یوحنا ۷
۷
عیسا اورشلیم میأن
1 پس عیسا بوشؤ جلیل سأمأن شرأ و اویَه دیهأتأنٚ دورون گردستی کی یوهودیه جَا دؤر بٚبه چونکی یوهودٚ پیله کسأن خأستیدی اونَ بوکوشٚد. 2 ولی خیمه‌یأنٚ عَید کی ایتأ جٚه یوهودٚ پیله عَیدأن بو، فأرٚسِئندوبو. 3 عیسا برأرأن اونَ بوگفتٚده: «تو اَیَه‌یَ بٚنه و بوشو یوهودیه، کی تی پیروأن تی موجیزه‌یأنَ بیدینٚد. 4 چونکی اگه بٚخأیی تٚرَه جیگأ بدی، هیوخت معروفَ نیبی. اگه رأس‌رأسِی پیله کسی، اَنَ دونیأیَ ثأبیت بوکون.» 5 حتّا اونی برأرأنٚم اونَ ایمأن نأشتیدی.
6 عیسا جوأب بٚدأ: «من نتأنٚم اَسه بشم، ولی شومأن تأنیدی. اَسه می اَمؤنٚ وخت نییٚه. ولی شِمِره فرقی نوکونه چی وخت بیشید، 7 چونکی دونیأ مردوم شیمی جَا نیفرت نأرٚده ولی می جَا نیفرت دأرٚده، چونکی من اوشأنٚ نأجورٚ کردکأرأن کی گونأ جَا پور ایسه‌یَ اَشأنَ خأطر اَوٚرم. 8 اَسه شومأن بیشید و عَیدٚ جشنٚ دورون شرکٚت بوکونید، ولی من ای وخت دِه، ایتأ خوروم زمأت اَیٚم.» 9 اَشأن بوشؤده امّا عیسا جلیلٚ میأن بئیسأ.
عیسا خودا خأنه میأن آشیکأرأ آموجه
10 بأزون عیسایٚم عَیدٚ رِه بوشؤ، ولی ایجوری بوشؤ کی هیکس اونی اَمؤنَ نیده. 11 اویَه یوهودٚ پیله کسأن، اونٚ دونبأل گردستیدی و کس‌کسٚ جَا وأوٚرسئیدی: «پس عیسا کؤیَه ایسأ؟»
12 مردومٚ میأنم اَ بوگو بشتأو زیأد بو. ای عیده اونَ قوبیل دأشتیدی و گفتیدی: «عیسا ایتأ بوزورگوأرٚ مردأکه» و ای عیده‌یٚم اونی ضد بود و گفتیدی: «نه، عیسا مردومَ گومرأ کونه.» 13 اَطؤیی بو کی هیکس نٚیأرستی رأحت و آزأد اونی جَا نظر بٚدأ، چونکی یوهودٚ پیله کسأنٚ جَا ترسئیدی.
14 او وخت کی نیصفٚ عَیدٚ روجأن تومأنَ بوسته بو، عیسا بأمؤ معبدٚ دورون و مردومٚ رِه موعیظه بوکوده. 15 قومٚ یوهود پیله کسأن اونی گبأنٚ جَا قأقَ بوستٚد و کس‌کسٚ بوگفتٚده: «آدم قأقَ به! چوطؤ به اینفر کی هیوخت اَمی دینی مدرسه دورون درس نخأنده اَطوچی‌یَ بٚدأنه؟»
16 عیسا بٚفرمأسته: «اونچی کی شٚمٚره گم جٚه می فیکر و نظر نییٚه بلکی جٚه خودایی ایسه کی مٚرَه اوسه کوده. 17 اگه اینفر بٚخأیٚه هوطؤ خودا خأستٚ مأنستَن زٚندیگی بوکونه فأمه کی اونچی من گم، خودا جَا ایسه نه می جَا. 18 اونی کی خودشٚ فیکرَ بٚگه، اونی هدف اَنه کی مردوم اونَ پیله کس بدأنٚد ولی هر کی بٚخأیٚه خودا تعریف و ستأیٚش بٚبه، اون دوروستکأر و بی‌ریأ ایسه. 19 مگه موسا تورأتَ شٚمٚره فأندأ؟ ولی شومأن هیتأ، اونی جَا ایطأعت نوکونیدی. چٚره خأییدی مٚرَه بوکوشید؟»
