Gadiyeeda Giijasoodiga 7
7
Girgweageeda Stefaano
1Ghwalamda ashoohoochcheanda haw ak gwayeeshsha, “Heappi ng'asheesu huumwa?” 2Ghwasha Stefano ak gwayeeshsha, “Fugeaduupcheewi ea ghweanigeasu, oleeysean iit. Aseetta ghaambiidaat ghayi gabussiinnyi sea ghweandeanya was Abrahaamu, damanda mideewa ng'eanyiida Mesopotamiya, nea mii gawa goobiida Haraani, 3ak gwayeeshsha niny, ‘Ng'eada ng'amwana hiji bea ng'eanyiidaang'uun ak ginung'usi heeda eara fugaagu ak guwi ng'eanyiida jea daahiimneay.’ 4Ghang'eat ghang'amwa ng'eanyiida eemeeda siyi Galdayu, ak gawa goobiida Haraani. Iiduw nea ning'atta miyeeda ghwaan, goobaleaga Aseetta ng'eanyiidida ak ghwahidu ghamway ng'eanyiin ghamneawa ondiini; 5ak ea moadawa hearaniischooda aba ng'eanyiitta, eara hiji ayang'da baneakta geeshta, ak gwaheelleesa gideaba gayghoadaw niny ak ghoaw daannyi sea diibigaaschi jea gweadu geeshteaba niny, earappeadi mandeawana jeepta. 6Hit goobalool Aseetta damandida nea gwayeeshsha, diibigaagu rabasta aba ng'eanyiida ambal fii suuk, ak aba hooweanji gajeenung' ghoaw ging'gn'oonyanga ak ghwanyas sawanadeeda gweannyeew bughalaji ang'wan. 7‘Ak aniini gaydeargweaksa emeeda gadiyeesa,’ aba girrugu Aseetta, ‘nea iing'atta hiji gaygwarinna jeannyaawa ak ghaghadoawan aba hiji.’ 8Ak ghoadaw niny neajeeda ghasmeahooda. Ak ghoaw Abrahaamu ghweanda Isakka, ak ghwaat niny ghasmeahooda eaweetteaba sis; ak ghoaw Isakka ghweanda Yakkobo, nea Yakkobo ghoaw ghweandeaba oorjookka attamaniyyeenyean.
9“Nea balloojisu inyeesa gwashissa ghaang' Yoseefu, ak geeshaayda aba ng'eanyiida Misri; nea Aseetta gwandeayi sea niny, 10ak gwalealna jeeda sawanaduutkaaschi sean, ak ghoadaw alooheeda ea weaghumeeda aba madeeda Faraoyda was sugoochcheanda ng'eanyiida Misri, ak ghwanung' ghoaw sugoochcheanda haw bea ng'eanyiidida Misri ea fugeaba gheannyi. 11Iiduw ghang'eat geejeeda ng'waan aba ng'eanyiida Misri ea ng'eanyiida Ganaani, ea sawanadeeda haw, ak eara ghweanigaasa ea ning'assa hamitta. 12Iiduw nea ghwanyas iitta Yakkobo gideaba ng'eanyiida Misri gwanda booga, goojeakta ghweanigaasa aba ng'eetta madeeda. 13Iiduw nea gabiikta gabareessa deaba iyyenya gwarukuta geawi Yoseefu aba heeda oorjooga ghaamwat ak eara Farao ghwanal oorjookeenyea Yoseefu. 14Goojeaksa Yoseefu Yakkoboyda was ghwaan ea fukgheenyaawa sean, fii laadam ea damana muut; 15ghang'eat Yakkobo gawa ng'eanyiida Misri. Ak gameewsa, niny sea ghweanigaasa, 16iiduw geasar eakghuumda Shekkemu ak geebung'sa jeeda bung'eetta ghayi shaaha Abrahaamu lappiyeeda mida monneeda aba heeda balloojiga Hamori mida ng'eanyiida Shekkemun.
17“Iiduw nea nineekkiit damanda heelleesiinda ghayi adaw Aseetta Abrahaamu, ghoahaada monneeda buuneeda ea ghwadarda aba ng'eanyiida Misri 18ea eeyibwak ea goombal ng'eanyiida Misri sugoochcheanda nuut mwanala Yoseefu. 19Ak gwasiissa fuga ng'eanyiideanya seareeda muy ak gwasissa eara ghweanigaasa ng'asheega munyas, aba gideaba gwading'sa ghweanigaasa gwahissa diibiga nyaawa manang'i jarooda, ea meabiidana ng'eanyiida. 20Muusa abeeda geeji damani ak ea jeepta miy aba madeeda Aseetta. Geereersa gheanyaawa sheah samwagu; 21iiduw nea geeruutta jarooda ghwanyas hudeaba Farao ak ghoarear ea gwaheedu nea ghoaw balleandaannyi. 22Muusa iiduw geenaal weaghumeeda sea fuga ng'eanyiida Misri, ak ghwanyas uurda aba baloaldaannyi ea sinaweagaaschi.
