Luke 14
14
1Da neħ' heˑniˑya'wă̱ħˑo̱h he'no̱ħˑweeh neħˑhuh' hwa'aˑyo̱ħ' hoˑno̱h'soot shaˑyaħˑdaat ne tă̱ˑno̱h'do̱ˑo̱ħ ne Pharˑiˑsees, naˑah'gwaak naˑwĕnˑdaˑdo'gă̱hˑdo̱ħ'gĕh, neħ naˑgwʋs' ho̱ˑwa̱ntˑgaˑă̱''o̱sˑo̱h.
2Da jatˑga'ă̱ˑo̱h, neħ' naˑyaħ'daˑdooˑgă̱ă̱h no̱o̱'gweh neħˑhuh hă̱ħˑdyo̱ħ' he'aˑgat, neħ' noˑdet'gwĭsˑdă̱ħ'gwă̱h, oˑneeˑgaat' dyoˑi'waħ.
3Oˑnă̱h' ne Jeˑsus tosˑnyeħ'o̱h, haˑgo̱s'nyeħˑseeh ne gaˑya'nesˑhăħ hă̱ˑno̱nˑdiˑo̱ˑnyaˑnih, kuh neˑPharˑiˑsees, haˑwă̱ă̱', Neħ' gă̱h ne gaˑyaˑnesˑhăħˑgĕh nă̱nˑjo̱ˑdaˑdeeˑjă̱ħt' naˑwĕnˑdaˑdo'gă̱hˑdo̱h' wă̱ˑnĭs'hăˑdeħ?
4Neħ ne' taˑă̱ˑno̱nˑdyeeħ' sho̱. Oˑnă̱h' waˑoˑyeeˑno̱o̱ħ' saˑoˑjă̱ħt' kuh, shotˑgaħ'wă̱h kuh;
5Oˑnă̱h' doˑsaa'goˑwă̱ˑno̱ħ'saˑgòħ, haˑwă̱ă̱', So̱' naħˑot' he'niˑswaaˑdiih', oˑya'daˑgo̱o̱h' giħˑshă̱h' hă̱ˑga'yaħˑdă̱ħt noos'heˑnă̱ħ' oˑno̱ħ'gaˑes, neħ giħˑshă̱h ne gă̱ˑo̱nˑdaˑnă̱h'gwih deˑwa'o̱hˑdees, da neħ' gă̱h ne tă̱ħ'ă̱h noˑnă̱h' sho̱' kuh naˑwĕnˑdaˑdo'gă̱hˑdo̱ħ'gĕh to̱o̱'sahˑsyaħ'daˑdah'gòh?
6Da neħ' ne tă̱ħˑă̱h aeħ' deˑoˑdiˑgwe'nyo̱sˑo̱o̱ħ ne do̱'saˑo̱ˑwa̱ˑwă̱'no̱ħˑsăăˑgòħ nă̱ˑgă̱ă̱' no̱ħˑoˑiˑoħ'dă̱ħˑsho̱ħ.
7Oˑnaeħ' desˑhoˑyă̱ˑo̱nˑdăăhˑgo̱h' he'aˑdiˑgat, no̱ˑwă̱ˑno̱o̱'gaħˑdo̱ħ, noˑnă̱h' shaˑyaˑno̱ħt' he neħ gă̱ă̱s haˑdi'no̱kˑdăăˑgwʋs' ne gaˑno̱k'daˑnoˑo̱ˑnyo̱ħ'; haˑgo̱ˑyă̱ˑo̱h'seeh,
8Neħ noˑnă̱h' so̱ˑgaaħ' no̱'gweh oħˑshe'swaˑo̱ˑgaħt' neħˑhuh' hă̱ˑsweeħ' he'o̱ˑweh' ă̱ntˑho̱ˑwa̱ˑdi'nyakˑdă̱ħ, să̱ˑno̱h' neħˑhuh' hă̱ˑswaˑdyă̱ă̱h' naˑgwʋs' heħˑtgă̱h dyoˑno̱k'daˑyă̱ħ, dyă̱ˑgwah' sho̱ siˑgwaa' he'niˑaˑo̱ˑgweħ'daˑnăă'gwat niis' heˑniˑyòħ'dă̱ă̱h neħˑhuh' ă̱ˑo̱ˑwa̱ˑno̱k'dăăˑgwʋs;
9Da neħ' haˑyaħ'daˑdeħ ne yă̱ă̱'no̱o̱ˑgo̱h kuh ne shaˑyaħ'daat, neħˑhuh' ă̱ˑo̱ˑyo̱ħ', ă̱ˑyă̱'o̱s, Hesˑno̱k'dotˑhas' nă̱ˑgă̱ă̱' ho̱'gweh; oˑnă̱h' ne' neħ ă̱hˑsa'deˑă̱h noˑnă̱h' neħ hă̱chˑha'dahˑno̱k'dăăˑgwʋs' naˑgwʋs' ehˑdaħ'gĕh.
