Luke 15
15
1Oˑnă̱h' dosˑgă̱'o̱h heˑo'no̱ntˑhĭs'do̱h haaˑyaħ'daˑdeħ', gaˑgweeˑgo̱h' naˑdii'wĭsˑde'oˑees, kuh noˑdii'wa'neħˑaaˑgo̱h, neħ' na'o̱ˑwa̱n'diˑwat'ho̱nˑdaaˑdă̱ħ.
2Oˑnă̱h neh', Pharˑiˑsees, kuh ne' shaˑgo'diiˑyaˑdo̱o̱ˑnih' waˑoˑwa̱nˑdwĕn'no̱ħˑdih, hoˑnă̱ă̱', Neħˑnă̱ˑgă̱ă̱' ho̱ˑgweh' haˑgo̱o̱ˑgwʋs' noˑdii'wa''neħˑaaˑgo̱h, neħ' kuh shaħˑgaat' de'ă̱ˑno̱nˑdo̱o̱s.
3Oˑnă̱h' neħ waa'go̱sˑnyeh'dahˑgwă̱ħ' nă̱ˑgă̱ă̱' des'gaˑyă̱ˑo̱nˑdăăhˑgo̱h, haˑwă̱ă̱',
4So̱' naħˑot' no̱'gweh heˑniˑswaˑdiih', sgat' deˑwă̱ħ'nyaħˑeeh niˑo'no̱sˑgwaaˑyă̱ħ' ne deˑyòˑdiˑno̱ħ'gă̱ˑo̱nt, sgaˑyaħ'daat giħˑshă̱h aa'oˑno̱s'gwahˑdo̱o̱ħ, tă̱ħ'ă̱h gă̱h ta'atˑgah ne' dyòhˑdo̱o̱h niˑwă̱'no̱sˑhă̱ă̱h dyòhˑdo̱o̱h' kuh sgaˑeħ he'o̱ˑweh' deħ'eˑno̱ˑgeeˑnyo̱ħ, neħ' a'aˑyaħ'dihˑsaakˑhaħ' noˑyaħ'dahˑdo̱ħ'o̱h, heˑniˑyòòˑweħ' hă̱sˑhaaˑgă̱h?
5Da neħ' kuh noˑnă̱h' sa'aˑgă̱ħ, haaˑnă̱h'saħˑgĕh da'ăˑdă̱ħ shoˑdo̱h'ho̱ˑo̱nˑdyeħ.
6Neħˑhuh' noˑnă̱h' sa'aˑyo̱ħ, hwa'go̱ˑno̱o̱kˑho̱o̱ħ', waˑgo̱ˑyaħ'deˑo'eek noˑdă̱'oħˑsho̱ħ kuh neh' shaħˑgaat' hă̱ˑnă̱'no̱hˑsaˑneˑgă̱s'yo̱ħ ha'go̱ˑyă̱ˑo̱h'seeh shaħˑgaat' heˑdwa'do̱hˑho̱'ă̱h; neħ să̱ħ'ă̱h, ne swaˑgeeˑgă̱ă̱h' nakˑno̱s'gwahˑdo̱'niˑno̱ħ ne deˑyò'diˑno̱ħ'gă̱ˑo̱nt.
7Neħ' noħˑgwă̱'o̱s, neħ' ne siˑgwaa' naeh niˑdyaˑwĕnˑdetˑgăăˑdă̱s ne gă̱ˑo̱'yaħˑgĕh ne jo̱ˑgweħ'daat do̱ˑsa'yă̱ħˑni'go̱ˑă̱nˑdeeˑniħ ne goˑi'waˑneħ'aˑgo̱h, naeh' heˑniˑyòħ'dă̱ă̱h ne' dyòhˑdo̱o̱ niˑwʋs'hă̱ă̱h dyòhˑdo̱o̱ kuh sgaˑeħ niˑă̱ˑno̱nˑdiih no̱ˑgweh, ne tgaˑi'waˑyeeˑiħ, tă̱ħ'ă̱h iˑgă̱ă̱' daħˑdeˑyoˑdo̱ˑă̱nˑjoˑo̱h ne do̱o̱'sa'ă̱ˑnă̱ħˑni'go̱ˑă̱nˑdeeˑniħ.
