Nɩ-toni 2
2
A Vʋʋrʋ Sõw waa
1A Pãtɩkɔtɩ cuw bibir na wa vɩɛ a, a yɛbr tɩ ɓã n taa bɛ za zi-been. 2Bɛ wa bere na damnʋ yi a salom zu, ɩ mɛ̃ sɛsɛb kpɛ̃ɛ na fure a. Ʋ tɩ fu na paalɩ a yir ʋl za pʋɔ bɛ na tɩ be a. 3Lɛ n'a bɛ tɩ nyɛ̃ bom na ŋmɛ̃ mɛ̃ vũu a, ʋ siw põ yaarɩ mɛ̃ zɛlɛ a, dɔwlɩ a bɛ za been been zu. 4A lɛ n'a a Vʋʋrʋ Sõw tɩ paalɩ bɛ za bɛ tĩ ƴɛ̀rɛ bʋʋr-yoru ƴɛ̀rʋ. Ŋa za mɩ́ tɩ ƴɛ̀rɛ na mɛ̃ a lɛ a Vʋʋrʋ Sõw na kʋ̀ ʋ k'ʋʋ ƴɛ̀rɛ a.
5A tɩ car'ɩ na kɛ́ Zifʋ bɛ mɩnɛ kãw na nɔ̃w a puoru a, mɩ̀ tɩ be n a Zerizalɛm be. A nɩ-bʋʋrɛ bɛl za na tɩ be a tẽ-daa zu a, a bɛl pʋɔ n'a bɛ tɩ yi kɛ́ wa. 6A nɩbɛ na tɩ wõ a damnʋ a, bɛ tɩ zɔ na wa ɓã taa bɛ tɛr vuo ɩ. A tɩ ùr bɛ na bɛ dɩ vuo ɩ, à ŋà za na mɩ́ tɩ wone bɛ ƴɛ̀rɛ a ʋ sãà bʋʋrɛ ƴɛ̀rʋ a ƴãw. 7A bɛ tɩɛrʋ za tɩ nyaw nɩ taa ɛ́ nɔ-ɓãan nyɔw bɛ bɛ yere: «A nɩbɛ bɛ ŋa na ƴɛ̀rɛ a, Galile tẽw dem bɛ tʋ̃ɔ́ n'ɩ bɛ za ɩ? 8Ɛ́ ŋmɩŋmɩn n'a tɩ za been been wa wone a bɛ ƴɛ̀rʋ, ŋa za a ʋ sãà bʋʋrɛ kɔkɔr pʋɔ? 9Partɩ mɩnɛ n'ɩ bɛ ŋa, Mɛdɩ nɩ Elamɩtɩ mɩnɛ, a Mezopotami tẽw dem, Zude nɩ Kapadɔsɩ nɩbɛ, Pɔ̃ nɩbɛ, Azi nɩbɛ, 10Firizi nɩ Pãfili ten dem mɩ̀, Eziptɩ tẽw nɩbɛ nɩ Libi na pɩɛlɩ a Sɩɩrɛn tẽw a nɩbɛ, Ʋrɔm tẽw dem na kpɩɛr a ka a, 11a bɛl na dɔw ɩ a Zifʋ mɩnɛ bʋʋrɛ a, nɩ a bɛl na kpɛ a Zifʋ mɩnɛ puoru a, Kɩrɛtɩ tẽw dem nɩ Arabʋ mɩnɛ za, tɩ za wone na bɛ hiere a Naaŋmɩn nɔ-ɓãa-yele a tɩ bʋʋrɛ ƴɛ̀rʋ pʋɔ.» 12A bɛ tɩɛrʋ za tɩ nyaw nɩ taa, ɛ́ bɛ na bɛ tɩ bãw lɛ bɛ na na tɩɛrɛ a, bɛ sowre nɩ taa: «A yel ŋa pɛr'ɩ bo?» 13Ɛcɛ bɛ mɩnɛ tɩ ɩrɛ bɛ na laar hele yere nɩ: «Bɛ kuol'ɩ dãa bɛ za!»