10Neħ gwaa', noˑnă̱h' ă̱ˑdye'să̱ˑno̱o̱k neħˑhuh' ă̱hˑsaaˑdyă̱ă̱ħ' naˑgwʋs' ehˑdaħˑgĕh dyoˑno̱k'daˑyă̱ħ; neħˑhuh dih', noˑnă̱h' ă̱ntˑheħ' neˑyă̱ă̱'no̱o̱ˑgo̱h oˑgweˑnyo̱o̱h' nă̱ˑyă̱'o̱s, Gyaˑdă̱ă̱ˑooh', heħtˑgă̱h' satˑhis; deˑyeˑsaˑyaħ'daˑno'o̱hˑgwaa'no̱o̱ħ, dih', nă̱ă̱ħ' iis he'aˑdiiˑgat ne' shaħˑgaat' dă̱ˑswaˑdo̱nt.
11Neħ să̱ħ'ă̱h neħ, so̱n'diħˑgwa'naħˑot heħtˑgă̱h' ă̱ˑoˑdaˑdo̱'niˑaak, ehˑdaħ'gĕh ă̱sˑho̱'wa̱ˑyo̱o̱ˑniħ; neħ' kuh neh, ehˑdaħ'gĕh ă̱ˑoˑdaˑdo̱'niˑaak heħˑtgă̱h' ă̱ˑo̱'wa̱ˑis.
12Oˑnă̱h' ha'eħˑgwah haˑwă̱'o̱hˑseeh no̱ˑdaˑni'no̱ˑgo̱h', Neħ' gă̱ă̱s' noˑnă̱h' ă̱hˑsekˑhwaˑă̱ħ naaħˑdeˑwă̱ˑnĭsˑhăˑă̱h neħ giħˑshă̱h nòħˑgăăs'ah, să̱ˑno̱h' neh hă̱sˑhe'no̱kˑho̱o̱ħ neˑswaˑdă̱'oħˑsho̱ħ, kuh ne deˑswa'dă̱ˑno̱nˑdeeħ, kuh ne sheˑno̱o̱kˑsho̱ħ, kuh noˑno̱nt'gaˑno̱o̱ˑniħs' deˑswă̱'no̱hˑsaˑneˑgă̱s'yo̱ħ; dyă̱ˑgwah' să̱ħ'ă̱h sho̱ ă̱ˑje'sakˑdaħs' nă̱ă̱ħ' iis neħ' dă̱ˑswa̱n'diˑwaħ'saˑgwat' heh' syaħˑdaaˑdeħ.
13Neħ gwaa', noˑnă̱h' ă̱hˑsek'hwaˑă̱ħ, neħ hoħˑsheˑno̱o̱k no'niˑdă̱ă̱s, hoˑdi'yaħˑdaˑjiˑyòħ, hoˑdih'soħkˑhaħ' kuh ne deˑaˑdiˑgah'gweeˑgo̱h.
14Da neħ' ă̱ˑsa'dăħˑswi'yòħˑheħt; neħ să̱ħˑă̱h naeh, ne tă̱ħ'ă̱h deˑo'diˑgweeˑnyo̱o̱h' ne do̱'saˑdii''waħˑsăăˑgòħ heh' syaħˑdaaˑdeħ; neħ să̱ħ'ă̱h naeh neħˑhuh haħˑdă̱ˑjiˑsa'diiˑwaħˑsăˑgwʋs' noˑnă̱h' dă̱ntˑhă̱'no̱ntˑgă̱'o̱hˑso̱o̱ħ neh' taˑdi'waˑyeeˑiħ.