8Neħ' giħˑshă̱h, so̱' naħˑot ne yaˑgo̱o̱ˑgweeh', wʋsˑhă̱ă̱ niˑyò'wĭsˑdaaˑgeeh' noˑwĭs'daˑnooˑo̱ħ' ni'yaˑgooˑyă̱ħ, sgat' giħˑshă̱h ă̱ˑya'gòhˑdo̱o̱ħ, tă̱ħˑă̱h gă̱h neh, oˑnă̱h' sho̱ kuh aˑyeˑjĭs'dooˑdă̱ħ, a'yesˑgăăˑwaak ne gaˑno̱h'so̱o̱t, neħ' kuh naˑgwʋs'' ă̱ˑya'ihˑsaakˑjih' heˑniˑyòòˑweħ hă̱ˑjeeˑgă̱ħ?
9Neħ kuh noˑnă̱h' sa'yeeˑgă̱ħ, waˑo̱'wa̱ˑdi'yaħˑdeˑoˑeek ne goˑdă̱'oħˑsho̱ħ, kuh neh', dă̱ˑnă̱ˑno̱h'saˑne'gă̱sˑyo̱ħ, gaˑwă̱ă̱, Shaħˑgaat heˑdwa'do̱hˑho̱ˑă̱h; neħ să̱ħ'ă̱h ne swaˑgeeˑgă̱ă̱h' naˑgah'do̱ˑni'no̱ħ.
10Neħ ha'eħˑgwah noħˑgwă̱'o̱s, Neħ ha'eħˑgwah nă̱nˑdyaˑwĕnˑdet'găăˑdă̱h' heˑtă̱ˑniħˑdyo̱ħ noˑo̱'yaħˑgeˑoˑno̱ħ'shăħ Na'wĕnˑniˑyòħ ne jo̱ˑgweħ'daat dă̱ˑjă̱ħˑniˑgo̱'ă̱nˑdeˑniħ' ne go̱ˑi'waˑneħ'aˑgo̱h.
11Neħ ne'aaˑwă̱ă̱h', Neħˑnaaˑyaħ'daˑdooˑgă̱ă̱h' no̱'gweh, dekˑnii deˑo'deħˑdo̱k' de'iˑjiˑno̱h;
12Da' oˑnă̱h noos'to̱h haˑwă̱'o̱hˑseeh nòòħ'nih, Haħˑni'ih', daˑgo̱h niiħ' nas'hă̱ˑno̱ˑnyʋs'hăħ heˑniˑyò'iˑwaħ niiħ ă̱ˑwa̱'gaˑdyaħ'gă̱ħ. Oˑnă̱h' waˑgoˑyaħk'ho̱ˑo̱s he'o̱ˑweh' niˑo̱h'hehˑgo̱h.
13Neħ' ne' dòhˑgaaħˑah' sho̱ no̱ˑsaˑyòòˑdaaħ' oˑnă̱h' noos'to̱h', gaˑgweeˑgo̱h' waˑe'oˑeek, neħ' ne deˑot'haah'gwă̱h, weeˑă̱h' dyo̱ˑă̱nˑjaˑdeħ' heˑaˑweeˑno̱o̱h, neħˑhuh' heˑo'dă̱ħˑdaah' he'niˑoˑyă̱nˑdʋk, neħ daˑga'iˑo̱o̱ˑniħ, heh oħˑdăăħˑeeh' sho̱ niˑoˑdye'o̱ˑdyĭĕħs ho̱'heˑdyeħs.
14Neħ huh dih' noˑnă̱h gaˑgweeˑgo̱h' shaa'dă̱ħˑdaaħ', neħ ne daˑwa'deħˑhaasˑdo̱o̱ħ' waħˑaˑgoˑdo̱s'weħˑda'no̱o̱s he'yo̱ˑă̱nˑjaˑdeħ' ne' neħˑhuh; oˑnă̱h' oħˑwah'saˑwă̱ħ' noħˑdwa'do̱ˑă̱nˑjo̱h haˑyaħ'daˑdeħ.
15Oˑnă̱h' hohˑdă̱nˑdyo̱o̱h' neħ haħˑdoo'no̱n'diħˑheħ'o̱h, naˑno̱'geħˑo̱ˑweh' ne' neħˑhuh' dyo̱'ă̱nˑjaˑdeħ; neħˑhuh' hwa'oˑhaħt hotˑă̱'yă̱nˑdo̱ħ, gwĭsˑgwis' ă̱ˑo̱ˑno̱nˑdă̱'o̱o̱k.
16Neħ' toˑgaaˑyă̱s' sho̱ ne' neħ a'aˑdet'gwĭsˑdiiħ' nòtˑtgo̱'wa̱ħˑsaˑaħ' ne waaˑdiis' ne gwĭsˑgwis. Neħ ne deħˑso̱o̱ˑgaaħ' no̱ˑgweh' a'o̱ˑwa̱a̱ˑyo̱ħ.
