मर्कुस् 10
10
छ्योबु छ्युङ्म घीज्ये मीप्पे ढीक्ल १-१२
1हुनी थो़न्नी येशुसो यहुदीया लुङ्बे चङ्बु यर्दन्गी पारीगी लुङ्बल फीम्ब बेत्। ॱनी हुदु मी छेत्मीत् खोङ् च्याल जोम्न युङ्नी, हुब घयेत्ल खोङ्गी ॱएङ्गी लेक्मुरङ् ॱलोप्से केच्च्य ॱस्येप्प बेत्। 2खोङ्ल छो़त्लीन् तदु हुदु फरीसी यरीब युङ्न हुबे खोङ्ल छ्योगो़ रोरङ्गी छ्युङ्म ॱलो़ तोङ्ज्ये युङ्गेन् बेक्क न मीत् युङ्गेन् बेक्क? सीन्न ढीब बेत्। 3ॱनी हीगी लेल्ल खोङ्गी हीगी ढीक्ल मोशागी खीत्रङ्ल घन्दुक् झ्यीबे ठीम् स्यक्तुक्क? सीन्न ढीब बेत्। 4हुबे लेल्ल मोशागी ढीबे कल
छो पत्तर ढीन ॱनी, छ्युङ्म ॱलो़ तोङ्ज्ये युङ्गेन् बेत् सीन्न झ्यीब बेत्। (ठीम्लु २४:१)
5ॱनी येशुगी हुबल खीत्रङ् ॱअप्स्यी़त् मीप्पे मी झ्यीनी, मोशागी हुन्दुक् झ्यीबे क टो़त् गो़ ॱस्यर बेत्। 6ॱङो़न् धङ्बु गोम छङ्म थम्ज्येत् छ्यादु ची़प्पे यङ्ल को़न्ज्योक्की छ्योगो धङ् भुमु सो़ब बेत्। 7हीगो झ्यीनी छ्योगो रोरङ्गी फम च्यानी भीन रोरङ्गी छ्युङ्मदङ् मुल डीक्न दो़क्केन् बेत्। 8हुनी हुब ॱङीबी़ ली़ दी च्यीक् हीम्बल डोगेन् बेत्। हुनी हुब ॱङी मेम्ब, च्यीक् बेत्। 9हुन्दुक् झ्यीन को़न्ज्योक्की कङ्ज्यीक्पल सो़न स्यक्प दी मी या टो़ज्ये मीत् युङ्गेन् बेत् सीन्न ॱस्येप्प बेत्।
10ॱनी तीङ्ला खीम् च्यीक्तु ॱलोप्टुक् दीबे येशुल हीगी धो़न् दी ढीब बेत्। 11ॱनी हुगी लेल्ल खोङ्गी मी ॱसी़ रोरङ्गी छ्युङ्म ॱलो़ तङ्न ॱयोङ्म ठीक्कुक्क हुगो ॱयोङ्दङ् ङीब झ्यीबल डोगेन् बेत्। 12ॱनी यङ् भुमी़ रोरङ्गी छ्योबु ॱलो़ तङ्न ॱयोङ्गी ॱनमल फीन्न ॱनी, हुगो ॱयोङ्दङ् ङीब झ्यीबल डोगेन् बेत् सीन्न ॱस्येप्प बेत्।
येशुगी भीज च्युङेत्मुल ॱमेल्लम् ज्यब १३-१६
13हुनी हुदु मी घयेक्की भीज गज्येन् ठीक्न युङ्न हीबल रेक्न ॱनङ्रो झ्यी सीन्न येशुल स्यी़ब बेत्। ॱनी ॱलोप्टुक् दीबे हुब क च्येत्न लप्स्य तङ बेत्। 14ॱनी हुन्दुक् झ्यीप्प येशुगी थोङ्नी, खोङ् खोङ्डोक् लङ्न ॱलोप्टुक् दीबल भीज घयेत् हुब क ॱमत् च्यो़त्। हुब ङ च्याल युङ्दु ची़त्। घन्ड हीन् सीन्न को़न्ज्योक्की ज्यागक् भीज हीब डस्सीगी बेत्। 15ङे गन्दीय ॱस्येत् योङ्। को़न्ज्योक्की ज्यागक्ल स्युक्पल मी ॱसु भीज हीगो डस्सीगी ॱसम्ल खुर्न मीत् युङेक्क हुगो हुल स्युक् ॱमीत् छुगेन् बेत् सीन्न ॱसुङ बेत्। 16हुनी भीज घयेत् दी खोङ्गी फङ्ल खुर्न छ्यक्वङ् केन ॱमेल्लम् ज्यप्न टेप्प बेत्।
मी छ्युक्पु थर घासी १७-२७
