मर्कुस् 9
9
1हीनी हरुङ्द खोङ्गी हुब घयेत्ल ङे खीत्रङ्ल गन्दीय ॱस्येत् योङ्। हुन्दो हीन यो़क्केन् खीत्रङ् यरीगी ॱमत् ॱस्यीयलरङ् को़न्ज्योक्की ज्यागक् ॱवङ् छ्यीम्मुल झ्युङ्न युङ थोङ्गेन् बेत्।
येशुगी सी़ च्यत् थीङीयल ज्युरे तम् २-१०
2हीनी स्यक्पु ढुक् ॱसोङ्नी, येशुगी पत्रुस्, याकुब्, युहन्ना झ्यीब ठीक्न लदोक् थोया च्यीक्ल जेन फीम्ब बेत्। ॱनी हुगी लदोक् दीदु हुबे दोङ्दु येशुगी कुस्सी़ दी ज्युर्नर बेत्। 3खोङ्गी घो़ दी म दीरङ् ओ़त् छ्यीम् छ्यीम् झ्यीक्केन् कप्पु च्यत् थीङीयल ॱसोङ बेत्। नुक्मे घो़गी धक्प जम्बुलीङ्न मी ॱसी़ इक् घन्डे टी़त् छुज्ये। 4ॱनी हुगी यङ्ल हुदु एलीया धङ् मोशा खोङ् च्याल केच्च्य लप्तु थो़न्न युङ बेत्। 5हुगो थोङ्नी पत्रुस्की येशुल रब्बी, हज्यरङ् हीदु दो़प्पल गस्सी युङेत्। हीदु दीर ॱसुम् सो़दोङ्, च्यीक् नीज्यरङ्ल, च्यीक् मोशाल, च्यीक् एलीयाल झ्यीब बेत्। 6हुब ज्यीक्टक् गन्दीक्म लङ्नी, पत्रुस्की घन्ड सीर् गोगेन् बेक्क हुगो ॱस्यो़त् दीरङ् ॱमत् ॱस्यीबल हुन्दुक् झ्यीब हीङ्गो़प्प बेत्।
7हुन्दुक् सीरे यङ्ल ॱमुब च्यीक् युङ्न, खोङ्जोसो तुम् तङ बेत्। ॱनी ॱमुबे नङ् दीनी मल्ल हीगो ङे झ्यम्बे भु हीन्। हीगी झ्यीबल खीत्रङ् नेन्ज्यीत् सीरे ॱसुङ्गेत् च्यीक् युङ बेत्। 8हुनी ॱस्यरी ॱलोप्टुक् दीबे फल्ल छुल्ल घल अक् तेनी, उन येशुरङ् च्यीगी च्यीक्पु यो़प्प थोङ बेत्।
9हुनी खोङ्जोसो हुगी लदोक् दीनी मल्ल भप्न युङे यङ्ल येशुगी ॱलोप्टुक् ॱसुम्बु दील खोङ्गी खीत्रङ्गी हुन्दो घङ् थोङ घयेत् हीगो कोलीमीगी ॱरेबु ॱस्यीनी, यङ् ॱसोम्बुल लोङ् लोङ् थुक्ल मी ॱसुल आक् ॱमत् ॱस्यो़च्च्यीत् सीन्न गन्दीक्म ॱङाब बेत्। 10ॱनी हील ॱलोप्टुक् दीबे नेन्न ॱसुल आक् ॱमत् ॱस्येप्प बेत्। ॱनी ढोङ्नी यङ् ॱसोम्बुल लोङ्गेन् सीक्केन् हुगी धो़न् दी घन्ड ब अक्? ॱनो़न रोरङ्सो ॱनम्बु लप्री चीय बेत्।
एलीयागी ढीक्ल तम् ढीब ११-१३
11ॱनी हुबे खोङ्ल छ्यो़डीम्गी चयेलम घयेक्की केच्च्यल एलीया एल्ला थो़न् गोगेन् बेत् सीगुक् न? सीन्न ढीब बेत्। 12ॱनी खोङ्गी लेल्ल एलीया एल्ला थो़न्न हुगी कुरीक् ठोक्क सो़न डीक्न डोगेन् बेत् सीक्केन् हुगो खुङ्देन् बेत्। ॱनी कोलीमीगी ॱरेबु आक्तोक्ल पुर्न दुक्स्यी गज्येन् नोङ्गेन् बेत् सीक्केन् हीगो घन्डल ढीन यो़क्केन् बेक्क? 13ङे खीत्रङ्ल ॱस्येत् योङ्। हुगी एलीया हुगो थो़न् छर बेत्। खोङ्गी ढीक्ल ॱसुङ्रप्ल ढीन यो़प्प दी डस्सीरङ् मी घयेक्की खोङ्ल घङ् झ्यीक्कीन् थेच्चो़त् झ्यीब बेत् सीन्न ॱस्येप्प बेत्।