17Da neħ noˑnă̱h' saa'daħˑwăăˑdook, haˑwă̱ă̱', Doˑgwah' no̱o̱' naeh niˑoh'haħˑshăăˑyă̱ħ' naaħ'nih, ne neħˑhuh' naeh haħˑdeˑgaˑyeeˑiħ heˑniˑoˑdiˑăh'gwaˑyă̱ħ, oˑgweeˑnyo̱o̱h' kuh na'ă̱ˑno̱nˑdwă̱nˑdet, da neħ niiħ nă̱nˑdaħ' a'giiˑyòs!
18Neħ' dih ne' dă̱kˑdaħt, haħˑnii'neh ă̱sˑgat'go̱nˑdʋk, neħ' neh', ă̱ˑe'yă̱ˑos', Haħˑni'ih', neħ' noħˑgi'waˑneeħˑaak ne gă̱ˑo̱'yaħˑgee'gwaa, kuhˑhee'seeˑgat,
19Tă̱ħ'ă̱h dih heˑniˑdwaˑgaˑdoħk', taħˑdes'gaˑyeeˑiħ' naˑyo̱ˑgyaasˑheek' neħ' ho'aaˑwak; neħ dih' sho̱ neh, sgaat' aˑga'do̱ħˑtaak', haˑdi'yaħˑdaaˑdeħ' ne saˑhaħ'shăħ'sho̱ħ.
20Oˑnă̱h detˑho'daħˑo̱h, neħˑhuh' hesˑha'weˑno̱o̱h' heh' tă̱ħˑdyo̱ħ nooħ'nih. Ahˑso̱h dih' sho̱, weeˑă̱h' daˑeħ, neħ ne' waˑooˑgă̱ħ' nooħ'nih; neħ noˑdă̱ă̱s'o̱h, oˑnă̱h' deˑo'ă̱hˑdaaˑdo̱h, haˑnyaħ'saħˑgĕh hwaˑaˑyeeˑno̱o̱ħ, oħˑto'gwaˑyo̱o̱ħ' gwaħˑhuh.
21Oˑnă̱h' naakˑsaħ'goˑwaah' haˑwă̱'o̱hˑseeh, Haħˑni'ih, neħ noħˑgi'waˑneeħˑaak ne gă̱ˑo̱'yaħˑgee'gwaa, neħ kuh hee'seeˑgat, tă̱ħ'ă̱h dih taħˑdes'gaˑyeeˑiħ' heˑniˑdwaˑgaˑdoħk' naˑyo̱ˑgyasˑheek neħ' hoˑaaˑwak.
22Neħ' dih nooħ'nih haˑgo̱ˑyă̱ˑo̱h'seeh noˑhaħ'shăħˑsho̱ħ', Daˑji'aah neh, si'gwaa he'niˑwiˑyòòh' nasˑyo̱'nyasˑhăħ, neħ ă̱sˑhe'swasˑyo̱o̱ˑnyaħt; neħ kuh nă̱sˑheˑswă̱ħˑnyaaˑhaaħ, dă̱sˑhe'swahˑsoˑweek' kuh;
23Neeħ' gwaħˑhuh' ă̱nˑdi'swaˑaaħ', ne' wahˑsă̱s'yo̱o̱ˑniih' ne dyòh'hosˑgwaaˑo̱nt' otˑhwas'aˑah, ă̱ˑswaaˑnyòħ' kuh; neħ' ă̱ˑdwa'dekˑho̱o̱ˑniħ', ă̱ˑdwaˑdă̱nˑdet'găăˑdo̱o̱ħ' kuh.
24Neħ să̱h'ă̱h nă̱ˑgă̱ă̱' heˑaaˑwak' haˑweeˑyo̱o̱'no̱ħ, neħ dih neh, shoˑdo̱h'heeˑdo̱h, hoˑyaħ'dahˑdo̱ħ'o̱ˑno̱ħ, neħ ne' sho̱ˑwa̱ˑgă̱ă̱h. Oˑnă̱h' waˑă̱'no̱hˑsaaˑwă̱ħ' ne' waˑă̱ˑno̱nˑdă̱n'detˑgăăˑdo̱o̱ħ.
