Nɩ-toni 3
3
A Ŋmɩn-yir-kpɛ̃ɛ dɩ̃dɔr nʋɔr gbɛr sanʋ yele
1Pɩɛr nɩ Zã tɩ dúor'ɩ a Zerizalɛm Ŋmɩn-yir-kpɛ̃ɛ pʋɔ, a zaanʋɔra gbele ata puoru ƴãw. 2Nɩbɛ kãw mɩ́ tɩ tuo nɩ dɛb na dɔw ɩ gbɛr a wa n. Bibir za, bɛ mɩ́ tɩ wa na wa bɛr ʋ ʋ zɩ̃ a Ŋmɩn-yir-kpɛ̃ɛ dɩ̃dɔr ʋl bɛ na bʋɔlɛ kɛ́ «Dɩ̃dɔr-vla» a ƴãw, k'ʋʋ tʋ̃ɔ́ mɩ́ zɛlɛ a nɩbɛ na kpɩɛr a Ŋmɩn-yir-kpɛ̃ɛ pʋɔ a libie. 3Ʋ na tɩ nyɛ̃ a Pɩɛr nɩ a Zã na bɔbr kɛ́ bɛ kpɛ a Ŋmɩn-yir-kpɛ̃ɛ pʋɔ a, ʋ zɛlɩ nɩ a libie a bɛ zie. 4Lɛ n'a a Pɩɛr nɩ a Zã tɩ jɩ́r ʋ gbẽgbẽ, ɛ́ a Pɩɛr yel ʋ: «Jɩ́rɛ tɩ!» 5Ʋ tɩ jɩ́rɛ bɛ nɩ gbẽgbẽ tɩɛrɛ k'ʋʋ na páw nɩ bʋ̃-kãw a bɛ zie. 6Lɛ n'a a Pɩɛr tɩ yel ʋ: «Ɩ̃ bɛ tɛr libie nɩ salm-zɩɛ ɩ, ɛcɛ a ʋlɩ bom nɛ ɩ̃ na tɛr a, ʋlɛ n'ʋ ɩ̃ kʋ̀rɛ fʋ: a Nazarɛtɩ tẽw Yeezu Kɩrɩta yúor ƴãw a, ìr cere!» 7Ʋ tɩ nyɔw ʋ nɩ a dʋrʋ nũú, ɩ k'ʋ ìr. Daadaalɛ, a gbɛr gbɛ́ɛ nɩ a ʋ gbɛnakɔɛ tɩ kpɛmɛ na. 8Ʋ tɩ vaa na ìr cere. Ʋ tɩ páw bɛ na kpɛ a Ŋmɩn-yir-kpɛ̃ɛ pʋɔ, cere, ƴawr dúor saa, ɛ́ danɛ a Naaŋmɩn. 9A nɩbɛ za tɩ nyɛ̃ ʋ na ʋ cere ɛ́ danɛ a Naaŋmɩn. 10Bɛ tɩ nyɛ̃ ʋ na bãw: ʋl tɔr za n'ʋ mɩ́ tɩ zɩ̃ zɛlɛ a libie a Ŋmɩn-yir-kpɛ̃ɛ Dɩ̃dɔr-vla ƴãw. Dɛ̃bɩ̃ɛ nɩ nɔ-ɓãan tɩ nyɔw nɩ a nɩbɛ yaga za, a yel ŋa na tɩ ta ʋ a ƴãw.
