मर्कुस् 8
8
मी तोङ्डक् स्यील येशुगी सम टेप्प १-१०
1हुगी धी़गी यङ्ल लेन् च्यीक् येशु च्येल्ल मी छेत्मीत् जोम्न युङ्न यो़प्प बेत्। ॱनी मी घयेत् दील सम घन्ड अक् मीप्पल येशुगी रोरङ्गी ॱलोप्टुक् दीब रोरङ्गी लोल भो़न हुबल हीन्दुक् सीन्न ॱस्येप्प बेत्। 2मी घयेत् हीबल ङ ॱङीङ् छगुक्। हीब ङदङ् दल स्यक्पु ॱसुम् थम्ब देत्नी, हीबल सम हुन्दो घन्ड अक् मीप्प बेत्। 3हीब यरी थक्रीङ्मी़ मी बेत्। हीब नुक्रङ् ॱलोक्न तङ्न ॱनी, लम्ल डोये यङ्ल तोबे ङेस्यीक्प च्यक्को़ट्टो झ्यीब बेत्। 4ॱनी ॱलोप्टुक् दीबे खोङ्ल नुक्मे मी मङल डङे ढोप्ची हीन मी मीस्से लुङ्बनी घन्दुक् झ्यीन ज्योर्केन्? झ्यीब बेत्। 5हील येशुगी खीत्ल ढोप्ची घजो़त् च्यीक् यो़प्प? सीन्न ढीब बेत्। ॱनी ॱलोप्टुक् दीबे लेल्ल दी़न् यो़त् झ्यीब बेत्। 6हीनी येशुगी मी घयेत् दील ॱसल दो़त् झ्यी सीक्केङ्गी खक्को़ ॱनङ बेत्। हुनी ढोप्ची दी़म्बु दी छ्यक्ल ॱनम्न को़न्ज्योक्ल थु छ्यी पुब बेत्। हुनी ढोप्ची दी खोङ्गी च्यक्न मी घयेत् दील गो़न टो़त्लेत् सीन्न ॱलोप्टुक् दीबे लक्ल टेप्प बेत्। हुनी ॱलोप्टुक् दीबे मी घयेत् दील टेप्प बेत्। 7ॱनी हुबे लक्ल न च्युङेत्मु च्यीक्प आक् यो़प्प बेत्। ॱनी हुगो ओक् लीन्न खोङ्गी को़न्ज्योक्ल थु छ्यी पुन मी घयेत्ल टो़त्लेत् सीन्न ॱलोप्टुक् दीबल टेप्प बेत्। 8ॱनी मी कुरीक्की हुगो ढोप्प डङ् डङ् सेब बेत्। ॱनी स ॱमत् छुबे ॱल्हक्टो़ फरक् फीरुक् घयेत् दी ॱलोप्टुक् दीबे डुनी, हुगो डालो दी़न् घेङ बेत्। 9उन तोम्दु मी तोङ्डक् स्यीजो़त् च्यीक्की ची यो़प्प बेत्। हुनी खोङ्गी हुगी मी घयेत् दी पीद तङ्नी, 10खोङ् ॱलोप्टुक् दीबदङ् दल ढुल स्युन दल्मनुथा लुङ्बल फीम्ब बेत्।
यीक् छ्यीम्मी़ ता ॱयेङ्दु युङ ११-१३
11हुनी फरीसी यरी येशु च्येल्ल तम् च्युर्तु युङ बेत्। युङ्नी, हुबे खोङ्ल छो़त्लीन् तज्येल ङीत्ल इगीनी मक्की यीक् छ्यीम्मी़ ता च्यीक् तो़न्दे सीन्न स्यी़ब बेत्। 12हीगोल खोङ् घी़रीम ॱस्योर्न हुबल धीङ्सङ्गी मी हीबे यीक् छ्यीम्मी़ ता घन्डल तो़ल्लेत् सीक्केन् बेक्क? ङे खीत्रङ्ल गन्दीय ॱस्येत् योङ्। धीङ्सङ्गी मी हीबल घन्डे ता आक् ॱमीत् तो़ङ्गेन् बेत् सीन्न ॱस्येप्प बेत्। 13हुनी हुगी मी दीबदङ् घीन खोङ् ढुल स्युन छो़ पारी दील लोक्प बेत्।
फरीसीगी टोल जीम् गोगेङ्गी ढीक्ल १४-२१