A Pɩɛr ƴɛ̀rʋ ʋ na ƴɛ̀r a Pãtɩkɔtɩ cuw bibir a
14Lɛ n'a a Pɩɛr tɩ ìr àr, ʋlɛ nɩ a nɩ-toni pie nɩ been bɛl na tɩ cɛ a, ɛ́ zɛw kɔkɔr ƴɛ̀r à ŋá: «Zude tẽw dem i, nɩ nyɩɩm za na kpɩɛr a Zerizalɛm ka a, nyɩ bãw a yel ŋa na ɩrɛ a vla, nyɩ ƴãw tobr a ɩ̃ ƴɛ̀rʋ ƴãw. 15Nyɩ na tɩɛr kɛ́ a nɩbɛ bɛ ŋa kuol'a a, lɛ bɛ n'a ɩ. Bɛ bɛ nyũ ɛ, biɓaara gbele piwaɩ sob tɛwr'ɩ à ŋà na ŋmɛ a. 16Ɛcɛ, a lɛ a naaŋmɩn-ƴɛ̀r-manɛ Zowɛl na tɩ dãw yel a, alɛ n'ɩ à á ŋá na tuur a:
17“À ŋá n'a a Naaŋmɩn ƴɛ̀rɛ:
a bibi-pɛ-baarɩ wa vɩɛ a,
ɩ̃ na ƴãw nɩ a ɩ̃ Vʋʋrʋ nɩsaal za.
A nyɩ bidɛbr nɩ a nyɩ pɔwyaar
na lɩɛb'ɩ naaŋmɩn-ƴɛ̀r-manbɛ,
a nyɩ pɔlbili na nyɛrɛ nɩ bʋ̃-nyɛrɩ,
zánʋ na waar'ɩ a nyɩ dɛb-nyamɛ,
18mɔ̃ mɩ̀, a alɩ bibie nɛ pʋɔ,
ɩ̃ na ƴãw nɩ a ɩ̃ Vʋʋrʋ a ɩ̃ tõ-tõ-bi-dɛbr,
nɩ a ɩ̃ tõ-tõ-bi-pɔwbɛ,
ɛ́ bɛ na lɩɛb'ɩ naaŋmɩn-ƴɛ̀r-manbɛ.
19Ɩ̃ na maal'ɩ yel-bãw-guuri a salom zu,
nɩ nɔ-ɓãa-yele a tẽw zu:
zɩ̃ɩ, vũu nɩ zʋ̀ʋ́r na ŋmɛlɛ dúor a.
20A mʋ̃tɔ̃w na lɩɛb'ɩ lige
ɛ́ a cuw mʋ̃ɔ mɛ̃ zɩ̃ɩ a,
ɛ́ a Sore bibir wa bãw vɩɛ,
bibi-kpɛ̃ɛ, yúor-vɩɛlʋ-danʋ bibir.
21Lɛ n'a, sob nɛ za nãà wa bʋɔlɛ a Sore a na nyɛ̃ a faafʋ.”#2:21 Nyɛ̃ Zow 3.1-5.»
22«Ɩsɩrayɛl biir i, nyɩ ƴãw tobr a ɩ̃ ƴɛ̀rʋ ƴãw: a Nazarɛtɩ tẽw Yeezu, a dɛb ŋa a Naaŋmɩn na de a yele, ɛ́ ƴãw k'ʋ maalɩ nɔ-ɓãa-yele a nyɩ sɔgɔ, lãwnɩ yel-bãw-guuri nɩ yele na ɩ bãwfʋ sãá a, mɛ̃ a lɛ nyɩɩm mɩŋa na bãw a, 23a dɛb ŋa nyɩ na mɩl nyɔw, a tu a lɛ a Naaŋmɩn pʋ-tɩɛrʋ na tɩ dãw bãwnɩ a yele cɔbrɩ a, nyɩ kʋ ʋ na, ƴãw nɩ-faar kpa ʋ da-gara zu. 24Ɛcɛ Naaŋmɩn ɩ na ʋ lɛb yi a kũu pʋɔ, ɩ a ʋ kũu kpɩɛrʋ za baarɩ: a bɛ tɩ tɛr sɔ́r kɛ́ a kũu tɛr fãw ʋ zu ɛ. 25Daviir tɩ yel'ɩ a ʋ ƴãw kɛ́:
“Ɩ̃ tɩ nyɛ̃ nɩ a Sore ʋ be a ɩ̃ niŋé kʋralɛ,
ʋ be n a ɩ̃ lõbowrí k'ɩ̃ɩ taa lore ɩ.