ॱनो़प्प घुव च्यीक् दीप्पे तम् १४-२९
14हुनी खोङ्जोसो ॱलोप्टुक् ॱयोङ्मा दीब च्याल ॱलीब बेत्। ॱलीत्नी, उन मी छेत्मीत् जोम्न छ्यो़डीम्गी चयेलमदङ् ॱलोप्टुक् ॱयोङ्मा दीब केच्च्य थुक्री चीय थोङ बेत्। 15मी घयेत् दीगी येशु युङ थोङ्नी, हुब ॱह लेन खोङ् च्याल ज्युन फीन्न थोङ् झ्यीब बेत्। 16ॱनी खोङ्गी हुब घयेत्ल खीत् घन्डे ढीक्ल केच्च्य थुक्को़प्प? सीन्न ढीब बेत्। 17हीगी लेल्ल हुगी मी घयेत् दीगी छीक्नी छुल्ल मी च्यीक् थो़न्न खोङ्ल चयेलमला, नीज्यरङ् च्याल ङे भु हीगो ठीक्न युङेन्। हील ॱनो़प्प स्युन घुवल ॱसोङ्न यो़त्। 18हील ॱनो़प्प दी नम् सीङ्गो़दङ् हुगी यङ्ल ॱसल बदरक् दप्न खे नङ्नी बुजुप् थो़न्न ॱसोन्जीन् डीक्कुक्। हुनी सी़बु दी ठङीयल टप् डोगुक्। ङे नीज्यरङ्गी ॱलोप्टुक् हीबल हीगो तो़न्न दीत्रो झ्यी सीन्न स्यी़बेन्। ॱनी हुबे हीगो तो़न्न दीत् ॱमत् छुसोङ् झ्यीब बेत्।
19ॱनी हीगी लेल्ल खोङ्गी हुब घयेत्ल ॱवे छ्य मीत् स्योक्केन्, धीङ्सङ्गी मी घयेस्सो, खीत्तङ् दल ङ घजो़त् च्यीक्रङ् दो़च्च्ये व ॱनी? घजो़त् च्यीक्रङ् गुर्च्ये व ॱनी? हुगो ङ च्याल ठीक्लेत् सीन्न ॱसुङ बेत्। 20हुनी हुगो खोङ् च्याल ठीक्न युङ बेत्। हुनी हुगी ॱनो़प्प दीगी येशु थोङ्नी, हुगी मी दीगी सी़ दी कक् च्यीरीक् कुक् च्यीरीक्ल तङ्न ॱसल बदरक् दप्न ॱआलोक् फीलोक् झ्यीन खनी मल्ल बुजुप् थो़न्दु ची़प्प बेत्। 21हुनी हुगी पब दील येशुगी हील नम्नी हीन्दुक् झ्यीब झ्युङ? सीन्न ढीब बेत्। ॱनी हुगी लेल्ल हील भीजे यङ्नीरङ् हीन्दुक् झ्यीब झ्युङ्। 22हीगो ॱसो़च्च्येल लेम्म गज्येन् लङ्न यरी मी बर्सल घप् डोगुक्। यरी छ्युल घप् डोगुक्। हील नीज्यरङ्गी घन्ड जेत् छुगुक्क? छुन ङीत्ल ॱङीङ्ज्यी जेत्न दगु जेत्रो ॱनङ् सीन्न स्यी़ब बेत्। 23हुल येशुगी खोक्की ङल ॱवे झ्यीत् छुन सीरङ्? छ्य स्योक्केल्ल धो़न् घन् दी इक् कुरीक् डुप् छुगेन् बेत् झ्यीब बेत्। 24हीनी ॱस्यर्च्यक् हुगी भीजे पब दीगी ङे छ्य स्योक्को़त्। ङे छ्य स्योक् ॱमीत् छुबे लेमु दील दगु जेत्रो ॱनङ् सीन्न केत् ज्यब बेत्।