20 اَشأن اَ گبٚ وأسی جَا بوخوردٚد و بوگفتٚده: «تو تومأمٚ تی عقلَ جٚه دٚس بٚدأیی، کی خأیه تٚرَه بوکوشٚه؟»
21 عیسا جوأب بٚدأ: «من ایتأ نأخوشَ، شَبّأتٚ روجٚ میأن شفأ بٚدأم و همٚتأن قأقَ بوستید. 22 ولی شومأن، خودتأنٚم شبّأت روجٚ میأن کأر کونیدی. موسا دستور وأسی شیمی پٚسرأنَ حتّا شبّأت روجٚ میأن ختنه کونیدی. (البت ختنه جٚه ایبرأهیمٚ زمأت رسم بو نه جٚه موسا زمأت.) 23 پس اگه شیمی پٚسر زأکٚ ختنه، شَبّأتٚ روجٚ میأن دکفه، شومأن اونَ هو شبّأت روجٚ میأن ختنه کونیدی کی موسا شریعتَ نشکنید، پس چٚره مٚرَه محکوم کونیدی کی ایتأ نأخوشَ شبّأت روجٚ میأن کأمیل شفأ بٚدأم؟ 24 ظأهیرٚ جَا قیضأوت کودنَ دٚس بٚکشید، رأس‌رأسِی معیأرأنٚ اَمرأ قیضأوت بوکونید.»
آیا اون مسیح ایسه؟
25 ای عیده جٚه اورشلیمٚ مردوم کس‌کسَ گفتیدی: «مگه اَن هونی نییٚه کی خأیده اونَ بوکوشٚد؟ 26 پس چوطؤ هسأ آزأد موعیظه کونه و هیکس اونَ هیچی نیگه؟ شأید اَمی قومٚ پیله کسأنٚم آخرپٚسی اَ حِئقتَ بٚفأمٚستد کی اون هو مسیح ایسه. 27 ولی اَن ایمکأن نأرِه، چونکی اَمأن بشتأوستیم کی مسیح او وخت کی بأیٚه، هیکس نأنِه جٚه کؤیَه بأمؤ. ولی اَمأن دأنیمی کی اون کؤیَه بودونیأ بأمؤ.»
28 پس عیسا او وخت کی معبدٚ دورون موعیظه کودأندوبو، مردومَ بوگفته: «شومأن مٚرَه خُب شنأسیدی و دأنیدی کی کؤیَه بودونیأ و کؤیَه پیلّه بوستم امّا من جٚه اینفرٚ ور بأمؤم؛ کی شومأن اونَ نشنأسیدی و اون دوروست هو حِئقته. 29 من اونَ شنأسٚم، چونکی من جٚه اون ایسٚم و اون مٚرَه شیمی ورجأ اوسه کوده.»
30 او وخت کی قومٚ پیله کسأن اَ گبأنَ بشتأوستٚد، بٚخأستٚد اونَ بیگیرٚد، امّا هیکس نٚیأرستی چونکی هنو او وخت کی وأستی بأمؤبی فأنرٚسه بو. 31 اَنٚ اَمرأ هطویی خٚیلیأن هو وختٚ میأن ایمأن بأوٚردٚد کی اون هو مسیح ایسه و کس‌کسَ بوگفتٚده: «ینی خأیید مسیحَ، کی اونی رأفأ ایسأییم ویشتر جٚه اَن موجیزه بوکونه؟»
32 او وخت کی فریسیأن و کأهینأنٚ پیله کسأن بشتأوستٚده مردوم عیسا جَا چی گده، دفأتن خوشأنی مأمورأنَ اوسه کودٚد کی اونَ بیگیرٚد. 33 او وخت عیسا مردومَ بٚفرمأسته: «فقد من ایتأ پیسخأله زمأت شیمی میأن ایسأم، بأزون شٚم اونی ورجأ کی مٚرَه اوسه کوده. 34 او وخت شومأن می دونبأل گردیدی ولی نتأنیدی مٚرَه بیأفید و اویَه کی من شٚم، شومأن نتأنیدی بأیید.»