17हुनी खोङ्जोसो लम्ल स्युन डोये यङ्ल मी च्यीक् ज्युन युङ्न खोङ्गी ढुङ्दु पीमुङ् चुन गय च्येम्मे चयेलम ङल फु तक्पे छी थोबे ढीक्ल ङे घन्दुक् झ्यीब झ्यीत् गोगेन् बेक्क? सीन्न ढीब बेत्। 18येशुगी हुगोल खोक्की ङल घन्डल गय च्येम्म सीक्केन्? गय च्येम्म को़न्ज्योक् मेन्द, ॱयोङ् ॱसु उक् मीप्प बेत्। 19छ्यो़डीम्गी क घयेत् रङ्ल ॱस्यो़च्च्ये यो़ट्टो।
मी ॱमत् ॱसो़च्च्यीत्। ॱयोङ्दङ् मत् ङीज्यीत्। की़न्नक् ॱमत् कुज्यीत्। पङ्बु झ्यीप्पे यङ्ल ॱएलम मत् ज्यक्च्यीत्। गोप्नोक् ॱमत् तोङ्ज्यीत्। फमल खुच्च्य झ्यीज्यीत् सीन्न ॱस्येप्प बेत्। (थो़म्ब २०:१२-१६)
20ॱनी हुगी मी दीगी खोङ्ल चयेलम हीगो त कुरीक् ङे च्युङेत्मुनीरङ् चीन युङेन् झ्यीब बेत्। 21ॱनी येशुगी हुल तेनी झ्यम्ब झ्युङ्न हुगोल रङ्ल हुन्दो ॱनग च्यीक् ॱमत् छङेत्। रङ् ज्युक्ल रङ्ल घङ् यो़प्पे नोर् घयेत् दी चोङ्न टङ्बु घयेत्ल गो़न बील्ल रङ् ङे ॱलोप्टुक्ल ॱस्योक्। हुनी रङ्ल तेङ् यी़दु तीर्क थोप्केन् बेत् सीन्न ॱस्येप्प बेत्। 22येशुगी ॱसुङे केच्च्य दील हुगो ॱसीम्दुक्की फोप्नेत् छ्यान टप्नर बेत्। घन्ड हीन् सीन्न हुगोल नोर् छेत्मीत् यो़प्प बेत्। 23हुगो ॱसोङ्नी, येशुगी फल्ल छुल्ल तेन ॱलोप्टुक् दीबल मी छ्युक्पु बर को़न्ज्योक्की ज्यागक्ल स्युक्पल घन्दुक्मे घाब दुक्क सीन्न ॱस्येप्प बेत्। 24ॱलोप्टुक् दीब खोङ्गी हीगी केच्च्य हील ॱह लेब बेत्। हुनी येशुगी हुबल भीजसो, को़न्ज्योक्की ज्यागक्ल स्युक्पल घन्दुक्मे घाब दुक्क। 25मी छ्युक्पु बर को़न्ज्योक्की ज्यागक्ल स्युक्पले त ॱमुक्मु घम खप्की ॱमीक्ल स्युक्प ले ॱल्हा युङ्गेन् बेत् झ्यीब बेत्। 26ॱलोप्टुक् दीब हील हरुङ् गन्दीक्म ॱह लेन रोरङ्सो ॱनम्बु नुक्म हीन्न, मी ॱसु दी छी थर्वल थो़न् छुगेन् ॱनी? सीन्न झ्यीब बेत्। 27ॱनी येशुगी हुबल फोरी तेन हीगो कोलीमी ङो़नी युङ् ॱमीत् छुगेन् बेत्। ॱनी हीन्न अक्, को़न्ज्योक् ङो़नी हीगो युङ् छुगेन् बेत्। खोङ्गी ढुङ्नी कुरीक् डुप् छुगेन् बेत् झ्यीब बेत्।
कुरीक् ॱलो़ तङे ढीक्ल ॱल्हक्मु ज्यगोर् थोप्केन् २८-३१
28हील पत्रुस्की खोङ्ल ङीक्की ॱनी कुरीक् फङ्न स्यक्न ङीत् नीज्यरङ्गी ॱलोप्टुक्ल स्युन यो़त् सीन्न झ्यीब बेत्। 29हीगी लेल्ल येशुगी ङे खीत्रङ्ल गन्दीय ॱस्येत् योङ्। ङ धङ् केच्च्य ॱनेम्बी़ ढीक्ल मी ॱसी़ रोरङ्गी ढोङ्ब, पी़न्, फम, भीज धङ् फस्स्यी मस्स्यी घन्ड फङ्न स्यक् यो़दङ् 30हुगोल हन्देङ्गी छी हीलरङ् ज्यगोर्की ॱल्हक्मु ढोङ्ब, पी़न्, आम, भीज, फस्स्यी मस्स्यी थोप्केन् बेत्। ॱनी ॱयोङ्गी दुक्प तङ्न, दुक्प अयेक्प अक् नोङ्गेन् बेत्। ॱनी तीङ्मागी धी़ दीगी यङ्ल ॱसुम्ब हुल फु तक्पे छी थोप्केन् बेत्। 31ॱनी हीन्न अक्, ॱएम्मा घयेत् दी गज्येन् तीङ्ल झर् डोगेन् बेत्। ॱनी तीङ्मा घयेत् दी यङ् गज्येन् एल्ला थो़न् डोगेन् बेत् सीन्न ॱसुङ बेत्।