15Da neħ' noˑnă̱h' shaˑyaħ'daat he'niˑă̱ˑno̱nˑdiih ne' shaħˑgaat deˑoˑno̱nˑdo̱nˑdo̱h wa'o̱o̱k nă̱ˑgă̱ă̱' no̱ħˑo'iˑoħ'dă̱ħ, haˑwă̱'o̱hˑseeh, Hoˑdă̱ă̱ˑo̱h' ne' neħ, ne' neħˑhuh' hă̱sˑhaah'gwaak he'o̱ˑweh' tă̱ˑno̱h'do̱ˑo̱ħ'shăˑgwĕnˑniˑyòħ' Na'wĕnˑniˑyòħ.
16Oˑnă̱h' haˑwă̱'o̱hˑseeh, Neħ' naaˑyaħ'daˑdooˑgă̱ă̱h' no̱o̱'gweh, waak'hwaˑă̱ħ, aˑgwʋs' hoħˑdwa'doħkˑdă̱ħ, gotˑgaħ'deħ kuh hwa'go̱ˑno̱o̱kˑho̱o̱ħ;
17Neħ' kuh noˑhaħ'o̱h noˑnă̱h' shaħˑga'eeħ heˑniˑjo̱n'dekˑho̱ˑnih noħˑgăăs'ah, neħ' nă̱'o̱ˑgo̱ˑyă̱'o̱s no̱ˑwă̱ˑno̱o̱'gaħˑdo̱h', Gaaˑoħ' daˑsweet', oˑnă̱h' să̱ħ'ă̱h haħˑdeˑyo'iˑwaˑgeeh' ga'yă̱ˑnă̱nˑdaħ'o̱h.
18Neħ' oˑnă̱h ne gaˑgweeˑgo̱h' shaħˑta'diħˑni'go̱ˑă̱nˑdă̱h' waˑă̱'no̱hˑsaˑwă̱ħ waˑă̱'no̱nˑdo̱'eˑsyo̱k no̱ˑsaˑo̱ˑwă̱ˑno̱o̱tˑgaħ' sho̱ ho̱'wă̱ˑno̱o̱'gaħˑdo̱h. Neħ ne' toˑdye'ă̱hˑdo̱h haˑwă̱'o̱hˑseeh, Neħ' niiħ nakˑheh'daˑniiˑno̱ħ, gaˑi'waˑyă̱n'dahˑgo̱h dih nă̱ˑgat'gatˑhwah'saħ; oħˑgo̱ˑyaˑdo̱ˑeˑsyo̱h'gwă̱ħ dih, ho̱ˑgyaħ'dohˑdaˑah' sho̱ niiħ.
19Oˑyaħ' kuh ne' waˑă̱ħ, Neħ' ne wĭs' niˑyò'wă̱ħˑgăˑgeeh' noˑno̱ħ'gaˑes ak'niˑno̱ħ; neħ' dih, ne' neħˑhuh hă̱ˑgeet', ă̱ˑgaˑdă̱ˑno̱ħ'geeˑăt, ă̱kˑno̱sˑgwakˑdo̱o̱h, neħ dih nòħ'go̱ˑyaˑdo̱'eˑsyo̱ħ gwă̱ħ ho̱ˑgyaħ'dòhˑdaˑah' sho̱ niiħ.
20Oˑyaħ' kuh ne' waˑă̱ħ, Neħ' niiħ naˑge'nyakˑheħ'o̱h; neħ' dih gaˑi'o̱ˑnih' deħˑaaˑo̱h' o̱n'daˑgeħ.
21Oˑnă̱h' shoˑyo̱s'o̱h naaˑhaħ'shăħ neħ' ne' waˑo'oˑwiħ noˑwĕnˑniˑyòħ' nă̱ˑgă̱ă̱' no̱ħˑo'iˑoħ'dă̱ħˑsho̱ħ. Oˑnă̱h' naˑno̱h'saˑgwĕnˑniˑyòħ oħˑtaˑdeˑnyă̱ħ'doħk, waa'wă̱ˑo̱s nooˑhaħ'shăħ, Deħˑsaħˑsăˑi'yă̱h' sah'dă̱nˑdih neħˑhuh' hă̱hˑseeħ' he'deˑyoˑno̱nˑdaˑgwĕnˑdeeˑnyo̱ħ, kuh' heˑdeˑyòħ'ă̱ă̱ˑgwĕnˑdeeˑnyo̱ħ, neħ' dasˑheeˑyo̱ħt' no'niˑdă̱ă̱s, kuh noˑdi'yaħˑdaˑjiiˑyòħ, kuh noˑdih'soħkˑhaħ, neħ' kuh ne' deˑaˑdiˑgah'gweeˑgo̱h.
