मर्कुस् 7
7
को़न्ज्योक्की क धङ् मी स्यङे टो १-१३
1ॱनी तीङ्ला यरुशलेम्नी फरीसी धङ् छ्यो़डीम्गी चयेलम यरी युङ्न येशुदङ् दल जोम्न यो़प्प बेत्। 2ॱनी येशुगी ॱलोप्टुक् दीबे ठी़ मत् ज्यब, लक्प चङ्बोक्म ॱमत् टी़बल सम सय हुब घयेक्की थोङ बेत्। 3फरीसी धङ् यहुदी ॱयोङ्मा घयेक्की धङ्बी़ पुबु ॱमुमी़ टोल ॱसम्न लक्प टी़न ठी़ ज्यप्न मेन्द, सम मीत् सगो़प्प बेत्। 4ठोम्ल फीन्न हुनी लोक्न युङ्नी इक् ठी़ ज्यप्न टी़न मेन्द, सम मीत् सगो़प्प बेत्। थार फोप्प धङ् सङ् दीत् ॱयज्येत् कुरीक् टी़न ठी़ झ्यीगो़प्प बेत्। 5हीगो झ्यीनी फरीसी दीब धङ् छ्यो़डीम्गी चयेलम दीबे येशुल नीज्यरङ्गी ॱलोप्टुक् हीबे लक्पल ठी़ मत् ज्यबल सम सगुक् न। घन्डल पुबु ॱमुमी़ टोल ॱमीत् ॱसम्गेन् बेक्क? सीन्न ढीब बेत्। 6ॱनी खोङ्गी लेल्ल खीत्रङ् छ्यीलेल नङ् मत् लेबे मी घयेत्ल डीक्पे केच्च्य यशैयागी ॱङो़स्स्यील थो़ङ्गेन् बेत्।
हीगी मी घयेत् हीबे ख दीगीरङ् ङल तो़प्प झ्यीक्केन् बेत्। ॱसीम् दी ङ ङो़ल मीप्प बेत्। 7हीबे ङल छ्यक् छ्यो़प्प पुब हुगो घो ॱमीत् छ्यो़त् बेत्। हीबे मी स्यङे क घयेक्की ढीक्ल मेन्द, ॱमीत् ॱस्यो़क्केन् बेत् सीन्न को़न्ज्योक्की ॱसुङ्न यो़क्केन् बेत्। (यशैया २९:१३)
8खीत्रङ् घयेक्की को़न्ज्योक्की छ्यो़डीम्गी क दी फङ्न स्यक्नी, मी स्यङे टोल ॱसम्गेन् बेत्। 9ॱनी खोङ्गी हुबल खीत्रङ्गी टो हुगोल ॱसम्ज्येल को़न्ज्योक्की ॱनङे क घयेत् दी खीत्रङ्गी खेसी झ्यीन फङ्न स्योक्केन् बेत्। 10मोशागी ॱसुङ्न यो़क्केन् बेत्।
फमल खुच्च्य झ्यीज्यीत्। ॱनी ॱसी़ रोरङ्गी फमल तम् ङेम्ब लप्कुक्क हुगो ॱसो़त् गोगेन् बेत् सीर यो़क्केन् बेत्। (थो़म्ब २०:१२)
11ॱनी हीन्न अक्, खीत्रङ्गी टोल हीन्दुक् झ्यीक्केन् बेत्। मी ॱसी़ च्याल रोरङ्गी फम घन्डे गो़बे खोज्येत् झ्युङ्न लीन्दु युङ्गुक्क हुल भु दीगी हीगो टो़त् ॱमीत् छुबेत्। हीगो ङे को़न्ज्योक्ल पुज्येल ॱमीन स्यक्पे कुर्बान् हीन् 12सीन्न सीक्केन् बेत्। हुन्दुक् झ्यीन फमल झ्यीत् गोगेङ्गी खुच्च्य दी खीत्रङ्गी झ्यीत्तु ॱमीत् ची़क्केन् बेत्। 13खीत्रङ्गी ॱलप्न युङे टो घयेत् दीगी को़न्ज्योक्की ॱसुङ्रप्की क हुगो मीप्पल सोगेन् बेत्। हुगो डस्सीगी लेमु खीत्रङ्गी ॱयोङ्म आक् गज्येन् झ्यीक्केन् बेत्।