26Alɛ n'a so, a ɩ̃ socir cɩlɛ,
ɛ́ a ɩ̃ nʋɔr yiele nʋ̃ɔ̀ yielu.
A ɩ̃ ƴã-gan tɔr za na bɛr'ɩ tɩɛrʋ,
ɛ́ ɓãá ƴãw pɩ̃ɛnɛ, bʋ̃ʋ n'ʋ vɛ̃,
27fʋ kʋ̃ tʋ̃ɔ́ jɛ mɛ̃ bɛr a kpɩmɛ tẽw ɛ,
fʋ mɩ̀ kʋ̃ tʋ̃ɔ́ bɛr a fʋ Nɩ-sõw k'ʋ pʋ̃ɔ ɩ.
28Fʋ wul mɛ̃ nɩ a nyɔ-vʋʋrʋ sɛ́ɛ,
fʋ na ɩ na k'ɩ̃ be a fʋ zie cɩlɛ yaga#2:28 Nyɛ̃ Ssy 16.8-11..”»
29«Yɛbr i, ɩ̃ na tʋ̃ɔ́ na ɓãá ƴãw yel kʋ̀ nyɩ: a tɩ sãàkʋm-kʋra Daviir kpi na, bɛ ũù ʋ na, nɩ dɩ̃a, a ʋ yaa cãà na be a tɩ zie. 30Ɛcɛ, ʋ tɩ ɩ n naaŋmɩn-ƴɛ̀r-manɛ, ɛ́ tɩ bãwnɩ a kɛ́ Naaŋmɩn tɩ pɔ na yel k'ʋʋ na zɩɩlɩ nɩ a ʋ bʋ̃-dɔwra kãw a ʋ naalʋ-dà-kɔw zu#2:30 Nyɛ̃ Ssy 132.11.. 31A na ɩ à ŋá a, ʋ de nɩ niwn nyɛ̃ a Kɩrɩta kũu-pʋɔ-lɛb-yibu. Ɛ́ a ʋl ƴãw n'a ʋ tɩ yel:
“Bɛ bɛ jɛ ʋ bɛr a kpɩmɛ tẽw ɛ,
ɛ́ a ʋ ƴã-gan bɛ pʋ̃ɔ ɩ.”#2:31 Nyɛ̃ Ssy 16.10.»
32«A Yeezu ŋa a, Naaŋmɩn ɩ na ʋ lɛb yi a kũu pʋɔ, tɩɩm za dɩ n a dãsɩɛ. 33A Naaŋmɩn dʋrʋ zɛw ʋ na ʋ do. Lɛ so ʋ páw a Vʋʋrʋ Sõw a Naaŋmɩn na ƴãw nʋɔr k'ʋʋ na tɩr'a a. Ʋlɛ n'ʋ ɩ a Vʋʋrʋ Sõw siw põ yaarɩ a tɩ zu, ɛ́ alɛ n'a nyɩ nyɛrɛ ɛ́ wone. 34A Daviir tɔr za bɛ do a salom zu ɛ, ɛcɛ ʋ yel'a:
“A Sore yel'ɩ a ɩ̃ Sore:
zɩ̃ a ɩ̃ dʋrʋ lowr,
35ɛ́ gù ɩ̃ wa tɩ nɛb a fʋ dɔ̃ dem
bin a fʋ pile, fʋ dɔwlɩ a fʋ gbɛ́ɛ#2:35 Nyɛ̃ Ssy 110.1..”
36A Ɩsɩrayɛl bʋʋrɛ za, bɛ bãwnɩ a vla: a Yeezu ŋa tɔr za nyɩ na kpa a da-gara zu a, Naaŋmɩn ɩ na ʋ ɩ Sore nɩ Kɩrɩta.»