35 قومٚ پیله کسأن عیسا اَ گبأنٚ جَا قأقَ بوستٚد و کس‌کسٚ جَا وأورسئده: «مگه کؤیَه خأیه بشه؟ شأید خأیه اَ ولأیتٚ جَا بشه یوهودیأنٚ ورجأ البأقی ولأیتأنٚ میأن، شأیدٚم خأیه بشه اوشأنی ورجأ کی یوهودی نییٚده. 36 اونی منظور چیسه کی بوگفته: "می دونبأل گردیدی ولی مٚرَه یأفتن نتأنیدی و او جأ کی من شٚم، شومأن نتأنیدی بأیید"؟»
عیسا زٚنده آبٚ وعده‌یَ دِهه
37 عَیدٚ آخری و موهیمترین روج بو، عیسا خو صدایَ بوجؤر بیگفته و مردومَ بٚفرمأسته: «هر کی تشنه ایسه، بأیٚه می ورجأ و آب وأخوره. 38 هطؤ کی موقدسٚ کیتأبأنٚ میأن بینیویشته بوبوسته هر کی مٚرَه ایمأن بأوٚره، "جٚه اونی میأن، زٚنده آب، روبأرٚ مأنستَن رأ دکفه".»
39 عیسا منظور جٚه زٚنده آبٚ روبأر، هو روح‌القدس بو کی اوشأنی‌یَ فأدأ به کی عیسایَ ایمأن بأوٚرٚد. امّا روح‌القدس هنو هیکسَ عطأ نوبوسته بو، چونکی عیسا هنو جلالَ، فأنرٚسه بو.
تفرقه و بی‌ایمأنی
40 او وخت کی مردوم اَ گبأنَ عیسا جَا بشتأوستٚد، بوگفتٚده: «اَن وأستی هو پیغمبری بٚبه کی اونی رأفأ ایسأبیم.» 41 البأقیأن بوگفتٚده: «اَن هو مسیح ایسه!» ای عیده‌یٚم بوگفتٚده: «اَ مردأی نتأنه مسیح بٚبه ینی مسیح جٚه جلیل اَیِه؟ 42 مگه موقدسٚ کیتأبأنٚ میأن بینیویشته نوبوسته کی مسیح داوودٚ پأدیشأ نسلٚ جَا ایسه و بیت‌لحمٚ دیهأتٚ دورون بودونیأ اَیِه؟»
43 پس مردوم چنتأ دسته بوبوستده. 44 ای عیده‌یٚم خأستید اونَ بیگیرٚد، امّا هیکس خو دٚسَ اونی ور درأزَ نوکوده.
45 مأمورأنی کی بوشؤ بود عیسایَ بیگیرٚد، دٚس خألی وأگردٚستٚده. فریسیأن و کأهینأنٚ پیله کسأن وأورسئده: «پس چٚره اونَ نأوٚردیدی؟»
46 بوگفتٚده: «هیکس تأ هسأ اونی مأنستَن اَ جور گبأن نٚزِه بو کی دیلٚ میأن بینیشینه.»
47 فریسیأن اَشأنَ رخشنٚ گیفتٚده و بوگفتٚده: «پس شومأنم گول بوخوردیدی؟ 48 آیا ایتأ جٚه اَمأن، کی قومٚ پیله کسأن و فریسی ایسیم اونَ ایمأن بأوٚردیم؟ 49 اَ نأدأنٚ آدمأن کی اونَ ایمأن بأوٚردٚد شریعتَ نأنٚده خودا اَشأنَ لعنت بوکونه.»
50 اَیَه بو کی نیقودیموس، هونی کی پیشتر عیسا ورجأ بوشؤ بو و ایتأ جٚه اوشأن بو ویریشته و بوگفته: 51 «آیا شریعت اَمٚرَه وئأله کی اینفرَ هطؤ بودونٚ موحأکمه، محکوم بوکونیم؟»
52 اونَ جوأب بٚدأده: «مگه تویٚم جلیلٚ شینی؟ بوشو موقدسٚ کیتأبأنَ خُب بخأن کی بیدینی هیتأ پیغمبر جلیلٚ جَا ظوهور نوکونه.»
53 جٚه اَ گبأنٚ پٚسی، همه ویریشتٚده و بوشؤده خوشأنی خأنه.
Valið núna:
یوحنا ۷: GLK_NT
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Transform Iran