Nɩ-toni 4
4
Bɛ nyɔw nɩ a Pɩɛr nɩ a Zã cen nɩ a Zifʋ mɩnɛ ƴɛ̀rʋ-dɩb-lãw niŋé
1A Pɩɛr nɩ a Zã tɩ cãà na ƴɛ̀rɛ a zu-sɛbla zie wa bere a bàwr-maalbɛ, a Ŋmɩn-yir-kpɛ̃ɛ sojarɩ nɩ-kpɛ̃ɛ nɩ a Sadiseyɛ̃ mɩnɛ wa ta. 2Suur tɩ ɩrɛ bɛ na bɛ dɩ vuo ɩ, bɛ na tɩ nyɛ̃ a Pɩɛr nɩ a Zã bɛ kanɛ nɩ a zu-sɛbla ɛ́ yere k'aa Yeezu lɛb'a yi a kũu pʋɔ, a wul k'aa kũuni-lɛb-yibu be na a. 3Bɛ tɩ ƴãw na bɛ nyɔw a Pɩɛr nɩ a Zã lɔb ƴãw gaso pʋɔ cɛlɛ nɩ a bio daarɩ́, a zie na tɩ faa sɔbr a ƴãw. 4A nɩbɛ bɛl na tɩ bɛr wõ a Pɩɛr mɩnɛ ƴɛ̀rʋ a, bɛ yaga zie tɩ sàw na de. Bɛ tɩ faar'a na ta nɩbɛ túr-anũu (5 000).
5A bio daarɩ́ n'a, a Zifʋ mɩnɛ nɩ-bɛrɛ, nɩ a nɩ-kore nɩ a Naaŋmɩn wulu sɛ-sɛbrbɛ bɛl na tɩ be a Zerizalɛm a, tɩ ɓã taa. 6A Naaŋmɩn bàwr-maal-kara An, nɩ Kayifʋ, nɩ Zã nɩ Alɛsãdɩr, nɩ a bàwr-maal-nɩ-bɛrɛ yie dem za tɩ be n be. 7Bɛ tɩ ƴãw na bɛ tɛr a Pɩɛr nɩ a Zã wa n a bɛ niŋé, bɛ wa tɛr'ɩ bɛ sowru: «Ãa n'ʋ kʋ̀ nyɩ a fãw, bɩɩ ãa yúor ƴãw n'a nyɩ tõ à à ŋá?» 8Lɛ n'a a Vʋʋrʋ Sõw tɩ paalɩ a Pɩɛr ʋ yel bɛ: «Nyɩɩm, nɩbɛ nɩ-bɛrɛ nɩ nɩ-kore e, 9bɛ na sowre tɩ dɩ̃a, ƴɛ̀rʋ zie, yel-vla tɩ na maalɩ nɩ-bàal ƴãw a, nɩ a lɛ a na tu ʋ tɩ sanɩ a, 10a fɛr'a kɛ́ nyɩ za bãw vla, lãwnɩ a Ɩsɩrayɛl nɩbɛ za: a Yeezu Kɩrɩta na yi Nazarɛtɩ a yúor ƴãw n'a a nɩr ŋa lɛb ɩ nɩ-kpɛ̃w àr a nyɩ niŋé, a Yeezu Kɩrɩta ŋa nyɩ na kpa a da-gara zu, ɛ́ a Naaŋmɩn ɩ ʋ lɛb yi a kũuni pʋɔ a. 11Ʋlɛ n'ɩ
“A kʋsɩɛr ʋl, a nyɩɩm yir-mɩɛrbɛ
na ír lɔb bɛr a,
ɛcɛ ʋ lɩɛb'ɩ a yir pɛr kʋsɩɛr.”#4:11 Nyɛ̃ Ssy 118.22.
12 Faafʋ bɛ lɛb yi nɩr kãw za zie a bɛ ɩ a ʋl yõ zie ɩ. Yúor bɛ lɛb ka zie za a tẽw zu, a Naaŋmɩn kʋ̀ a nɩsaalbɛ, ʋ na tʋ̃ɔ́ faa tɩ ɛ.»
