RIPHUTNA 39
39
Josefa neh Potifara nupui
1Josefa kha Aigupta ramah an ṭhui a; Faroa nuaia ruaitu khatkah, vêngtu pôl ruaitu, Aigupta mi, Potifara khan kha muna zuang iṭhuitu Ismaelhei kut ata khah archôk a. 2Pumapa khah Josefa ziangah a om mai a; khanchu, a sinthona kipah thluan a tlung a. A pu Aigupta mi inah khan a om a.#TS.7:9. 3A pu khan Pumapa khah Josefa ziangah a om a, a sinthona kipah thluan a tlung iti a mu a. 4Khanchu, Josefa khan a pu mit a tlung a, ama sin thotu bîkin a mang a. Ani khan a insungkua enkoltu neh ai nei murdi chunga thuneitun a siam a. 5A insungkua enkoltun a siam a, ai nei murdi chunga thuneitun a siama rithokin chu Josefa sikin Pumapa khan Aigupta mi insungkua khah ṭhat a vur a; in tiang neh ram tianga ai nei murdi khah Pumapa khan ṭhat a vur mai tâk a. 6Khanchu, Potifara khan ai nei murdi khah Josefa kutah a sia zit a; a zianga thil a înkol rêng rêng khah îte ngaituapui khâi mak a, ama bunêk#39:6 Aigupta mihein Hebrai mihei an itir a, an itôn tâk nung chu an ifâk nuam khâi ngai ino a nit. rang ti no chu îte ai ngaitua khâi ino a nit.
Josefa khah tlangvâl tuaizâi iṭha tak a nit a, a mêl khom a ṭhat tak tak a. 7Itôiteka nungah chu hingka hin a nit a, a pu nupui khan Josefa khah â dit a; a ziangah, “Ne zâlpui roh,” a ti a. 8Nikhomsela, ani khan nuam mak a, a pu nupui ziangah khan, “Ringai roh, keimah ki om ngânin chu ki pu khan hi inah hin im â om îte ngaitua mak a, ai nei murdi ki kutah ai sia zit a nit. 9Hi inah hin ki nêka lian ual tute omak e; a nupui ni nit sikin nangma banah chu keima rangin îte ithloi nei viat mak e. Khasika khan ingkan im hi sual ilian tak hi ithon Pathian chungah thil ki thonsual thei rang a?” a ti a. 10Nin tin tin Josefa khah â thlêm mai mai a; khanniseh, ama zâlpui manih, ama zianga om manih kha nuam tlak mak a.
11Nikhomsela, sûnkah chu Josefa khah sin itho rangin insungah a va lût a; insunga khan tute mi dang rêng rêng an omno lâi tak a nit a. 12A puanah khan a lei man a, “Ne zâlpui roh,” a ti a. Nikhomsela, ani khah â tlânpat a, a puan kha chu a kutah khan a mâk rak a. 13Potifara nupui khan â tlânsuak a, a puan a mâk rak iti a riatin chu, 14a ina omhei khah a koi a, an ziangah, “En ta u, mualphoi ne sak rangin Hebrai mi hih, hi insungah hin ki pasalin a hong iṭhui lût a nit hih. Ne zâlpui itumin ki ziangah hin a hong lût a; nikhomsela, iring takkan ke khêk suak a. 15Iring takkan ke khêk iti a riat kaneh a puan khom chôi phâk iloiin a îtlân suak tâk a nit,” a ti a.
16Khanungchu, Josefa pu a hong tlung mâkah chu a puan khah a lei sia ṭian a. 17Khanchu, a ziangah hingka hin a lei isîr a, “Kha Hebrai suak ei zianga ni hong iṭhui khah, mualphoi ne sak itumin ki ziangah a hong lût a. 18Iring takkan ke khêk a, a puan khom chôi man loiin lâizâm ai tho a nit,” a ti a.
19Josefa pu khah a nupuiin a ziangah, “Ni suak hin hingka hin kêng a ne itho,” a ti a, a thu sîr khah a riatin chu a ning a thik tak tak a. 20Khanchu, Josefa khah a ṭhui a, tâng in, rêng mi manhei khumna ngaia khan an khum tâk a; khanchu, tâng inah khan a om mai tâk a. 21Nikhomsela, Pumapa khah Josefa ziangah a om mai a, a chungah lungkhamlianna ân lang a, tâng in vêngtu ditsakna khom ân dong a.#TS.7:9. 22Khanchu, tâng in vêngtu khan lung ina tânghei murdi khah Josefa enkolna nuaiah a sia a; khanchu, tâng ina isin rua om murdi chu Josefa kha â sintu a nit ngai a. 23Pumapa khah Josefa ziangah a om mai a, a sintho tin khah Pumapa khan thluan ân tlung ngai sikin tâng in vêngtu khan Josefa mophurnaa omhei rêng rêng chu enpui khâi mak a.
Valið núna:
RIPHUTNA 39: BIATBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More