ढीप् युङ धङ् मीत् युङे ढीक्ल १४-२३
14हीनी येशुगी मी ॱयोङ्म घयेत् दी इक् रोरङ्गी लोल भो़न खोङ्गी हुब घयेत्ल खीत्रङ् घयेत् हीगो नेन्न ॱह घोव झ्यीज्यीत्। 15ढीप्च्येल्ल सोगेन् दी मी ॱसीम्ल यो़क्केन् बेत्। खनी मल्ल घन्ड स्युन अक्, हुगी मील ढीप्लङ् मीत् युङ्गेन् बेत्। ॱसीम्बे नङ्नी यल्ल घन्ड थो़ङ्गो़दङ् हुगी रोरङ् ढीप्च्येल्ल सोगेन् बेत् सीन्न ॱसुङ बेत्। 16[ॱसी़ आम्ज्योक्की घोगुक्क हुगी हीगो नेन्ज्यीत्।]
17हीनी खोङ् हुगी मी घयेत् दीनी भीन खीम् च्यीक्ल फीन्न हुदु स्युन देप्प बेत्। ॱनी हुदु ॱलोप्टुक् दीबे खोङ्ल हुगी ॱलीङ्दम्गी धो़न् दी घन्ड बेक्क? सीन्न ढीब बेत्। 18हीगी लेल्ल खोङ्गी खीक्की इक् ॱह घोमोङ ॱनी? छ्यीनी मल्ल खोक्ल घन्ड स्युन अक्, हुगी ढीप् युङ् ॱमीत् ॱस्यीगेन् बेत्। हीगो ॱस्यो़च्च्ये मीप्प ॱनी? 19हुगो ॱसीम्ल मेम्ब, ढोप्पल स्युन, हुनी आक्पल थो़न् डोगेन् बेत् सीन्न ॱसुङ बेत्। हुन्दुक् झ्यीन खोङ्गी समे ढङ्ल ठी़ झ्यीत् मीत् गो़ब कुरीक् चङ्बोक्मल सो़ब बेत्।
20खोङ्गी हरुङ्द हुब घयेत्ल मी ॱसीम्बे नङ्नी घन्ड थो़ङ्गो़दङ् हुगी रोरङ्ल ढीप् युङ्गेन् बेत्। 21ॱसीम्बे नङ्नी ॱसम्ल ङेम्ब तोङ्गेन्, दयम् झ्यीक्केन्, की़न्नक् कुगेन्, मी ॱसो़क्केन्, 22ॱयोङ्दङ् ङीब झ्यीक्केन्, लोप् झ्यीक्केन्, मीङेन् झ्यीक्केन्, ॱयोज्यी़ ठम्ज्यी़ झ्यीक्केन्, छ्येल ॱनक्सी झ्यीक्केन्, ठदोक् झ्यीक्केन्, ॱमो़म्बी़त् तोङ्गेन्, ज्यीम्गेत् ॱस्यो़क्केन्, घुलोक् थप्केन् धङ् 23हीन्दुक् झ्यीबे आक्पागी ढङ् थो़ङ्गेन् बेत्। ॱनी हुगी क हस्सो़त् मी दी ढीप्च्येल्ल सोगेन् बेत् सीन्न ॱसुङ बेत्।
लुङ्ब ॱयोङ्गी भुमु च्यीक्की छ्य गस्सी स्यक्प २४-३०
24हीनी येशु हुनी थो़न्नी टायर् सार्की लुङ्बल फीम्ब बेत्। ॱनी हुदु ॱलीत्नी खोङ् खीम् च्यीक्ल स्युन गोङ बेत्। ॱनी गोङ्न अक्, खोङ् गोङ् ॱमत् छुब बेत्।
25हुगी लुङ्बे भुमु ढोङ्गी आम च्यीक्की येशु उन दुक् सीर ॱह घोनी ॱस्यर्च्यक् हुगो खोङ् च्येल्ल युङ्न हुनी खोङ्ल छ्यक् छेब बेत्। हुगी ढोङ्गी आमे भुमु दील ॱनो़प्प स्यीलोक्पोक्म च्यीक् स्यीन्न यो़प्प बेत्। 26हुगो यहुदी मेम्ब, सुरोफोनीसीया लुङ्बल दो़क्केन् ज्यी़त् ॱयोङ्गी मी हीङ्गो़प्प बेत्। हुगी येशुल ङे भुमुल ॱनो़प्प अयेक्प स्यीन्न यो़त्। हुगो तो़न्न दीत्रो झ्यी सीन्न स्युव पुदु युङेन् झ्यीब बेत्। 