22Neħ ne'aaˑwă̱ă̱h' naaˑhaħ'shăħ, Syaħˑdaˑgwĕnˑniˑyòħ, neħ' naeh neh, oˑnă̱h' neħˑhuh no̱ħˑo̱o̱ˑwă̱h' heˑniˑsa'iˑwih'saħˑo̱h, neħ' dih neh, ahˑso̱h', o'no̱o̱kˑdoot.
23Oˑnă̱h' Naˑyaħ'daˑgwĕnˑniˑyòħ' haˑwă̱'o̱hˑseeh naaˑhaħ'shăħ, Neħˑhuh hoħˑseeh' ho'aˑdeˑnyo̱ħ noˑa'asˑdă̱ă̱ħˑsho̱ħ, gaħˑă̱ă̱'go̱o̱sˑho̱ħ' gwaħˑhuh, haˑdi'ahˑdah'gwaˑno̱h no̱ˑgweh, neħ' nă̱s'heˑyaˑdi'waˑyă̱ˑo̱o̱sˑdă̱ħ, ă̱sˑhe'yaˑdo̱'eˑsyo̱h'gwă̱ħ ne' tgaˑgo̱nt' o̱n'daˑdiˑyo̱ħ', neħ' naˑgaˑno̱h'sih hakˑno̱h'sòòt.
24Neħ să̱ħ'ă̱h nòħˑgwă̱'o̱s neħ ne' deħˑjo̱'gweħˑdaat ah' he'niˑă̱ˑno̱nˑdiih not'gaˑno̱ˑnyaħ'o̱h hoˑwă̱ˑno̱o̱'gaħˑdo̱h ta'akˑdo̱o̱h naˑgek'hwaˑeeħ.
25Neħ noˑno̱h'dă̱nˑdyo̱o̱h' gă̱nˑdyòh'goˑwaaˑnă̱h' no'neeˑno̱o̱h; neħ ne' detˑhoˑdihˑsaˑdeeˑnyo̱o̱h' haˑgo̱ˑyă̱ˑo̱h'seeh kuh,
26So̱n'diħˑgwa'naħˑot' no̱o̱ˑgweh' neħˑhuh' ă̱ntˑhat'go̱nˑdʋk he'gyaħˑdaaˑdeħ, ă̱ˑgă̱'a̱a̱k naeh' deˑos'waˑă̱s nòòħˑnih, kuh noˑnoħ'ă̱h, kuh nee'yòòħ, kuh nookˑsaħ'daħˑsho̱ħ, kuh ne deˑaˑdă̱ă̱ˑno̱nˑdeeħ haˑdiˑjiˑno̱h' wă̱ˑni'o̱sˑho̱ħˑo̱h kuh, ha'eħˑgwah kuh ho̱o̱'heħ ne'aˑo̱ˑhwa̱ħ, tă̱ħˑă̱h' deħˑoˑgweˑnyo̱o̱h neh, iiħ a'eˑiˑo̱ˑnya'niˑaak.
27Neħ kuh neh, so̱n'diħˑgwa'naħˑot ă̱ˑgă̱ˑa̱a̱k deˑa'wiħ no'oˑwă̱h' ne deˑga'yahˑso̱nt, tă̱ħˑă̱h' deħˑoˑgweˑnyo̱o̱h neh, iiħ aˑeˑiˑoˑnya'niˑaak.
28Neħ' waeh, neh, So̱'nahˑot' heˑniˑswaˑdiih' nă̱ˑehˑheˑaak ă̱ˑgaħ'no̱hˑso̱ˑniiħ ă̱ˑgas'dă̱ˑoˑdaħk, ne neħ' yaaˑeħ o̱n'daˑdyeˑă̱nt' na'aˑdyă̱ă̱ħ o̱nˑdaˑasˑheet' kuh heˑnă̱ˑgaˑgăăħˑheħt, a'diħˑgwah' neħˑhuh' haħˑdeˑgaˑyeeˑiħ' he'niˑoˑyă̱ħ' nă̱ˑa̱nˑdyă̱'noħkˑdă̱ħ?