25हुदु मी गज्येन् ज्युन रुप्न तदु युङ थोङ्नी, खोङ्गी हुगी ॱनो़प्प स्यीलोक्पोक्म स्युब दील ॱवे घुव ओ़र्रीये ॱनो़प्प रङ् हीगी भीज हीनी थो़ल्ल ज्युक्। हुनी फीच्च्य यङ् नम् नम्ल अक् हील मत् स्युक्च्यीत् सीन्न कगो़त् तङ बेत्। 26हुनी हुगी ॱनो़प्प दी ओ़लोक् ॱस्योर्न कक् च्यीरीक् कुक् च्यीरीक् झ्यीन थप्न थो़न्नर बेत्। हुनी भीज दी ॱस्यीनर हीम्ब डस्सील टप्नर बेत्। ॱनी उन मी यरीगी ह हीगो ॱस्यीसोङ् झ्यीब बेत्। 27हुनी येशुगी हुगी लक्प दीनी सुङ्न ॱलोङ्नी, हुगो लोङ्न युङ बेत्।
28हीनी येशु खीम् च्यीक्ल स्युन हुदु मी ॱयोङ् मीप्पे यङ्ल ॱलोप्टुक् दीबे खोङ्ल ॱनो़प्प हुगो ङीक्की घन्डल तो़न्न दीत् ॱमत् छुब बेक्क? सीन्न ढीब बेत्। 29हीगी लेल्ल खोङ्गी हीगो डस्सीगी ॱनो़प्प दीप्पल को़न्ज्योक्ल गन्दीक्म ॱसुव तप्न मेन्द, दीत् ॱमीत् छुगेन् बेत्।
येशु खोङ् रोरङ् ढोङे ढीक्ल ॱस्येप्प ३०-३२
30हीनी येशुसो हुनी थो़न्नी गालीलागी घुङ्नी फल्ल मी ॱसी़ इक् ॱह मत् घोवाल फीम्ब बेत्। 31घन्ड हीन् सीन्न खोङ्गी रोरङ्गी ॱलोप्टुक् दीबलरङ् हीन्दुक् सीन्न ॱस्येप्प बेत्। कोलीमीगी ॱरेबु मी घयेक्की डलक्ल तङ्न ॱसो़क्केन् बेत्। हुनी स्यक्पु ॱसुम् ॱसोङ्नी, यङ् ॱसोम्बुल ॱलोङ्गेन् बेत् सीन्न ॱस्येप्प बेत्। 32हीगी धो़न् दी ॱलोप्टुक् दीबे ॱह मत् घोव बेत्। ॱनी खोङ्ल तम् ढीयल अक् हुब ज्यीब बेत्।
ॱलोप्टुक् दीब ॱसु छ्यीया थो़न् लप्री चीय ३३-३७
33हीनी खोङ्जोसो कफर्नहुम् सार्ल ॱलीब बेत्। ॱनी हुदु खोङ्जोसो खीम् च्यीक्ल स्युन दो़प्पे यङ्ल खोङ्गी हुबल खीत् लम्ल युङे यङ्ल घन्डे केच्च्य लप्री चीय? सीन्न ढीब बेत्। 34ॱनी हुब ॱसीङ् थागी लेनर बेत्। घन्ड हीन् सीन्न हुबे रोरङ्सो ॱनम्बु लम्ल युङे यङ्ल हज्यरङ् घयेक्की छीक्नी ॱसु छ्यीया थो़ङ्गो़दङ् सीन्न लप्री चीय हीङ्गो़प्प बेत्। 35ॱनी खोङ् ॱसल स्युन ॱलोप्टुक् च्युन्नीबु दी लोल भो़न हुबल खोङ्गी हीन्दुक् ॱसुङ बेत्। मी ॱसु छ्यीस्स्योल थो़न्ज्ये ॱनो़ब झ्यीक्को़दङ् हुगो ॱयोङ्मा कुरीक्ले च्युङ्स्यो झ्यीन कुरीक्ल स्यप्च्यी़ ज्युक् गोगेन् बेत्। 36हुनी खोङ्गी भीज च्युङेत्मु च्यीक् खुर्न हुबे घुङ्दु टङील स्यक्न हुनी यङ् खोङ्गी हुगो फङ्ल खुर्न हुबल 37ङे मीङ्गी ढीक्ल हीगी भीज हीगो डस्सील मी ॱसी़ थोङ् झ्यीगुक्क हुगी ङल झ्यीबल डोगेन् बेत्। ॱनी ॱसी़ ङल थोङ् झ्यीगुक्क हुगी ङल छ्युवक्ल मेम्ब, ङ तोङ्गेल्ल आक् झ्यीबल डोगेन् बेत् सीन्न ॱस्येप्प बेत्।
येशुदङ् दल मीप्पे मी इक् ॱनो़प्प दीप्प ३८-४१