23“Geeyibwak ama ahiitta gweannyeew haradam, gagasa aba guroroadaannyi gawa ghwadaa fuga duupchi was balloojiga Israeeli. 24Ghwadaa siyagi nea geabwar, hean gawa ghaweat siitta sisawaniin, ak iiduw ghawalda mureandooda ak gwanus siitta bea Misriin. 25Niny abeeda ghaghayi gideaba fugaaschi duupchi gaygwajeeng'u gideaba Aseetta niyeadu siida jea gwalealu aba geattindaannyi ak ea majeeng'na. 26Iimuchchu eaweeda bassa ghwadaa fii iyyeenya bea Israeeli nea gabearji hean gawa gooheel ak gwayeeshsha, ‘Agooga gowaschi oorjoospwa gheawagi, iijea gwaybwak ea abearjeena.’ 27Ng'atta ghang'eat oorjeeda gwachi bwar giischeewoochcheandaannyi ak gwajakta nea gwayeeshsha, ‘Ghwayiinyi ng'eaha gadiyeani bea gimbaliischoodean ea gideaba guwasi siida jea gooheeldooscheesa. 28Gigasayi nuustanean gida heetta inuusti siidida bea ng'eanyiida Misriini?’ 29Iyiy ng'asheesu Muusa gamng'aw, ak ghoaw mang'eaweanyeanda aba ng'eanyiida Midiyaani, goobiida hoowa ea gwaji ballooji iyyeenya.
30“Ng'atta gweanyeew haradam goobeersa Muusa malaykajeanda aba jeeda dareapcheeda neekeewa giijeeda Sinayi, aba ng'ushapta beasta yeada jeeda murunjooda. 31Daa Muusa ghahamng'eanyi aba hoowa; iiduw nea gwaneekkiisa gang'ula ghwanya ghuutta Ng'uttamiida, 32‘Aniini geawaschi Aseetta ghweanigeagwa, ak geawoschi Aseetta Abrahaamu, ea dea Isakka dea ea Yakkobo.’ Hean ghabeal Muusa muuchchi ea ghabwaadan ea ea mutghoammu gang'ula. 33Gwayeeshsha, Ng'uttamiida niny, ‘Fakta geakkaagu aba geeshangaagu aba gideaba hiji imiinaadawiiniin ng'eanyiida ghaydit gil. 34Aba huumwa naadaay ng'asheega munyas sisma fugeasu aba ng'eanyiida Misri ak ea naayiinyi shookka nyaawa, ak ghaawunnyi dalealu. Asi ghamneawa beenni gaydeajeaktaneey Misri.’ 35Muusa nii deaghayi siheawa, nea geeyeeshsha, ‘Ghwanung' ng'eaha huwa siida ambaliischi nea giheeldooschi buuneeda?’ Aseetta iiduw goojeakta ghoaw siida ambaliischi ea lealnoochcheanda aba geattinda malaykajeanda bussiinnyi aba jeeda murunjooda. 36Nii deaghayi aruuna buuneeda ng'eanyiida Misri gil, nea gwasin gwadeagooda ea ng'asheega deamdeameadi aba ng'eanyiida Misri, ea aba jeeda Basoodareara, ea jeeda dareapcheeda gweanyeew haradam. 37Nii Muusa dea ghayi eeshsha fuga Israeeli, ‘Aseetta gaygoojeakseegwa sibaneeda jea gawuurjeaweani ak siisi gaygwaleabu jeeda fuga oduupcheewi.’ 38Siisi nii dea ghayi mideawa buuneeda aba dareapcheeda gil sea malaykajeanda abalool niny aba uhuuda Giijeeda Sinayi, sea ghweanigaasa; ak geattaw ng'asheega mideawa eaweega jea gagoaneasa.