29Dyă̱ˑgwah' să̱ħ'ă̱h sho̱ noˑnă̱h dă̱ntˑhos'dă̱ˑă̱ˑdo̱o̱k he'o̱ˑweh' ă̱ˑwa̱nˑdăˑdă̱ħ, tă̱ħˑă̱h gwa' naeh deħˑoˑgweˑnyo̱o̱h' na'aˑdyă̱ˑnoħkˑdă̱ħ, gaˑgweeˑgo̱h heˑniˑyo̱o̱ nă̱ˑyo̱nt'gatˑhòħ ă̱ˑo̱ˑwa̱nˑdă̱nˑdoˑnyaħt,
30Ă̱'ă̱ˑnih, Neħ' nă̱ˑgă̱ă̱' ho̱'gweh, tohˑsaaħ' ne waˑah'no̱hˑso̱ˑniħ, tă̱ħˑă̱h' deˑoˑgweˑnyo̱o̱h' na'aˑdyă̱ˑnòħk'dă̱ħ.
31Neħ'giħˑshă̱h neh, so̱o̱ ne go'wăhˑgoˑwaah' waaˑdiˑyòs'heħ, dă̱ˑiˑdooˑgă̱h' noˑyaħ' ne go'wăhˑgoˑwaah, ne neħ' yaaˑeħ' o̱nˑdaˑwaˑdyeˑă̱nt' na'aˑdyă̱ă̱ħ, da'aˑyaħ'doˑweh'daaˑno̱o̱ħ, a'diħˑgwah hoˑgweeˑnyo̱o̱h' ne' wʋsˑhă̱ă̱h' niˑwă̱ħ'nyaħˑes'hăsˑhă̱ă̱h' dă̱ˑa̱nˑdiˑdoˑgă̱h noˑnă̱h' dă̱ˑyaaˑdăħt, ne deˑwʋs'hă̱ă̱h niˑwă̱ħ'nyaħˑes'hăsˑhă̱ă̱h niˑgă̱nˑdyòhˑgwaħ' daˑă̱nˑdyòhˑgwă̱'o̱ˑwiħ?
32Neħ' giħˑshă̱h nah'so̱h weeˑă̱h' daˑeħ' ne' shaˑyaħ'daat, neħ ne waa'dă̱hˑha̱ħt, oħˑto'do̱ˑă̱nˑjoos' na'diħˑgwah no̱nˑdaˑgaˑye'ăħˑdak ne' sgă̱ˑno̱ħ' sho̱ o̱'saˑyaaˑdo̱ħ.
33Neħˑhuh dih ha'eħˑgwah niˑyòħ'dă̱ă̱h, so̱n'diħˑgwa'naħˑot' nă̱ˑgă̱ă̱' heˑniˑswaˑdiih, nă̱ˑgă̱ˑa̱a̱k gaˑgweeˑgo̱h' deˑot'gaħˑwă̱ă̱ħ he'niˑooˑyă̱ħ, tă̱ħˑă̱h deħˑoˑgweˑnyo̱o̱h neh, iiħ aˑeˑiˑo̱ˑnya'niˑaak.
34Wiˑyòò neh, oˑjĭk'heħˑdaħ; neħ gwaa' giħˑshă̱h nă̱ˑyòh'do̱ˑni'aak noˑjĭk'heħˑdaħ ne deˑyò'yòħˑjĭs'dahˑgo̱h, gaˑă̱ˑo̱ˑweeh' no̱ħˑdă̱ntˑgaa'wihˑdah'go̱ˑo̱o̱k' nă̱sˑga'jĭkˑheħ'daˑgă̱h'dak'?
35Tă̱ħ'ă̱h deħˑgaatˑgaaħ' deħˑjo'yaħˑda'gehˑhaasˑhă̱ħ he'yo̱ˑă̱nˑjaˑdeħ' neħ' giħˑshă̱h hoħˑdah'soˑjoot; neħ gwaa' no̱ˑgweh' asˑdeh' heˑoˑno̱nˑdyeħs. Neħ' haaˑyaħ'daˑdeħ neh' haˑo̱h'dooˑdo̱ħ' he'o̱ˑweh' haˑo̱k'hasˑdo̱h', hotˑho̱nˑdeek ne' neħ.
Valið núna:
Luke 14: SEE
Áherslumerki
Deildu
Afrita
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.