येशुगी रोरङ् ढोङे केच्च्य ॱस्येप्प ३२-३४
32हीनी येशुसो यरुशलेम्ल फीम्ब बेत्। लम् दील खोङ् एल्ला धङ् ॱलोप्टुक् दीब तीङ्ला झ्यीन फीम्ब बेत्। ॱनी ॱलोप्टुक् दीबे घन्ड झ्यीक्केन् ब अक्? ॱनो़न ॱह लेब बेत्। तीङ्ला युङ्गेन् दीबल ज्यीब झ्युङ बेत्। ॱनी ॱलोप्टुक् च्युन्नीबु दी येशुगी रोरङ्गी लोल भो़न हुबल रोरङ्ल घङ् युङ्गेङ्गी केच्च्य दी हीन्दुक् सीन्न ॱस्येत्न टेप्प बेत्। 33तेदे, हुन्दो हज्यरङ् यरुशलेम्ल डोगीन् यो़क्केन् बेत्। ॱनी हुदु कोलीमीगी ॱरेबु छ्यो़प्पो़न् चो छ्यीया घयेत् धङ् छ्यो़डीम्गी चयेलम घयेक्की लक्ल ॱस्योर्न, हुबे ॱसो़त् गोगेङ्गी छ्येप्प को़गेन् बेत्। हुनी ज्यी़त् ॱयोङ् ॱयोङ्गी मी घयेक्की लक्ल टेत्न, 34हुगी मी दीबे खोङ्ल छ्यस्सी़त् ज्यप्न छ्युप्स्या कप्न डेङ्ज्यक् बेन्न हुनी ॱसो़क्केन् बेत्। हुनी स्यक्पु ॱसुम् ॱसोङ्नी, यङ् खोङ् ॱसोम्बुल लोङ्गेन् बेत् सीन्न ॱसुङ बेत्।
याकुब् धङ् युहन्नागी येशुल स्युदेन् ज्यब ३५-४५
35ॱनी जब्दीगी भु याकुब् धङ् युहन्ना दी येशु च्याल युङ्न हुबे खोङ्ल चयेलम ङीक्की हुन्दो घन्ड लीङ्गो़दङ् हुगो ॱनङ्रो झ्यी सीन्न स्यी़ब बेत्। 36हीगी लेल्ल खोङ्गी हुबल खीक्की ङल घन्ड झ्यी सीन्न सीच्च्ये ॱनो़गुक्क? सीन्न ढीब बेत्। 37ॱनी हुबे नीज्यरङ्गी तो़त्वङ् च्येम्मे ओ़च्च्यदु ङीत् ॱङी च्यीक् नीज्यरङ्गी ॱये छ्योदु धङ् च्यीक् ॱयेन् छ्योदु दो़च्च्ये यो़प्प ॱनङ्रो झ्यी सीन्न स्यी़ब बेत्। 38हुल येशुगी खीक्की घन्डे केच्च्य च्यीक् लीङ्गो़प्प हुगो ॱस्यो़च्च्ये यो़प्पक्? ङे थुङ्ज्येमे फोप्पनी खीक्की थुङ् छुबेक्क? ङ स्युक्च्येमे बप्तीस्ल खीत् स्युक् छुबेक्क? सीन्न ॱसुङ बेत्। 39हीगी लेल्ल हुब ॱङीबी़ ङीक्की छुबेत् झ्यीब बेत्। ॱनी येशुगी यङ् ङे थुङ्ज्येमे फोप्पनी खीत्रङ्गी थुङ दी त थुङ्गेन् बेत्। ङ स्युक्च्येमे बप्तीस्ल खीत्रङ् स्युक्प दी त स्युक्केन् बेत्। 40ॱनी हीन्न अक्, ङे ॱये छ्योदु धङ् ॱयेन् छ्योदु दो़त्तु ची़च्च्येमे ॱवङ् ङल मीत्। हुगो ॱसी़ ढीक्ल स्यक्न यो़दङ् हुगो दो़क्केन् बेत् सीन्न ॱसुङ बेत्। 41ॱनी हीगी केच्च्य हीगो ॱलोप्टुक् च्युबु दीबे ॱह घोनी, हुब घयेत् पी़न् ॱङीबु दील सीगुक् लङ बेत्।