13Nɔ-ɓãan tɩ nyɔw nɩ a Zifʋ mɩnɛ ƴɛ̀rʋ-dɩb-lãw nɩbɛ. Bɛ tɩ nyɛ̃ na kɛ́ a Pɩɛr nɩ a Zã ƴɛ̀rɛ na bɛ zɔrɛ nɩ bom za ɩ, ɛ́ ɩ nɩ-zawlɛ na bɛ bãw sɛbɛ a. Bɛ tɩ nyɛ̃ na bãw bɛ ɩ a Yeezu po-tuurbɛ. 14Bɛ mɩ̀ tɩ nyɛ̃ nɩ a nɩr ʋl na sanɩ a, ʋ àr kɔw a Pɩɛr nɩ a Zã, ɛ́ bɛ bɛ tɩ nyɛ̃ a lɛ bɛ na na yel a ɩ. 15Lɛ n'a bɛ tɩ ƴãw bɛ tɛr a po-tuurbɛ yi n a ƴɛ̀rʋ-dɩb dĩó, ɛ́ bɛ wõ taa. 16Bɛ tɩ sowre nɩ taa: «Tɩ na ɩ n a nɩbɛ bɛ ŋa ŋmɩn? Bʋ̃ʋ n'ʋ vɛ̃, bɛ maal'ɩ nɔ-ɓãa-yel na bɛ sɔwlɩ a, a sãá nɩ a Zerizalɛm nɩbɛ za zie, tɩ kʋ̃ tʋ̃ɔ́ ciiri ɛ. 17Ɛcɛ, nyɩ ɩ tɩ kpãa bɛ kɛ̀ bɛ taa lɛb pore a yúor ŋa nɩsaalɛ kãw za zie ɩ, a yel ŋa ta yi tɔl yɩ̃ɛ a nɩbɛ pʋɔ ɩ.»
18Lɛ n'a bɛ tɩ ƴãw bɛ lɛb bʋɔlɩ bɛ wa n, bɛ wa ƴãw nʋɔr kʋ̀ bɛ kɛ́ bɛ taa lɛb pore a Yeezu yúor towtow ɛ, bɩɩ bɛ taa lɛb kanɛ nɩ nɩr a Yeezu yúor ɛ. 19Ɛcɛ a Pɩɛr nɩ a Zã tɩ sɔw bɛ na: «Abobe sob'a sɛw a Naaŋmɩn zie: tɩ sàwr a nyɩ nʋɔr bɩɩ tɩ sàwr a Naaŋmɩn nʋɔr? Nyɩmɛ so na bãw! 20Tɩɩm ƴãw a, tɩ kʋ̃ tʋ̃ɔ́ bɛ manɛ a alɩ bome nɛ tɩ na nyɛ̃ ɛ́ wõ a ɩ.» 21Bɛ tɩ lɛb'a kpãa bɛ ɛ́ bɛr bɛ: bɛ bɛ tɩ tʋ̃ɔ́ nyɛ̃ a lɛ bɛ na na ɩ ƴãw bɛ dɔwrʋ a ɩ, ɛ́ a ɩ a zu-sɛbla ƴãw. Bʋ̃ʋ n'ʋ vɛ̃, a nɩbɛ za tɩ danɛ nɩ a Naaŋmɩn a yel ŋa na tɩ maalɩ a ƴãw. 22A nɩr ʋl bɛ na tɩ maalɩ a nɔ-ɓãa-yel sanɩ a, ʋ tɩ tɛr'ɩ yome lɩz'a ayi nɩ dɔwlɛ.
A kɩrɩta-nɩbɛ puore na zɛlɛ k'aa Naaŋmɩn kʋ̀ bɛ fãw
23Bɛ na tɩ lɛb bɛr a Pɩɛr nɩ a Zã a, bɛ cen na tɩ páw a bɛ taabɛ, manɩ kʋ̀ bɛ a lɛ za a bàwr-maal-nɩ-bɛrɛ nɩ a Zifʋ mɩnɛ nɩ-kore na tɩ yel kʋ̀ bɛ a. 24Bɛ tɩ bɛr'a wõ a Pɩɛr nɩ a Zã manʋ. Al pùorí, bɛ za tɩ lãw nɩ nɔ-been puori a Naaŋmɩn à ŋá: «Bome za zu-sob i, fʋ̃ʋ n'ʋ ír a salom, a tẽw, a kʋ̃ɔ-kpɛ̃ɛ nɩ bom za na be a pʋɔ a. 25Fʋ̃ʋ n'ʋ ɩ a Vʋʋrʋ Sõw ƴãw a ƴɛ̀r-bie á ŋá a fʋ tõ-tõ-bie tɩ sãàkʋm Daviir nʋɔrɩ́:
“Bʋ̃ʋ n'ʋ so a ten nɩbɛ ɩrɛ gɔmɛ à ŋá?