38ॱनी युहन्नागी येशुल चयेलम मी च्यीक्की नीज्यरङ्गी छेन्नी ॱनो़प्प अयेक्प घयेत् तो़न्न दीप्प ङीत्तङ् ठेच्च्युङ्। हुगो हज्यरङ्दङ् दल दो़क्केन् मेम्बल ङीक्की हुल मत् झ्यीत् झ्यीबेन् सीन्न झ्यीब बेत्। 39ॱनी हुल येशुगी हुगो क ॱमत् च्यो़त्। घन्ड हीन् सीन्न मी ॱसी़ ङे मीङ्नी ॱस्यीक् छ्यीम्मी़ ले झ्यीगुक्क हुगी ज्योक्पु ङल ङेन्दम् मीत् लप्केन् बेत्। 40ॱसी़ हज्यरङ्ल ड मीत् झ्यीप्पेक्क हुगो हज्यरङ् छ्योगी मील डोगेन् बेत्। 41ङे खीत्रङ्ल गन्दीय ॱस्येत् योङ्। खीत्रङ् ख्रीष्ट्की मी हीम्ब ॱनो़ब ॱसम्न मी ॱसी़ खीत्रङ्ल छ्यु फोप्प घङ् तीक्कुक्क हुगो बीम्बे ॱल दी हुगोल घनी इक् थोप्केन् बेत्।
सी़गी यल्लक्की दीक्पल च्युगेन् ४२-४८
42ॱनी ङल छ्य स्योक्केन् हीगो डस्सीगी मी च्युङेत्मु च्यीक् मी ॱसी़ ङे लम्नी दीक्पल छ्यी़दु ची़क्कुक्क हुगोल बोर ओक्म दील लागोर् गर्चम च्यीक् डान छ्यु ज्यम्जो छ्यीम्मुल पुर् तङ्न, गा युङ्गो़ट्टो। 43रङ्गी लक्पे झ्यीत् झ्यीक्की रङ् ङे लम्नी छ्यी़दु ची़क्को़त्न, हुगो दुम्न पुर्लोङ्। रङ्ल लक्प ॱङी झ्युङ्न, नम्ल अक् ॱमीत् ॱस्यीगेङ्गी मी बर्से ॱनलल छरले त बोर लक्प ॱमत् छङ, रङ् फु तक्पे छी थोप्सल स्युब गा युङ्गेन् बेत्। 44[उन इप्रीक् छ्येत्न हुगो मीत् येब दो़क्केन् बेत्। ॱनी मी बर दी इक् ॱमीत् ॱस्यीगेन् बेत्।] 45रङ्गी कङ्बे रङ् ङे लम्नी छ्यी़दु ची़क्को़त्न, हुगो दुम्न पुर्लोङ्। रङ्ल कङ्ब ॱङी झ्युङ्न, ॱनलल छरले त बोर कङ्ब ॱमत् छङ, रङ् फु तक्पे छी थोप्सल स्युब गा युङ्गेन् बेत्। 46[उन इप्रीक् छ्येत्न हुगो मीत् येब दो़क्केन् बेत्। ॱनी मी बर दी इक् ॱमीत् ॱस्यीगेन् बेत्।] 47यङ् रङ्गी ॱमीक्की झ्यीत् झ्यीक्की रङ् ङे लम्नी छ्यी़दु ची़क्को़त्न, हुगो तो़ल्ल पुर्लोङ्। रङ् ॱमीक् ॱङीक्कर् झ्युङ्न, ॱनलल छरले त बोर रङ् ॱमीक् च्यीक् मीप्प को़न्ज्योक्की ज्यागक्ल स्युब गा युङ्गेन् बेत्।
48उन इप्रीक् छ्येत्न मीत् येब दो़क्केन् बेत्। ॱनी मी बर दी इक् ॱमीत् ॱस्यीगेन् बेत्। (यशैया ६६:२४)
49मी रीदङ् रील मी बर्केन्दङ् छ्येत्मीक्की छ ॱलुक्केन् बेत्। 50छ हुगो स्येन् गङ्ज्येन् बेत्। ॱनी हीन्न अक्, छे ढुव दी येन खुर्न ॱनी, हुगो यङ् घन्दुक् झ्यीन छगुवल सोगेन् ॱनी? खीत्रङ् छदङ् छ्येत्मीत् युङ झ्यीज्यीत्। खीत्रङ् नङ्दु छ्यम्ब डीक्प झ्यीन दो़च्च्यीत् सीन्न ॱस्येप्प बेत्।
Valið núna:
मर्कुस् 9: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society