eara aniini uuri ak abeeda siida nyoo dayiin geattindeanyu uhuudaannyi ghwanyas Gurorooda Ghaydit.” 20Ghwalamda Betro ak gwayeeshsha, “Roosiina hoowa ea lappiyeedaang'u, aba gideaba gighayi gilijea nyasa gidaguh Aseetta aba lappiya! 21Ak ang'iing'i ea mibwaheasa nea meebareannyeeni aba ng'asheanji, aba gideaba guroroadaang'u mwadoabiiwa aba madeeda Aseetta. 22Asi duukkuunana searoojusu ikkeagwa munyasiin, ak gumwaashi Ng'uttamiida, immuusi, ak gaygwasamseey aba gidigasayi mida jeeda guroroadaang'uuni. 23Aba gideaba naadaayi gindi jeeda lachng'eanyiida ng'waan ea jeeda ghealooniga appadayda munyinda.” 24Ghwalamda Simon ak gwayeeshsha, “Eaniyean amwasha Aseetta appadaydeanyu aba heeda Ng'uttamiida, ak ea adaghwanyasan gidawassean aba jeedeaba ng'asheesu oorguun.”
25Asi ghamneawa inumuuwwu ng'asheega nyaawa ea rukwiideayda ng'asheanda Ng'uttamiida, gabiikta Yerusaleemu, ak gwarukwiida gijasta miy aba gharang'weakka saang'a bea ng'eanyiida Samariya.
Filippo sea siida haw bea leabu Etiyopiya
26Ng'atta gwayeeshsha malaykajeanda Ng'uttamiida Filippo, “Ng'eada ak guwi wilooda ng'eanyiida biyeara was bwalbwaleeda leabu Yerusaleemu gal Gasa.” Nea naweani ea eeshtearajeanda. 27Ghang'eat ak gawa. Deagheatta ghwadaa siida ng'eanyiida Etiyopiya was gulaneeda, ak ea siida haw ambal Gandakehi was sugoochcheanda was gatmooda bea ng'eanyiida Etiyopiya, ambal eara maghastaannyi, hean ghwaan Yerusaleemu ghaghadoawan Aseetta 28iiduw nea gabiikta ghoah; gawa goopteada aba badayda muttukkoadaannyi, nea ghoassoamwa gittaabooda sibaneeda suguura Isaaya. 29Gwayeeshsha Gurorooda Ghaydit Filippo, “Siyeang'da ak guwi ding'da muttukkwajeandida ak gideayeewi.” 30Ghafach Filippo gawa murdeadaannyi, ak ghwayiiy nea ghoassoamwa siidida gittaabooda sibaneeda suguura Isaaya, ak ghoonyaash, “Heappi, ng'asheesu isoamwaniin ginali?” 31Ghwasha Siidida ak gwayeeshsha, “Gaydanaldaan aniini, nea manda siisi anaalan?” Ak gaguursa siidida Filippo gwading'da ak goobiitpiit sea niny. 32Nea Ng'ooruutka asaamwa geeng'wardunu:
“Gawuurji gisilleanda siyaat ealach gheatta
gawuurji dayeenda gisilleanda silach buudeega nea ghwasiinda,
ak eara niny ea miighwanya ghuutta.
33Geapwaaspwaas ak geaweada gidadoobiiwusa,
ng'eaha gil siida jea ghoomu gwargu ng'asheega seaygeedaannyi?
Aba gideaba eaweegaaschi sigeandeawa jeeda ng'eanyiida.”
34Ak goobearsa siidida was gulaneedean Filippo, “Heappi sibaneani ghamwaash Aseetta appadaydeabeang'a inyas gwargu ng'asheesuun, gabaloola badaydaannyi ghana baloola badayba sii nuut?” 35Ghang'eat Filippo ghwajaat ghuuttaannyi, nea ghoong'eada ng'ooruussu ak gwarukusa giijasta miy bea Yeesu. 36Iiduw nea geeweay aba naweeda geeyibwak ea eehitta heeda mida beega, gwayeeshsha siidida was gulaneedean, “Hiji gwanda beega! Gwanda gichchea ghoadealan ea meeppattiisani?” [ 37Ng'ooruutka suuk bea garayi ghoahaat, Ng'atta gwayeeshsha Filippo, “Iimwasi aba guroroadaang'u sean, gay sina.” Ghwasha nea gwayeeshsha, “Ghaamwaschi gideaba Yeesu Gristo Balleanda Aseetta.”] 38Ak ghwanung' ghamiinaada muttuk, ak ghwararang'aada duwaawi ng'eanyi ak gaweay jeeda beega, Filippo sea siitta was gulaneedean, ak goobattiisan niny. 39Iiduw nea gwascheeng'na jeeda beega, ghwanung' Gurorooda Ng'uttamiida ghwaroat Filippo; ak ea mudugabiikta siidida was gulaneedean ghwadaa gichcha, ak ghang'eat gawa nea gahoosan. 40Iiduw geadaah Filippo nea gwanda ng'eanyiida Asotto, ak gwasik jeeda mujiinajeega sean nea gwarukwiida giijasta miy ea ghwahitta ng'eanyiida Gaysariya.
Attualmente Selezionati:
Gadiyeeda Giijasoodiga 8: DTGANT09
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Datooga New Testament © Bible Society of Tanzania, 2009.