27ॱनी खोङ्गी लेल्ल भीजल तीच्च्येमे सम ढोप्ची कील पुर्न तीच्च्ये मीत् युङ्गेन् बेत्। ॱअल हुगो भीजल एल्ला डङ् डङ् तीत् गोगेन् बेत् झ्यीब बेत्। 28ॱनी हीगी लेल्ल हुगी ढोङ्गी आम दीगी चोव ज्यीन्दक् नीज्यरङ्गी ॱसुङ्गेन् हुगो खुङ्देन् बेत्। ॱनी हीन्न अक्, भीज घयेक्की सेबे फीरुक् च्योक्चीनी मल्ल छर्नर घयेत् दी क की इक् डुन सगेन् बेत् झ्यीब बेत्। 29ॱनी हुल खोङ्गी रङ् ज्युक्। रङ्गी झ्यीबे तम् दीगीरङ् रङ्गी भुमु च्यानी ॱनो़प्प अयेक्प दी थो़न्न ॱसोङ् छर बेत् सीन्न ॱसुङ बेत्। 30हुनी हुगो रोरङ्गी खीम्ल लोक्न फीन्नी भुमु दी च्यानी ॱनो़प्प दी थो़न्न ॱसोङ्न, रोरङ् नासल ना देप्पदङ् ठेप्प बेत्।
घुव ओ़र्रीय च्यीक् ढक्पे तम् ३१-३७
31हुनी येशु हुगी टायर् लुङ्ब दीनी थो़न्नी सीदोन् धङ् डेकापोलीस् लुङ्बे घुङ्नी छुल्ल झ्यीनी गालीलागी छो झ्यीस्स दील लोक्न युङ बेत्। 32ॱनी हुदु मी आम्ज्योक् ओ़न्नर तम् गन्दीक्म लप् ॱमीत् छुगेन् च्यीक् खोङ् च्येल्ल मी यरीगी ठीक्न युङ बेत्। युङ्नी, हुबे खोङ्ल नीज्यरङ्गी हील छ्यक्वङ् केन ॱनङ्रो झ्यी सीन्न स्युव पुब बेत्। 33हुनी येशुगी हुगी मी दी फच्चो़त् च्यीक्ल ठीक्न खोङ्गी हुगी मी दीगी आम्ज्योक् ॱङीबु दील जुक्मु चुन छ्युमक् कब बेत्। हुनी हुगी च्यीला दील खोङ्गी रेक्प बेत्। 34हुनी खोङ्गी इगी तेङ् यी़ ङो़ल ॱमीक् तेन घी़रीम ॱस्योर्न हुगी मी दील इप्फाता सीन्न ॱसुङ बेत्। हीगी धो़न् दी ॱसेङ्ल ज्युक् सीक्केन् बेत्। 35हीनी हुगी मी दीगी आम्ज्योक् दी भीन खुर्, ख दी इक् ॱसेङ्न खुर् झ्यीन तम् ॱसेबोक्म लप्केल्ल ॱसोङ बेत्। 36हीनी येशुगी हुगी मी घयेत् दील हीगी केच्च्य हीगो मी ॱयोङ् ॱसुल आक् ॱमत् ॱस्यो़च्च्यीत् सीन्न गन्दीक्म ॱङाब बेत्। ॱनी खोङ्गी हरुङ् ॱमत् ॱस्यो़त् सीन्न ॱङान आक्, हुबे हरुङ् मङ्दु ॱस्येप्प बेत्। 37ॱनी मी घयेत् दी कुरीक् हुल गन्दीक्म ॱह लेसी झ्युङ्न, हुब घयेत् खोङ्गी ले घयेत् दील गस्सी छोर्न आम्ज्योक् ओ़न्नर घयेत् घोगेल्ल धङ् तम् लप् ॱमीत् छुगेन् घयेत् लप् छुगेल्ल सोगुक् सीन्न झ्यीब बेत्।
Valið núna:
मर्कुस् 7: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society