14ॱनी ढुल स्युन डोये यङ्ल छो़ थोक्तु ॱलोप्टुक् दीबे ढोप्ची खुर्च्ये दी टोक् ज्यीप्नर हीङ्गो़प्प बेत्। ढोप्ची च्यीक्रङ् हुबल यो़प्प बेत्। 15ॱनी येशुगी ॱलोप्टुक् दीबल तेदे, फरीसी घयेत् धङ् हेरोद्गी ढोप्चीगी च्युर् हुनी खीत्रङ् तोक्स्यीप् झ्यीन च्यङ् जीम्न दो़च्च्यीत् सीन्न गन्दीक्म ॱङाब बेत्। 16ॱनी ॱलोप्टुक् दीब रोरङ्सो नङ्दु खोङ्गी हीगो हज्यरङ्ल ढोप्ची ॱमत् खुरे ढीक्ल सीक्केन् हीम्ब न घन्ड ब अक्? झ्यीब बेत्। 17ॱनी हीगो येशुगी ॱह घोनी खोङ्गी हुबल खीत् घन्डल ढोप्ची मीप्पे ढीक्ल केच्च्य लप्को़प्प? हुन्दो ओक् खीक्की ॱह मीत् घोयेक्क? खीत्ल धो़ल्ल ङामोङ? हुन्दो थुक्ल खीत्रङ्गी ॱसीम् दी मत् भीय हीङ्गो़प्पेत्। 18ॱमीक् यो़त्न अक्, खीक्की ॱमीत् थोङेक्क? आम्ज्योक् यो़त्न अक्, खीक्की मीत् घोयेक्क? खीक्की हुन्दो ढेङ्गी ॱमीत् ॱसो़बेक्क? 19मी तोङ्डक् ॱङल ढोप्ची ॱङ च्यक्न टेत्नी, हुदु स ॱमत् छुबे ॱल्हक्टो़ घयेत् दी खीक्की डुनी, डालो घजो़त् च्यीक् घेङ्सोङ? सीन्न ढीब बेत्। ॱनी हुबे लेल्ल च्युन्नी सीन्न झ्यीब बेत्। 20ॱनी खोङ्गी यङ् मीरङ् तोङ्डक् स्यील ढोप्ची दी़न् टेत्नी, हुदु स ॱमत् छुबे ॱल्हक्टो़ फरक् फीरुक् घयेत् दी खीक्की डुनी, डालो घजो़त् च्यीक् घेङ्सोङ? सीन्न ढीब बेत्। ॱनी हुबे लेल्ल दी़न् सीन्न झ्यीब बेत्। 21ॱनी खोङ्गी हुबल खीक्की हुन्दो ओक् ॱह मीत् घोयेक्क? सीन्न ॱसुङ बेत्।
मी ॱमीक्मीत् च्यीक् ढक्पे तम् २२-२६
22हुनी खोङ्जोसो बेथ्सेदाल युङ बेत्। ॱनी हुदु खोङ् च्याल मी यरीगी मी ॱमीक्मीत् च्यीक् ठीक्न युङ्न खोङ्ल हील रेक्न ॱनङ्रो झ्यी सीन्न स्युव पुब बेत्। 23हीनी येशुगी हुगी ॱमीक्मीत् दी लक्पनी सुङ्न युगी छ्यील पक्कल ठीक्न फीम्ब बेत्। हुनी हुगी ॱमीक् दील खोङ्गी छ्युमक् कप्न हुल छ्यक्वङ् केन घन्ड थोङ्गुक्क? सीन्न ढीब बेत्। 24ॱनी हुगी ॱमीक्मीत् दीगी यल्ल तेनी ङे मी घयेत् दोङ्बु डस्सी फल्ल छुल्ल डोव थोङ्गुक् सीन्न झ्यीब बेत्। 25हुनी यङ् फीच्च्य हुगी ॱमीक् दील येशुगी छ्यक्वङ् केनी, ॱमीक् दी थोङ्गेल्ल ॱसोङ्न ढक्नर बेत्। हुनी ॱसेबोक्म थोङ बेत्। 26हुनी येशुगी हुल रङ् युगङ्ल मत् स्युक्प, स्युङ्ज्योङ् रङ्गी खीम्ल लोक्ल ज्युक् सीन्न ॱङान तङ बेत्।
येशुसो यरुशलेम्ल डोगेन् ८:२७–१०:५२
पत्रुस्की येशुल ख्रीष्ट् बेत् सीर २७-३०