42हुनी येशुगी ॱलोप्टुक् दीब कुरीक् रोरङ्गी लोल भो़न हुबल ज्यी़त् ॱयोङ्म घयेक्की घुङ्दुरङ् मी चो छ्यीया घयेत् धङ् ॱवङ् च्येम्म घयेक्की ॱवङ् धङ् ॱवङ्यो़त् तोङ्गेन् बेत्। हुगो खीत्रङ्ल ॱस्यो़च्च्ये यो़क्केन् बेत्। 43ॱनी हुगो डस्सीगी लेमु खीत्रङ्गी घुङ्दु झ्यीच्च्ये मीत् युङ्गेन् बेत्। खीत्रङ्गी घुङ्नी ॱसु छ्यीयाल थो़न्ज्ये ॱनो़ब यो़दङ् हुगी ॱयोङ्म कुरीक्ल स्यप्च्यी़ ज्युक् गोगेन् बेत्। 44ॱनी यङ् खीत्रङ् ॱसु छ्यीस्स्योल थो़न्ज्ये ॱनो़ब यो़दङ् हुगो ॱयोङ्म कुरीक्की ॱयोक्पु डस्सी झ्यीत् गोगेन् बेत्। 45घन्ड हीन् सीन्न कोलीमीगी ॱरेबु उक् स्यप्च्यी़ लीन्दु युङ मेम्ब, स्यप्च्यी़ ज्युक्तु धङ् मी गज्येन् ॱलुये ढीक्ल रोरङ्गी ॱरोक् च्यो़दु युङ हीन् सीन्न ॱसुङ बेत्।
ॱसो़ङो़म्ब स्यर्च्योक् च्यीक्की ॱमीक् थोङ्गेल्ल ॱसोङ ४६-५२
46हुनी येशुसो यरीहो सार्ल ॱलीब बेत्। ॱनी यङ् हुनी खोङ्दङ् ॱलोप्टुक् दीब, हुनी मी ॱयोङ्म आक् गज्येन् कङ्ज्यीक्ल थो़न्न डोये यङ्ल ज्यलम्गी छीगन तीमैगी भु बार्तीमै सीक्केन् स्यर्च्योक् ॱसो़ङो़म्ब च्यीक् यो़प्प बेत्। 47ॱनी नासरत्की येशु हुनी मल्ल डोगुक् सीर हुगी ॱह घोनी हुगी ॱवे दाऊद्गी ज्यी़त् येशु ङल ॱङीङ्ज्यी जेत्रो ॱनङ् सीन्न केत् ज्यब बेत्। 48ॱनी उन यो़क्केन् मी ॱयोङ्म दीबे हुल ॱहरक्प दो़त् सीन्न लप्स्य तङ बेत्। ॱनी तङ्न आक्, हुगी हरुङ् केत् छ्यीदु तो़न्न ॱवे दाऊद्गी ज्यी़त् ङल ॱङीङ्ज्यी जेत्रो ॱनङ् सीन्न झ्यीब बेत्। 49हुनी येशु फच्चो़त्तु ठेल्ल देत्न फोगो छुल्ल ठीक्लेत् सीन्न तङ बेत्। ॱनी भो़त्मीय दीब हुगी च्याल फीन्न हुल खोङ्गी रङ् ठीक्लेत् सीगुक्। ह गेस झ्यीन लोङ्ल डो झ्यीब बेत्। 50हुनी हुगी रोरङ्गी ली़गी छ्यी घो़ दी पीक्न स्यक् झ्यीज्ये ॱहोक् लोङ्न येशु च्याल फीम्ब बेत्। 51ॱनी येशुगी हुल ङ खो़त्ल घन्ड झ्यीच्च्ये गो़गुक्क? सीन्न ढीब बेत्। हील हुगी स्यर्च्योक् दीगी रब्बोनी, ङल ॱमीक्की थोङ्ज्ये यो़प्प सो़न ॱनङ्रो झ्यी सीन्न स्युव पुब बेत्। 52ॱनी हुल येशुगी रङ् ज्युक्। रङ्गी छ्य स्यक्प दीगी रङ्गी ॱमीक् थोङ्गेल्ल ॱसोङ बेत् सीन्न ॱसुङ बेत्। हुनी ॱस्यर्च्यक् हुगी ॱमीक् दी थोङ्गेल्ल ॱसोङ बेत्। हुनी हुगो लम्ल येशुगी तीङ्ल टप्नर बेत्।
Valið núna:
मर्कुस् 10: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society