25Da neħ', ne' taˑgoˑwaˑnă̱h' no'aaˑwak, gaħˑă̱ă̱'go̱o̱h naeh' itˑheħs; neħ' noˑnă̱h' do̱nˑdaah'dă̱nˑdiħ', oˑnă̱h' dòsˑgă̱'o̱h nisˑheħs heˑniˑga'no̱hˑsoot, neħ' ne' waˑă̱ˑno̱'o̱o̱k deˑwaatˑgwă̱h' kuh.
26Neħ ne waˑo'no̱o̱k shaˑyaħ'daat naa haħ'shăħ, hoˑda'o̱nˑdo̱s'o̱h ne' naħˑot' gă̱nˑdo̱h' nă̱ˑgă̱ă̱' heˑniˑyòˑdyeˑă̱h.
27Neħ' naˑwă̱'o̱hˑseeh', Neħ ne' shoˑyo̱o̱h' ne deˑja'dă̱ă̱ˑno̱nˑdeeħ; neħ' neh, hoˑnyòòh nee' yaħˑnih, ne' wahˑsă̱s'yo̱ˑni'no̱ħ ne dyòh'hosˑgwaˑo̱nt' otˑhwas'aah, neħ gaˑi'o̱ˑnih, heh, sgă̱ˑno̱ħ' tiˑo̱h'hiˑyòòh', sgă̱ˑno̱ħ' kuh to̱ˑsaa'yo̱ħ.
28Oˑnă̱h' waˑo̱'no̱ħˑkwă̱h, tă̱ħˑă̱h' kuh deħˑoˑgweeˑnyo̱o̱h' neh, ha'aˑyo̱ħ; neħ' dyòˑi'waħ oˑnă̱h' toˑya'gă̱ħˑo̱h nòòħˑnih neħ ne waˑoˑdo̱ˑe'syo̱hˑgwă̱ħ.
29Neħ ne detˑhos'nyeħˑo̱h, haˑwă̱'o̱hˑseeh nooħ'nih, Satˑga'ă̱ˑo̱h, neħ nă̱ˑgă̱ă̱ weeˑsòħ' yòsˑhăăˑgeeh o'nă̱h, iis' go̱ˑyat'ho̱nˑdeħ, neħ kuh' ne deˑwă̱nˑdo̱h' ah'so̱h, deħˑa'giiˑwăăˑjo̱ħ' heˑniˑsaˑiˑwih'saħˑho̱ħ; neħ dih ne tă̱ħ'ă̱h deˑwă̱nˑdo̱h' ahˑso̱h deħˑsgaaˑwiih ne gaˑyaħˑdaˑgă̱s' otˑhwas'aah, neħ naˑyòˑgwe'nyo̱ˑo̱o̱k' nă̱ă̱ħ' iiħ aˑyaˑgwaˑdă̱nˑdetˑgăăˑdo̱o̱ħ' no̱ˑgwaˑdă̱ˑoħ'sho̱ħ;
30Neħ gwaa', heˑniˑyòs'nooˑweħ' noˑnă̱h' sho̱ˑsaa'yo̱ħ nă̱ˑgă̱ă̱' hes'haaˑwak, nă̱ˑgă̱ă̱ neh, hoˑi'wahˑdo̱ħ'do̱h neh, so̱ˑheh'go̱h, neħ dyòˑdi'waħ no̱ˑno̱nt'geˑo̱ħ, waˑeh'siˑyòs', ne' wahˑsă̱sˑyo̱o̱ˑnii dyòh'hosˑgwaˑo̱nt' otˑhwas'aah.
31Neħ' naˑwă̱'o̱hˑseeh, Go̱'a̱ˑwa̱k, dyòtˑgo̱nt' niis' de'dyaˑdiih, gaˑgweeˑgo̱h' kuh, heˑniˑyo̱'o̱h' aˑgyă̱ħ' iis' saa'wă̱h.
32Neħˑhuh'jih dih naˑeˑdwaˑdă̱n'detˑgăăˑdo̱o̱ħ, a'yo̱ˑgyo̱ħ'esˑhaħ' kuh; neħ să̱ħ'ă̱hˑnă̱ˑgă̱ă̱ deˑja'dă̱ă̱ˑno̱nˑdeeħ' haˑweeˑyo̱o̱'no̱ħ, sho̱ˑheħ' oˑnă̱h, hoˑyaħ'dahˑdo̱ħ'o̱ˑno̱ħ, oˑnă̱h nee'waħ sho̱'wa̱a̱ˑgă̱ă̱h.
Valið núna:
Luke 15: SEE
Áherslumerki
Deildu
Afrita
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.