Ɛ́ bʋ̃ʋ n'ʋ so a nɩ-bʋʋrɛ bàlɛ bàl-zawlɛ à ŋá?
26A tẽw na-mɩnɛ nyɔw nɩ taa,
ɛ́ a nɩ-bɛrɛ ɓã taa ɩ been
ìr a Sore nɩ a ʋ Nɩ-kabra ƴãw.”#4:26 Nyɛ̃ Ssy 2.1-2.
27Sɩza, bɛ sɩrɩ na ɓã taa a tẽ-kpɛ̃ɛ ŋa pʋɔ: Erɔdɩ nɩ Pɔ̃sɩ-Pɩlatɩ, lãwnɩ a nɩ-bʋʋr-yoru nɩ a Ɩsɩrayɛl bʋʋrɛ nɩbɛ wõ n taa a fʋ tõ-tõ-bi-sõw Yeezu ƴãw, a ʋl fʋ na ka nũu ƴãw a. 28À à ŋá bɛ na ɩ a, bɛ tu n a lɛ za fʋ na tɩ bɔbr ɛ́ cɔbrɩ a yele nɩ kpɛnʋ bin a. 29Ƴɛrɛŋa a, Sore e, bãwnɩ a kpãàfʋ á ŋá bɛ na kpãànɛ tɩ a, ɛ́ ɩ a fʋ tõ-tõ-biir ɓãá ƴãw hiere a fʋ ƴɛ̀rʋ. 30A lɛ ƴãw a, wul a fʋ kpɛnʋ, kɛ̀ bàalbɛ sanʋ, nɩ nɔ-ɓãa-yele nɩ yel-bãw-guuri maalɛ a fʋ tõ-tõ-bi-sõw Yeezu yúor ƴãw.» 31Bɛ na tɩ puori baar'a, a dĩó nɛ pʋɔ bɛ na tɩ ɓã taa a, tɩ dam'a: a Vʋʋrʋ Sõw tɩ paal'ɩ bɛ za, bɛ ɓãá ƴãw hiere a Naaŋmɩn ƴɛ̀rʋ.
A dãwdãw kɩrɩta-nɩbɛ mɩ́ tɩ lãw nɩ a bɛ bʋ̃-tɛrɩ
32A nɩ-yaga bɛl za, na tɩ sàw de a Yeezu yele a, tɩ lãw nɩ soci-been nɩ tɩɛr-been. Kãw za bɛ mɩ́ tɩ yere kɛ́ ʋl yõ so a ʋ bʋ̃-tɛrɩ ɛ, ɛcɛ a bɛ bʋ̃-tɛrɩ za mɩ́ tɩ ɩ n a bɛ za dem. 33A nɩ-toni tɩ dɩrɛ nɩ a Sore Yeezu kũu-pʋɔ-lɛb-yibu dãsɩɛ nɩ fãw kpɛ̃ɛ, ɛ́ a Naaŋmɩn maalʋ yaga tɩ be a bɛ zie. 34A bɛ been kãw za bɛ tɩ ɩ nɩ-kɔmɛ ɩ, bʋ̃ʋ n'ʋ vɛ̃, bɛlɩ dem za na tɩ tɛr póru nɩ yie a, mɩ́ tɩ de a na kʋɔrɩ, wa n a libie 35wa bin a Yeezu nɩ-toni niŋé. Bɛ mɩ́ tɩ de nɩ a libie põ bɛ za, man a been been yel-bɔbrɩ. 36À ŋá n'a Zuzɛb, a nɩ-toni na kpɔwrɛ bʋɔlɛ Banabasɩ, a pɛr lɛ kɛ́ Mɔwl-mɔwlɛ a, tɩ tɛr púo. Ʋ tɩ ɩ n Levitɩ ɛ́ yi Sɩɩpʋr. 37Ʋ tɩ de nɩ a ʋ púo kʋɔrɩ wa n a libie wa bin a nɩ-toni niŋé.
Valið núna:
Nɩ-toni 4: DBDC
Áherslumerki
Deildu
Afrita
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.