27हीनी येशुसो सीजरीया फीलीप्पीगी लुङ्बे युगङ् घयेत्ल फीम्ब बेत्। ॱनी लम्ल डोये यङ्ल खोङ्गी रोरङ्गी ॱलोप्टुक् दीबल मी घयेक्की ङल ॱसु बेत् सीन्न सीगुक्क? सीन्न ढीब बेत्। 28ॱनी हीगी लेल्ल हुबे मी यरीबे युहन्ना बप्तीस् हीङ्गो़प्पेत् सीन्न सीगुक्। ॱनी यरीबे एलीया हीङ्गो़प्पेत् सीन्न सीगुक्। यरीबे यङ् कलुङ् ॱस्यो़क्केन् च्यीक् हीङ्गो़प्पेत् सीगुक् सीन्न झ्यीब बेत्। 29खोङ्गी हुबल खीक्की हीगी ढीक्ल ङल ॱसु बेत् सीगो़प्प ॱनी? सीन्न ढीब बेत्। ॱनी हीगी लेल्ल पत्रुस्की नीज्यरङ् को़न्ज्योक्की को़बे च्यप्को़न् ख्रीष्ट् बेत् झ्यीब बेत्। 30हुनी खोङ्गी हुबल हीगी केच्च्य हीगो मी ॱसुल आक् ॱमत् ॱस्यो़च्च्यीत् सीन्न गन्दीक्म ॱङाब बेत्।
येशुगी खोङ् रोरङ् ढोङे ढीक्ल ॱस्येप्प ३१-३३
31हीनी झ्यीनी खोङ्गी रोरङ्गी ॱलोप्टुक् दीबल हीन्दुक् सीन्न ॱस्येप्प बेत्। कोलीमीगी ॱरेबुल दुक्स्यी गज्येन् नोङ्गेन् बेत्। लुङ्बे गेम्बा चो छ्यीया घयेत्, छ्यो़प्पो़न् चो छ्यीया घयेत् धङ् छ्यो़डीम्गी चयेलम घयेक्की ॱलोल मीत् झ्यीप्पल ॱसो़क्केन् बेत्। हुनी स्यक्पु ॱसुम् ॱसोङ्नी, यङ् खोङ् ॱसोम्बुल लोङ्गेन् बेत् 32सीन्न स्युङ्ज्योङ् ॱस्येप्प बेत्। ॱनी पत्रुस्की येशु फच्चो़त् च्यीक्ल ठीक्न खोङ्ल लप्स्य तङ बेत्। 33हुनी येशु छुल्ल दोङ् ज्युर्न ॱलोप्टुक् ॱयोङ्मा दीबल तेन पत्रुस्ल ॱवे शैतान्, ङ च्यानी रङ् फल्ल ज्युक्। रङ्गी ॱनो़बे केच्च्य हुगो को़न्ज्योक् च्यागी मेम्ब, कोलीमी ङो़नी युङे केच्च्य बेत् सीन्न लप्स्य तङ बेत्।
येशुगी तीङ्ल डोगेङ्गी ढीक्ल ३४-३८
34हीनी येशुगी मी घयेत् धङ् रोरङ्गी ॱलोप्टुक् दीब खोङ् रोरङ्गी लोल भो़न हुब घयेत्ल हीन्दुक् सीन्न ॱस्येप्प बेत्। ङे लम्ल मी ॱसु युङ्गीन् थेक्को़दङ् हुगी रोरङ्गी धेच्च्यो घयेत् फङ्न रोरङ्गी कुरुस् खुर्न युङ् गोगेन् बेत्। 35ॱनी मी ॱसी़ रोरङ्गी छी दी तोर् योङ् ॱनो़न फङ झ्यीगुक्क हुगी छी दी तोर् डोगेन् बेत्। ॱनी यङ् ॱसी़ ङे धो़ल्ल धङ् केच्च्य ॱनेम्बी़ धो़ल्ल रोरङ्गी छील फङ मीप्प झ्यीक्को़दङ् हुगी रोरङ्गी छी दी सुङ् छुगेन् बेत्। 36जम्लीङ् की़न् दीरङ् लक्ल झ्युङ्ज्यङ्, रोरङ्गी छी दी मीत्तल ॱसोङ्न ॱनी, हुल घन्डे फेन्दो दी युङ्गेन्? 37हुगी रोरङ्गी छी दी घन्दुक्मे रीर्रङ् टेत्न आक्, ॱलु ॱमीत् छुगेन् बेत्। 38ॱयोङ्दङ् ङीगेन् दीक्च्येन् धीङ्सङ्गी मी घयेत् हीब ॱसी़ ङ धङ् ङे केच्च्यल ङु छय झ्यीगुक्क हुल तीङ्ला कोलीमीगी ॱरेबुल रोरङ्गी यप्की तो़त्वङ् झ्युङ्न इगीगी भङ्ज्येम्ब चङ्म घयेत्तङ् दल युङे यङ्ल खोङ्गी इक् हुल ङु छय झ्यीक्केन् बेत्।
Valið núna:
मर्कुस् 8: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society