39“Ak ghaheawa ghweanigaasa gwasissa niny mureeda, geasach ghoaw gidamwadaagha, ng'atta gagasa guroruunatka nyaawa gabiikta Misri, 40Iiduw geeyeeshsha Aroon, ‘Sinneasa aseechcheekka jea goosheedeawaneasa; aba gideaba meanali gidanibussa Muuseeda ghayi aruuneasa ng'eanyiida Misri.’ 41Iiduw geesin meayda aba askwearjoojikka, amahit geattaw lukghamajeega gidamawosa Aseetta nea geesin ghweelmeeda hean gahoosassa gadiyoojiga geattinga nyaawa. 42Iiduw ghwayam Aseetta ak ghwanung' ghabwat miinga humng'eeda, gawuurji gissung'waarda aba jeeda gittaabooda sibanga:
‘Neada haleanjeeda onnuuseadi ea lukghumajeega gogonnyeani,
gweannyeew haradam aba dareapcheeda, Ea gheeh Israeeli?
43Agooga ghayi ghoasareannyi maheemajeanda Molokki,
ea ming'weanda aseetteang'wa suguura Refani,
ea gidaghayi osinnyi ak ghoabwachchi;
ak gaydeabaleageegwa ea dasuudeagwa ng'eanyiida Babiloni.’ 44Ghwanigaasa ghayi gwandeawa maheemajeanda muwwunooda aba dareapcheeda, ak gawuurji siitta ghayi abalool Muusa sgideaba sina, gawuurji gidaghayi daakta. 45Iiduw ghoang'ng'waanyaan ghwanigaasa ea ghwahitta damanda Yoshuwa isihoan emoojiga aruutta Aseetta ammadeeda ghwanigaasa. Ak geang'ng'waanyaan ea ghwahitta damanda Dawdi, 46ghayi nyas alooheeda aba madeeda Aseetta ak gamus beatta gawa gagasa heechchea goobiida Aseetta Yakkobo. 47Ak siida iiduw deeksa gheeda ea Sulemaani.
48“Nea Aseetta haw ghanyea meabiitteena jeeda gheeda sideasa geattinga; gawuurji ginnyaashta sibaneeda,
49‘Humng'eeda hoorgeedeanyu bea gheambalmeeda,
nea ng'eanyiida ea hoorgeeda geeshangeasu.
Ana ghaaw gil dea jea adeeknean, aba ginnyah Ng'uttamiida,
ghana gwanda yeenu hoorgeedeanyu jea dafuufa?
50Ak ea masna geattindeanyu haleanjeeni seaniini?’
51“Ea fuga hang'oonyi iheen, miyeeyaat ghasmeahooda guroruunatka nyaawa ea iidiga, iissa galeagasean ghoattealli Gurorooda Ghaydit. Gawuurji gidaghayi sinda ghweanigeagwa, earagooga goosindunu. 52Aba jeeda sibanga gajea anneeda gil dea mii ghaghabwas ghweanigeagwa? Ak genuuseada fukka ghayi rugu ammwadiin hinnooda siida Doabiiwaat assagi, was dea ghayi osawannyi ak goonuuschi, 53agoogeeda noang'ng'waannyi deaweeda gawuurji gidaghayi goondaneegwa malaykajeanda ak ghanyea mii ghoang'ng'waay.”
Stefaano geefta lagheanga
54Ng'atta nea ghwayiiy ng'asheesu gwanyareesi nea goowiiri geeshatka nyaawa appadaydaannyi. 55Iiduw nea niny ea ninyiit Gurorooda Ghaydit, gang'ula humng'eeda ak ghwadaa gigheambiitta Aseetta, nea Yeesu ghamiinaada aba meatkweeda geattinda dugwa bea Aseetta; 56Ak gwayi, “Ang'ulla, ghaadaayi humng'eeda nea ghwajaada, nea Balleanda Siida ghamiinaada aba meatkweeda geattinda dugwa bea Aseetta.”
57Goojur muuchchi ea gwadukuta iidiga nyaawa ak geedeambiirsa sean ak geang'ng'waay. 58Geeruuteawa jeeda mujiini ak geefta lagheanga; ak gageanu muuwshoodiga ghwayiin hang'weakka nyaawa geattinga balleanji suguura Sauli. 59Damani sifutteewa Stefaano lagheangean, ghamwaash Aseetta nea gwayi, “Ng'uttamiida was Yeesu, deabwa guroroodeanyu.” 60Ng'atta gwatkuy ak ghoahawda nea gwayi, “Ng'uttamiida, adiiduw ginung' ghwanyas fiisu ring'eani.” Iiduw nea niihiit ng'asheesu, ghami.
Attualmente Selezionati:
Gadiyeeda Giijasoodiga 7: DTGANT09
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Datooga New Testament © Bible Society of Tanzania, 2009.