A Pɩɛr ƴɛ̀rʋ ʋ na ƴɛ̀r a Ŋmɩn-yir-kpɛ̃ɛ pʋɔ a
11A nɩr nɛ tɩ sɛ̀br'a tuur a Pɩɛr nɩ a Zã. A tɩ ɩ n nɔ-ɓãa-yel a zu-sɛbla za zie. Bɛ tɩ zɔ na wa ŋmãa viiri koli bɛ a bɛ-caar nɛ bɛ na bʋɔlɛ kɛ́ «Salomɔ̃ bɛ-caar» a pʋɔ. 12A Pɩɛr na tɩ nyɛ̃ a lɛ a, ʋ yel'ɩ a zu-sɛbla: «Ɩsɩrayɛl nɩbɛ ɛ, bʋ̃ʋ n'ʋ so nyɩ nyɔw nʋɔr a yel ŋa ƴãw? Bɩɩ, bʋ̃ʋ ƴãw n'a nyɩ jɩ́rɛ tɩ, mɛ̃ tɩ fãw bɩɩ tɩ puoru n'a ɩ a nɩr ŋa ʋ cere? 13A Abraham, Ɩzaakɩ nɩ Zakɔb Naaŋmɩn, a tɩ sãàkʋm-kore Naaŋmɩn kʋ̀ n yúor-vɩɛlʋ-danʋ a ʋ tõ-tõ-bie Yeezu, a nyɩɩm na nyɔw tɩr, ɛ́ jɛ ʋ bɛr a Pɩlatɩ niŋé, ʋl na nɩ̃ɛ tɩ bɔbr a ʋ lɛb bɛ́rʋ a. 14Nyɩ zawr'ɩ a Nɩ-sõw nɩ a Nɩ-mɩŋa bɛr, ɛ́ nɩ̃ɛ zɛlɩ kɛ́ bɛ yuo nɩ-kʋrɛ a gaso pʋɔ kʋ̀ nyɩ. 15À ŋá n'a nyɩ ɩ kʋ a nyɔ-vʋʋrʋ za sob. Ɛcɛ Naaŋmɩn ɩ na ʋ lɛb yi a kũuni pʋɔ, tɩ ɩ n a ʋ dãsɩɛ dem. 16A Yeezu sàw-deb zũú n'a, a ʋ yúor'ʋ ɩ a nɩr ŋa nyɩ na jɩ́rɛ ɛ́ bãw a, ʋ lɛb kpɛmɛ. A Yeezu sàw-deb'a ɩ k'ʋ lɛb kpɛ̃w ʋ za a nyɩ za niŋé.»
17«Ɛcɛ, ɩ̃ bãwnɩ a na, yɛbr i, zɔnʋ n'a nyɩɩm nɩ a nyɩ nɩ-bɛrɛ tõ. 18Ɛ́ à ŋá n'a a Naaŋmɩn mɩ̀ tu maalɩ a ʋlɩ bom nɛ ʋ na dãw ƴãw a ʋ ƴɛ̀r-manbɛ za yel a: a ʋ Nɩ-kabra na na wõ a tuo a. 19A na ɩ à ŋá a, nyɩ lɩɛbɩ a nyɩ ɩb ɛ́ lɛb wa a Naaŋmɩn zie, ʋ de a nyɩ yel-bebe bɛr a baarɩ. 20Lɛ n'a a Sore na ɩ a pɩ̃ɛnʋ voru a ta, ʋʋ tõ a Yeezu na ɩ a Kɩrɩta a, ʋl ʋ na tɩ dãw kaa ír a nyɩ ƴãw a. 21Ƴɛrɛŋa a, a fɛr'a k'aa Yeezu Kɩrɩta be a tẽ-vla pʋɔ tɩ ta a daar ʋl bom za na na lɩɛbɩ bʋ̃-paala, mɛ̃ a lɛ a Naaŋmɩn na tɩ dãw hieri yel nɩ a ʋ dãwdãw ƴɛ̀r-man-son nʋɔr a. 22Moyiir tɩ yel'a: “A Sore Naaŋmɩn na ɩ na ƴɛ̀r-manɛ yi a nyɩ yɛbr pʋɔ a nyɩ ƴãw, ŋmɛ̃ mɛ̃ a mãa a. Nyɩ na bɛrɛ na wone a lɛ za ʋ na yere kʋ̀rɛ nyɩ a. 23Sob nɛ za bɛ wa bɛrɛ wone a ƴɛ̀r-manɛ ŋa a, bɛ na ír ʋ na bɛr a Naaŋmɩn nɩ-bʋʋrɛ pʋɔ#3:23 Nyɛ̃ Wl-ayi 18.15..” 24A naaŋmɩn-ƴɛ̀r-manbɛ za, a na tĩ a Samɩɛl nɩ a ʋ lɩɛrbɛ za a, mɩ̀ ƴɛ̀r'a por a bibie á ŋá yúor. 25Nyɩmɛ nɛbɛ ɩ a naaŋmɩn-ƴɛ̀r-manbɛ bibiir: nyɩmɛ so a Wõ-taa a Naaŋmɩn na maal'ɩ a nyɩ sãàkʋm-kore a lɛn daar ʋ na tɩ yel a Abraham: “A fʋ bʋʋrɛ ƴãw, a tẽ-daa nɩ-bʋʋrɛ za na páw nɩ a ɩ̃ maalʋ”#3:25 Nyɛ̃ Yzt 22.18, 26.4.. 26Nyɩmɛ de niwn so a Tõ-tõ-bie a Naaŋmɩn na ɩ ʋ lɛb yi a kũuni pʋɔ, ʋʋ tõ k'ʋʋ wa maalɩ nyɩ, ɩ kɛ̀ nyɩ za been been mɩ́ bɛr a nyɩ ɩ-faar a.»
Valið núna:
Nɩ-toni 3: DBDC
Áherslumerki
Deildu
Afrita
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.