37Bɛ na tɩ wõ a lɛ a, a tɩ dam bɛ nɩ yaga, bɛ yel a Pɩɛr nɩ a nɩ-toni ŋmãa bɛl na cɛ a: «Yɛbr i, bʋ̃ʋ n'ʋ tɩ na ɩ?» 38A Pɩɛr tɩ yel bɛ na: «Nyɩ lɩɛbɩ a nyɩ ɩb, ɛ́ ŋa za mɩ́ de a suob a Yeezu Kɩrɩta yúor ƴãw, a nyɩ yel-bebe suur páwfʋ ƴãw, ɛ́ nyɩ na páw nɩ a Naaŋmɩn maalʋ na ɩ a Vʋʋrʋ Sõw a. 39A nyɩɩm nɩ a nyɩ bibiir ƴãw n'a a Naaŋmɩn tɩ dãw ƴãw a nʋɔr ŋa, nɩ a bɛlɩ dem na zãá a ƴãw, a bɛlɩ dem za a Sore tɩ Naaŋmɩn na na bʋɔlɩ a.»
40A Pɩɛr tɩ cãà na ƴɛ̀r ƴɛ̀r-bie a mɩnɛ dɩ n a Yeezu dãsɩɛ, ɛ́ tɩ kpaalɛ bɛ yere nɩ: «Nyɩ faa nyɩ tʋɔra yi zaa a dɩ̃a nɩbɛ bɛ ŋa na ɩ nɩ-faar a pʋɔ.» 41A bɛlɩ dem na tɩ sàw a Pɩɛr ƴɛ̀rʋ a tɩ de nɩ a suob. A ʋlɩ bibir nɛ a, a nɩbɛ na tɩ sàw de pʋɔ a bɛ pʋɔ a, tɩ faar'a na ta túr-ata (3 000).
A kɩrɩta-nɩbɛ lãw-dãw-niwn sob nyɔ-vʋʋrʋ
42Bɛ za tɩ ƴãw nɩ fãw tuur a nɩ-toni wulu kʋralɛ, ɛ́ lãw pone a dipɛ̃#2:42 Nyɛ̃ Luk 22.19., ɛ́ lãw puore mɩ̀. 43Dɛ̃bɩ̃ɛ tɩ tɛr'ɩ a nɩbɛ za: a nɩ-toni tɩ sɩrɩ na maalɛ yel-bãw-guuri nɩ nɔ-ɓãa-yele yaga. 44A bɛlɩ dem za na tɩ sàw de a Yeezu yele a, tɩ lãw nɩ taa, ɛ́ mɩ́ tɩ de a bɛ bome za ɓã taa lãw. 45Bɛ mɩ́ tɩ de nɩ a bɛ bʋ̃-sori nɩ a bɛ bʋ̃-tɛrɩ za kʋɔrɩ, lãw põ a libie: bɛ mɩ́ tɩ kʋ̀ n ŋa za man a ʋ yel-fɛrɩ. 46Bibi-vɩɛrɩ za, bɛ mɩ́ tɩ lãw nɩ soci-been cere nɩ a Ŋmɩn-yir-kpɛ̃ɛ pʋɔ bɛ tɛr nawfʋ ɛ, bɛ mɩ́ tɩ lãw na ŋmarɛ a dipɛ̃ pone a yie pʋɔ, ɛ́ lãw dɩrɛ a bɛ bʋ̃-dɩrɩ nɩ nʋ̃ɔ̀ nɩ pʋ-pɩɛlʋ. 47Bɛ tɩ danɛ nɩ a Naaŋmɩn, ɛ́ a nɩbɛ za nɔnɛ bɛ ɛ́ ƴãwnɛ bɛ. Bibie za, a Sore tɩ ɩrɛ na a bɛlɩ dem na nyɛ̃ a faafʋ a, bɛ kpɩɛr pʋɔrɛ a lãw pʋɔ.
Valið núna:
Nɩ-toni 2: DBDC
Áherslumerki
Deildu
Afrita
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.